Romanu 3:1-31
3 Tawamhã Zudeu na ꞌre iꞌaihâimana zaꞌra waꞌaba mono zé, e taré, te bété asihâiwata nhihâri ré hã ꞌre anomro aba mo. E taré, te duré ꞌRe ihâimana uꞌâsi mono ma hã ꞌre hâimana.
2 Mare di. Tô sena tãma hã, Zudeu na ꞌre aihâimana zaꞌra waꞌaba mono zé hã. Tãma wẽ di, ꞌRe ihâimana uꞌâsi mono ma hã. E niha, wa za tawamhã ãne hã waihuꞌu zaꞌra ni, Zudeu norĩ ꞌre ihâimana zaꞌra mono zé hã. Duréihã ꞌRe ihâimana uꞌâsi mono hã ma tô Zudeu norĩ si te te sima ꞌre awẽ, isimiroti na robꞌuiꞌéré ꞌrada hã uburé daꞌudâna te te ꞌre ꞌmadâꞌâ pese zaꞌra mono da, dawi simani tõ da.
3 Tane nherẽ, niꞌwam norĩ hã Zudeu norĩ hã ꞌRe ihâimana uꞌâsi mono nhimiroti zarina ꞌre inomro mono na hã te te tãma ãma ꞌre uwaimrami zaꞌra mono õ di. E tawamhã ꞌRe ihâimana uꞌâsi mono hã asa te te tãma ãma ꞌre uwaimrami zaꞌra mono õ di za, uburé marĩ na te te tãma ãma ꞌre iropisutu zaꞌra mono zéb zarina.
4 Te za tô te te tãma ãma ꞌre uwaimrami uꞌâsi zaꞌra, te te tãma ꞌre iꞌaropisutu mono zéb zarina. Uburé tiꞌai ãma dazadawa nhipese na dasima ꞌre dahâimana zaꞌra mono nherẽ, ꞌRe ihâimana uꞌâsi mono si, sadawa nhipese õ di, tô sena hã. Ãne Ibaihâ iwazé pese na robꞌuiꞌéré, ꞌRe ihâimana uꞌâsi mono ãma hã:“A hã marĩ na dama ꞌre roti mono wamhã, tô sena asadawa nhipese õ na te za da te ꞌre aiwaihuꞌu zaꞌra, tô sena asimiroti na hã. Duré niꞌwam norĩ hã asadawa nhipe te te aiꞌãma ꞌre saꞌra mono wamhã, ta norĩ si isadawa nhipese na te za da te dasiwi ꞌre waihuꞌu zaꞌra, aiꞌupana.”
5 Niꞌwam norĩ hã te ãne na te te siꞌãma ꞌre rosaꞌrata upa zaꞌra: “Wa norĩ hã wahâimana wasété na si, wa za oto ꞌre wahâimana zaꞌra, ꞌre iwanomro wasété uptabi mono na, da te ꞌre wawaihuꞌu zaꞌra mono wa, ꞌRe ihâimana uꞌâsi mono si wasété ãna ꞌre imorĩ wẽ uptabi na, da te ꞌre waihuꞌu zaꞌra mono da, wanhipai u. Tawamhã wahâimana wasété na ꞌre wahâimana zaꞌra mono nherẽ, e te za te te ꞌre waꞌahâ zaꞌra, ꞌRe ihâimana uꞌâsi mono hã. Mare di. Te te ꞌre waꞌahâ zaꞌra mono õ di za.” Ãne te niꞌwam norĩ hã te te siꞌãma ꞌre rosaꞌrata upa zaꞌra.
6 E tawamhã iꞌuwaibaba te ta norĩ hã ãne na hã te te ꞌre rosaꞌrata zaꞌra. Mare di. Iꞌuwaibaba õ di. ꞌRe ihâimana uꞌâsi mono hã te tô iꞌuwaibaba si te te ꞌre daꞌahâ zaꞌra. Iꞌuwaibaba na si te marĩ na te te dama ꞌre arowairébé. Ãne zarina te te dama ꞌre arowairébé mono õ ꞌwaꞌâhã, aré te te daꞌawẽꞌõ waihuꞌu õ di, za daꞌãma isipoꞌozéb ãma, ꞌRe ihâimana uꞌâsi mono hã.
