Neemia 5:1-19
5 Tawamhã suru na we iromhâimana mono zém na ronomro pari, ma tô daꞌahâ na aibâ norĩ hã duré piꞌõ norĩ hã tisiré Zudeu norĩ ma tisiwapsari na hã ãma sãnaꞌrata zaꞌra.
2 Tawamhã niꞌwam norĩ hã te ãne nharĩ zaꞌra:
— ꞌRi ꞌre, waꞌra siꞌaibâ norĩ hã duré waꞌra sipiꞌõ norĩ hã ahâ uptabi mono di. Tahawa amnho trigu wasa zaꞌra zéb da hã te wawi sô tirobaba zaꞌra, wahâiba ré wahâimanazém na wa te ãma iꞌuzusi zaꞌra da hã.
3 Te duré tawamhã isiré ihâiba amo norĩ hã ãne nharĩ zaꞌra:
— Mrap te wasiꞌutõrĩ tõ da hã, wa tô waburu mono na hã duré uva ꞌru wa te ꞌre izuri mono na hã duré wanhorõwa mono na hã ropisutu na robꞌuiprazé hã dawi ꞌmaꞌâri zaꞌra ni, amnho trigu wa te ãma iꞌuipra zaꞌra da hã.
4 Tawamhã te duré isiré ihâiba amo norĩ hã nharĩ zaꞌra ãne:
— Waburu waꞌâbâ arĩ mono hã duré uva ꞌru wa te ꞌre izuri mono waꞌâbâ arĩ mono hã, apito ma, wa te waꞌâbâ zaꞌra da hã, wa tô aꞌâ robꞌuiprazé hã taré dawi ꞌmaiꞌâri zaꞌra ni, ropisutu na.
5 Tô õ norĩ, wasiré Zudeu norĩ hã wasiwaprui mono. Duré waꞌra mono hã aiwa tô iꞌra norĩ sine hã iwẽ. Tane nherẽ, wa za tô oto waꞌra norĩ hã pawaꞌâbâ ãna te te dama ꞌre romhuri zaꞌra mono da hã hâiba nhomri zaꞌra ni. Niꞌwam norĩ waꞌra sipiꞌõ hã wa tô umro na pawaꞌâbâ ãna te te dama ꞌre iromhuri zaꞌra mono da hã, dama wede zaꞌra ni. Ãne wi hã tô wasitété waihuꞌu zaꞌra õ di, wa te ꞌmanharĩ zaꞌra tõ da hã. E marĩ wa. Waburu hã duré wate uva ꞌru hã da te wawi waibu zaꞌra pari wa.
6 Tawamhã wa hã Neemia, dasiwapsari te wapari wa, ma tô sina ĩnhitiꞌru waze.
7 Tahawa, wa tô marĩ te iꞌmanharĩ da hã ĩsima rowairébé. Tawamhã dama ipire norĩ ma, duré dama rotiꞌwa norĩ ma, wa ĩmreme na hã tãma priꞌi zaꞌra ãne:
— Asisãnawã norĩ waꞌaba wi, ma tô robꞌuiprazé ropisutu na te te aiwi ꞌre iwaibui waꞌaba mono zém na ãma tiwi ꞌre isisiwi zaꞌra waꞌaba mo, isipai u te te aima ꞌre waꞌâbâ zaꞌra waꞌaba mono da hã!
Tawamhã ãne na te rosaꞌrata pari, wa tô uburé ĩsima daꞌubumro, marĩ ipire na niha na, wa te wasima rowairébé zaꞌra da.
8 Tawamhã wa tô duré ãne tãma nharĩ zaꞌra:
— Wa norĩ hã wanhimarĩ wama ꞌre ihâimana zaꞌra mono zarina, wa tô wasiré aꞌuwẽ Zudeu norĩ, wasiré aꞌuwẽꞌõ norĩ wi hã apâ wa te ꞌre uipra zaꞌra, aré ꞌrâwi dama ꞌre isiwede zaꞌra mono norĩ hã. Ãne nherẽ, te duré oto ãhã na awaꞌawi na a norĩ waꞌwa hã asiré aꞌuwẽ norĩ zada, asiptede hã sada ꞌre iꞌmanharĩ zaꞌra waꞌaba mo, ꞌrâwi aima ꞌre siwede zaꞌra waꞌaba mono da hã!
