Romanu 2:1-29
2 A norĩ waꞌwa hã, dapoꞌreꞌõ na ꞌre idanomro mono norĩ ãma, iwasédé hã ãma ꞌre saꞌra zaꞌra waꞌaba mono wamhã, te za ꞌre aiwasété zaꞌra waꞌaba mo. E marĩ wa. Dasine aiwasédé hã ꞌre ꞌmanharĩ zaꞌra waꞌaba mono wa, aiwa. Tahawa, dasine ꞌre aihâimana zaꞌra waꞌaba mono nherẽ, dawasédé hã daꞌãma ꞌre saꞌra zaꞌra waꞌaba mono wamhã, te za ꞌRe ihâimana uꞌâsi mono hã te te ꞌre aiwẽꞌõ pese zaꞌra waꞌwa dasiré. Tahawa, aiwasété ãna ꞌre aihâimana zaꞌra waꞌaba mono zém na ꞌre asiꞌmadâꞌâ waihuꞌu zaꞌra waꞌaba mono õ di za.
2 ꞌRe ihâimana uꞌâsi mono hã dapoꞌreꞌõ na ꞌre idanomro mono norĩ hã te te ꞌre iꞌawaihuꞌu mono zéb zarina, te tô te te ꞌre awẽꞌõ pese, iꞌuwaibaba si. Ãne hã, uburé wama waihuꞌu pese zaꞌra di.
3 Tane nherẽ, a norĩ waꞌwa hã dawasédé hã daꞌãma ꞌre isaꞌra zaꞌra waꞌaba mono na, te aiwasédé hã ꞌre iꞌmanharĩ zaꞌra waꞌaba mo. E ꞌRe ihâimana uꞌâsi mono nhimihâzé wi, ꞌrâwi ꞌre asisõꞌreptu zaꞌra waꞌaba mono da bâ, te ãne ꞌre iꞌmanharĩ zaꞌra waꞌaba mo.
4 Ãté te za ãne asima ꞌre inharĩ zaꞌra waꞌaba mo: “ꞌRe ihâimana uꞌâsi mono hã simizawi pese uptabi di. Dasiꞌuihâ na dawasédé hã da te ꞌre ꞌmanharĩ uꞌâsi zaꞌra mono nherẽ, daꞌãma ꞌre waꞌa suꞌu mono õ di. Tahawa, ĩwasédé te ꞌre ꞌmanharĩ mono nherẽ, te te ꞌre ĩꞌahâri suꞌu mono õ di.” Ãne hã asiꞌuihâ na asiꞌãma ꞌre rosaꞌrata zaꞌra waꞌaba mono õ di za. ꞌRe ihâimana uꞌâsi mono hã aiwasété wi ꞌre aipizari zaꞌra waꞌaba mono da si, te simiꞌẽ na te te ꞌre aiꞌmadâꞌâ zaꞌra waꞌwa, simizawi pese uptabi na. E ãne hã zahadu aima waihuꞌu zaꞌra waꞌaba õ di bété.
5 A norĩ waꞌwa hã aipẽꞌẽ tete uꞌâsi, te ꞌre aihâimana zaꞌra waꞌaba mo. Tahawa, ꞌRe ihâimana uꞌâsi mono hã te za ropsiꞌutõrĩzéb u hã nimahã na bâdâ hã iwa iwaptãꞌãzéb ãma, dazu aihâ zaꞌra waꞌwa, dawasété wa, za te te idaꞌawẽꞌõzéb ãma hã. Tame te za oto tinhimihâzé hã dama ãma uwaimra, iꞌuwaibaba si.
6 Marĩ hã da te ꞌre iꞌmanharĩ zaꞌra mono zéb uwaibaba, te za ꞌRe ihâimana uꞌâsi mono hã te te dama ꞌre awaꞌâbâ, iwẽ na hã duré iwasété na hã.
7 Niꞌwam norĩ si te marĩ hã simiꞌẽ na te te dama ꞌre ꞌmanharĩ uꞌâsi zaꞌra, iwẽ hã. Ta norĩ hã ꞌRe ihâimana uꞌâsi mono si te te ꞌre wẽsãmri zaꞌra mono da, te sina ꞌre simipari zaꞌra, duré iꞌrata ꞌre isiꞌubumroi uꞌâsi mono zé, te te tãma ꞌre apisutu mono da. Ta norĩ ma si, te za tô ꞌRe ihâimana uꞌâsi mono hã te te ꞌre apisutu, ꞌre isiꞌubumroi uꞌâsi mono zéb da hã, iꞌrata.
