Neemia 4:1-23
4 Tawamhã Sãbalati, wa norĩ Zudeu ꞌri nhoꞌõmo ꞌwawi waꞌra ꞌrãihâ apâ wa te wasiwi iꞌmanharĩzé te te waihuꞌu wamhã, ma tô abꞌrui pese. Ma tô duré waꞌãma iwaꞌẽ zaꞌra zém na ãma sãnaꞌrata.
2 Tawamhã tisiré norĩ nhoꞌa, duré samaritanu dasiꞌwapéi ꞌmanharĩꞌwa norĩ nhoꞌre, ma tô tinha ãne:
— E marĩ te bété Zudeu norĩ tarére ꞌre ihâimana zaꞌra mono norĩ hã siwi ꞌmanha. E te za apâ ꞌri nhoꞌõmo ꞌwawi waꞌra hã siwi ꞌmanharĩ pese. E te za duré tinhimizama zata na ꞌRe ihâimana uꞌâsi mono ma, apâ tãma ãma ꞌre sõprub zaꞌra. E te za misi bâtâ na siwi uprosi, romhuri hã. E te za duré ẽtẽ na ꞌrizé hã apâ hâiwaꞌutu zaꞌra, ꞌri ꞌwawi waꞌrazé isiprum hawi, te te ãma siwi ꞌmanharĩ téb da, da te ãma dasiwi sazu zaꞌra nherẽ.
3 Tawamhã Amo na tiꞌai waꞌõtõ nhoꞌõmo nhisi hawimhã, Tobia isababa isa hã te ãne duré tinha:
— E niha te za merẽ ꞌri ꞌwawi waꞌra hã bété siwi ꞌmanha, wapsã wawẽre ãma sarõtõ wa, te te prub da nherẽ, apâ hã!
4 “Wate ꞌRe ihâimana uꞌâsi mono, maꞌãpé waꞌãma iwaꞌẽ zaꞌra zé hã wapari! Tãma ꞌmanharĩ zaꞌra na, waꞌãma iwaꞌẽ zaꞌra zé hã õ norĩ nhisiwip si waptãꞌã da, waꞌupana zaꞌra. Duré maꞌãpé isiptiꞌa zaꞌra hawi da te simroi mono da hã tãma ꞌmanharĩ zaꞌra na, sito pese na ꞌre hâimana zaꞌra mono da, waꞌupana zaꞌra.
5 Tiwasédé te te ꞌre iꞌmanharĩ zaꞌra mono zé hã tãma pari zaꞌra tõ, duré iwasété zaꞌra zém na hã ãma aipoꞌre siꞌâri zaꞌra tõ. E marĩ wa. Ta norĩ hã ꞌri ꞌwawi waꞌra ꞌmanharĩꞌwai ãma te te waꞌãma wasété zaꞌra wa.”
6 Tawamhã ꞌri ꞌwawi waꞌra ꞌrãihâ ꞌmanharĩ pese na hã wa tô ãma uzusi zaꞌra ni. Tahawa, waptu na wa tô ãma wasiwi aipoꞌo ni, iꞌmanharĩ ꞌrãihâ na hã, dato sina da te ãma robꞌmaꞌwamarĩ wa.
7 Tane nherẽ, ma tô Sãbalati, Tobia, Arabia hawi aꞌuwẽ norĩ, Amo na romnhisi ãma ꞌre idahâimana zaꞌra mono norĩ, duré Asidodi na ꞌri nhoꞌõmo nhisi ãma ꞌre idahâimana zaꞌra mono norĩ, ma tô tizahi pese zaꞌra, Zeruzalẽ ãma ꞌri ꞌwawi waꞌra ꞌmanharĩ pese na romhuri hã wa te ãma iꞌuzusi zaꞌra zé te te waihuꞌu zaꞌra wa, duré ꞌri ꞌwawi waꞌra isiprum na dazasizé mono hã wa te wasiwi isito mono zé, te te waihuꞌu zaꞌra wa.
