Romanu 4:1-25
4 E niha wa za tawamhã wa te wasima ꞌre wasuꞌu ꞌrãzarõtõ zaꞌra, Abraꞌã wasiré Zudeu norĩ hiꞌrada hã. E niha ihâimanazé hã.
2 Ta hã uburé marĩ hã te te ꞌre iꞌabꞌmanharĩ wẽ mono na, ꞌRe ihâimana uꞌâsi mono, iwasédé hã te te oto ãma ꞌre ꞌmadâꞌâ mono tõ da, te te sima ãma roti ꞌwaꞌâhã, duré taha zarina Abraꞌã hã ꞌrâwi tiwẽ na sina ꞌre wata mono ꞌwaꞌâhã, te aré tô sena ꞌrâwi sina ꞌre wata. Tane nherẽ, marĩ hã te te ꞌre iꞌabꞌmanharĩ wẽ mono na, ꞌrâwi sina ꞌre wata waihuꞌu mono õ di Abraꞌã hã, taha zarina ꞌRe ihâimana uꞌâsi mono hã te te sima ãma roti õ wa, iwasédé hã te te oto ãma ꞌre iꞌmadâꞌâ mono õ zarina, te te iwẽsãmrizéb da hã.
3 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Abraꞌã hã ꞌRe ihâimana uꞌâsi mono si, ma tô te te sina ꞌre umnhasi uꞌâsi, te te tãma iropisutuzém na hã. Taha ãma si, ma tô sasõ. Tahawa, ma tô ꞌRe ihâimana uꞌâsi mono hã sima ãma roti, iwasédé hã te te oto ãma ꞌre ꞌmadâꞌâ tõ mono da, duré taha zarina si te te oto wẽsãmri da. Tahawa, tãma wẽ uptabi di, ꞌRe ihâimana uꞌâsi mono ma hã.”
à hã Abraꞌã hã, marĩ hã te te ꞌre iꞌabꞌmanharĩ wẽ mono na, ꞌrâwi sina ꞌre iwata mono õ zé wasuꞌu.
4 Niꞌwam norĩ hã te te dama ꞌre romhuri zaꞌra mono wamhã, da te ꞌre ipawaꞌâbâ zaꞌra mono ré, te ꞌre hâimana zaꞌra. E sõpru wa, te za taré isibꞌapito hã robꞌuiprazé hã te te tãma ꞌre sõmri zaꞌra. Mare di. Sõpru wa, te te tãma ꞌre sõmri zaꞌra mono õ di za. Te te tãma ꞌre iromhuri zaꞌra mono zé waꞌrãmip si, te za te te tãma ꞌre sõmri zaꞌra, ipawaꞌâ hã.
5 Tanei õ di, ꞌRe ihâimana uꞌâsi mono hã. Marĩ hã da te ꞌre iꞌmanharĩ wẽ zaꞌra mono na, te ꞌrâwi ꞌre dasiꞌmadâꞌâ ze zaꞌra, taha na si ꞌRe ihâimana uꞌâsi mono hã dawasédé hã te te oto daꞌãma ꞌre iꞌaꞌmadâꞌâ mono õ na, te te sima daꞌãma ꞌre aroti mono newa. Tane nherẽ, te te sima daꞌãma ꞌre aroti mono õ di, taha na dawasédé hã te te oto daꞌãma ꞌre aꞌmadâꞌâ tõ mono da, taha zarina te te oto ꞌre idaꞌawẽsãmri mono zéb da hã. ꞌRe ihâimana uꞌâsi mono hã da te dasina ꞌre umnhasi zaꞌra mono wapsi, te za te te sina ꞌre daꞌawẽsãmri, dawasédé hã za oto te te daꞌãma ꞌre aꞌmadâꞌâ mono õ wa, duré dawasété na ꞌre danomro mono nherẽ, te te ꞌre daꞌahâ zaꞌra mono tõ da.