7 Ãté niꞌwam norĩ hã te za duré ãne na te te siꞌãma ꞌre rosaꞌrata upa zaꞌra: “Wa norĩ hã wawasédé, wa te ꞌre ꞌmanharĩ zaꞌra mono wamhã, ãté te za ãne na da te waꞌãma ꞌre rosaꞌrata zaꞌra: ‘Õ norĩ hã wasété uptabi na te ꞌre nomro. ꞌRe ihâimana uꞌâsi mono si, te wẽ uptabi na ꞌre hâimana, õhõ si siwaprosi.’ Ãne na te za ꞌRe ihâimana uꞌâsi mono si ꞌre imorĩ wẽ uptabi na, da te dasiwi ꞌre waihuꞌu zaꞌra, wawasété si, wa te ꞌre iꞌmanharĩ zaꞌra mono na, da te ꞌre iwawaihuꞌu zaꞌra mono zém na hã. E tawamhã iꞌuwaibaba, ꞌRe ihâimana uꞌâsi mono, wawasédé te te waꞌãma ꞌre iꞌazaꞌra mono zéb da hã. Mare di. Iꞌuwaibaba õ di.” Ãne na te duré niꞌwam norĩ hã te te siꞌãma ꞌre rosaꞌrata upa zaꞌra.
8 Taha zarina te duré te te sima ꞌre nharĩ zaꞌra: “Wawasété si, wa za tô wa te ꞌre ꞌmanharĩ uꞌâsi zaꞌra, ꞌRe ihâimana uꞌâsi mono si iwẽ uptabi na, da te dasiwi ꞌre waihuꞌu zaꞌra mono da.” Niꞌwam norĩ hã ma tô ãne na ĩnhimiroti wasédé hã ĩꞌãma saꞌra, ĩsiꞌuihâ na ãne hã te ãma waihuꞌu zaꞌra newa. Ma tô ĩꞌãma wasété zaꞌra. Tahawa, te za ꞌRe ihâimana uꞌâsi mono hã ta norĩ si siwi wẽꞌõ pese zaꞌra, iꞌuwaibaba.
Dahâimana wasété na ꞌre idahâimana zaꞌra mono na rowasuꞌu
9 Tawamhã wa norĩ hã Zudeu norĩ hã e taré Zudeu na ꞌre wahâimana zaꞌra mono wa, te za, zudeuꞌõ norĩ hâimanazém nhipai u, te te ꞌre waꞌawẽsãmri, ꞌRe ihâimana uꞌâsi mono hã. Mare di. Uburé aiwapsi tãma ꞌre idahâimana zaꞌra mono zé hã. Uburé dahâimana wasédé hã da te ꞌre iꞌmanharĩ zaꞌra mono na si te ꞌre dahâimana zaꞌra, Zudeu norĩ hã duré zudeuꞌõ norĩ zama. Dawasété hawi, dasiꞌuihâ na ꞌre dawairébé waihuꞌu mono õ di, dama siptete wa, dawasédé hã. Ãne, wa tô aima waihuꞌu pari zaꞌra waꞌwa.
10 Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré:“Niꞌwam norĩ hã siꞌuihâ na ꞌre inomro wẽ mono zém na, ꞌRe ihâimana uꞌâsi mono te te ꞌre iwẽsãmri zaꞌra mono zéb da hã, robaba di. Uburé te ꞌre danomro wasété, ꞌre idahâimana zaꞌra mono hã.
11 Duré niꞌwam norĩ hã ãne te te waihuꞌu zaꞌra õ di, dawẽ na ꞌre idanomro mono zé hã. Duré niꞌwam norĩ hã ꞌRe ihâimana uꞌâsi mono zô ꞌre sõpré mono õ di, ihâimanazém na te te ꞌre iwaihuꞌu zaꞌra mono zéb da hã. Ãne hã tãma robaba uptabi di, ꞌRe ihâimana uꞌâsi mono ma hã.
