Romanu 9:1-33
9 Tô sena, wa za aima rowasuꞌu zaꞌra waꞌwa. Wa hã Cristuhu te, ꞌre ĩmorĩ wa, ꞌre ĩzadawa nhipese mono õ di. ꞌRe ihâimana uꞌâsi mono Pẽꞌẽzani te te ĩma iwaihuꞌuzéb zarina, duré ꞌrâwi ĩpẽꞌẽ na te ĩsiꞌãma ꞌre irosaꞌrata mono zéb zarina, wa tô waihuꞌu, dama ꞌre ĩzadawa nhipese mono õ na hã.
2 9:2-3 Ĩsiré Zudeu norĩ ãma hã, ãma ꞌre ĩpẽꞌẽzé uptabi zaꞌra mono di, Cristu hã te te siwi ꞌre wẽꞌõ zaꞌra mono wa. Tahawa, te duré ĩwi ꞌre robzeiꞌõ pese, ĩpẽꞌẽ ꞌremhã. Ta norĩ ãma ꞌre ĩpẽꞌẽzé uptabi zaꞌra mono wa, wa aré te ĩsima ꞌre rosaꞌrata uꞌâsi ĩpẽꞌẽ na, ꞌRe ihâimana uꞌâsi mono ma, ĩsipisutu da, iꞌupana zaꞌra te te ꞌre ĩwẽꞌõ mono da, duré Cristuhu nhiti, iꞌupana ꞌre ĩhâimana uꞌâsi zaꞌra mono da. Ãne hã ꞌRe ihâimana uꞌâsi mono hã te te ĩma ꞌmanharĩ dai õ nherẽ, wa taré ĩsiwaihuꞌu, ĩsiré Zudeu norĩ ãma ꞌre ĩpẽꞌẽzé uptabi zaꞌra mono zém na. Ãne na, wa tô aima ĩsiwasuꞌu zaꞌra waꞌwa, ꞌre ĩzadawa nhipese mono õ na hã.
3 ꞌMadâꞌâ 9:2
4 Ta norĩ hã ꞌRe ihâimana uꞌâsi mono nhimipisudu, te ꞌre hâimana zaꞌra. Ta norĩ ãma, ma tô ꞌre ꞌra zaꞌra, ꞌRe ihâimana uꞌâsi mono hã. Ta norĩ ma si, ma tô rowaꞌa na aré iꞌrata ꞌre sãmra zaꞌra ꞌrâwi, iwaihuꞌu pese zé hã duré ihâimana wẽ zé hã te te waihuꞌu zaꞌra da. Simisutu siré, ãma ꞌre hâimana uꞌâsi zaꞌra mono da, ma tô duré marĩ iwẽ hã te te tãma ꞌre apisutu. Isimiroti na Mozési te te irobꞌuiꞌérézé hã ma tô duré tãma sõmri zaꞌra. Ta norĩ ma, ma tô duré ꞌre siwaihuꞌu zaꞌra, iꞌuwaibaba si ãma ꞌre iwata zaꞌra mono zéb da hã. Ta norĩ ma, ma tô duré ahâ na te te tãma ꞌre aropisutu, Zudeu norĩ ma, za te te tãma ãma ꞌre iꞌaꞌuwaimrami mono zém na hã.
5 Wahiꞌrata norĩ nhihudu uptabi, te ta norĩ hã ꞌre hâimana zaꞌra, dama ipire uptabi zaꞌra norĩ nhihudu. Cristu hã Zudeu hâiba na, ma tô podo, tiꞌai ãma. Cristu hã ta hã, ꞌRe ihâimana uꞌâsi mono, uburé marĩ hã te te ꞌre iꞌaꞌmadâꞌâ mono. Taha ãma uburé ꞌre wawata uꞌâsi zaꞌra waꞌaba mono. Tô sena, wa ãne na aima ãma rowasuꞌu zaꞌra waꞌwa.
