Neemia 9:1-38
9 Tawamhã aꞌamo 24 bâtâ ãma ma tô Izaraéu nhihudu norĩ hã siꞌrãꞌõtõ, sai ãna aꞌâ hâimana zaꞌra da. Tahawa, ma tô duré saꞌu ihâiro na siꞌuza zaꞌra. Ma tô duré tiꞌa na hã siꞌrã zazub zaꞌra.
2 Izaraéu nhihudu norĩ na ꞌre ihâimana zaꞌra mono norĩ hã ma tô uburé tisiré aꞌuwẽꞌõ norĩ nhiti sisani zaꞌra. Tawamhã tite mono bâ tisiꞌubumrozém hawi para na oto hâiwi simasa wamhã, ma tô tiwasété na hã duré tihiꞌrata norĩ wasété na hã siwẽꞌõ zaꞌra.
3 Tawamhã hâiwi simasam haré ma tô duré Uburé Danhibꞌapito, ite zaꞌra ꞌRe ihâimana uꞌâsi mono nhimiroti na robꞌuiꞌéré hã sõré zaꞌra, siꞌubdatõ bâtâ pibuzé ãma isiꞌutõrĩ zaꞌra ꞌre. Ma tô duré tawamhã siꞌubdatõ bâtâ pibuzé ãma timorĩ zaꞌra, tiwasété na siwẽꞌõ zaꞌra ré, duré Uburé Danhibꞌapito, tite zaꞌra ꞌRe ihâimana uꞌâsi mono ãma wata zaꞌra ré.
4 Tawamhã wede ꞌmanharĩ na waꞌra nhisiwi ma tô levita norĩ Zesua, Bani, Cadmiꞌé, Sebania, Buni, Serebia, Bani, duré Quenani norĩ, hâiwi simasab sina Uburé Danhibꞌapito, tite ꞌRe ihâimana uꞌâsi mono ma, mreme ꞌrãihâ na hã mreme zu.
5 Tawamhã levita norĩ Zesua, Cadmiꞌé, Bani, Hasabnéia, Serebia, Hodia, Sebania, duré Petaia, ma tô ꞌRe ihâimana uꞌâsi mono ãma dawata zaꞌra da hã dazô tihârâ zaꞌra. Tahawa, ma tô ãne dama nharĩ zaꞌra:“Maꞌãpé hâiwi aipara na aimasa aba, Uburé Danhibꞌapito, ate ꞌRe ihâimana uꞌâsi mono ãma aiwata zaꞌra waꞌaba da, õne uꞌâ ꞌRe ihâimana uꞌâsi mono, ꞌre ihâimana mono ãma!Duré isisi wẽ na uburé, ãma ꞌre dawata zaꞌra mono, ãma ꞌre idawata zaꞌra mono zém na da te iwab ꞌre saꞌra mono dai õ nherẽ!”
Uburé Danhibꞌapito ma, idamreme zusi na idasiwẽꞌõ zaꞌra zé wasuꞌu
6 Tawamhã Izaraéu nhihudu norĩ, ma tô ãne mreme zu:“ꞌRe ihâimana uꞌâsi mono, aiwétési Uburé Danhibꞌapito!A hã ma tô hâiwa iꞌmanha. Wasi norĩ hã ma tô duré iꞌapoto mo.Tiꞌa hã, âporé hã, duré iwa ꞌre ihâimana zaꞌra mono hã ma tô iꞌapoto mo.A hã ma tô uburé asimipoto mono bâ hâiba ré, ꞌre ihâimana zaꞌra mono da hã tãma iꞌmanharĩ zaꞌra.Duré hâiwa ãma ihâiba ré norĩ hã te hiꞌrãtitõ aima ꞌre siꞌubumroi mono sina aiꞌãma ꞌre wata uꞌâsi zaꞌra.
7 “A hã Uburé Danhibꞌapito ꞌRe ihâimana uꞌâsi mono, Abrãhã pisutuꞌwa, ma tô Babilonia ãma Ur na ꞌri nhoꞌõmo nhisi hawimhã iwaze.Ma tô duré Abraꞌã na isisi tém na da hã oto ãma isaprĩ.
8 Ta hã te te sina ꞌre iꞌaiꞌumnhasi mono zém na ꞌre waihuꞌu mono wa, ma tô asimiropisutu zahi hã tãma iꞌmanha.Ma tô duré tãma iropisu, cananeu norĩ nhiptiꞌa tãma sõmri da hã, hitita norĩ nhiptiꞌa hã, amoreu norĩ nhiptiꞌa hã, perizeu norĩ nhiptiꞌa hã, zebuzeu norĩ nhiptiꞌa hã, duré gigazeu norĩ nhiptiꞌa hã, isihudu norĩ hã iwa ꞌre ihâimana zaꞌra mono zéb da hã.A hã ma tô tãma iropisutuzé hã isuwa, sena na ꞌre aihâimana mono wa.