8 Duré niꞌwam norĩ hã sima si te marĩ na te te ꞌre rosaꞌrata zaꞌra, hâiba pisutu ãma ꞌre hâimana zaꞌra mono da. Ta norĩ hã uburé marĩ iwẽ hã te te siwi ꞌre wẽꞌõ zaꞌra, marĩ iwasété na si ꞌre hâimana zaꞌra mono da. Ta norĩ si te za ꞌRe ihâimana uꞌâsi mono hã saꞌẽtẽ te te ꞌre ahâ zaꞌra, poꞌre õ wa.
9 Uburé dawasété si, da te ꞌre iꞌmanharĩ zaꞌra mono norĩ hã te za te te ꞌre robzépata zaꞌẽtẽ zaꞌra, Zudeu norĩ hã, duré Zudeuꞌõ norĩ zama.
10 2:10-11 E niꞌwam norĩ hã taré Zudeu na ꞌre hâimana zaꞌra mono wa, te za tinhimihâzé hã te te tãma ꞌre baꞌa zaꞌra, ꞌRe ihâimana uꞌâsi mono hã. Mare di. Taha zarina, tinhimihâzé hã te te tãma ꞌre baꞌa zaꞌra mono õ di za. Duré e niꞌwam norĩ hã taré Zudeu na ꞌre hâimana zaꞌra mono wa, te za iwẽ hã te te tãma ꞌre anhomri, danhipai u. Mare di. Uburé aiwapsi ꞌRe ihâimana uꞌâsi mono ma hã, dapoto mono bâ. Tane nherẽ, uburé iwẽ si te te ꞌre iꞌmanharĩ zaꞌra mono norĩ ma si, te za ꞌRe ihâimana uꞌâsi mono hã iwẽ hã te te tãma ꞌre anhomri, Zudeu norĩ ma, duré zudeuꞌõ norĩ ma zama. Rowẽ uptabi si, te za ta norĩ ma si te te ꞌre apisutu. Ta norĩ si te za te te ꞌre awẽsãmri.
11 ꞌMadâꞌâ 2:10
12 ꞌRe ihâimana uꞌâsi mono nhimiroti na, duréihã Mozési te te irobꞌuiꞌérézé hã zudeuꞌõ norĩ ma, tãma ꞌre hâimana zaꞌra mono õ di. Tãma ꞌre hâimana zaꞌra mono õ nherẽ, tiwasété na si ꞌre hâimana zaꞌra mono wamhã, e ꞌRe ihâimana uꞌâsi mono ꞌrata ꞌre isiꞌubumroi uꞌâsi mono zéb da hã, te za te te sina ꞌre uwaimrami zaꞌra. Mare di. Te te sina ꞌre uwaimrami zaꞌra mono õ di za. ꞌRe ihâimana uꞌâsi mono nhimiroti ꞌrata na robꞌuiꞌéré hã Zudeu norĩ ma si, te ꞌre hâimana zaꞌra. Tahawa, ta norĩ hã tiwasédé te te ꞌre ꞌmanharĩ zaꞌra mono wa, te za ꞌRe ihâimana uꞌâsi mono hã tinhimiroti na robꞌuiꞌéré zarina, te te tãma ꞌre arowairébé, iwasété na te te ꞌre iꞌawaihuꞌu mono zéb uwaibaba.
13 E ꞌRe ihâimana uꞌâsi mono nhimiroti ꞌrata na robꞌuiꞌéré hã, taré dapoꞌre na da te ꞌre wapari zaꞌra mono nherẽ, te za ꞌRe ihâimana uꞌâsi mono hã te te ꞌre daꞌawẽsãmri. Mare di. Isimiroti zarina ꞌre dahâimana wẽ zaꞌra mono wapsi, te za te te ꞌre daꞌawẽsãmri, ꞌRe ihâimana uꞌâsi mono hã.