12 Aꞌuwẽ mono bâ ma tô ꞌRe ihâimana uꞌâsi mono wi, ꞌre dasipizari zaꞌra, dahâimanazé iwẽ nhiti.Dasiꞌuihâ na marĩ iwẽ hã da te ꞌre ꞌmanharĩ waihuꞌu zaꞌra mono õ di. Taré ma tô ꞌre danomro. Niꞌwam norĩ hã marĩ iwẽ hã te te ꞌre ꞌmanharĩ zaꞌra mono õ di. Mare uptabi di.
13 Uburé danhoto hã wasété di. Wasété uptabi di.Danhoto wasété na te dazadawa nhipese na, da te dasima ꞌre nharĩ wasété zaꞌra.Duré wahi hã te te ꞌre dahâzu mono wa, tiꞌwa waꞌu na te te ꞌre idanhimroi mono ne, te damreme na da te dasima ꞌre nharĩ wasété zaꞌra, rowẽ hã da te dasiwi ãma ꞌre uprosi zaꞌra mono da.
14 Damreme iwasété uptabi na si te dasiꞌãma da te ꞌre wasété zaꞌra.
15 Dasiꞌabaꞌré na te duré ꞌre dasiꞌuꞌa zaꞌra. Waptui pese na te duré ꞌre dasisimro.
16 Daro mono bâ ꞌre danomro mono sidâpâsi, te da te dasiwi ꞌre rowamnarĩ uꞌâsi zaꞌra. Tahawa, te dasisaꞌu hã robzeiꞌõ uꞌâsi ꞌre dahâimana zaꞌra.
17 Rowẽ na ꞌre idahâimana zaꞌra mono zéb da hã, dama saꞌrese õ di.
18 ꞌRe ihâimana uꞌâsi mono zama, da te dasiwi ꞌre hâimana wazé mono õ di.”
19 Duréihã ꞌRe ihâimana uꞌâsi mono nhimiroti na ma tô Mozési hã robꞌuiꞌéré, Zudeu norĩ ma, õhõ na si ãma ꞌre hâimana zaꞌra mono da. Tahawa, ꞌRe ihâimana uꞌâsi mono nhimiroti ꞌrata na robꞌuiꞌéré hã ꞌre hâimana siromo mono wa, niꞌwa hã tiwẽ na ꞌre imorĩ wasété õ na dama ꞌre siwasuꞌu waihuꞌu mono õ di. Uburé dawasété na ꞌre dasisãmri zaꞌra mono da si, te dama ꞌre hâimana, robꞌuiꞌéré ꞌrada hã, duré ꞌRe ihâimana uꞌâsi mono, dawasété na te te ꞌre idaꞌawẽꞌõ mono zé hã da te dasina ꞌre waihuꞌu zaꞌra mono da.
20 E ꞌRe ihâimana uꞌâsi mono nhimiroti ꞌrata na robꞌuiꞌéré zarina, marĩ hã da te ꞌre iꞌmanharĩ wẽ zaꞌra mono na, te za te te sima daꞌãma ꞌre aroti, dawasédé hã te te oto daꞌãma ꞌre aꞌmadâꞌâ tõ mono da, taha zarina te te oto ꞌre daꞌawẽsãmri mono da, dapoꞌreꞌõ nherẽ, te te ꞌre daꞌahâ zaꞌra mono tõ da. Mare di. Taha nai õ di. Uburé marĩ hã da te ꞌre iꞌmanharĩ wasété zaꞌra mono na, ꞌrâwi ꞌre dasiwaihuꞌu zaꞌra mono da si, te dama ꞌre hâimana, robꞌuiꞌéré ꞌrada hã.