6 E tawamhã, Izaraéu nhihudu norĩ hã Cristu te te siwi ꞌre wẽꞌõ zaꞌra mono wa, te te tãma ãma ꞌre aꞌuwaimrami mono õ di, ꞌRe ihâimana uꞌâsi mono, te te tãma ꞌre iropisutu zaꞌra mono zém na hã. Ma tô te te tãma ãma ꞌre aꞌuwaimrami, tô. Izaraéu nhihudu norĩ hã, ꞌRe ihâimana uꞌâsi mono nhimipisudu hã aihĩni ꞌre hâimana zaꞌra mono õ di, isibꞌaꞌuwẽ uptabi, ꞌre nomro mono da.
7 Abraꞌãhã nhihudu norĩ hã uburé pese ꞌRe ihâimana uꞌâsi mono ꞌra na ꞌre hâimana zaꞌra mono dai õ di. Duréihã ꞌRe ihâimana uꞌâsi mono hã ma tô ãne na Abraꞌãhã ma ropisutu, romhâ ré: “Izaquihi nhihudu norĩ si, te za ĩnhibꞌaꞌuwẽ uptabi hã ꞌre hâimana zaꞌra.” Ãne ma tô tãma waihuꞌu siro, ꞌRe ihâimana uꞌâsi mono hã.
8 Tahawa, Abraꞌãhã nhihudu mono norĩ hã ꞌRe ihâimana uꞌâsi mono ꞌra, aihĩni ꞌre inomro mono õ na, te wasuꞌu ã hã, duréihã Abraꞌãhã ma, ꞌRe ihâimana uꞌâsi mono te te iwaihuꞌuzém na. Abraꞌã hã ꞌRe ihâimana uꞌâsi mono nhimiropisudu hã te te ãma isaze ne, tane duré isimiropisutu na, da te ꞌre isaze zaꞌra mono norĩ si, te za Abraꞌãhã nhihudu ne oto ꞌre dahâimana zaꞌra.
9 Duréihã ꞌRe ihâimana uꞌâsi mono hã Abraꞌãhã ma, te te iropisutuzé hã, ãne isimiroti wasuꞌu hã: “Wahub amo na, wa za duré we atẽme wi, tô ã aꞌamo za duré iwa iwaptãꞌãzém na. Tawamhã apâ we atẽme ĩwisi õ ré, te za Saraha ma iꞌra podo, aibâ na.” Ãne duréihã Abraꞌãhã ma, ꞌRe ihâimana uꞌâsi mono te te iropisutuzé hã.
10 Tawamhã Saraha ꞌra hã ma tô tiprédu oto, Izaqui hã. Ta hã wahiꞌrada. Prédu wamhã, ma tô timro, Rebecaha ãma. Ta hã ma tô duré tiꞌra, iꞌra maparane isiꞌubza hã, aibâ zahuré hã.
11 9:11-12 Tane nherẽ, idiꞌi ꞌre, zahadu hâimana zahuré nherẽ, duré marĩ iwẽ hã te te waihuꞌu zahuré õ nherẽ, zahadu marĩ iwasédé hã te te duré waihuꞌu zahuré õ nherẽ, ma tô ãne ꞌRe ihâimana uꞌâsi mono hã tãma waihuꞌu siro, Rebecaha ma: “Idubꞌrada hã te za tinoi ma wapu na ꞌre hâimana.” Ãne ma tô ꞌRe ihâimana uꞌâsi mono hã ino si sima pisutu, tidubꞌrata ma, pire na ꞌre hâimana mono da. E marĩ hã te te ꞌre iꞌmanharĩ wẽ zahuré mono zéb zarina, ma tô ino si sima pisutu, ꞌRe ihâimana uꞌâsi mono hã. Mare di. Taha wab õ di. Siꞌuihâ na te te sima iwẽzéb uwaibaba, ma tô sima pisutu, ino si.
12 ꞌMadâꞌâ 9:11
13 Ãne ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã: “Zacoho si, ĩma sawi di. Ezauhu si hã te ĩsima wẽ õ di.” Ãne ꞌRe ihâimana uꞌâsi mono, siꞌuihâ na te te sima iwẽzéb zarina, Zaco te te sima ipisutuzé hã, idubꞌrata upana.