14 ꞌRe ihâimana uꞌâsi mono nhimiroti na Mozési te te irobꞌuiꞌérézé hã zudeuꞌõ norĩ ma, tãma ꞌre hâimana zaꞌra mono õ di. Tãma ꞌre hâimana zaꞌra mono õ nherẽ, siꞌuihâ na isimiroti zarina ꞌre hâimana wẽ zaꞌra mono wamhã, ꞌRe ihâimana uꞌâsi mono ma, te za te te tãma ãma ꞌre uwaimrami zaꞌra, tãma ꞌre hâimana zaꞌra mono õ nherẽ, ꞌRe ihâimana uꞌâsi mono nhimiroti na ibaihâ hã.
15 Ta norĩ hã siꞌuihâ na ꞌre hâimana wẽ zaꞌra mono wamhã, ꞌRe ihâimana uꞌâsi mono nhimiroti hã ipẽꞌẽ ꞌre, tãma ꞌre ihâimana uꞌâsi zaꞌra mono zé, te wasuꞌu. Duré iwẽ hã te te dama ꞌre ꞌmanharĩ zaꞌra mono wamhã, ꞌrâwi te za tipẽꞌẽ na ꞌre sisaze zaꞌra. Duré marĩ iwasédé hã te te ꞌre ꞌmanharĩ zaꞌra mono wamhã, ꞌrâwi te za tiwasété na ꞌre sisãmri zaꞌra. Tahawa, tipẽꞌẽ na ꞌrâwi ꞌre sisaze zaꞌra mono wamhã, duré ꞌrâwi tiwasété na ꞌre sisãmri zaꞌra mono wamhã, ꞌRe ihâimana uꞌâsi mono nhimiroti, ipẽꞌẽ ꞌre, tãma ꞌre ihâimana uꞌâsi zaꞌra mono zé, te wasuꞌu.
16 Ãne hã iwasuꞌuwẽ na te dama ꞌre irowasuꞌu mono zéb zarina, te za tô nimahã na tiromhâiba, ꞌRe ihâimana uꞌâsi mono nhimipisutuzéb zarina, Zezu Cristu hã daꞌãma isipoꞌozéb da hã. ꞌRâwi dasima si da te ꞌre irosaꞌrata zaꞌra mono na te za oto daꞌawaihuꞌu. Taha zarina te za dama arowairébé oto, Cristu hã.
Mozési hã ꞌRe ihâimana uꞌâsi mono nhimiroti na te te irobꞌuiꞌérézém na rowasuꞌu
17 Zudeu norĩ, ãhã na wa za aiꞌãma robꞌuiꞌéré zaꞌra waꞌwa. A norĩ waꞌwa hã, danhipai u ꞌRe ihâimana uꞌâsi mono te te ꞌre asawi pese uptabi zaꞌra waꞌaba mono na, te dama ꞌre asiwasuꞌu zaꞌra waꞌaba mo, isibꞌaꞌuwẽ ꞌre anomro aba mono wẽ te. ꞌRe ihâimana uꞌâsi mono nhimiroti na Mozési te te irobꞌuiꞌérézé hã, aima waꞌaba si ꞌre hâimana zaꞌra waꞌaba mono wẽ te, te ato sina ꞌre anomro aba mo, aima waꞌaba si ꞌre hâimana zaꞌra waꞌaba mono wa, ꞌRe ihâimana uꞌâsi mono hã te te ꞌre aiwẽsãmri zaꞌra waꞌaba mono da newa, aiwasédé hã te te oto aiꞌãma ꞌre iꞌaꞌmadâꞌâ zaꞌra waꞌaba mono õ zarina.
18 ꞌRe ihâimana uꞌâsi mono te te aima ꞌre iꞌapisutu aba mono zéb zarina ꞌre iꞌmanharĩ zaꞌra waꞌaba mono zéb da hã, aima waihuꞌu pese zaꞌra waꞌaba di. Duré ꞌRe ihâimana uꞌâsi mono nhimiroti ꞌrata na robꞌuiꞌéré hã ma tô ꞌre iwaihuꞌu zaꞌra waꞌaba mo, ãma ꞌre anomro wẽ waꞌaba mono da.