9 “Ma tô wahiꞌrata norĩ Ezitu ãma te te ꞌre robzépata zaꞌra mono ré hã ꞌre iꞌaꞌmadâꞌâ mo.Duré Âpré na â poré nhisi zaihâi ãma, sadari sina mreme ꞌrãihâ na te te aiwi irowaptẽrẽ zaꞌra zé hã, ma tô iwapa.
10 Ezitu ãma apito zada, isahâpâ dama rotiꞌwa norĩ zada, duré isiptiꞌai ãma uburé aꞌuwẽ zada, ma tô asimiromhõsi pipa na hã nasi tãma irobꞌmanharĩ zaꞌra, ta norĩ hã asibꞌaꞌuwẽ norĩ ma, te te ꞌre iꞌmanharĩ zaꞌra mono zéb zarina te te ꞌre irobzépata zaꞌra mono zé hã aima waihuꞌu pese wa.Ãne ma tô ãhã na zama ta norĩ wasuꞌu hã dama saꞌrese zaꞌẽtẽ na hã ꞌre hâimana zaꞌra.
11 A hã wahiꞌrata norĩ nhowa â poré na ma tô ãma aipo, tiꞌa iꞌré na te te ãma saprĩ zaꞌra da hã.Duré isarina isisaꞌrei mono norĩ ma hã, ma tô iꞌmanha, â ꞌrehâ uptabi u sisisi da hã, âporé sisasisi ꞌrowi ẽne ꞌre isisisi mono ne.
12 Ma tô bâtâ mono na hâiwaꞌa isarobꞌa, ipisutu pese na isimroi mo, bâdâdi te te tãma iwasuꞌu zaꞌra mono zéb da hã. Ma tô duré barana unhama roꞌo pisutu pese na te te tãma bâdâdi na rowaꞌa zaꞌra mono da hã, tãma ꞌre ihâiꞌré zaꞌra mo.
13 Sinaꞌi na ẽtẽ ꞌrãihâ nhisi u we asiꞌrai wamhã, ma tô hâiwa hawi asibꞌaꞌuwẽ norĩ ma, we inha. Tahawa, ma tô sena na asimiroti ipire na, duré aimreme iwẽ na, tãma iroti zaꞌra.
14 A hã ma tô duré sabadu iwazéb zahi na te te ꞌre iꞌmadâꞌâ zaꞌra mono zéb da hã tãma iroti zaꞌra.Ma tô duré asimiroti na robꞌuiꞌéré hã tãma isõmri zaꞌra, Mozésihi nhoꞌõmoi baba.
15 Izaraéu nhihudu norĩ, mram na ꞌre hâimana zaꞌra mono ré hã, ma tô iꞌuꞌẽtẽ wapu hâiwa hawimhã tãma ꞌre isõmri zaꞌra mo. Duré ꞌrubu na ꞌre hâimana zaꞌra mono wamhã, ma tô ẽtẽ tõmo wawẽ hawimhã â hã tãma ipuꞌu zaꞌra.Duré tiꞌa, õ norĩ ma, sõmri da, tãma iropisutu zaꞌra zéb zarina, ma tô tãma iꞌru zaꞌra, te te siwi âri da hã oto.
16 “Tane nherẽ, ma tô wahiꞌrata norĩ hã siꞌmadâꞌâ ze na, pẽꞌẽ tete na, duré asimiroti te te ꞌre wapari zaꞌra mono ãna aiwi ꞌre hâimana zaꞌra.
17 Aimreme te te ꞌre wapari zaꞌra mono tõ da hã, ma tô duré siwi sisisi. Duré uburé marĩ ꞌre iꞌabꞌmanharĩ mono zém na hã, ma te poꞌre haꞌâri pese zaꞌra. Marĩ isaꞌreseꞌõ iwẽ ꞌre iꞌabꞌmanharĩ mono zém na hã ma te duré poꞌre haꞌâri pese zaꞌra.Duré ꞌre isiꞌmadâꞌâ ze zaꞌra mono zarina ma tô tinhibꞌapito da hã ꞌrâwi sima pisutu zaꞌra, Ezitu u apâ te te isimroi mono da hã, pawaꞌâbâ ãna duré apâ te te ꞌre romhuri zaꞌra mono da dama.Tane nherẽ, a hã ꞌRe ihâimana uꞌâsi mono, tô dawasété pariꞌwa. Duré a hã iꞌaiwẽ, asimizawi pe, duré ꞌre iꞌasahi suꞌu mono õ.Duré daꞌãma ꞌre iꞌaiwamri mono zé hã saꞌẽtẽ uptabi di. Tahawa tô rẽme zaꞌra õ di, ta norĩ hã.
