Romanu 14:1-23
14 Isazeiꞌwa nherẽ, sibꞌuware na ꞌre inomro mono norĩ zô, te za asitẽme sô ꞌre aihãsi aba mo. Isimirosaꞌrata zaꞌra hã aimawi nherẽ, aiwab õ nherẽ, tãma ꞌre nharĩ wasété zaꞌra waꞌaba mono õ di za. Tane nherẽ, te za tô sô ꞌre atobꞌuzu zaꞌra waꞌaba mo.
2 Niꞌwam norĩ hã isazeiꞌwa norĩ uburé te tisazéb zô si hã sima sô ꞌre sõpré, te te sô ꞌre huri zaꞌra mono da, romnhi zô zama, ꞌRe ihâimana uꞌâsi mono te te tiwi ꞌre isawi zaꞌra mono õ na, ꞌrâwi ꞌre isisaze zaꞌra mono zéb zarina. Tane nherẽ, niꞌwam norĩ hã isazeiꞌwa nherẽ, te za romnhi hã te te siwi ꞌre wẽꞌõ zaꞌra, te te ꞌre huri mono tõ da, ꞌRe ihâimana uꞌâsi mono te te tiwi ꞌre sawi zaꞌra mono newa.
3 Tahawa, niꞌwam norĩ hã uburé romnhi te te ꞌre ihuri mono norĩ hã te te siwi ꞌre wẽꞌõ zaꞌra mono õ di za, romnhi na dame ꞌre isaihuri mono õ norĩ hã. Duré niꞌwam norĩ, romnhi na dame ꞌre isaihuri mono õ norĩ zama, te te siwi ꞌre wẽꞌõ zaꞌra mono õ di za, uburé siwaꞌru romnhi te te ꞌre ihuri mono norĩ hã. E marĩ wa. ꞌRe ihâimana uꞌâsi mono hã ma tô te te ꞌre awẽsãmri õ norĩ hã, romnhi na dame ꞌre isaihuri mono õ norĩ me.
4 E a norĩ waꞌwa hã isibꞌapito zaꞌra waꞌaba bâ, te za marĩ tiwi ꞌre iwẽꞌõ zaꞌra waꞌaba mo, isibꞌapito upana. Taha si te za te te ꞌre waihuꞌu zaꞌra, ihâimana wasété na, duré ihâimana wẽ na zama. Tawamhã isazeiꞌwa norĩ hã te za siptete uꞌâsi ꞌre hâimana zaꞌra. E marĩ wa. Wanhibꞌapito tiwaihuꞌu pese na te te ꞌre siptete uꞌâsi zaꞌra mono wa.
5 Niꞌwam norĩ hã isazeiꞌwa norĩ te ꞌrâwi te te siꞌãma ꞌre rosaꞌrata zaꞌra, nima hã bâdâ hã romhuriꞌõzé hã iwa ꞌre irereꞌe mono sidâpâsi, bâdâ dama ꞌre ipire zaꞌra mono zém na hã. Duré niꞌwam norĩ, isazeiꞌwa norĩ hã te te daꞌãma ꞌre rosaꞌrata zaꞌra asa, aiwapsi bâdâ hã uburé dama ꞌre hâimana zaꞌra mono nherẽ, ãma ꞌre idahâimana zaꞌra mono zéb da hã. Tahawa, ate waꞌaba mono bâ romhuriꞌõzé bâtâ mono na asimirosaꞌrata mono bâ te za asiptete sina ãma ꞌre aihâimana zaꞌra waꞌaba mo, tô õhõ na si.
6 Ta norĩ hã nimahã bâdâ hã romhuriꞌõzé hã dama ꞌre ipire zaꞌra mono zém na te te siꞌãma ꞌre irosaꞌrata zaꞌra mono norĩ hã, Wanhibꞌapito ãma ꞌre wata zaꞌra mono da, te ãne te te ꞌre ꞌmanharĩ zaꞌra. Duré niꞌwam norĩ hã uburé siwaꞌru romnhi te te ꞌre ihuri mono norĩ hã te ãne te te ꞌre ꞌmanharĩ zaꞌra, Wanhibꞌapito ãma ꞌre wata zaꞌra mono da, dasa na dama ꞌre sõpru mono wa. Duré niꞌwam norĩ hã romnhi na dame ꞌre isaihuri mono õ norĩ hã, te ãne duré te te ꞌre ꞌmanharĩ zaꞌra aiwa, ꞌRe ihâimana uꞌâsi mono ãma ꞌre wata zaꞌra mono da, waihuꞌu pese wa, duré sõprub uptabi wa.
