Neemia 6:1-19
6 Tawamhã Sãbalati norĩ, Tobiaha me, Gesẽhẽ me, duré wanhitobꞌru ihâiba amo norĩ me ma tô ꞌri ꞌwawi waꞌra ꞌmanharĩ pese zé wa te oto wasiwi iꞌuprosizé hã siwi waihuꞌu, duré isipru mono zém na ꞌridawa mono hã oto ihâimana õ zé hã. Tane nherẽ, zahadu ꞌridawa zaꞌẽtẽ mono hã wa te ãma sasõmri zaꞌra mono õ di.
2 Tawamhã ma tô Sãbalati norĩ, Gesẽhẽ me, romreme hã we ĩma me zahuré, ãne: “Maꞌãpé we aimorĩ, ẽtẽ siwaꞌaba wa romharé Ono na isisi ãma, nimahã ꞌri waꞌõtõ ãma wasisõpẽtẽ zaꞌra da.”
Tane nherẽ, ma tô õ norĩ hã ꞌrã nhipese na ĩzada rosaꞌrata zahuré, ĩma isimizaꞌre pese zahuré zéb da.
3 Tawamhã wa tô ãne ré romreme ꞌwapéiꞌwa norĩ hã, itẽmeb zahuré hã ꞌmazatõrĩ zaꞌra:
— Romhuri ipire hã wa ꞌmanha. Tahawa tamomomhã te ãma atẽme waꞌaba siꞌrai waihuꞌu õ di. E marĩ da, wa za bété ĩnhimiromhuri hã sazâ, aꞌâ ãma atẽme ĩmorĩ aba da, te asõpẽtẽ aba da hã.
4 Tawamhã romreme hã maparane siꞌuiwa na te te nasi ĩma wabzuri zahuré wamhã, wa tô duré tô õhõ na si nasi ãma sadaꞌâbâ zahuré.
5 Tawamhã Sãbalati, romreme na 5 na we te te ĩma imezéb ãmamhã ma tô tãma iromhuriꞌwa hã we ĩtẽmemhã iré ꞌmazatõ, isibꞌratamhã romnhihâdâ hã sitob ãna haré.
6 Ãne imreme na robꞌuiꞌéré hã:
“Gesẽ hã ma tô ĩma aiwasuꞌu, aiwaptoma aꞌuwẽ norĩ ꞌremhã te te aiꞌãma sima irobâsi zaꞌra zém na hã ãne: A hã Zudeu norĩ me, te u, dama ipire norĩ zada aihâimana zaꞌra waꞌaba da, rosaꞌrada hã asima iꞌmanharĩ zaꞌra waꞌwa. Duré tahawa te u, apâ ꞌri ꞌwawi waꞌra hã asiwi iꞌmanharĩ pese ꞌwa. Te duré u, asima irosaꞌra, dama iꞌasiꞌapito da hã.
7 Ma tô duré u, niꞌwam norĩ ꞌRe ihâimana uꞌâsi mono zadawa ꞌmahârâꞌwa hã ipisutu zaꞌra, Zuda tiꞌai ãma iꞌasiꞌapitozém na te te siwi dama aiwasuꞌu da hã Zeruzalẽ ãma. Tawamhã ãne na aiwasuꞌu hã te za tô apito Artazesi u wi. Tahawa wa norĩ si iwasisõpẽtẽ da hã wa ãma aipẽꞌẽ pibu, wa te wasima robzanhamri da, ãne mono na.”
8 Tawamhã asa te ãma isadaꞌâbâzé wa tô ãne tãma tisõ:
— Uburé we ĩma iwaihuꞌuzé mono hã uburé senaiꞌõ si. Asiꞌrãi hawip si ma tô taré uburé we ãne na hã ĩma iwaihu.
9 Õ norĩ hã ma tô aré wapahi te te wama sõmri zaꞌra da hã wapibu zaꞌra, romhuri na wa te ãma ꞌrãiwaꞌõmo zaꞌra tõ da.
Tane nherẽ, wa tô ãne na ꞌRe ihâimana uꞌâsi mono ma mre:
“ꞌRe ihâimana uꞌâsi mono, maꞌãpé ãhã na ĩnhiptetezé hã saꞌẽtẽ na ĩma sõmri!”