14 Ãté ãne na te za asima ꞌre irosaꞌrata zaꞌra waꞌaba mo: “ꞌRe ihâimana uꞌâsi mono hã te te sima iwẽzéb zarina, ino si te te sima ipisutu na hã ma tô ãma upa. Iꞌuwaibaba õ di.” Ãne na hã asima ãma ꞌre rosaꞌrata zaꞌra waꞌaba mono õ di za. Iꞌuwaibaba si te te dama ãma ꞌre aꞌuwaimrami uꞌâsi, ꞌRe ihâimana uꞌâsi mono hã. Te te dama ãma ꞌre aꞌupai mono õ di.
15 Duréihã Mozésihi ma, ma tô ãne na siwasuꞌu: “Niꞌwam norĩ ãma ꞌre ĩpẽꞌẽzé zaꞌra mono da, te ĩsima ꞌre wẽ zaꞌra mono wamhã, wa za tô ãma ꞌre ĩpẽꞌẽzé zaꞌra, ãma ꞌre ĩsiwãrĩ zaꞌra mono da, ta norĩ ãma hã. Duré niꞌwam norĩ ãma ꞌre ĩpẽꞌẽzé zaꞌra mono da, te ĩsima ꞌre wẽ zaꞌra mono õ wamhã, ãma ꞌre ĩpẽꞌẽzé zaꞌra mono õ di za tô, ta norĩ ãma hã, te ꞌre apawapto mono da.” Ãne Mozésihi ma, isiwaihuꞌuzé hã, ꞌRe ihâimana uꞌâsi mono hã.
16 Tahawa, da te dasima ꞌre iwẽ zaꞌra mono zéb zarina, te te ꞌre daꞌapisutu mono õ di, daꞌãma ꞌre ipẽꞌẽzé mono zém na hã, ꞌRe ihâimana uꞌâsi mono hã. Duré dasiꞌuihâ na sô ꞌre idasiwasutu zaꞌra mono na, te te ꞌre daꞌapisutu mono õ di, daꞌãma ꞌre ipẽꞌẽzé mono zém na hã. Siꞌuihâ na te te sima ꞌre idaꞌawẽ mono zéb zarina si, te za tô daꞌãma ꞌre pẽꞌẽzé, daꞌãma ꞌre isiwãrĩ mono zéb da hã.
17 Ãne ꞌRe ihâimana uꞌâsi mono mreme na Ibaihâ iwazé pese na ãne na ãma robꞌuiꞌéré hã, ꞌRe ihâimana uꞌâsi mono hã apito Faraoho ma te te irowasuꞌuzém na, ãne:“Wa hã wa tô aipisutu, dama asiꞌapito da. Wa tô duré nasi aiꞌrãnhito, asimirosaꞌrata nhiptete na aihâimana mono da, aꞌâ. Wa tô duré nasi aima robꞌmanharĩ wasété, ĩnhimiwaihuꞌu pese zém na, da te ꞌre ĩwaihuꞌu zaꞌra mono da, duré daro mono bâ ĩnhisi na, da te ꞌre ĩwaihuꞌu pese zaꞌra mono da oto.”
18 Tahawa, ꞌRe ihâimana uꞌâsi mono hã niꞌwam norĩ ãma ꞌre pẽꞌẽzé zaꞌra mono da, te te sima ꞌre wẽ zaꞌra mono wamhã, te za tô ãma ꞌre pẽꞌẽzé zaꞌra, ãma ꞌre siwãrĩ zaꞌra mono da. Duré te te sima ꞌre idaꞌawẽ mono zéb uwaibaba, te za te te ꞌre daꞌaꞌrãnhito, danhimirosaꞌrata wasété nhiptete na aꞌâ ꞌre dahâimana zaꞌra mono da.