8 Tawamhã ta norĩ hã ma tô siꞌrãꞌõtõ simisutu, wazada waꞌãma sisaze zaꞌra da, Zeruzalẽ te te siwi rési da, duré te te ãma siwi roꞌwaꞌrutu da.
9 Tane nherẽ, wate ꞌRe ihâimana uꞌâsi mono ma, wa tô nasi tãma wamreme zusi ni. Aibâ te te irobꞌmadâꞌâ zaꞌra da hã wa tô duré nasi wasiwi sõré ni, bâtâ na, duré barana daꞌwawi nasi isõpré da hã.
10 Tawamhã Zudaha nhihudu norĩ ma tô ãne tinhoꞌre zaꞌra:“Roꞌwapéiꞌwa norĩ ma tô te ãma ãpusire.Tane nherẽ, zahadu ꞌri sipru zaꞌwari hã saꞌẽtẽ di, te te nasi iꞌwasari da hã.Ã hã ꞌri ꞌwawi waꞌra ꞌrãihâ ꞌmanharĩ pesezé hã e wa te wasiwi iꞌuprosi da bâ bété.”
11 Wanhitobꞌru norĩ, ma tô ãne sima nharĩ zaꞌra: “Te te waꞌupsibi me zaꞌra wana ré, duré titõmo na te te waꞌmadâꞌâ zaꞌra wana ré, ꞌrâwibre wa za iwaꞌwab zaꞌra hã wahâimana zaꞌra ni. Tahawa, wa za wasiwi simro ni za. Wa za duré isimiromhuri hã tiwi uprosi zaꞌra ni za.”
12 Tawamhã Zudeu norĩ hã, wanhitobꞌru norĩ waꞌwa ꞌre ihâimana zaꞌra mono hã ma tô nasi we aiꞌabaꞌréi haré, za wazada ihâimana zaꞌra zém na rosaꞌrada te te sima iꞌmanharĩ zaꞌra na te te wapoꞌre puꞌu zaꞌra da hã.
13 Tahawa wa hã wa tô isiꞌuwazi ꞌrãꞌwa norĩ hã, sibꞌézé ꞌwa pa norĩ hã, umnhiꞌãsi norĩ hã, duré tiꞌi norĩ hã te dama anhomri. Taha pari wa tô duré ꞌri ꞌwawi waꞌra ꞌrãihâ zahâpâmhã dasisãnawã aꞌuwẽ upsãtã mono bâ te anhoré, zahadu ꞌmanharĩ pese ãna ꞌri ꞌwawi waꞌra ꞌridawa haré ihâimana zaꞌra mono bâ.
14 Tawamhã idahâtâꞌâ zaꞌra na hã wa tô daꞌaꞌmadâ. Tahawa wa tô dama ipire norĩ ma, duré dama rotiꞌwa norĩ ma nharĩ zaꞌra ãne:
— Maꞌãpé wanhitobꞌru norĩ ma hã aipahi zaꞌra waꞌaba tõ. Ãma aipoꞌre puꞌu zaꞌra waꞌaba, Uburé Danhibꞌapito iwaihuꞌu pese ãma, dapahi te te dama ꞌre iꞌazani uꞌâsi mono ãma. Ãhã wa, te za asisãnawã norĩ na, aiꞌra norĩ na, aimro norĩ na duré asõrõwa aba norĩ na iꞌwapé zaꞌra waꞌwa, wanhitobꞌru norĩ hã.
15 Tawamhã wanhitobꞌru norĩ ma tô waihuꞌu zaꞌra, isimirosaꞌrada wa te tiwi iꞌupsibi me zaꞌra zé hã. Ma tô duré waihuꞌu zaꞌra, ꞌRe ihâimana uꞌâsi mono niha na te te sima irowaꞌõtõ zaꞌra zé te te tiwi iꞌwaꞌrutu zaꞌra na hã. Tahawa, wa tô wa norĩ hã apâ ꞌri ꞌwawi waꞌra ꞌrãihâ ꞌmanharĩ pese na romhuri hã wasiwi âri ni.
