Romanu 10:1-21
10 Ĩsisãnawã norĩ, ꞌRe ihâimana uꞌâsi mono te te ꞌre idaꞌanhoꞌreptui mono zé hã, uburé ĩsiré Zudeu norĩ hã te te sina tãma ꞌre uwaimrami zaꞌra mono da, wa tô ĩsima wẽ uptabi zaꞌra. Taha da, wa ta norĩ ãma ꞌre ĩmreme uꞌâsi zaꞌra, ꞌRe ihâimana uꞌâsi mono ma.
2 Ta norĩ hã te te sima ꞌre wẽ uptabi zaꞌra, ꞌRe ihâimana uꞌâsi mono ma, ꞌre sisõmri uꞌâsi zaꞌra mono da, õhõ ma si, te te ꞌre romhuri pese zaꞌra mono da. Ãne na, wa tô ĩsiꞌuihâ na ãma waihuꞌu pese zaꞌra, tô sena na. Tane nherẽ, ꞌRe ihâimana uꞌâsi mono ma, da te ꞌre iromhuri pese zaꞌra mono zé hã te te waihuꞌu pese zaꞌra õ wa, te te sina tãma ꞌre uwaimrami zaꞌra mono õ di.
3 ꞌRe ihâimana uꞌâsi mono, dawasédé te te oto daꞌãma ꞌre iꞌaꞌmadâꞌâ mono õ zarina, te te ꞌre idaꞌawẽsãmri mono zé hã, tãma waihuꞌu pese zaꞌra õ di. Te te ꞌre idaꞌawẽsãmri mono zéb da, ꞌRe ihâimana uꞌâsi mono te te tãma ꞌre ipisutu zaꞌra mono zé hã, te te ꞌre ꞌmadâꞌâ pese zaꞌra mono õ di, ta norĩ hã. Siꞌuihâ na te te sima ꞌre ipisutu zaꞌra mono zéb zarina si, ma tô ꞌrâwi sô ꞌre siꞌwapé zaꞌra, taha na te te ꞌre wẽsãmri zaꞌra mono da newa.
4 ꞌRe ihâimana uꞌâsi mono nhimiroti na Mozési te te irobꞌuiꞌéré hã da te ꞌre iꞌmadâꞌâ pese zaꞌra mono na, da te ãma ꞌre rosaꞌrata uꞌâsi zaꞌra mono õ di za oto, taha zarina ꞌRe ihâimana uꞌâsi mono, te te sima daꞌãma ꞌre aroti mono newa, dawasédé te te oto daꞌãma ꞌre aꞌmadâꞌâ tõ mono da, duré taha zarina te te ꞌre idaꞌawẽsãmri mono zéb da hã. Tâibâ. Ãne hã ma tô Cristu hã dawi uprosi. Ta hã Danhoꞌreptuiꞌwa na te te sina ꞌre iꞌumnhasi zaꞌra mono norĩ si, te za ꞌRe ihâimana uꞌâsi mono hã te te ꞌre awẽsãmri, iwasédé hã te te oto ãma ꞌre iꞌaꞌmadâꞌâ mono õ zarina, poꞌreꞌõ nherẽ, te te ꞌre ahâ zaꞌra tõ mono da.
ꞌRe ihâimana uꞌâsi mono te te ꞌre idaꞌanhoꞌreptui mono zé wasuꞌu
5 Duréihã Mozési hã ma tô ãne na robꞌuiꞌéré:“Niꞌwa hã isimiroti na robꞌuiꞌéré hã uburé te te ꞌre ꞌmadâꞌâ pese uptabi mono wapsi, nimahã na marĩ na misi isimiroti na te te upai õ wapsi, tawapsi te za rowẽ na ꞌre hâimana uꞌâsi, ꞌRe ihâimana uꞌâsi mono ꞌrata.”
6 10:6-8 Tane nherẽ, niꞌwa hã ãne te te ꞌmanharĩ waihuꞌu õ di, isimiroti zarina uptabi hã. Niꞌwa hã isimiroti upaiꞌõꞌwa hã ꞌre morĩ õ di. Robaba di. Ãté ãne na te za ꞌrâwi asima ꞌre inharĩ zaꞌra waꞌaba mo: “E ꞌwa hã te za hâiwa u mo, Cristu hã apâ we te te saprõni da, waꞌupana wazada idâꞌâ zaꞌra da hã.” Ãne hã asima ꞌre nharĩ zaꞌra waꞌaba mono õ di za, Cristu hã Danhoꞌreptuiꞌwa da, ꞌRe ihâimana uꞌâsi mono te te ipisudu hã wei morĩ õ newa, tiꞌai u.