Tawamhã dama ipire norĩ hã ma tô ariꞌiwi pese tihâimana zaꞌra, te te ãma ĩzadaꞌâbâ zaꞌra ãna, niha na.
9 Tawamhã wa duré tãma nharĩ zaꞌra ãne:
— Marĩ a norĩ waꞌwa ꞌre iꞌmanharĩ zaꞌra waꞌaba mono hã, iꞌuwaibaba õ di! ꞌRe ihâimana uꞌâsi mono si ꞌre iwazéb zaꞌra waꞌaba mono zéb da si iꞌruzahi. Duré iꞌuwaibaba na si uburé marĩ ꞌre iꞌmanharĩ zaꞌra waꞌaba mono da si iꞌruzahi hã, wasiré zudeuꞌõ wanhitobꞌru norĩ, waꞌãma ꞌre waꞌẽ zaꞌra mono tõ da.
10 Tawamhã wa hã ĩsiré norĩ me hã, duré aibâ norĩ te te ĩma ꞌre iromhuri zaꞌra mono norĩ me, wa tô robꞌuiprazé hã duré trigu hã ropisutu na da te wawi iwaptẽrẽ zaꞌra hã taré dama sõmri zaꞌra ni. Tane nherẽ, wa za tô oto tãma sisisi zaꞌra ni, õne haré tãma hâimana zaꞌra da.
11 Tahawa, maꞌãpé a norĩ waꞌaba zama õ norĩ ma, sisisi zaꞌra waꞌaba, taré ropisutu na robꞌuiprazé, niha wamhã duré uva ꞌrãi waꞌu isé hã, niha wamhã, duré azeitona waꞌu to hã, te te aiwi ꞌre iwaibui waꞌaba mono hã. Ãhã na awaꞌawi na te za tô iburu mono hã ite zaꞌra uva ꞌru hã, olivera wede hã te te ꞌre izuri mono hã, duré isõrõwa mono hã apâ tãma ĩsõmri zaꞌra waꞌwa!
12 Tawamhã dama ipire norĩ, ma te ãne asa ãma ĩzadaꞌâbâ zaꞌra:
— Wẽ di tô. Ãma wama inharĩ zaꞌra zéb zarina, wa za tô wasiwi ꞌmanharĩ ni. Danhimarĩ mono hã wa za tô apâ wa te dama sõmri zaꞌra, itedeꞌwa norĩ ma hã. Duré robꞌuiprazém na da te wama ropisutu zaꞌra nherẽ, zahadu da te wama iwaꞌâbâ zaꞌra õ na, wa te ãma idawati zahu zaꞌra da hã mare di za.
Tawamhã sasedoti norĩ zô, wa tô ĩhârâ zaꞌra. Tahawa, wa tô dama ipire norĩ ma, ꞌmanharĩ zaꞌra, tinhimiropisutuzé te te ãma ĩma iꞌuwaimrami zaꞌra mono na sena na te te ĩma sina ropisutu zaꞌra da hã.
13 Tawamhã ĩsiꞌawasisizé isinhai ré hã wa tô waze. Te wazere wamhã, wa tô oto sãsãꞌã. Tahawa, wa tô tãma nharĩ zaꞌra ãne:
— Ãne te za ꞌRe ihâimana uꞌâsi mono hã aiꞌmasãsãꞌã ꞌwa, asimiropisutuzé tãma ãma ꞌmaiꞌuwaimrami aba õ wamhã. Tawamhã te za asõrõwa waꞌwa hã aiwi ꞌmaiwazere ꞌwa. Te za duré uburé asimarĩ waꞌwa hã aiwi ꞌmazani waꞌwa, asimarĩ õ uptabi na oto ꞌre aiꞌmaihâimana aba mono da.