18 Õ norĩ hã ẽtẽ waipo na powawẽ ibaꞌõmore hâiba hã te te siwi ꞌmanharĩ wamhã, ma tô nharĩ zaꞌra ãne, Ezitu hawi õ hã te te isani zaꞌra na hã.ꞌRe ihâimana uꞌâsi mono, e niha ma tô ãhã wamhã, õ norĩ hã aiꞌãma wasété zaꞌra!
19 Aꞌubuni wi rop si ꞌre irosaꞌwari mono ãma hã, a hã darẽme waihuꞌu õ di, saꞌẽtẽ uptabi na daꞌãma ꞌre iꞌaiwamri mono zé hã aima ꞌre hâimana mono wa.Duré bâtâ mono na hâiwaꞌa, mara mono na unhama roꞌo na, õ norĩ ma, te te tãma bâdâdi na irowaꞌa zaꞌra mono hã, tiwi wazere waihuꞌu zaꞌra õ di.
20 Ma tô Aipẽꞌẽzani iwẽ hã tãma isõmri zaꞌra, niha na marĩ te te ꞌre iꞌmanharĩ zaꞌra mono zém na, te te ãma tãma ꞌre irowasuꞌu zaꞌra mono da hã.Hâiwa hawi mana na ma tô duré iꞌasaihu. Ma tô duré â hã tãma ipuꞌu zaꞌra, ꞌrubu ãma tãma wĩrĩ zaꞌra da hã.
21 40 na aꞌubuni wi ãma wahub zaꞌra ré hã, ma tô ꞌre iꞌaꞌupari uꞌâsi mo, marĩ zô tiwi ꞌre rowaptâꞌâ zaꞌra mono tõ da.Tahawa, tiwi ꞌre hâsiwamnarĩ zaꞌra mono õ di iꞌuza zaꞌra hã. Duré hâiwi si ꞌre nomro uꞌâsi mono nherẽ, ipara hã tiwi ꞌre dupto waihuꞌu zaꞌra mono õ di.
22 “Ma tô tãma ipisutu zaꞌra, aꞌuwẽ mono bâ iwaptoma ꞌre ihâimana zaꞌra mono norĩ na te te aiꞌuté zaꞌra da.Ãhã wa, Izaraéu nhihudu norĩ hã ma tô Hesbõ na ꞌri nhoꞌõmo nhisi ãma, Seõ na apito nhisi ꞌre ihâimana mono ãma, duré Basã na romnhisi tiꞌai ãma apito Ogue na isisi ãma hã aiꞌuté zaꞌra.
23 Wasi hâiwa na ꞌre isimasa mono ne, ma tô duré ihiꞌrata nhihudu norĩ hã ahâ uptabi na ꞌre sitébré mono da, tãma iꞌmanharĩ zaꞌra mo.Ma tô duré tiꞌa na ihiꞌrata norĩ ma, iropisutu zaꞌra u hã isimroi mo.
24 Tahawa, ta norĩ nhihudu norĩ hã ma tô oto Canaꞌã tiꞌa na hã ãma siwi ate zaꞌra. Ãhã wa, a hã ma tô iwa ꞌre idahâimana zaꞌra mono norĩ na hã iꞌaiꞌuté.Ma tô duré asibꞌaꞌuwẽ ma, ihâiba nhomri zaꞌra, sima iwẽ na Canaꞌã ꞌre aꞌuwẽ ãma duré apito norĩ ãma niha hã marĩ te te ãma ꞌre ꞌmanharĩ zaꞌra mono da hã.
25 Asibꞌaꞌuwẽ norĩ, ꞌri nhoꞌõmo norĩ ꞌwawi waꞌra pe, te te siwi iꞌuirĩ norĩ ãma hã, ma tô ãma aiꞌuté zaꞌra. Ma tô duré tiꞌa iwẽ hã siwi tiꞌâ, marĩ iwaꞌâbâ zaꞌẽtẽ na ꞌri iꞌmasisi mono ré hã, duré â zô abꞌre siromo mono ré hã, olivera wede iwa ꞌre isimasa mono ré hã, wede norĩ iꞌrãi pe, iwa ꞌre isimasa mono ré hã, duré uva ꞌru, da te iwa ꞌre izuri mono ré hã.Tawamhã ta norĩ hã ma tô sima iwẽ na uburé marĩ hã te te ꞌre huri. Tahawa, ma tô ãma ꞌre sihâipese zaꞌra. Uburé marĩ iwẽ tãma ꞌre isõmri zaꞌra mono na hã ma tô duré te te sima ãma ꞌre rowẽ zaꞌra.