ꞌRe ihâimana uꞌâsi mono, te te sima ꞌre idaꞌawẽ mono zéb zarina si, marĩ hã te te dama ꞌre iꞌapisutu mono zé wasuꞌu
19 Ãté niꞌwam norĩ hã ãne waꞌrãmi te za te te ĩma ꞌre nharĩ zaꞌra, asiré ꞌre aihâimana zaꞌra waꞌaba mono norĩ hã. Ãté ãne te za ta norĩ hã te te ĩma ꞌre nharĩ zaꞌra: “ꞌRe ihâimana uꞌâsi mono hã danhimirosaꞌrata wasété nhiptete na aꞌâ ꞌre dahâimana zaꞌra mono da, te te ꞌre daꞌaꞌrãnhito mono wamhã, ãne wamhã, e niha te za te te siwi ꞌre daꞌawẽꞌõ. Te te siwi ꞌre daꞌawẽꞌõ waihuꞌu mono õ di za. E ꞌwa hã, te ꞌRe ihâimana uꞌâsi mono nhimipisutu da, hâimana nhiptete na ꞌre hâimana. Robaba di. Niꞌwai õ di.” Ãté, ãne te za niꞌwam norĩ hã te te ĩma ꞌre nharĩ zaꞌra, te te ꞌre waihuꞌu zaꞌra mono õ nherẽ.
20 E a norĩ waꞌwa hã ꞌRe ihâimana uꞌâsi mono ma, aipire zaꞌra waꞌaba bâ, te za ãne na ĩma ꞌre inharĩ zaꞌra waꞌaba mo. Piza na zé ꞌmanharĩ hã, e tiꞌmanharĩꞌwa te za sina sadanharĩ zaꞌra, ãne: “E marĩ da, ma tô ãne iwaꞌabꞌmanha.” Ãne na te te sina sadanharĩ waihuꞌu zaꞌra õ di za.
21 Iꞌmanharĩꞌwa hã te te sima iwẽzéb uwaibaba si, te za zé hã te te ꞌre abꞌmanharĩ, piza na. Zé hã te te su pese wamhã, misi te za oto sada ubꞌrã. Tawamhã te za sima rosaꞌrata, piza maparane te te sima ꞌmanharĩ da, ãma. Tawamhã te te iꞌmanharĩ ꞌrada hã, wẽ uptabi na te za ꞌmanha, iꞌmadâꞌâ ze da hã. Duré ihâiba amo hã siꞌabaꞌré na te za ꞌmanha, wẽ prã na, marĩ da si ꞌre hâimana mono da, taré.
22 Tane te za duré ꞌRe ihâimana uꞌâsi mono hã waꞌmanharĩꞌwa hã marĩ hã te te wama ꞌre apisutu, zé ꞌmanharĩꞌwa ne. Te te sima ꞌre iwẽ mono zéb zarina, te za uburé marĩ hã te te dama ꞌre apisutu, iwẽ hã duré iwẽ prã hã. Ta hã te te sima ꞌre wẽ uꞌâsi, tiwaihuꞌu pese na dapoꞌreꞌõ norĩ hã te te ꞌre ahâ zaꞌra mono da, taha zarina isimihâ nhiptetezém na da te dasina ꞌre waihuꞌu zaꞌra mono da. Tane nherẽ, te te siwi ꞌre iꞌawẽꞌõ pese mono norĩ ãma hã, ꞌre waꞌa suꞌu mono õ di, za te te ꞌre idaꞌuprosi zaꞌra mono norĩ ãma hã.
23 Ãne hã ma tô duré te te sima ꞌre wẽ, pire na ꞌre ihâimana wẽ uptabi mono zém na, dama ꞌre siwaihuꞌu mono da. Uburé waꞌãma ꞌre ipẽꞌẽzé mono zéb zarina, waꞌãma ꞌre isiwãrĩ zaꞌra mono norĩ ma, ma tô ãne na wama ꞌre siwaihuꞌu, ꞌRe ihâimana uꞌâsi mono hã. Wa norĩ hã ma tô oto te te ꞌre waꞌapisutu siro, rowẽ uptabi ãma iꞌrata ꞌre wahâimana uꞌâsi zaꞌra mono da.
