Neemia 8:1-18
8 Tawamhã Izaraéu nhihudu norĩ, oto 7 na aꞌamo siꞌutõrĩ pari, te oto tite zaꞌra ꞌri nhoꞌõmo ꞌremhã ꞌre siꞌubumro. Tawamhã aꞌamoi ꞌre bâdâ isãnaꞌrata hawi ma tô uburé Zeruzalẽ ãma tasiꞌrãꞌõtõ ni, ꞌre idasisõpẽtẽ pese zaꞌra mono zéb ãma, Â na ꞌridawa zaꞌẽtẽ nhisim nhoꞌre. Tawamhã Esdra hã rowaihuꞌu pese ꞌwa, duré Uburé Danhibꞌapito, Izaraéu nhihudu norĩ te ꞌRe ihâimana uꞌâsi mono, Mozésihi ma, tinhimiroti na robꞌuiꞌéré hã te te tãma isõmri waihuꞌu wẽ ꞌwai uptabi wi, ma tô tiwi waptẽrẽ zaꞌra ni, ꞌRe ihâimana uꞌâsi mono nhimiroti na robꞌuiꞌéré itepãiwasi hã te te dama âri da.
2 Tawamhã Esdra, ꞌRe ihâimana uꞌâsi mono nhimiroti na robꞌuiꞌéré ré hã ma tô tiꞌâ, aibâ norĩ, piꞌõ norĩ, duré aiꞌuté norĩ robꞌuiꞌéré te te isadaihuꞌu zaꞌra da zama isiꞌrãꞌõtõzéb u.
3 Tawamhã tame ꞌre idasisõpẽtẽ pese zaꞌra mono zéb ãma ꞌridawa zaꞌẽtẽ nhoꞌre, ma tô Esdra bâdâ iꞌrãi watobrozém hawi, abzuma waꞌwa u hã, Uburé Danhibꞌapito nhimiroti na robꞌuiꞌéré hã dama sõré. Tahawa, uburé ariꞌiwi pese ma tô wapari zaꞌra ni, te te isõrézé hã.
4 Tawamhã Esdra te hâiwi wede ꞌmanharĩ nhisiwi za. Tahawa, te isimire niwĩ, aibâ norĩ hã aimasa, ãne isisi zaꞌra hã: Matitia, Sema, Anaia, Urias, Hilquia duré Maaséia.
Duré isimiꞌe niwĩ, aibâ norĩ hâiwi isimasam norĩ nhisi hã ãne: Pedaia, Mizaéu, Malquia, Hasu, Hasbadana, Zacaria duré Mesulã.
5 Tawamhã Esdra, tame wede ꞌmanharĩ na danhisi hâimo sa wamhã, ma tô uburé dasiwi ꞌmadâꞌâ ni. Tawamhã ibaihâ te te oto sõꞌa wamhã, ma tô uburé pese aihĩni tawahutu zaꞌra ni, hâiwi dasimasab da, dapara na.
6 Tawamhã te Esdra hã ãne dama tinha:
— Maꞌãpé Uburé Danhibꞌapito, ꞌRe ihâimana uꞌâsi mono iwaihuꞌu pese uptabi ãma aiwata zaꞌra waꞌaba!
Tawamhã uburé hâimo danhibꞌrada da te wẽ zaꞌra sina, ma tô ãma sadaꞌâbâ zaꞌra ni ãne:
— Tane tô! Tane tô!
Tawamhã dahiꞌrãtitõ dasiꞌubumro sina, duré tiꞌai u daꞌubu na da te roptob zaꞌra sina, ma tô ꞌRe ihâimana uꞌâsi mono Uburé Danhibꞌapito ãma hã tawata zaꞌra ni.