ꞌRe ihâimana uꞌâsi mono te te ꞌre idaꞌawẽsãmri mono zém na rowasuꞌu
21 Tane nherẽ, ꞌRe ihâimana uꞌâsi mono ma tô oto dama waihuꞌu, te te ꞌre idaꞌawẽsãmri mono zém na hã, sõꞌawi da te oto ꞌre iwaihuꞌu zaꞌra mono zéb da hã. ꞌRe ihâimana uꞌâsi mono hã te te sima daꞌãma ꞌre aroti mono õ di, uburé marĩ hã da te ꞌre iꞌmanharĩ wẽ zaꞌra mono zéb zarina, dawasédé hã te te oto daꞌãma ꞌre iꞌaꞌmadâꞌâ mono õ zéb da hã, taha zarina te te oto ꞌre idaꞌawẽsãmri mono zéb da hã. Duréihã ꞌRe ihâimana uꞌâsi mono nhimiroti ꞌrata na robꞌuiꞌéréꞌwa norĩ hã ma tô ãne na ãma robꞌuiꞌéré zaꞌra, ꞌRe ihâimana uꞌâsi mono te te ꞌre idaꞌawẽsãmri mono zém na hã.
22 Zezu Cristu, Danhoꞌreptuiꞌwa na da te dasina ꞌre iꞌumnhasi zaꞌra mono zém na si, ma tô ꞌRe ihâimana uꞌâsi mono hã te te sima daꞌãma ꞌre aroti, dawasédé hã te te oto daꞌãma ꞌre aꞌmadâꞌâ tõ mono da, taha zarina si te te oto ꞌre daꞌawẽsãmri mono da, dawasété na ꞌre danomro mono nherẽ, te te oto ꞌre daꞌahâ zaꞌra mono tõ da. Uburé Zezu Cristu te te ꞌre isaze zaꞌra mono norĩ si, te te oto ꞌre awẽsãmri. Ãne hã aiwapsi te uburé tãma ꞌre hâimana zaꞌra, Zudeu norĩ hã, duré zudeuꞌõ norĩ zama.
23 Uburé te dawasété na aꞌuwẽ mono bâ ꞌre danomro. Tahawa, te ꞌRe ihâimana uꞌâsi mono ꞌre imorĩ wẽ uptabi zém nhiti ꞌre dahâimana zaꞌra, ꞌrâwi da te dasina ꞌre tété waihuꞌu zaꞌra mono ãna.
24 Tane nherẽ, ꞌRe ihâimana uꞌâsi mono nhiti ꞌre dahâimana zaꞌra mono nherẽ, Zezusi te te ꞌre isaze zaꞌra mono norĩ hã te te ꞌre awẽsãmri, daꞌãma ꞌre ipẽꞌẽzé mono zéb zarina, asa tãma ꞌre idasiwaꞌâbâ zaꞌra mono zéb zô, sina ꞌre simnhasi mono ãna. Cristu Zezusi hã tidâꞌâzém na ma tô daꞌawaꞌâ. Tahawa, ma tô dawasété hawi te te ꞌre daꞌawaibu. Taha na si te oto ꞌRe ihâimana uꞌâsi mono hã te te ꞌre daꞌawẽsãmri, dawasédé hã za oto te te daꞌãma ꞌre iꞌaꞌmadâꞌâ mono õ zéb zarina.
25 ꞌRe ihâimana uꞌâsi mono hã ma tô Zezusi hã pisutu, dazada idâꞌâzém na dawasédé, da te ꞌre iꞌmanharĩ zaꞌra mono zé hã te te dama ꞌre apari mono da, taha zarina tiwi ꞌrusimani da, iwaꞌrãmi daꞌãma ꞌre pẽꞌẽzé mono da. Duré taha na si te te ꞌre idaꞌawẽsãmri mono zé hã, ꞌrâwi da te dasina ꞌre waihuꞌu zaꞌra mono da, ma tô ãne da pisutu, Zezusi hã. Zezusi hã da te ꞌre sazei pese zaꞌra mono wapsi, te za dawasédé hã te te dama ꞌre apari. ꞌRe ihâimana uꞌâsi mono hã daꞌãma ꞌre waꞌa suꞌu mono õ wa, dawasédé hã te te daꞌãma ꞌre aꞌmadâꞌâ mono õ di aré.