24 Wa norĩ hã ma tô ꞌRe ihâimana uꞌâsi mono hã te te ꞌre waꞌapisutu, isibꞌaꞌuwẽ uptabi hã oto ꞌre wanomro mono da. E ꞌwam norĩ hã tawamhã, ꞌRe ihâimana uꞌâsi mono te te ꞌre iꞌapisutu mono norĩ hã. Wa norĩ hã Zudeu norĩ hã aihĩni õ nherẽ, duré zudeuꞌõ norĩ hã aihĩni õ nherẽ, ma tô wasiwazari te te ꞌre waꞌapisutu, isibꞌaꞌuwẽ oto ꞌre wanomro mono da, wasiré.
25 Duréihã ꞌRe ihâimana uꞌâsi mono zadawa ꞌmahârâꞌwa hã ma tô imreme na robꞌuiꞌéré, Ozéia na isisi hã. Zudeuꞌõ wasuꞌu na ma tô ãne na robꞌuiꞌéré:“Ĩnhibꞌaꞌuwẽꞌõ na aré ꞌre inomro mono norĩ hã, wa za oto ĩnhibꞌaꞌuwẽ na te ꞌre sisi zaꞌra.Aré te ꞌre isawi zaꞌra mono õ norĩ hã, wa za oto ĩma isawi pese na te ꞌre waptẽrẽ zaꞌra.
26 Tirob ãma ꞌre siꞌubumroi mono ré, wa tô aré te tãma ꞌre nharĩ zaꞌra, ãne: A norĩ waꞌwa hã ĩnhibꞌaꞌuwẽꞌõ na te ꞌre aihâimana zaꞌra waꞌaba mo. Tane nherẽ, tame ꞌre siꞌubumroi mono ré, wa za oto ĩꞌra na te ꞌre sisi zaꞌra, wa hã ꞌRe ĩhâimana uꞌâsi mono ꞌra na.”
27 9:27-28 Izaias hã ma tô duré ãne na ãma robꞌuiꞌéré, Izaraéu nhihudu norĩ ãma hã:
“Uburé Danhibꞌapito hã te za saꞌẽtẽ daꞌahâ zaꞌra waptu na, daro mono bâ dawasété na te te ꞌre idaꞌawaihuꞌu mono zéb zarina. Tahawa, Izaraéu nhihudu norĩ hã â poré zaihâ na supara ꞌre isimiꞌwara mono ne, ahâ uptabi nherẽ, te za umro na te te ꞌre anhoꞌreptu.”
28 ꞌMadâꞌâ 9:27
29 Izaias hã ma tô duré ãne na robꞌuiꞌéré:“Uburé Danhibꞌapito hã danhipai u Isiptete uptabi, te ꞌre hâimana. Õ hã uburé wahiꞌrata norĩ hã Zudeu norĩ hã te te wawi ꞌre aꞌuprosi mono ꞌwaꞌâhã, wa aré wasiré Zudeu norĩ hã ꞌre wasiꞌutõrĩ pese, Sodoma ãma uburé idasiꞌutõrĩ ne, duré Gomora ãma idasiꞌutõrĩ ne. Tane nherẽ, ma tô niꞌwam norĩ ãma tipẽꞌẽzé zaꞌra, te te sõꞌreptu zaꞌra da, uburé siꞌutõrĩ tõ da, wasiré Zudeu norĩ hã.”
Zudeu norĩ hã Cristu te te siwi ꞌre iwẽꞌõ zaꞌra mono zé wasuꞌu
30 E marĩ te wama wasuꞌu zaꞌra, tawamhã, ã hã. E niha, wa za tawamhã ãma waihuꞌu zaꞌra ni, ãhã wasuꞌu na hã. Ãne, wa za ãma waihuꞌu zaꞌra ni. Zudeuꞌõ norĩ hã ꞌRe ihâimana uꞌâsi mono, iwasédé hã te te ãma ꞌre iꞌaꞌmadâꞌâ mono õ zarina, te te ꞌre iwẽsãmri zaꞌra mono zéb da hã, te te aré sô ꞌre robꞌruiwapari zaꞌra mono õ nherẽ, ma tô te te ꞌre awẽsãmri, taré te te ꞌre isaze zaꞌra mono zém na si nherẽ.
