Salmu 91:1-16
91 Niꞌwa hã, ꞌRe ihâimana uꞌâsi mono danhipai u ꞌre Isãmra mono nhimiꞌmadâꞌâzéb zahâpâ ꞌre isãmra mono hã, duré danhipai u Iwaihuꞌu pese uptabi nhimiꞌawã zahâpâ sima iwẽ na ꞌre iwaꞌutu mono hã,
2 te za tãma tinha ãne, Uburé Danhibꞌapito ma:“Ĩte ꞌRe ihâimana uꞌâsi mono, a hã ĩꞌwawi ꞌre aimapa mono ꞌwa, duré ꞌri ꞌrãihâ isiptete ne, ĩma ꞌre iꞌaihâimana mono, duré te ꞌre iꞌaiꞌumnhasi mono.”
3 Ta hã, dama iꞌmadâꞌâ waihuꞌuꞌõ isimimnhasi hawimhã te za asõꞌreptu, duré dahâzé isipãrĩ waihuꞌu pese hawimhã.
4 Te za duré tizaripi na hã aiꞌubu.Isaripi zahâpâmhã te za asima iwẽ na ꞌre asãmra mo.Iꞌumnhasizé hã te za ibaihâ ꞌmanharĩ na dasiꞌwawi dasimapazém ne hã aiꞌwawi ꞌre simapa.
5 Robra na romnhimimnhasi ma hã ꞌre aipahi mono õ di za,duré bâtâ na tiꞌi na da te ꞌre iꞌasimrimi zaꞌra mono ma zama hã.
6 Robra na dahâzé ipire waptu na te te ꞌre idaduri mono ma hã, ꞌre aipahi mono õ di za, duré abzuma waꞌwa marĩ iwasédé te te ꞌre idanhimroi mono ma zama hã.
7 Asababa miu na darereꞌe nherẽ, niha wamhã 10 miu na asimire niwĩmhã duré darereꞌe nherẽ, te te duré iꞌaiꞌuwaimrami da hã mare di za.
8 Taré te za atõmo na iꞌmadâ, niha hã iwasété norĩ ma robꞌmanharĩzé hã.
9 A hã, ma tô Uburé Danhibꞌapito, aiꞌwawi ꞌre isimapa mono ꞌwa da hã tãma asisaꞌré.Danhipai u ꞌre Isãmra mono nhimiꞌmadâꞌâzéb zahâpâ ꞌre asãmra mono da hã, ma tô duré tãma asihâiba nho.
10 Niwamhã marĩ ipire uptabi asô iwatobro da hã mare di za.Duré asõrõwa u marĩ iwasété uptabi iwisi da hã mare di za.
11 ꞌRe ihâimana uꞌâsi mono hã te za tite hâiwa ãma romhuriꞌwa norĩ ma hã tãma robꞌru zaꞌra, te te siwi iꞌaiꞌmadâꞌâ da hã,duré nimomo ꞌre ane mono sidâpâsi, aiꞌwawi ꞌre simapa zaꞌra mono da.
12 Ta norĩ hã te za tinhibꞌrata na te te siwi ꞌre atété, ẽtẽ na aipara wimhã ꞌre asiꞌuꞌa mono tõ da.
13 Aipara na te za huꞌu zérépa norĩ hã, wahi norĩ me, ꞌre iꞌazu pese mo, huꞌu zérépa isahi norĩ hã, duré wahi isé norĩ hã.
14 ꞌRe ihâimana uꞌâsi mono hã te tinha ãne:“Wa hã, te te ꞌre ĩzawi pese zaꞌra mono norĩ hã wa za te ꞌre anhoꞌreptu uꞌâsi.Duré ĩnhisi waihuꞌu wẽ pese ꞌwa norĩ ꞌwawib zaꞌra hã, wa za ꞌre ĩsimapa.
15 Ta norĩ hã te te ꞌre ĩꞌmahârâ zaꞌra mono wamhã, wa za te ꞌre azadaꞌâbâ.Duré ropire ꞌre, ꞌre hâimana zaꞌra mono ré hã, wa za tô isiré ꞌre ĩhâimana uꞌâsi zaꞌra.Ta norĩ te duré ꞌre anhoꞌreptui mono wamhã, dama wazé pese na ꞌre hâimana zaꞌra mono da hã, wa za niha na te tãma ꞌre abꞌmanharĩ.
16 Tawamhã ipawaꞌâbâ zaꞌra iwẽ uptabi na wa za, ꞌre ihâimana hâ zaꞌra mono zéb da hã te tãma ꞌre anhomri.Wa za tô duré ꞌre ĩnhiminhoꞌreptui mono zé hã tãma te ꞌre ahâiꞌré.”
