Romanu 13:1-14
13 Tiꞌai ãma dama ipire norĩ hã, rotiꞌwa norĩ hã siꞌuihâ na ꞌre sipisutu zaꞌra mono õ di, dama ꞌre siꞌapito zaꞌra mono da hã. ꞌRe ihâimana uꞌâsi mono te te ꞌre iꞌapisutu mono zarina si, te dama ꞌre hâimana zaꞌra uburé. Tahawa, te za uburé aihĩni ꞌre iwapari pese zaꞌra waꞌaba mo, isimiroti hã.
2 Niꞌwam norĩ hã dama ipire norĩ nhimiroti te te siwi ꞌre wẽꞌõ zaꞌra mono wamhã, taha si te te siwi ꞌre wẽꞌõ zaꞌra mono õ di za. Iꞌuꞌâbâ te za duré ꞌRe ihâimana uꞌâsi mono te te ꞌre iꞌapisutu mono zé hã te te siwi ꞌre wẽꞌõ zaꞌra. Ãne hã niꞌwam norĩ te te ꞌre ꞌmanharĩ wasété zaꞌra mono wamhã, ꞌrâwi te za siꞌuihâ na te te sisada ꞌre sani zaꞌra, tiꞌai ãma dama ipire norĩ nhimihâzé hã, ꞌRe ihâimana uꞌâsi mono zadawa para.
3 Niꞌwa norĩ, marĩ te te ꞌre iꞌmanharĩ wasété zaꞌra mono norĩ si, te za dama ipire norĩ nhimihâzé ma, ꞌre pahi zaꞌra. Tanei õ di, marĩ te te ꞌre iꞌmanharĩ wẽ zaꞌra mono norĩ hã. Dama ipire norĩ ma, ꞌre pahi zaꞌra mono õ di za. Tahawa, te za iwẽ si ꞌre iꞌmanharĩ zaꞌra waꞌaba mo, dama ipire norĩ ma, tãma ꞌre aipahi zaꞌra waꞌaba mono ãna, ꞌre aihâimana zaꞌra waꞌaba mono da. Tawapsi te za te te ꞌre aiwẽsãmri zaꞌra waꞌwa, tiꞌai ãma dama rotiꞌwa norĩ hã.
4 Ta norĩ hã te ꞌRe ihâimana uꞌâsi mono zadawa para, te te ꞌre romhuri zaꞌra, iwẽ na si te te ꞌre aipawaptob zaꞌra waꞌaba mono da, taha zarina, rowẽ na ꞌre asimroi waꞌaba mono da. Tane nherẽ, marĩ iwasété si ꞌre ꞌmanharĩ uꞌâsi zaꞌra waꞌaba mono wamhã, te za tô tãma ꞌre aipahi zaꞌra waꞌaba mo. E marĩ wa. Dama ipire norĩ hã tô sena siptete uptabi wa, te te ꞌre idahâ zaꞌra mono zéb da hã. ꞌRe ihâimana uꞌâsi mono zadawa para, te isimipariꞌõ norĩ hã te te ꞌre hâ zaꞌra.
5 Ãne wa, te za uburé tiꞌai ãma dama rotiꞌwa norĩ nhimiroti hã ꞌre iwapari pese zaꞌra waꞌaba mo, asimipari õ wa, ꞌRe ihâimana uꞌâsi mono te te ꞌre aiwẽꞌõ pese zaꞌra waꞌaba mono zéb zarina, te te ꞌre aihâ zaꞌra waꞌaba mono tõ da. Duré ꞌre aihâimana wẽ zaꞌra waꞌaba mono zém na, ꞌRe ihâimana uꞌâsi mono ma, tãma ãma ꞌre iꞌuwaimrami zaꞌra waꞌaba mono na, aipẽꞌẽ ꞌre asimirosaꞌrata na asina ꞌre waihuꞌu pese zaꞌra waꞌaba mono da, te za isarina dama ipire norĩ nhimiroti hã ꞌre iwapari pese zaꞌra waꞌaba mo.
6 Tahawa, dama ipire norĩ nhimipisutuzéb zarina te za duré robꞌuiprazé hã suru na tãma ꞌre iꞌarĩ zaꞌra waꞌaba mo, tiꞌai ãma dama ipire norĩ ma. E marĩ wa. Dama ipire norĩ hã ꞌRe ihâimana uꞌâsi mono zadawa para, te te ꞌre romhuri zaꞌra mono wa.
7 Tahawa, te za tô isarina tãma ꞌre iꞌarĩ zaꞌra waꞌaba mo, aipawaꞌâbâzé hã duré uburé marĩ uiprazé hã. Te za duré tãma ꞌre aihâimana prédub zaꞌra waꞌaba mo, dama rotiꞌwa norĩ ma.