26 “Tane nherẽ, tipoꞌreꞌõ zarina ma tô duré apâ asibꞌaꞌuwẽ norĩ hã aiwi ꞌre sipizari zaꞌra. Ma tô duré asimiroti na robꞌuiꞌéré wi, ba niwĩmhã tiwi ꞌre sipizari zaꞌra.Ma tô duré asadawa ꞌmahârâꞌwa norĩ hã te te siwi ꞌre simro, apâ atẽme ꞌre sipizari zaꞌra mono da, te te ãma ꞌre ipoꞌre puꞌu zaꞌra mono hã.Ma tô duré asibꞌaꞌuwẽ norĩ hã te te aiꞌãma ꞌre wasété zahu ahâ zaꞌra.
27 Tahawa ma tô isitobꞌru norĩ ma, isaꞌré zaꞌra, te te ãma aiꞌuté zaꞌra da hã, duré te te ꞌre iwati pese zaꞌra mono na tãma ꞌre hâimana zaꞌra mono da hã.Tane nherẽ, te te oto ꞌre irobzépata zaꞌra mono ꞌremhã, te te aiwi ꞌre rowaptẽrẽ zaꞌra mono wamhã, ma tô duré hâiwa hawi ãma ꞌre isadaꞌâbâ zaꞌra mo.Tawamhã ãma iꞌaiwamri zaꞌẽtẽ zaꞌra zarina, isitobꞌru norĩ hawi te te nasi sani zaꞌra da hã ma tô iꞌrãnhoꞌõmo norĩ itẽme zaꞌra hã ꞌre isatõrĩ zaꞌra mo.
28 Tane nherẽ, rowẽ apâ itẽme ꞌre sihutu mono sidâpâsi asibꞌaꞌuwẽ norĩ, tiwasédé te te aiwi ꞌmanharĩ zahu zaꞌra wamhã, ma tô duré apâ isitobꞌru norĩ ma hã ꞌre iꞌazaꞌréi uꞌâsi mo, te te ãma ꞌre aiꞌuté zaꞌra mono da hã.Duré apâ sadari sina mreme ꞌrãihâ na te te aiwi ꞌre rowaptẽrẽ zaꞌra mono sidâpâsi ma tô duré hâiwa hawi a hã ꞌre iꞌawapari mo. Tahawa, ma tô duré ãma ꞌre iꞌaiwamri zaꞌẽtẽ zaꞌra mono zarina, nasi ꞌre iꞌanhoꞌreptui mo.
29 Asimiroti tẽme apâ ꞌre sipizari zaꞌra mono da, ma tô ꞌre iꞌapoꞌre puꞌu uꞌâsi mo. Tane nherẽ, ꞌre isiꞌmadâꞌâ ze zaꞌra mono zarina, ma tô asimiroti hã te te ꞌre wẽꞌõ zaꞌra.Ma tô duré tãma ꞌre iwaihuꞌu zaꞌra mono zé wi hã tiwasété si te te ꞌre ꞌmanharĩ zaꞌra, asimiroti ꞌmadâꞌâ pese zém na si ꞌre idanomro uꞌâsi mono zé, da te dasina ꞌre uwaimrami zaꞌra mono da nherẽ.Ta norĩ hã pẽꞌẽ tete wa, ma tô ba niwĩmhã aiwi ꞌre sipizari zaꞌra. Tahawa, te te siwi ꞌre iꞌaiwapari pese mono zé hã ma tô siwi wẽꞌõ pese zaꞌra.
30 Tane nherẽ, wahup sidâpâsi ta norĩ ãmamhã ꞌre aiwaꞌa suꞌu mono õ di.Duré Aipẽꞌẽzani, asadawa ꞌmahârâꞌwa nhoꞌõmoi babamhã ma tô te te tãma ꞌre priꞌi zaꞌra. Tane nherẽ, ma tô asibꞌaꞌuwẽ norĩ hã poꞌre nhidâ haré ꞌre hâimana zaꞌra.Tahawa ma tô duré iwaptoma ꞌre idahâimana zaꞌra mono norĩ ma, isibꞌratab zaꞌra tãma ꞌre iꞌanhomri uꞌâsi mo.
