Salmu 69:1-36
Davihi nhoꞌre
69 ꞌRe ihâimana uꞌâsi mono, maꞌãpé ĩnhoꞌreptu na, â hã ĩbutu u we oto te te sina ropto wa!
2 Rowaiꞌo iꞌrehâ uptabi ꞌre wa ãzébré pe.Nimomo ĩpara hã te sãrĩ waihuꞌu õ di, ãma ĩsiwazere da hã. ꞌrehâ u ĩzébré wa, te â wara nhoꞌu hã ĩꞌmazébré pese.
3 Ĩnhoꞌreptuzéb zô ĩhârâ waꞌa wa, wa ĩnhoꞌreꞌa.Ĩtõmo zadâꞌâ zahuré di oto, ĩte ꞌRe ihâimana uꞌâsi mono, asô ꞌre ĩnhimipari mono zém na ĩnhoꞌreptu da.
4 Taré nherẽ, ĩzada isitiꞌru zaꞌra norĩ hã ahâ uptabi di, ĩꞌrã na ĩzéré ꞌre ihâimana zaꞌra mono nhipai u.Ĩnhitobꞌru norĩ hã te ĩhâiba na sadawa nhipese na te te ꞌre rowasuꞌu zaꞌra.Ta norĩ hã siptete di. Te te sima ꞌre wẽ uꞌâsi zaꞌra, te te siwi ĩwĩrĩ da hã.Duré marĩ te simiꞌuri õ nherẽ, te ta norĩ hã te te ĩwi ꞌre waptẽrẽ zadawa zaꞌréiꞌõ zaꞌra, te tãma sõmri zaꞌra da hã.
5 ꞌRe ihâimana uꞌâsi mono, ꞌre ĩwasété mono zé hã aiwi ꞌre simaꞌuri waihuꞌu mono õ di.Duré ĩꞌrã nhimizaꞌrese ãna ꞌre ĩhâimana mono zé hã aima waihuꞌu pese di.
6 Uburé Danhibꞌapito, ꞌRe ihâimana uꞌâsi mono Iwaihuꞌupe, te te sina ꞌre iꞌaiꞌumnhasi zaꞌra mono norĩ ma, ĩnhimiꞌmanharĩzé uꞌâbâmhã te ĩsina tãma rowazé wazere zaꞌra tõ da, ĩzawi na hã ĩpawapto na!Izaraéu nhihudu norĩ te, ꞌRe ihâimana uꞌâsi mono, aiꞌãma ꞌre iwata zaꞌra mono norĩ ma, te ĩsina tãma rowazé wazere zaꞌra tõ da, ĩzawi na hã duré ĩpawapto na!
7 Te ꞌre iꞌasawi mono zéb zarina, wa tô da te ĩꞌãma ꞌre iwasété zaꞌra mono zéb da hã ꞌre ĩnhiptete.Taha zarina ma tô duré ĩma ꞌre irowazé mono zé hã te te ꞌre ĩꞌubu zuwa.
8 Tahawa, ĩsisãnawã norĩ ma, aimawi aꞌuwẽ ne, wa ꞌre ĩhâimana.Ĩna ꞌra norĩ ma, ĩzaꞌrese zaꞌra õ ne, wa ꞌre ĩhâimana.
9 Asõrõwa zawi pe ĩma ꞌre ihâimana mono hã te unhama ne ĩpẽꞌẽ ꞌremhã ĩma ꞌre hâimana.Duré aiꞌãma iwasétéꞌwa norĩ, te te aiꞌãma ꞌre iwasété zaꞌra mono zé hã te duré ĩnhisiwimhã ꞌre waptãꞌã.
10 ꞌRe ĩsiwaꞌõi mono wamhã, duré ĩsai ãna ꞌre ĩsimasisi mono wamhã, te ĩꞌãma ꞌre dawaꞌẽ uꞌâsi zaꞌra.
11 ꞌRe daꞌruꞌru mono wa, daꞌuza ihâi wasédé te ĩsima ꞌre zai mono sidâpâsi, te ĩꞌãma ꞌre dato zaꞌra.
12 ꞌRe idasisõpẽtẽ pese zaꞌra mono zéb ãma, te duré te te sima ĩꞌãma ꞌre robzanhamri zaꞌra.Âzé zeiꞌwa norĩ hã te duré ĩꞌãma niha na ꞌre sõꞌre zaꞌra, siwaꞌru.