6 ꞌRe ihâimana uꞌâsi mono te te sima daꞌãma ꞌre aroti mono õ di tô, uburé marĩ hã da te ꞌre iꞌmanharĩ wẽ zaꞌra mono zéb zarina, dawasédé hã te te oto daꞌãma ꞌre iꞌaꞌmadâꞌâ mono õ zéb da hã, taha zarina te te oto duré ꞌre idaꞌawẽsãmri mono zéb da hã. Da te ꞌre isaze zaꞌra mono zém na si te oto te te ꞌre daꞌawẽsãmri tô. Taha zarina, dama ꞌre irowẽ uptabi zaꞌra mono zém na hã, ma tô Davi hã ãne na ãma robꞌuiꞌéré, duréihã:
7 “Niꞌwam norĩ ãma hã, ꞌRe ihâimana uꞌâsi mono iwasédé te te oto ãma ꞌre iꞌaꞌmadâꞌâ mono õ norĩ ma si hã tãma ꞌre rowẽ zaꞌra mono di za, iwasété zaꞌra na oto ꞌre sipoꞌre puꞌu mono õ wa.
8 Uburé Danhibꞌapito, iwasédé hã te te oto ãma ꞌre saꞌrata zaꞌra mono õ wa, tãma ꞌre rowẽ zaꞌra mono di.”
9 Ãne hã, e sihâiwata nhihâri ré ꞌre inomro mono norĩ si, te za rowẽ uptabi na ꞌre nomro. E ã norĩ si, te wasuꞌu, Davi hã. Mare di. Sihâiwata nhihâri ãna ꞌre inomro mono norĩ zama, te wasuꞌu zaꞌra. Ãne na, wa tô aima waihuꞌu pari zaꞌra waꞌwa, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã:“Abraꞌã hã ꞌRe ihâimana uꞌâsi mono si, ma tô te te sina ꞌre umnhasi uꞌâsi, te te tãma iropisutuzém na hã. Taha ãma si ma tô sasõ. Tahawa, ma tô ꞌRe ihâimana uꞌâsi mono hã sima ãma roti, iwasédé hã te te oto ãma ꞌre ꞌmadâꞌâ tõ mono da, duré taha zarina si te te oto wẽsãmri da. Tahawa, tãma wẽ uptabi di, ꞌRe ihâimana uꞌâsi mono ma hã.”
10 E tawamhã Abraꞌã hã sihâiwata nhizâri siromo, ma tô ꞌRe ihâimana uꞌâsi mono hã sima ãma roti, te te wẽsãmri da. Mare di. Sihâiwata nhizâri õ ré, ma tô wẽsã.
11 ꞌRe ihâimana uꞌâsi mono hã, Abraꞌã hã te te sina iꞌumnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abraꞌã hã, ꞌRe ihâimana uꞌâsi mono te te iwẽsãmrizém na hã, te wama wasuꞌu zaꞌra, tô sena na uburé da te ꞌre iwaihuꞌu zaꞌra mono zéb da hã. Tahawa, Abraꞌã hã uburé ꞌRe ihâimana uꞌâsi mono, da te dasina ꞌre iꞌumnhasi zaꞌra mono norĩ hiꞌrada, ta hã. Duré sihâiwata nhihâri õ nherẽ, ꞌRe ihâimana uꞌâsi mono te te ꞌre iꞌawẽsãmri mono norĩ hiꞌrada.
12 Duré, isihâiwata nhihâri ré norĩ hiꞌrada, Zudeu norĩ hiꞌrada. E tawamhã sihâiwata nhihâri ré ꞌre hâimana zaꞌra mono wa, te ta norĩ hiꞌrada hã ꞌre hâimana, Abraꞌã hã. Mare di. Abraꞌã hã sihâiwata nhizâri õ ré, ꞌRe ihâimana uꞌâsi mono te te isazei pese ne, isine te te ꞌre isazei pese zaꞌra mono norĩ hiꞌrata si, te ꞌre hâimana, Abraꞌã hã.