Tawamhã uburé õme idahâimana zaꞌra hã te ãne nharĩ zaꞌra:
— Tane tô! Tane romhâimana da hã iwẽ!
Tawamhã Uburé Danhibꞌapito ãma te tiwata zaꞌra. Tawamhã tinhimiropisudu te te iꞌmanharĩ zaꞌra zém na hã ma tô oto duré ãma uwaimrami zaꞌra.
Neemia, sena na ꞌre ihâimana mono na isiwasuꞌuzé wasuꞌu
14 Tawamhã Zuda tiꞌai ãma Artazesi ãma 20 na danhibꞌapito na ãma iwahubzém hawi, 32 na ãma iwahubzéb u hã, 12 wahub ꞌre ĩsiꞌiꞌrãnhoꞌõmo na ꞌre ĩza mono ré, wa hã, ĩsiwapru norĩ me hã dama iꞌrãnhoꞌõmo norĩ sazém na hã, wa te ꞌre ꞌmaiꞌrẽne zaꞌra mono õ di.
15 Ĩwana dama iꞌrãnhoꞌõmo norĩ, ma tô ropire hã te te dama ꞌre sõmri zaꞌra. Ma tô duré bâtâ sidâpâsi mreme tete na te te dawi ꞌre waibu, ẽtẽ waipo prã prata na iwaꞌõtõ waré, 480 grama na ipire pibuzém na da te tãma ãma ꞌre waꞌâbâ zaꞌra mono da, dasa norĩ uiprazéb da hã duré uva ꞌrãi waꞌu isé uiprazéb da. Tãma romhuriꞌwa norĩ zama ma tô duré te te ꞌre dawati zaꞌra. Tane nherẽ, wa hã wa tô romhâimanazé aimawi na tãma ãma romhâimana zaꞌra, ꞌRe ihâimana uꞌâsi mono hã, te ꞌre wazé pese mono wa.
16 Wa hã wa tô duré aimawi ĩsima romhâimana, ꞌri ꞌwawi waꞌra ꞌmanharĩzé pese na si. Taha na si wa tô te ꞌre romhuri pese. Te duré ꞌmaiꞌuipra õ di, roptedeꞌwa norĩ wi tiꞌai waꞌõno hã. Ma tô duré uburé ĩma romhuriꞌwa norĩ hã te te siwi ꞌre ĩpawapto pese, ꞌri ꞌwawi waꞌra na hã.
17 Wa tô duré Zudeu 150 na ihâiba norĩ zô hâ, isibꞌapito norĩ zô zama, duré aꞌuwẽ aimawi wawaptoma ꞌre ihâimana zaꞌra mono norĩ ĩtẽme ꞌre inomro uꞌâsi mono zô zama, nasi ĩhârâ zaꞌra, ĩnhorõwa ꞌre nasi saihuri da hã.
18 Tawamhã bâtâ sidâpâsi wa tô misi powawẽ hã, 6 na poneꞌẽrebâ iwẽ norĩ hã duré siꞌa norĩ hã dasazéb da, te dama ꞌre aꞌru. Tawamhã 10 na bâdâ iwa waptãꞌã mono sidâpâsi, wa tô duré uva ꞌrãi waꞌu isé itéb ré iwahuré hã da te we ĩma ꞌre sõmri mono da hã, te ꞌre ꞌru. Ãne hã te ꞌre ꞌmanharĩ mono nherẽ, romhuri pire na da te ꞌre iromhuri zaꞌra mono zém na ĩma waihuꞌu pese wa, dama iꞌrãnhoꞌõmo norĩ sazé hã te ꞌre ꞌmaiwaptẽrẽ mono õ di.
19 “Ĩte ꞌRe ihâimana uꞌâsi mono, maꞌãpé ĩꞌãma aipoꞌre puꞌu, uburé ã hã aꞌuwẽ norĩ ma, marĩ te ꞌre iꞌmanharĩzé mono na hã.”