31 Tane nherẽ, daꞌãma ꞌre iꞌaiwamri mono zé hã saꞌẽtẽ na aima ꞌre hâimana mono wa, ta norĩ hã duré rẽme zaꞌra õ di. Uprosi zaꞌra õ di duré.A hã, ꞌRe ihâimana uꞌâsi mono daꞌãma ꞌre iꞌaiwamri pese mono, duré ꞌre idapawapto wẽ uꞌâsi mono, te ꞌre aihâimana mo!
32 “Tahawa, wate ꞌRe ihâimana uꞌâsi mono, iꞌasaꞌẽtẽ uptabi, iꞌasiptete uptabi, asina ꞌre idaꞌapahi zani mono, asimiropisutu zahi na dama ꞌre iꞌaꞌuwaimrami mono, duré daꞌãma ꞌre iꞌaiwamri pese mono, maꞌãpé taré waꞌãma airĩtĩ pese zaꞌra tõ, robzépada wanhisiwi iwaptãꞌã zaꞌra zém na hã, wanhibꞌapito nhisiwi, wama iꞌrãnhoꞌõmo zaꞌra nhisiwi, wate sasedoti norĩ nhisiwi, wama asadawa ꞌmahârâꞌwa norĩ nhisiwi, wahiꞌrata norĩ nhisiwi, duré uburé asibꞌaꞌuwẽ nhisiwi, ꞌre ihâimana mono zém na hã, Asiria ãma apito wazada ꞌre ihâimana zaꞌra mono zém hawi, ãhã bâtâ u hã!
33 Uburé marĩ waꞌãma ꞌre ihâimana zaꞌra mono zé hã ma tô iꞌuwaibaba si waꞌãma ꞌre iꞌaꞌmadâꞌâ mo. Duré wa norĩ hã wawasété si wa te aiwi ꞌre ꞌmanharĩ zaꞌra mono nherẽ, ma tô ibâ na si wama ꞌre iꞌarobꞌmanharĩ mo.
34 Wahiꞌrata norĩ hã, wanhibꞌapito norĩ hã, wama ipire zaꞌra norĩ hã, duré wate sasedoti norĩ hã, asimirotizé hã te te aima ãma ꞌre uwaimrami zaꞌra mono õ di.Duré aimreme hã, duré ꞌre iwaꞌapoꞌre puꞌu mono zé hã te te ꞌre wapari zaꞌra mono õ di.
35 Asimipawaptobzé iwẽ hawim na, ma tô apito norĩ, asibꞌaꞌuwẽ norĩ ma iꞌrãnhoꞌõmo na ꞌre hâimana zaꞌra, tiꞌa iwẽ isaꞌẽne tãma isõmri zaꞌra zé wa, iwa ꞌre siꞌubumroi mono ré hã.Tane nherẽ, õ norĩ hã aima romhuriꞌwa na ꞌre hâimana zaꞌra mono õ di. Duré tiwasété na si ꞌre inomro mono zé hã te te rẽme zaꞌra õ di.
36 Tahawa tiꞌa iwẽ wa, ꞌre irobꞌrãi pese mono na ꞌre wasaihuri mono da, wama isõmri zaꞌra ꞌremhã, wa oto taré wapawaꞌâbâ ãna wa te dama ꞌre romhuri zaꞌra.
37 Wawasété zaꞌra uꞌâbâ, te tiꞌai ꞌre robꞌrã, ꞌre iꞌrãi uꞌâsi zaꞌra mono hã apito norĩ, pire na waꞌmadâꞌâꞌwa da, ꞌre iꞌapisutu mono ma si ꞌre hâimana zaꞌra.Ta norĩ hã te duré sima iwẽ na marĩ hã te te wama ꞌre ꞌru zaꞌra. Te duré wanhimizama powawẽ na niha hã te te ãma wama ꞌre robꞌmanharĩ zaꞌra.Tahawa, wa te ꞌre robzépata zaꞌẽtẽ uptabi zaꞌra mono di.”
Danhisi nhihâtâ na, ãma idasisaze zaꞌra zé wasuꞌu
38 Tawamhã ãne hã uburé wama ꞌre iromhâimana zaꞌra mono zarina, uburé wa norĩ Izaraéu nhihudu norĩ hã wa oto robꞌuiꞌéré na ꞌre idasisihâtâ zaꞌra mono zém na wasisazezé hã wasiwi ꞌmanharĩ ni. Tawamhã wate dama ipire norĩ hã, levita norĩ hã, duré wate sasedoti norĩ hã te za duré taha na hã ãhã na ãma sisihâtâ zaꞌra.