Abraꞌãhã ma, ꞌRe ihâimana uꞌâsi mono te te iropisutuzé wasuꞌu
13 Duréihã ꞌRe ihâimana uꞌâsi mono hã Abraꞌãhã ma, ma tô ropisutu, uburé danhiptiꞌai mono bâ te te tãma ꞌre anhomri mono da, isihudu norĩ ma ropibu ma, isihudu sidâpâsi. E isimiroti hã uburé te te ꞌre ꞌmadâꞌâ pese uptabi mono wa, duré nimahã na marĩ na misi isimiroti na te te upai õ wa, ma tô ãne na tãma ropisutu. Mare di. Taha wab õ di. ꞌRe ihâimana uꞌâsi mono te te isazei pese na, te te wẽsãmri wa, ma tô ãne na tãma ropisutu siro.
14 ꞌRe ihâimana uꞌâsi mono nhimiroti ꞌmadâꞌâꞌwa norĩ hã Zudeu norĩ hã, isimiroti te te ꞌre iꞌmadâꞌâ pese zaꞌra mono zéb zarina, ꞌRe ihâimana uꞌâsi mono, ta norĩ ma, uburé danhiptiꞌai mono bâ te te tãma ꞌre iꞌanhomri mono da hã, te te ropisutu ꞌwaꞌâhã, taré te aré da te ꞌre saze zaꞌra, ꞌRe ihâimana uꞌâsi mono hã. Marĩ dai õ di aré. Taré te aré ꞌRe ihâimana uꞌâsi mono hã dama ropisutu, daro hã te te dama ꞌre iꞌanhomri mono zém na hã. Dama hã, aré marĩ õ di.
15 ꞌRe idahâimana wẽ zaꞌra mono zéb da hã, dasiꞌuihâ na da te dasima ꞌre ipisutu zaꞌra mono zé hã dama ꞌre hâimana zaꞌra mono õ ꞌwaꞌâhã, aré da te ãma ꞌre upai waihuꞌu zaꞌra mono õ di. Tane, ꞌRe ihâimana uꞌâsi mono nhimiroti na Mozési te te irobꞌuiꞌérézé hã dama ꞌre hâimana zaꞌra mono õ ꞌwaꞌâhã, aré da te ãma ꞌre upai waihuꞌu zaꞌra mono õ di duré. Tane nherẽ, te tô dama ꞌre hâimana, isimiroti na robꞌuiꞌéré ꞌrada hã. Tahawa, da te ꞌre waihuꞌu pese zaꞌra mono nherẽ, da te ꞌre ꞌmadâꞌâ pese zaꞌra mono õ wamhã, ꞌRe ihâimana uꞌâsi mono te te ꞌre idaꞌahâ zaꞌra mono zé, te wasuꞌu.
16 Tawamhã e marĩ hawi, ma tô ꞌRe ihâimana uꞌâsi mono hã Abraꞌãhã ma ropisutu, isihudu norĩ ma ropibu ma. Abraꞌã hã te te isazei pese zém hawi, ma tô tãma ropisutu. Te te tãma iropisutuzé waꞌrãmi, asa tãma isiwaꞌâbâzéb zô ꞌre isimnhasi mono õ na, da te dasina ꞌre iwaihuꞌu pese zaꞌra mono zéb da hã, ma tô ꞌRe ihâimana uꞌâsi mono hã Abraꞌã te te isazei pese zém hawip si, tãma ropisutu. E Mozésihi nhimiꞌuiꞌéré ꞌmadâꞌâꞌwa norĩ ma si, te ꞌRe ihâimana uꞌâsi mono nhimiropisutuzé hã tãma ꞌre hâimana zaꞌra, Zudeu norĩ te te ꞌre isazei pese zaꞌra mono norĩ ma si. Mare di. Abraꞌã hã, ꞌRe ihâimana uꞌâsi mono si te te sina iꞌumnhasi ne, uburé ꞌre idahâimana zaꞌra mono norĩ ma zama, te tãma ꞌre hâimana zaꞌra, ꞌRe ihâimana uꞌâsi mono nhimiropisutuzé hã. E marĩ wa. Abraꞌã hã uburé wahiꞌrata wa, uburé wasiré isazeiꞌwa norĩ hiꞌrata wa.