19 Ãne na te duré asiꞌãma si ꞌre irosaꞌrata upa zaꞌra waꞌaba mo: “Wa norĩ si datobꞌa ne ꞌre idanomro mono norĩ hã, wa wa te ꞌre simro, tô sena. Robra uꞌâsi ꞌre idanomro mono norĩ ma, wa wa te ꞌre rowaꞌa zaꞌra.
20 Duré ꞌre idahâimana wẽ zaꞌra mono zéb da hã, da te ꞌre iwaihuꞌu zaꞌra mono õ norĩ ma hã, wa wa te ꞌre roti zaꞌra iwẽ na, duré aiꞌuté ne hâimana nhimizaꞌrese ãna ꞌre ihâimana zaꞌra mono norĩ ma zama.” Ãne na te asiꞌãma ꞌre irosaꞌrata upa zaꞌra waꞌaba mo. Duré ꞌRe ihâimana uꞌâsi mono nhimiroti ꞌrata na robꞌuiꞌéré hã aima ꞌre hâimana zaꞌra waꞌaba mono wẽ te, te duré ãne na asiꞌãma ꞌre irosaꞌrata upa zaꞌra waꞌaba mo: “Wa norĩ ma si, wama waihuꞌu pese zaꞌra di, uburé roti iwẽ hã tô sena uptabi hã.” Ãne na te duré asiꞌãma ꞌre aiwata zaꞌra waꞌaba mo.
21 E marĩ wa, a norĩ waꞌwa hã dama ꞌre roti zaꞌra waꞌaba mono nherẽ, ꞌrâwi duré asima zama ꞌre roti zaꞌra waꞌaba mono õ di. Marĩ na dawi ꞌre danhipsaihuri zaꞌra mono tõ da, dama ꞌre roti zaꞌra waꞌaba mono nherẽ, te a norĩ waꞌaba zama marĩ na dawi ꞌre asipsaihuri zaꞌra waꞌaba mo.
22 Duré damro na dasiwi ꞌre danhipsaihuri zaꞌra mono tõ da, dama ꞌre roti zaꞌra waꞌaba mono nherẽ, te duré a norĩ waꞌwa hã aimro na asiwi ꞌre asipsaihuri zaꞌra waꞌaba mo. Duré uburé romhâiba ꞌmanharĩ hã ꞌRe ihâimana uꞌâsi mono upana, ãma ꞌre idawata zaꞌra mono zé hã asiwi ꞌre wẽꞌõ pese zaꞌra waꞌaba mono nherẽ, te ꞌri para ꞌre isimasa mono zéb u ꞌre asisisi aba mo, marĩ, ꞌre simiꞌuri zaꞌra waꞌaba mono da.
23 A norĩ waꞌwa hã Zudeu na da te ꞌre aiwaptẽrẽ zaꞌra waꞌwa, ꞌRe ihâimana uꞌâsi mono nhimiroti ꞌrata na robꞌuiꞌéré hã aima waꞌaba si ꞌre hâimana mono wẽ te, te dama asina ꞌre iwasuꞌu zaꞌra waꞌaba mo. Tane nherẽ, isimiroti si ꞌre ꞌmadâꞌâ zaꞌra waꞌaba mono õ di. Duré asiwi ꞌre wazéb zaꞌra waꞌaba mono õ di. Taha zarina, zudeuꞌõ norĩ ma hã tãma wẽ zaꞌra õ di, ꞌRe ihâimana uꞌâsi mono hã.
24 Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã:“A norĩ waꞌwa hã Zudeu na ꞌre aihâimana zaꞌra waꞌaba mono, ꞌRe ihâimana uꞌâsi mono nhimiroti zarina si ꞌre aihâimana zaꞌra waꞌaba mono õ wa, te zudeuꞌõ norĩ hã ꞌRe ihâimana uꞌâsi mono ãma te te ꞌre wasété zaꞌra.”
25 ꞌRe ihâimana uꞌâsi mono nhimiroti ꞌrata na robꞌuiꞌéré hã ꞌre ꞌmadâꞌâ pese zaꞌra waꞌaba mono wamhã, iꞌuwaibaba te za ꞌre asisihâiwata nhihâri zaꞌra waꞌaba mo. Tane nherẽ, isimiroti si ꞌre ꞌmadâꞌâ pese zaꞌra waꞌaba mono õ wamhã, sihâiwata nhihâri ãna ꞌre inomro mono norĩ ne, te za tãma ꞌre aihâimana zaꞌra waꞌaba mo, ꞌRe ihâimana uꞌâsi mono ma hã aiwa.
