Salmu 36:1-12
Davihi nhoꞌre
36 Dawasédé hã te iwasété norĩ pẽꞌẽ ꞌre, te te tãma ꞌre anharĩ.Tahawa, iwasété norĩ hã ꞌRe ihâimana uꞌâsi mono wazébzé hã te te ꞌre waihuꞌu zaꞌra mono õ di.
2 Aꞌuwẽ iwasédé hã te ꞌrâwi tipire na ꞌre siꞌmadâꞌâ.Te duré sina te te ꞌre rosaꞌrata, ꞌRe ihâimana uꞌâsi mono, iwasédé te te tiwi iꞌupsibi mei õ na hã za, duré taha zarina za niha te te tãma irobꞌmanharĩ õ na hã.
3 Isimirobzanhamrizé hã iwasété na si, duré isadawa nhipese na si.Ta hã simizaꞌrese wẽ na ꞌre ihâimana mono zé hã ma tô tirẽ.Tahawa, marĩ te te ꞌre iꞌabꞌmanharĩ wẽ mono da hã, te te sima ꞌre wẽ mono õ di oto.
4 Tinhimiwaptâ wa, ꞌre saꞌwari mono ré, te marĩ iwasédé te te iꞌmanharĩ da hã te te sima ãma ꞌre rowaꞌõtõ.Bâdâdi iwasété na si hã te ꞌre mo.Duré niwamhã marĩ iwasédé hã te te siwi ꞌre awẽꞌõ waihuꞌu mono õ di.
5 Uburé Danhibꞌapito, ãma hâiwa u te asimizawizé hã te te sina ꞌre robꞌuwei pese.Duré hâiwaꞌa u te aiꞌumnhasi na ꞌre iꞌaihâimana mono zé hã te te sina ꞌre robꞌuwei pese.
6 Ẽtẽ ꞌrãihâ rési ãna ꞌre isa mono ne, te iꞌuwaibaba na si dama ꞌre iꞌarowairébé mono zé hã ꞌre hâimana.Duré â poré â ꞌrehâ uptabi ne, te dama ꞌre iꞌapisutu mono zé hã ꞌre hâimana.Uburé Danhibꞌapito, a hã te aꞌuwẽ norĩ hã, abaze norĩ me ꞌre iꞌaꞌmadâꞌâ pese mo.
7 ꞌRe ihâimana uꞌâsi mono, e niha asimizawizé hã iwẽ uptabi!Asaripi na asimiꞌawã zahâpâ, wa waꞌwawi ꞌre iꞌaimapa mono zé hã wa te ꞌre sõpẽtẽ zaꞌra.
8 Wasa na wa wa te wasima ꞌre rowẽ zaꞌra, wama ꞌre iꞌanhomri uꞌâsi mono na, saꞌẽtẽ na.A hã te duré â isei uptabi hã wama iꞌanhomri mo, wa te ꞌre iꞌâhuri mono da hã.
9 A hã dahâimanazém nhanaꞌrada.Asimirowaꞌa zarina, wa duré wa norĩ hã tô õ hã rowaꞌa hã ꞌmadâꞌâ zaꞌra ni.
10 ꞌRe ihâimana uꞌâsi mono, te te ꞌre iꞌaiwaihuꞌu zaꞌra mono norĩ hã maꞌãpé ãma ꞌre uzusi mono, ꞌre isawi zaꞌra mono zém na hã.Duré marĩ tãma ꞌre abꞌmanharĩ wẽ uꞌâsi mono, sena na ipẽꞌẽ wẽ norĩ ma hã.
11 ꞌRâwi ꞌre isiꞌmadâꞌâ ze zaꞌra mono norĩ te te siwi ĩwatiꞌi da hã tãma ĩhâiba zaꞌré zaꞌra tõ. Duré wasété na ꞌre inomro mono norĩ ma, ĩhâiba zaꞌré zaꞌra tõ, te te siwi ĩzamarĩ da, tiwi ĩwara zaꞌra da hã.
12 Õhõta ma tô ta norĩ hã rere. Ma tô ta norĩ hã ꞌmarõpãrĩ zaꞌra ni. Iwahutu waihuꞌu zaꞌra da hã mare uptabi di za.