ꞌRe idasisawi pese zaꞌra mono zé wasuꞌu
8 Marĩ aꞌâ taré dawi ꞌre iwaibui waꞌaba mono hã, apâ iwaꞌrãmi dama ꞌre isõmri zaꞌra waꞌaba mono da na ãma ronomro õ ré, te za dama ãma ꞌre iꞌuwaimrami zaꞌra waꞌaba mo. Asimizawizém na si te za ꞌre idazawi pese zaꞌra waꞌaba mo. ꞌRe dazawi pese zaꞌra waꞌaba mono wamhã, uburé ꞌRe ihâimana uꞌâsi mono nhimiroti ꞌrata na Mozési te te irobꞌuiꞌérézém na te za asina tãma ãma ꞌre iꞌuwaimrami zaꞌra waꞌaba mo.
9 Duréihã ꞌRe ihâimana uꞌâsi mono, Mozésihi ma, te te iwaihuꞌuzéb zarina te te ãma dama irobꞌuiꞌérézé hã, ãne:“Aimro na asiwi ꞌre asimisaihuri zaꞌra waꞌaba mono õ di za. Duré ꞌre danhimroi waꞌaba mono õ di za. Duré dawi ꞌre asimisaihuri zaꞌra waꞌaba mono õ di za. Duré marĩ iwẽ hã dawi ꞌre ꞌruiwapari zaꞌra waꞌaba mono õ di za.”
à norĩ hã, duré aimawi hã isimiroti hã ahâ uptabi nherẽ, simisutu haré te wasuꞌu isimiroti hã, ãne:
“Te za ꞌre idazawi pese zaꞌra waꞌaba mo, aihâimanazé hã ꞌrâwi asima ꞌre isawi pese zaꞌra waꞌaba mono ne.”
10 Niꞌwam norĩ hã te te ꞌre dazawi pese zaꞌra mono wamhã, marĩ iwasédé hã te te dama ꞌre ꞌmanharĩ waihuꞌu zaꞌra mono õ di za. Tahawa, niꞌwam norĩ hã te te ꞌre dazawi pese zaꞌra mono wamhã, ta hã uburé ꞌRe ihâimana uꞌâsi mono nhimiroti ꞌmadâꞌâ pese ꞌwa, te za ꞌre hâimana zaꞌra.
11 Zezusi hã we apâ wazô imorĩzéb u hã romhuture di oto, te te iwanhoꞌreptu zaꞌra zé hã te te oto wama iꞌrãsutu zaꞌra da hã. Cristu hã duréi, wa te wasina ꞌre iꞌumnhasi naꞌrata zaꞌra mono hawim nherẽ, romhuture di oto, wama hã. Tahawa, te za oto asimizaꞌrese ꞌre aihâimana zaꞌra waꞌaba mo, darési ãna ꞌre idanhotõ zaꞌra mono ne, asimizaꞌrese ãna ꞌre aihâimana tõ zaꞌra waꞌaba mono da. Ãne na tiꞌai ãma ꞌre iwahâimana hutu zaꞌra mono zé hã aima waihuꞌu pese zaꞌra waꞌaba di. Ãne wa, te za ꞌre idazawi pese zaꞌra waꞌaba mo.
12 Robra isiꞌutõrĩzéb u hã romhuture di oto, tiꞌai ãma ré dawasédé, da te ꞌre iꞌmanharĩ zaꞌra mono hã. Tâibâ za oto. Cristu hã we apâ morĩ wapsi, rowaꞌa si te za oto ꞌre hâimana uꞌâsi, robra waꞌrãmi. Tahawa, robra ꞌrowi dawasédé, da te ꞌre iꞌmanharĩ zaꞌra mono ne, ꞌre wanomro mono õ di za oto. Wawasédé hã wa za oto wa te ꞌre sahâri pese zaꞌra. Duré Zezusihi nhimirowaꞌa na si wa za ꞌre wanomro, robra wi wanhiptete sina ãma ꞌre iwahâimana zaꞌra mono zéb da hã, danhimnhiꞌãsi na dawi ꞌre idasisõpa zaꞌra mono ne.
13 Wawasété ãna, wa za oto ꞌre wanomro wẽ, rowaꞌa na ꞌre idanomro mono ne. Âzé wa te dame ꞌre âhuri mono õ di za, dato iwasété u ꞌre dasiꞌrãꞌõtõ mono wa, siwaꞌru da te ꞌre iꞌâhuri mono ne, ꞌre waꞌrã siwamnarĩ tõ zaꞌra mono da. Duré siwaꞌru wahâimanazé iwasédé hã wa te ꞌre ꞌmanharĩ uꞌâsi zaꞌra mono õ di za, piꞌõ na aibâ na zama. Duré marĩ na ꞌre iwasiwẽꞌõ zaꞌra mono hawi, wa te wasima ꞌre nharĩ zaꞌra mono õ di za. Duré marĩ na ꞌre wasiꞌruiwapari zaꞌra mono õ di za.
14 Siwaꞌru ꞌrâwi asima iwẽzéb zarina, aipẽꞌẽ ꞌre asimirosaꞌrata wasété aba na ãma ꞌre rosaꞌrata zaꞌra waꞌaba mono õ di za. Wanhibꞌapito Zezu Cristu ꞌre imorĩzém na si te za oto ꞌre aihâimana zaꞌra waꞌaba mo, isine.