7 Tawamhã apâ dawahutu zaꞌra wamhã, ma tô dasimasabzé mono bâ apâ dasimasa. Tawamhã levita norĩ ma tô ꞌRe ihâimana uꞌâsi mono nhimiroti na robꞌuiꞌéré na hã ãma dama saprĩ zaꞌra. Ãne isisi norĩ hã: Zesua, Bani, Serebia, Zami, Acube, Sabetaꞌi, Hodia, Maaséia, Quelita, Azaria, Zozabade, Hana duré Pelaia.
8 Tawamhã ta norĩ, ꞌRe ihâimana uꞌâsi mono nhimiroti na robꞌuiꞌéré te te dama siwi isõré hã ma tô ãma dama saprĩ zaꞌra. Ma tô duré nasi ãma dama rowasuꞌu zaꞌra, romnhihâdâ da te sadaihuꞌu wẽ zaꞌra da, te te siwi isõré hã.
9 Tawamhã ꞌRe ihâimana uꞌâsi mono nhimiroti na robꞌuiꞌéré, da te wapari zaꞌra wamhã, ma tô taꞌruꞌru ni. Tawamhã Neemia dama iꞌrãnhoꞌu hã, Esdra, ꞌRe ihâimana uꞌâsi mono nhimiroti waihuꞌu wẽ ꞌwa uptabi hã, duré levita norĩ hã, robꞌuiꞌéré na te te ãma dama saprĩ zaꞌra da, ihâimana zaꞌra norĩ hã ma tô dama nharĩ zaꞌra ãne:
— Ã hã bâdâ iwazéb zahi, te tihâiba, Uburé Danhibꞌapito, wate ꞌRe ihâimana uꞌâsi mono ma. Tahawa a norĩ waꞌaba wi aiwi irobzeiꞌõ zaꞌra waꞌaba da hã mare di za. Duré nasi iꞌaiꞌruꞌru waꞌaba da hã mare di za.
10 Maꞌãpé oto aiwairébé aba, ꞌri tẽme aiꞌabaꞌréi aba da, rowẽ te, dato isaꞌẽne hã asiwi ꞌmanharĩ aba da. Tawamhã te za dasa norĩ hã, duré uva ꞌrãi waꞌu isé hã, niꞌwam norĩ wi, tiwi sô irobaba zaꞌra norĩ ma, isõmri zaꞌra waꞌaba mo. Ã hã bâdâ, te tô iwazéb zahi hã tãma tihâiba, Uburé Danhibꞌapito ma. Tahawa duré aiwi robzeiꞌõ zaꞌra waꞌaba tõ. E marĩ wa. Rowẽ isaꞌẽne hã Uburé Danhibꞌapito te te aima isõmri zaꞌra waꞌaba si te za asiptete zaꞌra waꞌwa.
11 Tawamhã levita norĩ hã, ma tô atãma na dahâimanazé hiri zaꞌra. Ãne te tahawa, dama nharĩ zaꞌra:
— Ma. Atãma aihâimana zaꞌra waꞌaba, ã hã bâdâ iwazéb zahi, hâimana wa. Duré aiwi robzeiꞌõ zaꞌra waꞌaba tõ!
12 Tawamhã aihĩni danhorõwa u oto dasiꞌabaꞌréi wamhã, ma tô dasa hã huri ni. Ma tô duré dato sina nasi âhuri ni, dasa nhimihârizé hã. Tahawa, ma tô duré niꞌwam norĩ wi, dasa norĩ zô tiwi sô irobaba zaꞌra norĩ ma hã da te sõmri. Ãne ma tô ꞌmanharĩ zaꞌra ni, robꞌuiꞌéré, da te dama isõré zaꞌra, da te sadaihuꞌu zaꞌra wa.
Romhâ ꞌmanharĩ ꞌri na dasima romhuꞌu nhisi wasuꞌu
13 Tawamhã aꞌamo nhanaꞌrata hawi maparane bâtâ ãma, uburé aꞌuwẽ waꞌõtõ ma ipire norĩ hã, sasedoti norĩ hã, duré levita norĩ hã ma tô Esdra ihâimanazéb u hã aiꞌabaꞌré, ꞌRe ihâimana uꞌâsi mono nhimiroti na robꞌuiꞌéré na taha siré te te ãma romnhoré zaꞌra da.