Ãté te za duré ãne na ꞌrâwi asima ꞌre inharĩ zaꞌra waꞌaba mo: “E ꞌwa hã te za mo, adâ ꞌre ihâimana zaꞌra mono zéb u, Cristu hã te te hâiwaꞌutu da apâ.” Ãne hã asima ꞌre nharĩ zaꞌra waꞌaba mono õ di za duré, Cristu hã apâ hâiwaꞌutu õ newa, abꞌre hawi. ꞌRe ihâimana uꞌâsi mono, da te ꞌre saze zaꞌra mono wapsi, te te ꞌre idaꞌawẽsãmri mono zém na, ma tô Mozési hã ãne na ãma robꞌuiꞌéré, duréihã:“ꞌRe ihâimana uꞌâsi mono zadawa wasuꞌu hã ma tô aipẽꞌẽ ꞌre, ꞌre isazei pese zaꞌra waꞌaba mo, ꞌrâwi. Taha na, ma tô duré dama ꞌre asiwasuꞌu uꞌâsi zaꞌra waꞌaba mo, asadawa na.”
Taha na, wa tô duré wa norĩ hã wa te dama ꞌre sadawa wasuꞌu zaꞌra, Cristu, da te ꞌre sazei pese zaꞌra mono wapsi, ꞌRe ihâimana uꞌâsi mono te te ꞌre idaꞌawẽsãmri mono zém na, dawasédé te te oto daꞌãma ꞌre iꞌaꞌmadâꞌâ mono õ zarina.
7 ꞌMadâꞌâ 10:6
8 ꞌMadâꞌâ 10:6
9 Zezusi hã Wanhibꞌapito uptabi na, asadawa na danhoꞌa ꞌre sisi zaꞌra waꞌaba mono wamhã, duré ꞌrâwi aipẽꞌẽ ꞌre, ꞌRe ihâimana uꞌâsi mono, Zezusi te te ihâiwaꞌutuzém na, ꞌre sazei pese zaꞌra waꞌaba mono wamhã, tawapsi te za te te ꞌre asõꞌreptu zaꞌra waꞌwa, ꞌRe ihâimana uꞌâsi mono hã.
10 Zezusi hã wapẽꞌẽ ꞌre, wa te wasina ꞌre iꞌumnhasi zaꞌra mono zém na, ꞌRe ihâimana uꞌâsi mono hã te te ꞌre iwaꞌawẽsãmri mono zé hã. Zezusi hã Wanhibꞌapito na danhoꞌa, wa te dama ꞌre isisi zaꞌra mono zém na, ꞌRe ihâimana uꞌâsi mono te te ꞌre iwaꞌanhoꞌreptui mono zé hã.
11 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne: “ꞌRe ihâimana uꞌâsi mono hã, Danhoꞌreptuiꞌwa da, te te ipisudu hã da te dasina ꞌre umnhasi zaꞌra mono wamhã, niwamhã te te sina ꞌre umnhasi baba zaꞌra mono õ di za. Te za te te dama ãma ꞌre aꞌuwaimrami uꞌâsi.” Ãne Izaias hã te te ãma irobꞌuiꞌérézé hã.
12 Zudeu norĩ hã zudeuꞌõ norĩ me, ꞌRe ihâimana uꞌâsi mono ma hã, tô õhõ si, tãma ꞌre ihâimana zaꞌra mono zé hã. Siwanhizari, tãma ꞌre hâimana zaꞌra mono õ di oto ta norĩ hã. ꞌRe ihâimana uꞌâsi mono, Uburé Danhibꞌapito uptabi, te dama ꞌre hâimana. Tahawa, niꞌwam norĩ hã ꞌRe ihâimana uꞌâsi mono te te ꞌre sõꞌreptu zaꞌra mono da, te te tiwi ꞌre waptẽrẽ zaꞌra mono wamhã, ta norĩ ma, te za tô te te tãma ãma ꞌre aꞌuwaimrami, dama ꞌre isõpru mono zéb zarina.
13 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Niꞌwam norĩ hã Uburé Danhibꞌapito te te ꞌre sõꞌreptu zaꞌra mono da, te te tiwi ꞌre waptẽrẽ zaꞌra mono wamhã, te za ta norĩ hã te te tô ꞌre anhoꞌreptu, ihâiba mono bâ.”
14 E niha te za tawamhã da te tiwi ꞌre waptẽrẽ zaꞌra, te te ꞌre daꞌapawapto mono da hã, Cristu, da te dasina ꞌre umnhasi zaꞌra mono õ nherẽ. Ãne wamhã, dama waihuꞌu õ di. Duré Zezusihi wasuꞌuwẽ hã dapoꞌre na da te ꞌre wapari zaꞌra mono õ ré hã, e niha te za da te dasina ꞌre umnhasi zaꞌra, Zezusi hã. Da te dasina ꞌre umnhasi waihuꞌu zaꞌra mono õ di. E niha te za duré Zezusihi wasuꞌuwẽ na, da te ꞌre dapawaptob zaꞌra mono õ nherẽ, da te ꞌre wapari zaꞌra. Dama waihuꞌu õ di.
15 Duré, e niha te aré Zezusihi zadawa wasuꞌuꞌwa norĩ hã daro mono bâ datẽme ꞌre nomro, imreme na te te ꞌre dapawaptob zaꞌra mono da, ꞌRe ihâimana uꞌâsi mono hã te te datẽme ꞌre satõrĩ zaꞌra mono õ nherẽ. Ãne wamhã, te te ãma ꞌre dapawapto waihuꞌu zaꞌra mono õ di aré. Tane nherẽ, ꞌRe ihâimana uꞌâsi mono, ma tô te te datẽme ꞌre satõrĩ zaꞌra tô. ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Rowasuꞌu wẽ hã nima hawi da te dama ꞌre ãwisi zaꞌra mono wamhã, dama ꞌre rowẽ uptabi zaꞌra mono di za.”