13 Tane nherẽ, Uburé Danhibꞌapito, wa hã wa za aiwi rowaptẽ.ꞌRe ihâimana uꞌâsi mono, maꞌãpé te ãma aiwi irowaptẽrẽzém na hã ĩzadaꞌâbâ, nimahã bâdâ asima iwẽ zéb zarina, ꞌre ĩzawi pese uptabi mono wa!Duré ĩnhoꞌreptu na, iropisutuzéb zarina.
14 Robꞌuwa na ĩzébré tõ da, ĩwazere.Duré maꞌãpé ĩnhitobꞌru norĩ na hã ĩma baꞌa, duré â ꞌrehâ na zama.
15 Â sisaru te te duré ĩhâiba ubu tõ da ĩma baꞌa.Ã ꞌrehâ na ĩzébré tõ da, ĩma baꞌa.Duré adâꞌâ da, abꞌre hã te te ĩnhomri tõ da, ĩma baꞌa.
16 Uburé Danhibꞌapito, maꞌãpé aiwi ĩnhimirowaptẽrẽzém na hã ĩzadaꞌâbâ, asimizawi pese wẽ uptabi zarina.Duré ĩꞌãma ꞌre aiwamri zaꞌẽtẽ mono zarina, maꞌãpé ĩzô aipiꞌra na.
17 Asibꞌaꞌuwẽ wi, ĩwi hã aimaꞌuri tõ.Ãhã na awaꞌawi na ãma ĩzadaꞌâbâ, ĩma romnhimimnhasi zaꞌẽtẽ na ĩhâimana wa.
18 We ĩtẽme asina rotété ꞌrâwi, ĩnhoꞌreptu da.Ĩnhitobꞌru norĩ hã ĩma baꞌa.
19 Aima hã waihuꞌu pese di, da te ĩꞌãma ꞌre iwasété zaꞌra mono zé hã, ĩwi ꞌre irowazé mono zé hã, duré ꞌre ĩnhisé mono wa, te ꞌre irobzépata mono zé hã. Uburé ĩnhitobꞌru norĩ hã aima hâimanazé waihuꞌu pese zaꞌra di.
20 Da te ĩꞌãma ꞌre iwasété zaꞌra mono zé hã ma tô te ꞌre ĩsiri waiꞌre. Tahawa, marĩ iwẽ zô hã oto ꞌre ĩnhimnhasi waihuꞌu mono õ di.Niꞌwa ĩꞌãma isiwamri zô ne, wa aré mapa. Tane nherẽ, niꞌwa hã ĩꞌãma siwamri õ di.Duré niꞌwa te te sina ĩpẽꞌẽ tété da hã, wa aré mapa.Tane nherẽ, niꞌwa ĩtẽmemhã we morĩ õ di.
21 Mram na ꞌre ĩhâimana mono wamhã, ma tô duré õ norĩ hã marĩ isé pire na iwazari na ĩsa hã te te ĩma ꞌre sõmri zaꞌra.Duré ꞌrubu na ꞌre ĩhâimana mono wamhã, ma tô vinagri marĩ zazazép si te te ĩma ꞌre sõmri zaꞌra, te ꞌre hâsi mono da hã.
22 Datoi wa dasa isaꞌẽtẽ siwaꞌroꞌo, ropire da te dasisô ꞌre isani zaꞌra mono da si, ĩma iwẽ hã.Duré danhimizaze na dato da te dasima ꞌre iꞌmanharĩ zaꞌra mono zé para, ꞌre idasisito zaꞌra mono zéb u ꞌre idarereꞌe mono da si, ĩma iwẽ hã!
23 ꞌRe ihâimana uꞌâsi mono, maꞌãpé õ norĩ hã toptâꞌâ zaꞌra na, te te robꞌmadâꞌâ waihuꞌu zaꞌra tõ da!Duré maꞌãpé hâiba popoꞌo uꞌâsi zaꞌra da, tãma ꞌmanharĩ zaꞌra na!
24 Õ norĩ nhisiwimhã sada asitiꞌru zaꞌra zé hã maꞌãpé saꞌwari!Duré asitiꞌruzé hã te te sasãmri zaꞌra da, tãma ꞌmanharĩ zaꞌra na!