14 Tawamhã 7 aꞌamo ãma Romhâ ꞌmanharĩ ꞌri na dasima romhuꞌu nhisi wa, aꞌâ romhâ ꞌmanharĩ ꞌri ꞌre, ꞌre ihâimana zaꞌra mono zéb da hã, Uburé Danhibꞌapito, Mozésihi nhoꞌõmoi baba Izaraéu nhihudu norĩ ma, te te iꞌruzém na ãma irobꞌuiꞌéré hã ma tô siwi tisã, tô taha na te te ãma iromnhoré zaꞌra na.
15 Tahawa uburé ꞌrinhoꞌu Zeruzalẽ ãma ꞌre ihâimana zaꞌra mono norĩ ma, uburé ꞌrinhoꞌu ihâiba amoi ꞌre, ꞌre ihâimana zaꞌra mono norĩ ma, duré uburé ꞌri waꞌõtõ ꞌre, ꞌre ihâimana zaꞌra mono norĩ ma, dapoꞌre puꞌuzé da te ãma tãma ropéi mono da, ma tô ta norĩ hã ãne na dama ꞌru zaꞌra:
— Maꞌãpé ẽtẽ u aiwairébé aba, pinheiro wede panhipti hã, olivera wede panhipti hã, murta wede panhipti hã, norõwede su ne panhipti hã, duré aimawi wede panhipti mono hã, we ꞌwasari aba da, romhâ ꞌmanharĩ na ꞌri hã ãma asiwi ꞌmanharĩ aba da, ꞌRe ihâimana uꞌâsi mono nhimiroti na ãma irobꞌuiꞌéré zarina.
16 Tawamhã uburé dawairébé wamhã, ma tô wede panhipti hã dasiwi ꞌwasari ni. Taha pari ma tô õne haré romhâ ꞌmanharĩ na ꞌri hã dasiwi ãma ꞌmanharĩ zaꞌra ni, danhorõwa ꞌri nhisi hâpâ mono bâ, ꞌRe ihâimana uꞌâsi mono nhorõwa ꞌri zahâpâ ãma, Â na ꞌridawa zaꞌẽtẽ nhisi nhoꞌre, ꞌre idasisõpẽtẽ pese zaꞌra mono zéb ãma, duré Efraĩ na ꞌri zaꞌẽtẽ nhisi nhoꞌre, ꞌre idasisõpẽtẽ pese zaꞌra mono zéb ãma zama.
17 Uburé Babilonia ãma danhito pese na ꞌre idasiꞌubumroi mono hawi, apâ we idasiꞌabaꞌré norĩ hã ma tô romhâ ꞌmanharĩ na ꞌri hã da te dasima ꞌri, aꞌâ niha bâtâ na iwa ꞌre dasiꞌubumroi mono da. Nuhu ꞌra, Zozué ꞌre ihâimana mono zém hawim haré, ãhã bâtâ u hã ãne na da te dasima romhuꞌu zaꞌra õ di. Tahawa, te uburé dasima rowẽ pese zaꞌra ni.
18 Tawamhã Esdra, dasima romhu ihâimana naꞌrata zém hawi, iꞌrãsutuzéb u te bâtâ sidâpâsi ꞌRe ihâimana uꞌâsi mono nhimiroti na robꞌuiꞌéré hã nasi dama sõré. Tawamhã 7 bâtâ ꞌre ma tô dasima romhu hã ꞌmanharĩ zaꞌra ni. Duré 8 bâtâ ãma hã ãma irobꞌuiꞌéré zarina ma tô dasiꞌrãꞌõno ipire hã dasiwi ꞌmanharĩ ni, da te dasiwi iꞌrãsutuzéb na, bâtâ pisutu zahi ihâimana ãma.