10 Tawamhã taha mono na Semaia, Delaiaha ꞌra, Meꞌetabehe nhihudu wi hã, ma tô tinhorõwa hawi watobro da hã tiwi sawi ni. Tahawa te sabu da, wa tô itẽmemhã mo. Itẽme ĩmorĩ wamhã, ma tô ãne ĩma tinha:
— ꞌRe ihâimana uꞌâsi mono nhorõwa ãma ꞌriꞌre waꞌwa iwazéb zahi ꞌre, aré wasimaꞌuri. Tawamhã wa za wasiré hã tété ni, õ norĩ hã za we siꞌabaꞌréi wa, te te siwi aiwĩrĩ da hã. Siwaꞌru mara na te te siwi aiwĩrĩ da, te za tô õ norĩ hã we asô aiꞌabaꞌré.
11 Tawamhã wa tô ãma tãma waꞌrã ãne:
— E marĩ zarina bâ, wa za dawi aimani. Duré ꞌRe ihâimana uꞌâsi mono nhorõwa ꞌri ãma ĩsimaꞌuri wa, ĩsisõꞌreptu da hã, e tô isarina. Ãne hã te iꞌmanharĩ da hã mare uptabi di.
12 Tawamhã wa tô upsibi me, Semaia, ꞌRe ihâimana uꞌâsi mono we te te ĩtẽme isatõrĩ õ na hã. Duré Tobia norĩ, Sãbalatihi me, ꞌRe ihâimana uꞌâsi mono zadawa wasuꞌu zarina newa, te te ĩma waihuꞌu da, wa tô duré upsibi me, õhõ ma, te te tãma iwaꞌâbâ zahuré zém na hã.
13 Ta norĩ hã ma tô robꞌuiprazé tãma sõmri zahuré, te te ãma ĩpahi wazere da hã aré, taha zarina ĩwasédé te iꞌmanharĩ da hã. Ãne ꞌwaꞌâhã, te aré ĩnhisi wẽ hã ĩwi uprosi zahuré. Te aré duré ãma ĩnhisém hiri zahuré.
14 “Ĩte ꞌRe ihâimana uꞌâsi mono, maꞌãpé Tobia norĩ ãma, Sãbalatihi me ãma aipoꞌre puꞌu zahuré na, te te ĩma irobꞌmanharĩ zahuré zém na hã niha na ahâri zahuré da. Asadawa ꞌmahârâꞌwa sipiꞌõ Noadiaha ãma, duré aimawi ihâiba amo asadawa ꞌmahârâꞌwa norĩ te te aré siwi ĩpahi da, te te siwi ĩpibu norĩ ãma, maꞌãpé ta norĩ ãma zama duré aipoꞌre puꞌu zaꞌra na.”
ꞌRi ꞌwawi waꞌra ꞌmanharĩ pese zé isiꞌutõrĩzé wasuꞌu
15 Tawamhã apâ ꞌri ꞌwawi waꞌra ꞌmanharĩ pese zé hã ma tô aiꞌutõ bâdâ 25 na, elul na aꞌamo nhisi ãma, bâdâ hã 52 na waꞌãma morĩ zaꞌra pari.
16 Tawamhã uburé wanhitobꞌru norĩ ãne hã te te waihuꞌu zaꞌra wamhã, ma tô uburé wawaptoma ꞌre ihâimana zaꞌra mono norĩ hã tipẽꞌẽwara pese zaꞌra. Ma tô duré siwazé pese zaꞌra, romhuri isiꞌutõrĩzé ꞌRe ihâimana uꞌâsi mono nhimipawaptobzém hawimhã te te waihuꞌu zaꞌra wa.
17 Tawamhã taha ré, ma tô Zuda ãma dama ipire norĩ hã nasi Tobiaha ma robꞌuiꞌéré hã ahâ na tãma sãmra zaꞌra. Taha sidâpâsi te te ãma isadaꞌâbâ zaꞌra zém na hã te duré nasi asa tãma ãma siri zaꞌra, Tobia hã.
18 Zuda tiꞌai ãma te daꞌahâ uptabi na Tobiaha niwĩmhã ꞌre hâimana zaꞌra, Zudeu Araha ꞌra, Secaniasi na isisi isaꞌõmo na ꞌre hâimana mono wa, duré iꞌra Zoãna na isisi Berequiaha ꞌra, Mesulãhã ꞌra sipiꞌõ na mro wa.
19 Ta norĩ hã ma tô duré ĩꞌubu nhoꞌa hã Tobia marĩ iwẽ te te ꞌre iꞌabꞌmanharĩ mono zé hã dama wasuꞌu zaꞌra. Ma tô duré uburé te ꞌre inharĩ mono zéb zama õhõ ma, tãma wasuꞌu zaꞌra. Tawamhã Tobia, ĩma robꞌuiꞌéré nhomri na hã ma tô te ãma uzusi, te te ãma ĩpahi wazere pese da.