25 Isibꞌri zaꞌra, baba na ꞌre isimasa mono da si, tô ĩma iwẽ hã!Niꞌwa duré romhâ ꞌmanharĩ na ꞌri ꞌremhã hâiba ré hâimana ãna!
26 Ta norĩ hã, a hã ꞌre iꞌahâ zaꞌra mono nhisiwimhã te duré tinhimiꞌmanharĩ wasétézém na hã te te ãma tãma ꞌre sisiwi uꞌâsi zaꞌra.Duré a hã, niꞌwam norĩ ꞌre iꞌuꞌa zaꞌra mono para, te te ꞌre irobzépata zaꞌra mono zém na te duré õ norĩ hã ꞌre waꞌẽi uꞌâsi zaꞌra.
27 Õ norĩ, tiwasédé te te ꞌre iꞌmanharĩ zaꞌra mono zém na hã ãma ꞌre arobꞌuiꞌéré zaꞌra mono.Duré ꞌre idaꞌanhoꞌreptui mono zé te te sina ꞌre uwe zaꞌra mono tõ da hã, tãma ꞌre arowairébé mono tõ.
28 Tahawa, ꞌRe ihâimana uꞌâsi mono ꞌrata za ꞌre idahâimana uꞌâsi zaꞌra mono norĩ nhisi ré ibaihâi hawi isisi zaꞌra hã tiwi iꞌapari da si ĩma iwẽ hã.Duré iꞌuwaibaba ꞌre ihâimana zaꞌra mono norĩ nhisi zu isisi zaꞌra na ꞌre irobꞌuiꞌéré mono õ da si, ĩma iwẽ hã.
29 Wa hã marĩ iwẽ zô ꞌre ĩnhimipari mono ãna, wa te ꞌre robzépata.ꞌRe ihâimana uꞌâsi mono, ĩwahutu, duré ĩnhoꞌreptu na!
30 ꞌRe ihâimana uꞌâsi mono ãma danhoꞌre na hã wa za ꞌre ĩwata.Duré danhipai u iwaihuꞌu pese na wa za te dama ꞌre wasuꞌu wẽ sõꞌawi, ãma ꞌre ĩwata mono zém na hã.
31 Ã hã, Uburé Danhibꞌapito ma hã tãma wẽ uptabi di za, powawẽ ibaꞌu iprédup siromo zata na tãma danhoprubzém nhipai u hã.
32 Tawamhã da te ãma ꞌre iwati zaꞌra mono norĩ, ãne hã te te ꞌre ꞌmadâꞌâ zaꞌra mono wamhã, tãma ꞌre rowẽ zaꞌra mono di za.Duré ꞌRe ihâimana uꞌâsi mono ãma ꞌre iwata zaꞌra mono hã ꞌre to zaꞌẽtẽ zaꞌra mono di za.
33 E marĩ wa. Uburé Danhibꞌapito, marĩ zô tiwi ꞌre iroꞌwanhiꞌriti zaꞌra mono norĩ, te te ꞌre awapari mono wa,duré tinhibꞌaꞌuwẽ dazazéb ꞌre, ꞌre isimasa mono norĩ te te ꞌre aꞌmadâꞌâ rẽme mono õ wa.
34 Tiꞌa norĩ hâiwa me, ꞌRe ihâimana uꞌâsi mono ãma hã aiwata aba, duré âporé norĩ hã, duré uburé ropodo iwa ꞌre ihâimana zaꞌra mono hã!
35 Ta hã te za Zeruzalẽ ꞌri hã sõꞌreptu. Zuda ãma te za duré ꞌri nhoꞌõmo mono hã apâ wahutu zaꞌra.Isibꞌaꞌuwẽ te za tame ꞌre hâimana zaꞌra. Te za duré ãma ꞌre siptiꞌa zaꞌra.
36 ꞌRe ihâimana uꞌâsi mono ãma si ꞌre inomro mono nhihudu hã te za tiꞌa na tiꞌrata norĩ uirĩ na ãma ꞌre siptiꞌa zaꞌra.Duré te te ꞌre isawi pese zaꞌra mono norĩ hã te za iꞌremhã ꞌre hâimana zaꞌra.