7 14:7-8 Wasiꞌuihâ na misi wahâiba na hã ꞌrâwimhã ãma ꞌre wahâimana waihuꞌu zaꞌra mono õ di za. Wanhibꞌapito te te wama ꞌre iꞌapisutu mono zéb zarina si, wa tãma ꞌre wahâimana zaꞌra. Duré wasiꞌuihâ na bâdâ ꞌre iwadâꞌâ zaꞌra mono zéb da hã wa te wasima ꞌre pisutu waihuꞌu zaꞌra mono õ di za. Wanhibꞌapito te te waꞌãma ꞌre iꞌapisutu mono zéb zarina si, wa za ꞌre wadâꞌâ zaꞌra, õhõ ma. Tahawa, wahâiba ré ꞌre wahâimana zaꞌra mono ré, duré oto ꞌre wadâꞌâ zaꞌra mono wamhã, isibꞌaꞌuwẽ na, wa za tãma ꞌre wahâimana uꞌâsi zaꞌra, simisutu.
8 ꞌMadâꞌâ 14:7
9 Cristu hã dâꞌâ nherẽ, ma tô apâ hâiwaꞌudu, hâiba ré ꞌre ihâimana zaꞌra mono norĩ nhibꞌapito da hã, duré ꞌre idâꞌâ zaꞌra mono norĩ nhibꞌapito da zama. Uburé isazeiꞌwa norĩ nhibꞌapito da, ma tô hâiwaꞌudu apâ. Tahawa, wa isibꞌaꞌuwẽ ꞌre wahâimana uꞌâsi zaꞌra oto, simisutu.
10 Tane nherẽ, e marĩ wa, te bété asisãnawã norĩ hã ꞌre iwẽꞌõ zaꞌra waꞌaba mo, asiré isazeiꞌwa ꞌre anomro aba mono nherẽ. E marĩ wa, te ꞌre iꞌruiwapari uꞌâsi zaꞌra waꞌaba mo, asisãnawã nherẽ. Niwapsi wa za uburé ꞌRe ihâimana uꞌâsi mono nhoꞌre aimasam ni, te te waꞌawaihuꞌu da, wahâimana wẽ na, duré wahâimana wasété na zama. Tamep si za te te daꞌawẽꞌõ na dâꞌâsina, asiꞌuihâ na ꞌre asiwẽꞌõ pese zaꞌra waꞌaba mono õ di za, tiꞌab ré.
11 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Wa hã Uburé Danhibꞌapito, tô sena ꞌre ĩhâimana mono zé hã aima waihuꞌu pese zaꞌra waꞌaba di. Duré tô sena aima ĩsiwasuꞌu zaꞌra waꞌaba zéb zarina, wa duré tô sena aima ropisutu zaꞌra waꞌwa. Ãne, wa aima ropisutu zaꞌra waꞌwa. Niwapsi te za aꞌuwẽ mono bâ dahiꞌrãtitõ ĩnhoꞌre ĩma asimro ni, dama ĩpire uptabi wa. Tawamhã tame dapoto mono bâ te za ĩnhisi zaꞌra ni, ĩnhisi na ꞌRe ĩhâimana uꞌâsi mono na.”
12 Tamep si, wa za oto wasiꞌuihâ na tãma wasiwasuꞌu zaꞌra ni wahâiba mono bâ, tiꞌab ré wahâimanazém na, uburé marĩ hã wa te ꞌre iꞌmanharĩ zaꞌra mono zém na hã.