17 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Wa hã wa tô aipisutu, daro mono bâ da te dasina ꞌre ĩꞌumnhasi zaꞌra mono norĩ hiꞌrata na, da te ꞌre asisi zaꞌra mono da.”
ꞌRe ihâimana uꞌâsi mono nhimiropisutuzé hã, tô sena. Pire uptabi di. E marĩ wa. Õ hã tô sena, ꞌre hâimana mono wa. Taha si, ma tô Abraꞌã hã te te sina ꞌre umnhasi uꞌâsi. Taha si, ꞌre dadâꞌâ zaꞌra mono nherẽ, dahâiwaꞌutuꞌwa hã te ꞌre hâimana. Taha si duré marĩ õ ré, Ropoto mono ꞌwa hã.
18 4:18-19 Duréihã Abraꞌã hã 100 na ãma iwahubzéb u hã romhutu na ma tô ꞌRe ihâimana uꞌâsi mono hã tãma ropisutu, ãne: “Asihudu sidâpâsi, daꞌahâ uptabi di za.” Ãne robꞌuiꞌéré ꞌrata na iwasuꞌu hã. Abraꞌã hã romhutu na ma tô tidâꞌâzé hã sina waihuꞌu, ihâiba isibꞌuware na hã oto. Timro zama ma duré waihuꞌu, ꞌra waihuꞌu õ na, Sara hã. Tane nherẽ, siptete sina ma tô ꞌRe ihâimana uꞌâsi mono si saze, za iꞌra te te tãma isõmrizém na hã. Te te ꞌre wawãi mono ãna, te sô ꞌre simipari uꞌâsi, ꞌRe ihâimana uꞌâsi mono nhimiropisutuzéb zô hã, marĩ hã tãma hâimana õ nherẽ, sô ꞌre isimipari mono zéb da hã. Tahawa, ma tô ꞌRe ihâimana uꞌâsi mono hã pisutu, daro mono bâ da te ꞌre isazei pese zaꞌra mono norĩ hiꞌrata na, da te ꞌre sisi zaꞌra mono da.
19 ꞌMadâꞌâ 4:18
20 ꞌRe ihâimana uꞌâsi mono te te tãma iropisutuzém na hã te te ãma wawãi õ di. Imreme hã te te isazei pese zéb zarina, ma tô siptete uptabi na ꞌre hâimana. Te duré ãma ꞌre wata uꞌâsi.
21 ꞌRe ihâimana uꞌâsi mono te te tãma iropisutuzé hã za te te tãma ãma iꞌuwaimramizéb zô, te te duré ꞌre sazei pese uꞌâsi. Te te sazei utõrĩ ãna, Abraꞌã hã.
22 Tahawa, te te isazei pese na ma tô sima ãma roti ꞌRe ihâimana uꞌâsi mono hã, iwasédé hã te te oto ãma ꞌre ꞌmadâꞌâ mono tõ da, taha zarina te te wẽsãmri da, duré poꞌreꞌõ nherẽ, za te te azâri tõ da, dame.
23 Duréihã robꞌuiꞌéré ꞌrata na Abraꞌãhã wasuꞌu hã, ꞌRe ihâimana uꞌâsi mono te te iwẽsãmrizém na hã, taha wasuꞌu si õ di.
24 Wa norĩ zama, wa te wasina ꞌre iꞌumnhasi zaꞌra mono norĩ hã te za duré te te ꞌre waꞌawẽsãmri, Wanhibꞌapito Zezusihi hâiwaꞌutuꞌwa, wa te wasina ꞌre iꞌumnhasi zaꞌra mono norĩ hã.
25 ꞌRe ihâimana uꞌâsi mono hã ma tô Zezusi hã dama tisõ, da te dasiwi wĩrĩ da, wawasété na ꞌre wanomro mono wa. Ma tô duré hâiwaꞌutu, taha na te te ꞌre waꞌawẽsãmri mono da, wawasédé hã te te oto waꞌãma ꞌre aꞌmadâꞌâ tõ mono da, ꞌRe ihâimana uꞌâsi mono hã.