16 Zezusihi wasuꞌuwẽ hã, uburé da te dasima ꞌre waibui wẽ mono õ di, wẽ nherẽ. Izaias hã ma tô duré ãne na ãma robꞌuiꞌéré, ꞌRe ihâimana uꞌâsi mono ma, te te inharĩzém na: “Uburé Danhibꞌapito, wa te dama ꞌre asadawa wasuꞌu zaꞌra mono wamhã, e ma tô aiwasuꞌu na da te ꞌre wazaze zaꞌra. Mare di. Da te ãma ꞌre wazaze zaꞌra mono õ di.”
17 Tane nherẽ, Cristuhu wasuꞌuwẽ na, da te ãma ꞌre dapawaptob zaꞌra mono õ nherẽ, da te ãma ꞌre sasõmri waihuꞌu zaꞌra mono õ di. Cristuhu wasuꞌuwẽ hã dapoꞌre na da te ꞌre wapari zaꞌra mono wapsi, te za da te ꞌre saze zaꞌra.
18 E Zudeu norĩ hã zahadu iwasuꞌuwẽ hã te te ꞌre wapari zaꞌra mono ã bâ bété. Iwasuꞌuwẽ hã ma tô te te ꞌre wapari zaꞌra aré ta norĩ hã, tô sena na. Duréihã Davi hã ma tô ãne na ãma robꞌuiꞌéré:“Isadawa wasuꞌuꞌwa norĩ mreme hã ma tô daro mono bâ te te ꞌre ropé.Ta hã ma tô ropâ dapoꞌre na hã da te ꞌre wapari zaꞌra.”
19 E tawamhã, Izaraéu nhihudu norĩ hã iwasuꞌuwẽ te te ꞌre wapari zaꞌra mono wamhã, e te te ꞌre waihuꞌu zaꞌra mono õ di bété. Ma tô te te ꞌre waihuꞌu zaꞌra. Tane nherẽ, tipẽꞌẽ na te te sima ꞌre wẽ zaꞌra mono õ di, te te ꞌre isaze zaꞌra mono da hã. Zudeuꞌõ norĩ si, ma tô te te sima ꞌre wẽ zaꞌra, te te ꞌre saze zaꞌra mono da. Ãne na, ma tô Mozési hã duréihã ãma robꞌuiꞌéré ꞌrata, Zudeu norĩ ma ꞌRe ihâimana uꞌâsi mono te te tãma irowaihuꞌu zaꞌra zém na hã:“Ĩnhibꞌaꞌuwẽꞌõ aré ꞌre inomro mono norĩ hã oto ãma ꞌre ĩnhibꞌaꞌuwẽ zaꞌra mono wa, te za oto ta norĩ hã asiwi ꞌre iꞌruiwapari zaꞌra waꞌaba mo, ĩzadawa parab õ nherẽ.Ta norĩ hã te te ꞌre ĩwaihuꞌu pese zaꞌra mono õ nherẽ, wa tô ãma ꞌre ĩnhibꞌaꞌuwẽ zaꞌra aré. Tahawa, te za asibꞌru na sada ꞌre aihâimana uꞌâsi zaꞌra waꞌaba mo, ĩzadawa parab õ nherẽ.”
20 Izaias hã ma tô duré ãne na isaꞌu ãma robꞌuiꞌéré, zudeuꞌõ norĩ wasuꞌu na hã. Zudeu norĩ hã te te siwi ꞌre iwẽꞌõ pese zaꞌra mono zém na, ma tô siptete sina ãma robꞌuiꞌéré, ꞌRe ihâimana uꞌâsi mono mreme na:“Niꞌwam norĩ hã aré ĩzô ꞌre sõpré uꞌâsi mono õ nherẽ, ma tô te te siwi ꞌre ĩsãmri zaꞌra.Ĩzô ꞌre sinharĩ zaꞌra mono õ nherẽ, wa tô ta norĩ ma ꞌre ĩsiwaihuꞌu zaꞌra.”
21 Ãne na ma tô duré Izaias hã Zudeu norĩ ãma robꞌuiꞌéré, ꞌRe ihâimana uꞌâsi mono mreme na:“Wa hã wa tô aré Izaraéu nhihudu norĩ zô ꞌre ĩnhimiwẽ uꞌâsi zaꞌra, te ꞌre azawi pese mono wa, apâ ĩtẽme we ꞌre sihutu mono da. Ta norĩ hã poꞌre ãna ꞌre nomro uꞌâsi mono wa, te te siwi ꞌre ĩwẽꞌõ pese zaꞌra mono nherẽ, wa tô aré sô ꞌre ĩnhimiwẽ uꞌâsi zaꞌra, te ꞌre isawi pese zaꞌra mono zéb zarina.”