13 Tahawa, wasiré isazeiꞌwa nherẽ, ꞌre iwasiwẽꞌõ zaꞌra mono zé hã wa za oto rẽme pese zaꞌra ni. Ãne zô si, te za asina ꞌre asõpré waꞌaba mo, marĩ iwẽ hã ꞌre iꞌmanharĩ zaꞌra waꞌaba mono zéb zô. Marĩ hã ꞌre ꞌmanharĩ zaꞌra waꞌaba mono ré, asiré isazeiꞌwa norĩ hã te te ꞌre aiꞌmadâꞌâ zaꞌra waꞌaba mono wa, asarina waꞌaba tiwasété na ꞌre siꞌmarõpãrĩ tõ zaꞌra mono da, te za marĩ iwẽ si ꞌre iꞌmanharĩ uꞌâsi zaꞌra waꞌaba mo.
14 Wa hã Wanhibꞌapito Zezusihi ãma ꞌre ĩhâimana mono wa, wa tô ĩsina waihuꞌu sena na, uburé dasa iwẽ na hã, duré iwasété õ na. Tane nherẽ, niꞌwam norĩ hã te za ãne hã te te ãma ꞌre rosaꞌrata upa zaꞌra: “Ã hã romnhi hã, wasétére di. ꞌRe ihâimana uꞌâsi mono ma hã wẽ õ di, wa te ꞌre ihuri mono da hã.” Ãne hã niꞌwam norĩ hã te te ãma ꞌre rosaꞌrata zaꞌra mono wamhã, õ norĩ ma si, romnhi hã wasété di tô. Tane nherẽ, te te siwi ꞌre wẽꞌõ zaꞌra mono nherẽ, te te ꞌre huri mono wamhã, dawasédé te wasuꞌu.
15 Ãté marĩ dasa hã te za ꞌre ihuri aba mo, asiré isazeiꞌwa norĩ te te siwi ꞌre iwẽꞌõ zaꞌra mono hã. Tawamhã ꞌre huri aba mono wamhã, ꞌRe ihâimana uꞌâsi mono te te dawi ꞌre awẽꞌõ mono newa, ãté te za ãne na tiwi ꞌre irobzeiꞌõ zaꞌra waꞌaba mo, tô õ norĩ wi hã. Ãne wamhã, asimizawi pese zé hã tãma ãma ꞌre uwaimrami zaꞌra waꞌaba mono õ di za. Tãma sawi uptabi zaꞌra wa, ma tô Cristu hã sada tidâꞌâ zaꞌra. Tahawa, romnhi hã asiré isazeiꞌwa norĩ te te ꞌre iwẽꞌõ zaꞌra mono hã, ꞌre huri aba mono õ di za, ꞌre huri aba mono wa, ta norĩ hã asa na tiwi ꞌre irobzeiꞌõ zaꞌra mono zéb zarina, tiwasété na ꞌre isiꞌmarõpãrĩ zaꞌra mono na ꞌre siꞌutõrĩ tõ mono da.
16 Ãne hã marĩ hã aima wasété aba õ nherẽ, ꞌre ꞌmanharĩ zaꞌra waꞌaba mono õ di za, da te ꞌre aiwasuꞌu wasété zaꞌra waꞌaba mono tõ da.
17 E marĩ wa. ꞌRe ihâimana uꞌâsi mono hã isazeiꞌwa norĩ ãma ꞌre isibꞌaꞌuwẽ mono zé hã, dasa hã da te ꞌre iwẽꞌõ zaꞌra mono zé, te te wasuꞌu õ di. Uburé marĩ hã da te ꞌre iꞌâhuri mono zéb zama te te wasuꞌu õ di duré. E marĩ te wasuꞌu tawamhã, ꞌRe ihâimana uꞌâsi mono, daꞌãma ꞌre isibꞌaꞌuwẽ mono zé hã. Ta hã ꞌRe ihâimana uꞌâsi mono nhimiroti zarina ꞌre idanomro wẽ mono zé, te wasuꞌu. Duré ꞌRe ihâimana uꞌâsi mono, Tipẽꞌẽzani na te te ꞌre idaꞌapawapto mono zéb zarina, rowẽ uptabi na ꞌre idanomro mono zé, te wasuꞌu, dato sina.
18 Ãne na niꞌwam norĩ hã Cristuhu ma, te te ꞌre romhuri wẽ zaꞌra mono wamhã, ꞌRe ihâimana uꞌâsi mono ma, te za te te sina ꞌre rowẽ zani zaꞌra, uburé ꞌre ihâimana wẽ zaꞌra mono zém na. Tawamhã te za duré da te ꞌre wẽsãmri zaꞌra, tiꞌai ãma ré.