31 Tane nherẽ, Izaraéu nhihudu norĩ hã ꞌRe ihâimana uꞌâsi mono nhimiroti ꞌrata na Mozési te te irobꞌuiꞌéré hã te te ꞌre iꞌmadâꞌâ pese zaꞌra mono na, ꞌRe ihâimana uꞌâsi mono, iwasédé te te oto ãma ꞌre aꞌmadâꞌâ tõ mono da, duré taha zarina te te ꞌre awẽsãmri mono da, te te sima ãma ꞌre aroti mono newa, ma tô ta norĩ hã taré sô ꞌre siꞌwapé zaꞌra, te te ꞌre iꞌawẽsãmri mono zéb zô. ꞌRe ihâimana uꞌâsi mono hã, iwasédé hã te te ãma ꞌre iꞌaꞌmadâꞌâ mono õ zarina, te te ꞌre iwẽsãmri zaꞌra mono zéb da hã, te te sina tãma ꞌre uwaimrami zaꞌra mono õ di, ta norĩ hã.
32 E marĩ wa, te te sina tãma ꞌre uwaimrami zaꞌra mono õ di. ꞌRe ihâimana uꞌâsi mono te te ꞌre isazei pese zaꞌra mono zém na si, te te ꞌre iwẽsãmri zaꞌra mono zéb da hã, ꞌre siꞌmadâꞌâ zaꞌra mono õ wa, ꞌRe ihâimana uꞌâsi mono nhimiroti ꞌrata na robꞌuiꞌéré na si ꞌre siꞌmadâꞌâ ze zaꞌra mono wa. Cristuhu ãma, wa za oto ẽne hã aima ãma simiréꞌé zaꞌra waꞌwa. Ẽtẽ tõmo wawẽ hã bâdâdi wa, ꞌre saꞌwari mono wa, te za te te ꞌre daꞌmarõpãrĩ zaꞌra. Tahawa, te za ꞌre dasirẽme zaꞌra. Tane duré, Zudeu norĩ hã ma tô Cristu te te siwi ꞌre iwẽꞌõ zaꞌra mono zém na siꞌuihâ na sima ꞌre simizaꞌrepese zaꞌra, wedepoꞌo nhonhiꞌrãmi na dazada idâꞌâzé hã taré newa, Cristu hã da te ꞌre isaze zaꞌra mono zém na, ꞌRe ihâimana uꞌâsi mono te te ꞌre idaꞌanhoꞌreptui mono õ newa.
33 ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã, ãne:“Maꞌãpé, ĩwapari pese zaꞌra waꞌaba. Zeruzalẽ u, wa za niꞌwa hã satõ, Siã na saꞌa nhisi u. Ẽtẽ tõmo wawẽ hã bâdâdi wa, dawi ꞌre isaꞌwari mono hã, te te ꞌre daꞌmarõpãrĩ zaꞌra mono wa, ꞌre idasirẽme zaꞌra mono ne, ꞌRe ihâimana uꞌâsi mono ꞌrata ꞌre idanomro uꞌâsi mono zé hã da te dasina ꞌre uwaimrami zaꞌra mono õ di za, da te dasiwi ꞌre wẽꞌõ pese zaꞌra mono wa, ꞌRe ihâimana uꞌâsi mono Zeruzalẽ u te te isatõrĩ hã.Tane nherẽ, niꞌwam norĩ hã te te sina ꞌre umnhasi zaꞌra mono wamhã, taré te te sina ꞌre umnhasi baba zaꞌra mono õ di za. Iwẽ hã te za tô te te tãma ãma ꞌre aꞌuwaimrami, ꞌRe ihâimana uꞌâsi mono hã. Tahawa, tãma ꞌre rowẽ uꞌâsi zaꞌra mono di za.”
Ãne ma tô duréihã Izaias hã ãma robꞌuiꞌéré siro, Cristu za da te dasiwi iwẽꞌõzém na hã.