16 Tawamhã ta hawim haré aibâ norĩ aiwa sima isipo hã ma tô ꞌri ꞌwawi waꞌra na nasi romhuri pese zaꞌra. Taha ré, ma tô duré aiwa sima isipoꞌo hâiba amo norĩ hã isiꞌuwazi ꞌrãꞌwa ré, duré ibaihâ ꞌmanharĩ na dasiꞌwawi dasimapazéb ré, umnhiꞌãsi ré, duré dahâiba ubuzé itete ré hã nasi robꞌmadâꞌâ zaꞌra. Tawamhã dama ipire norĩ hã ma tô tinhiptede hã tãma ꞌmanharĩ zaꞌra,
17 ꞌri ꞌwawi waꞌra apâ te te siwi iꞌmanharĩ zaꞌra norĩ ma. Duré ꞌrizé ꞌmanharĩ ꞌwapéiꞌwa norĩ hã te nasi tinhibꞌrata amo niwĩ romhuri hã ãma ꞌmanharĩ zaꞌra. Taha ré, te duré nasi tinhibꞌrata amo niwĩmhã tinhimnhiꞌã te te tété zaꞌra.
18 Tawamhã romhuriꞌwai mono bâ ma tô tiꞌusisi na sibꞌézé ꞌwa pa ré hã nasi romhuri zaꞌra. Te duré aibâ hã nasi ĩꞌrata misi ꞌmaihaimasisi ꞌwamnhasite, marĩ watobro wa, danhimnhihârâzé te te ihârâ da hã.
19 Tawamhã wa hã, aꞌuwẽ norĩ ma, dama rotiꞌwa norĩ ma, duré dama ipire norĩ ma, wa tô tãma nharĩ zaꞌra ãne:
— Romhuri hã te romhâ na wama hâimana zaꞌra. Tahawa wa wasisiti ꞌri ꞌwawi waꞌra nhoré na hã wasimasa mono.
20 Tawamhã danhimnhihârâzém hârâ hã wapari zaꞌra waꞌaba wamhã, te za we watẽme ato aba mo, ãwa. Tawamhã wate ꞌRe ihâimana uꞌâsi mono te za waꞌãma aiꞌwapé zaꞌra.
21 Tawamhã ãne wa tô bâdâ pusi nhidâpâsi mararé hawim haré, mara na wasi norĩ ꞌre isihâiꞌré zaꞌra mono zéb u, aiwa wasima iwasipoꞌo norĩ hã ꞌri ꞌwawi waꞌra ꞌrãihâ ꞌmanharĩ pese na hã wa te romhuri zaꞌra, isiꞌuwazi ꞌrãꞌwa ré, robꞌmadâꞌâꞌwa ihâimana zaꞌra norĩ me.
22 Tahawa, wa tô dama tinha ãne: “Aihâiba mono bâ waꞌaba aipawapto waꞌaba ꞌwa norĩ me te za barana Zeruzalẽ ãma nasi asimroi waꞌwa za, barana robꞌmadâꞌâꞌwa na nasi aihâimana zaꞌra waꞌaba da, duré bâtâ na romhuri na nasi robꞌmaꞌwamarĩ aba da.”
23 Tawamhã wa hã, ĩsisãnawã norĩ, aibâ ĩma iꞌumnhasi norĩ, duré ĩsiré robꞌmadâꞌâꞌwa norĩ me waꞌuza zaꞌra wa te nasi sani zaꞌra õ di, wanhotõ zaꞌra da hã. Wahâiba mono bâ wa tô duré wanhibꞌratam haré wanhimnhiꞌãsi ré, wahâimana uꞌâsi zaꞌra.