19 Tahawa, rowẽ na wasiré ꞌre iwahâimana zaꞌra mono zéb zô si, wa za wasima ꞌre wanhopré. Wanhibꞌapito ãma wahâimana nhiptete uꞌâsi ꞌre wanomro mono da, ꞌre iwasipawaptob zaꞌra mono zém na, wa za duré ꞌre wanomro uꞌâsi.
20 Tawamhã dasa siwaꞌru ꞌre huri aba mono wa, ꞌRe ihâimana uꞌâsi mono, danhiptete sina ãma ꞌre idanomro mono zéb da, te te daꞌãma ꞌre iromhuri wẽ mono zé hã tiwi ꞌre uprosi zaꞌra waꞌaba mono tõ da, ãté ꞌre huri aba mono õ di za, siwaꞌru dasa na, romnhi hã. Tô sena uburé dasa hã iwẽ si da te ꞌre ihuri mono da hã. Tane nherẽ, dasa hã siwaꞌru ꞌre huri aba mono ré, asiré isazeiꞌwa nherẽ, sibꞌuware na ꞌre inomro mono norĩ hã te te ꞌre aiꞌmadâꞌâ zaꞌra waꞌaba mono wa, asarina waꞌaba tiwasété na ꞌre siꞌmarõpãrĩ zaꞌra mono wamhã, tawamhã, aiwasédé te za tô ꞌre iꞌmanharĩ zaꞌra waꞌaba mo.
21 Tahawa, romnhi hã siwaꞌru ꞌre huri aba mono õ di za, duré uva ꞌrãi waꞌu isé hã ꞌre âhuri aba mono õ di za, taha zarina asiré isazeiꞌwa norĩ hã tiwasété na apâ ꞌre siꞌmarõpãrĩ tõ zaꞌra mono da. Duré siwaꞌru marĩ aimawi hã ꞌre ꞌmanharĩ zaꞌra waꞌaba mono wa, niꞌwam norĩ hã tiwasété na apâ ꞌre siꞌmarõpãrĩ tõ zaꞌra mono da, ꞌre ꞌmanharĩ zaꞌra waꞌaba mono õ di za.
22 ꞌRe ihâimana uꞌâsi mono si te te ãma ꞌre awaihuꞌu mono da, te za ꞌrâwi asima si ãma ꞌre irosaꞌrata zaꞌra waꞌaba mo, siwaꞌru romnhi ꞌre huri aba mono wa, ãma ꞌre iꞌupa zaꞌra waꞌaba mono õ zém na hã. Niꞌwam norĩ hã uburé siwaꞌru, tisa te te sima ꞌre iwẽ uptabi zaꞌra mono zéb zarina, te te ꞌre ihuri mono na, ꞌre siwẽꞌõ zaꞌra mono õ wamhã, ipẽꞌẽ ꞌre tãma ꞌre rowẽ uptabi zaꞌra mono di za. Duré niꞌwam norĩ hã siwaꞌru dasa hã te te siwi ꞌre iwẽꞌõ zaꞌra mono zéb zarina, te te ꞌre ihuri mono õ na, ꞌre siwẽꞌõ zaꞌra mono õ wamhã, ipẽꞌẽ ꞌre tãma ꞌre rowẽ uptabi zaꞌra mono di za duré, ãne hã aiwa.
23 Tane nherẽ, niꞌwam norĩ hã romnhi siwaꞌru te te ꞌre huri mono nherẽ, ꞌrâwi ãma ꞌre siwawã zaꞌra mono wamhã, ꞌRe ihâimana uꞌâsi mono hã te za te te ꞌre wẽꞌõ zaꞌra, tisa na ꞌre isiwawã zaꞌra mono zéb zarina. Tane hã marĩ hã wa te ꞌre ꞌmanharĩ zaꞌra mono nherẽ, ꞌrâwi ãma ꞌre wasiwawã zaꞌra mono wamhã, taha na wa za wawasédé hã wa te ꞌre ꞌmanharĩ zaꞌra.