26 Tane nherẽ, ãhã na hã dawasédé hã da te ꞌre iꞌmanharĩ zaꞌra mono zém na, te te daꞌãma ꞌre aꞌmadâꞌâ mono ãna ꞌre hâimana mono õ di oto. Te oto te te daꞌãma ꞌre aꞌmadâꞌâ uꞌâsi, uburé marĩ hã iꞌuwaibaba si te te ꞌre iꞌabꞌmanharĩ wẽ mono na, da te dasina ꞌre waihuꞌu zaꞌra mono da, duré uburé Zezusi hã da te ꞌre isazei pese zaꞌra mono norĩ hã te te ꞌre idaꞌawẽsãmri mono na, da te dasina ꞌre waihuꞌu zaꞌra mono da.
27 E tawamhã wasiꞌuihâ na, wa za wawẽ na wasina ꞌre wawata zaꞌra, ꞌRe ihâimana uꞌâsi mono te te ꞌre iwaꞌawẽsãmri mono na hã. Mare di. E marĩ wa. ꞌRe ihâimana uꞌâsi mono nhimiroti si, wa te ꞌre iꞌmadâꞌâ pese zaꞌra mono na, te te sima waꞌãma ꞌre aroti mono õ na dâꞌâsina, taha zarina wawasédé hã te te waꞌãma ꞌre aꞌmadâꞌâ tõ mono da. Taré, Zezusi hã wa te ꞌre isazei pese zaꞌra mono na, te te sima waꞌãma ꞌre aroti, taha zarina wawasédé hã te te oto waꞌãma ꞌre aꞌmadâꞌâ tõ mono da, taha zarina te te duré ꞌre waꞌawẽsãmri mono da.
28 Ãne hã wa tô wasina waihuꞌu pese zaꞌra ni oto. Tô sena, Zezusi hã da te dasina ꞌre umnhasi zaꞌra mono wapsi, te za tô ꞌRe ihâimana uꞌâsi mono hã te te sima daꞌãma ꞌre aroti, dawasédé hã te te oto daꞌãma ꞌre iꞌaꞌmadâꞌâ mono õ zéb zarina, te te oto ꞌre idaꞌawẽsãmri mono zéb da hã. Ta hã te te sima daꞌãma ꞌre aroti mono õ di, isimiroti na robꞌuiꞌéré ꞌrata zarina, marĩ hã uburé da te ꞌre iꞌmanharĩ wẽ zaꞌra mono na, dawasédé hã te te oto daꞌãma ꞌre iꞌaꞌmadâꞌâ mono õ zéb da hã, taha zarina te te duré ꞌre idaꞌawẽsãmri mono zéb da hã. Ãne wasuꞌu zarina, wa tô wa norĩ hã wasina waihuꞌu pese zaꞌra ni oto.
29 E Zudeu norĩ nhibꞌapito si, te ꞌRe ihâimana uꞌâsi mono hã ꞌre hâimana. E zudeuꞌõ norĩ ma hã, ꞌre hâimana mono õ di bété. Ta norĩ ma zama te duré ꞌre hâimana.
30 ꞌRe ihâimana uꞌâsi mono hã tô sena, misire uburé Danhibꞌapito uptabi. Zezusi hã te te ꞌre isazei pese zaꞌra mono zéb zarina si, te za te te sima ãma ꞌre aroti, iwasédé hã te te oto ãma ꞌre aꞌmadâꞌâ tõ mono da, taha zarina si te te oto ꞌre awẽsãmri mono da, Zudeu norĩ hã, duré zudeuꞌõ norĩ hã.
31 Zezusi hã da te dasina ꞌre iꞌumnhasi zaꞌra mono zém na si, ꞌRe ihâimana uꞌâsi mono hã dawasédé hã te te oto daꞌãma ꞌre aꞌmadâꞌâ tõ mono da, te te sima daꞌãma ꞌre aroti mono wamhã, e tawamhã, ꞌRe ihâimana uꞌâsi mono nhimiroti ꞌrata na robꞌuiꞌéré hã, wama zaꞌra hã taré hã. E wa te ꞌre ꞌmadâꞌâ pese zaꞌra mono õ di za bété. Wa za tô taha zama, wa te ꞌre ꞌmadâꞌâ pese zaꞌra, tô sena wa.