26 Zudeuꞌõ norĩ hã sihâiwata nhihâri ãna ꞌre nomro mono nherẽ, isimiroti ꞌrata na si ꞌre hâimana wẽ zaꞌra mono wamhã, isibꞌaꞌuwẽ ne, te za ꞌRe ihâimana uꞌâsi mono hã te te ꞌre ꞌmadâꞌâ zaꞌra, Zudeu norĩ ne.
27 A norĩ waꞌwa hã Zudeu na ꞌre aihâimana zaꞌra waꞌaba mono hã, ꞌRe ihâimana uꞌâsi mono nhimiroti ꞌrata na robꞌuiꞌéré hã ꞌre ꞌmadâꞌâ pese zaꞌra waꞌaba mono õ di, ibaihâ na robꞌuiꞌéré hã aima ꞌre hâimana zaꞌra waꞌaba mono nherẽ, duré asihâiwata nhihâri ré ꞌre aihâimana zaꞌra waꞌaba mono nherẽ. Tane nherẽ, niꞌwam norĩ hã zudeuꞌõ norĩ hã sihâiwata nhihâri ré, ꞌre hâimana zaꞌra mono õ nherẽ, te ꞌRe ihâimana uꞌâsi mono nhimiroti ꞌrada hã te te ꞌre ꞌmadâꞌâ pese zaꞌra. Taha zarina te za ꞌRe ihâimana uꞌâsi mono hã te te siwi ꞌre aiwẽꞌõ pese zaꞌra waꞌwa, te te ꞌre aihâ zaꞌra waꞌaba mono da, zudeuꞌõ norĩ si isimiroti hã te te ꞌre ꞌmadâꞌâ pese zaꞌra mono wa, aiꞌupana zaꞌra waꞌaba.
28 2:28-29 A norĩ waꞌwa hã, e asihâiwata nhihâri ré ꞌre anomro aba mono wa, te ꞌRe ihâimana uꞌâsi mono nhibꞌaꞌuwẽ uptabi na ꞌre aihâimana zaꞌra waꞌaba mo. E danhoꞌa uburé marĩ hã Zudeu hâimanazéb zarina si ꞌre ꞌmanharĩ zaꞌra waꞌaba mono wa, te za ꞌRe ihâimana uꞌâsi mono nhibꞌaꞌuwẽ uptabi hã ꞌre anomro aba mo. Mare di. Ãne hã iꞌuwaibaba nherẽ, iꞌuwaibaba õ di, ꞌRe ihâimana uꞌâsi mono ma hã. ꞌRâwi aipẽꞌẽ ꞌre, isimiroti hã aima ꞌre hâimana uꞌâsi zaꞌra waꞌaba mono wapsi, tawapsi te za isibꞌaꞌuwẽ uptabi na ꞌre aihâimana zaꞌra waꞌaba mo, ꞌRe ihâimana uꞌâsi mono Pẽꞌẽzani nhimipawaptob zarina si. ꞌRe ihâimana uꞌâsi mono nhimiroti ꞌrata na robꞌuiꞌéré hã danhoꞌa ꞌre iwapari zaꞌra waꞌaba mono zém na, tawamhã, isibꞌaꞌuwẽ uptabi na ꞌre anomro aba mono õ di za. ꞌRâwi aipẽꞌẽ ꞌre, isimiroti hã aima ꞌre hâimana uꞌâsi zaꞌra waꞌaba mono wapsi, tawapsi te za isibꞌaꞌuwẽ uptabi na ꞌre aihâimana zaꞌra waꞌaba mo. Isibꞌaꞌuwẽ uptabi na ꞌre ihâimana zaꞌra mono norĩ hã tiꞌai ãma ré, da te ꞌre wẽsãmri zaꞌra mono dai õ nherẽ, te ꞌRe ihâimana uꞌâsi mono si te te sima ꞌre wasuꞌu wẽ zaꞌra.
29 ꞌMadâꞌâ 2:28
