Tiagu 4:1-17
4 E ma hawi ꞌre wairébé mono bâ, dasiꞌwapé hã duré dasiwasu hã aiꞌreb zaꞌra waꞌaba hã. E ta norĩ hã marĩ iwasédé aihâiba ꞌre, ꞌre isiꞌwapéi uꞌâsi zaꞌra waꞌaba mono zém hawi ꞌre wairébé mono ã bâ.
2 Marĩ hã ate õ nherẽ, te sô ꞌre aiꞌwapé zaꞌra waꞌaba mo. Tane nherẽ, aima ꞌre hâimana waihuꞌu zaꞌra waꞌaba mono õ wa, te sô ꞌre idanhimroi waꞌaba mo. Te duré marĩ na ꞌre idanhoꞌru zaꞌra waꞌaba mo. Tane nherẽ, asima ꞌre waibui waihuꞌu zaꞌra waꞌaba mono õ wa, te sô ꞌre aiꞌwapé zaꞌra waꞌaba mo. Te duré dasiꞌwapé hã sô ꞌre isani zaꞌra waꞌaba mo. Tane nherẽ, aima ꞌre hâimana waihuꞌu zaꞌra waꞌaba mono õ di, ꞌRe ihâimana uꞌâsi mono wi, ꞌre waptẽrẽ zaꞌra waꞌaba mono õ wa.
3 Duré ꞌRe ihâimana uꞌâsi mono wi ꞌre rowaptẽrẽ zaꞌra waꞌaba mono wamhã, ꞌre waibui waꞌaba mono õ di. E marĩ wa. Asima iwẽzé hã wasété nherẽ, ꞌre waptẽrẽ zaꞌra waꞌaba mono wa, marĩ asima ꞌre iwẽ zaꞌra waꞌaba mono zéb zarina si, ãma ꞌre ꞌmanharĩ zaꞌra waꞌaba mono da.
4 ꞌRe ihâimana uꞌâsi mono ma si, ꞌre iꞌaihâimana zaꞌra waꞌaba mono õ! E waihuꞌu zaꞌra waꞌaba ã bâ, niꞌwa hã tiꞌai ãma marĩ iwasédé siwaꞌru ꞌre ihâimana zaꞌra mono zawiꞌwa na ꞌre hâimana mono wamhã, ꞌRe ihâimana uꞌâsi mono nhitobꞌru na ꞌre ihâimana mono na hã. Niꞌwa hã tiꞌai ãma marĩ iwasédé, siwaꞌru ꞌre ihâimana zaꞌra mono zawiꞌwa na ꞌre hâimana mono wamhã, ꞌRe ihâimana uꞌâsi mono nhitobꞌru na te za ꞌre hâimana.
5 Duré niwamhã ãma rosaꞌrata zaꞌra waꞌaba tõ, taré ihâimana newa, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré, ã hã: “ꞌRe ihâimana uꞌâsi mono, Tipẽꞌẽzani te te wama ꞌre iꞌanhomri mono ma hã, te sima wẽ upta, õhõ ma si ꞌre wahâimana zaꞌra mono da.”
6 Tazahã, ꞌRe ihâimana uꞌâsi mono, tinhimizawi pese zé te te wama ꞌre iꞌanhomri mono hã saꞌẽtẽ uptabi di. Ãne duréihã ãhã wasuꞌu na ꞌRe ihâimana uꞌâsi mono mreme na Ibaihâ iwazé pese na robꞌuiꞌéré hã: “ꞌRe ihâimana uꞌâsi mono hã te ꞌre simaꞌwara, ꞌrâwi ꞌre isiꞌmadâꞌâ ze zaꞌra mono norĩ zada. ꞌRâwi ꞌre isiꞌmadâꞌâ ze zaꞌra mono õ norĩ ma si, te tinhimizawizé hã te te tãma ꞌre anhomri.”
7 Tahawa, maꞌãpé ꞌRe ihâimana uꞌâsi mono nhimiꞌmadâꞌâzéb zahâpâ, ꞌre aihâimana uꞌâsi zaꞌra waꞌaba mono. Duré asiptete sina Waꞌuburé da, asimire sina ꞌre aimasa waꞌaba mono. Tawamhã te za aima ꞌre simani zaꞌra waꞌwa.
8 Maꞌãpé ꞌRe ihâimana uꞌâsi mono u asina rotété pese zaꞌra waꞌaba. Tawamhã te za atẽme sina rotété ꞌwa. Aiwasédé ꞌre iꞌmanharĩ zaꞌra waꞌaba mono norĩ, maꞌãpé asisibꞌrata upsõ zaꞌra waꞌaba! Duré a norĩ waꞌwa aihâimana siꞌamoi pese na ꞌre iꞌaihâimana zaꞌra waꞌaba mono norĩ, maꞌãpé asipẽꞌẽ pese zaꞌra waꞌaba!
9 Aiwasété uꞌâbâ, maꞌãpé aiwi robzeiꞌõ zaꞌra waꞌaba, duré asina rosaꞌrata zawi te, aiꞌruꞌru waꞌaba. Rowẽ te, ꞌre iꞌaihâ zaꞌra waꞌaba mono zé hã ãma saprĩ zaꞌra waꞌaba, aiwaꞌõzéb u. Duré robze na ꞌre iꞌaihâimana zaꞌra waꞌaba mono zé hã, robzeiꞌõ u ãma saprĩ zaꞌra waꞌaba.
10 Maꞌãpé Uburé Danhibꞌapito nhoꞌremhã, aiwapu na asiꞌmadâꞌâ zaꞌra waꞌaba. Tawamhã te za asõré waꞌwa, danhipai u aiwazé pese na ꞌre aihâimana zaꞌra waꞌaba mono da.
11 Ĩsisãnawã norĩ, ꞌre asibâsi wasété zaꞌra waꞌaba mono tõ. Niꞌwa hã tisiré Cristuhu zazeiꞌwa te te bâsi wasété wamhã, duré iwasédé hã te te ãma hiri wamhã, ta hã te ꞌRe ihâimana uꞌâsi mono nhimiroti zahi na wasété. ꞌRe ihâimana uꞌâsi mono nhimiroti zahi ãma wasété wamhã, isarina ãma aihâimana õ di. Tazahã, te daꞌãma rowairébéꞌwa ne aihâiba.
12 ꞌRe ihâimana uꞌâsi mono si, misire roti zahi ꞌmanharĩꞌwa hã. Duré taha si, daꞌãma rowairébéꞌwa iꞌuptabi hã. Taha si te te danhoꞌreptui waihuꞌu pese di, duré te te daꞌuprosi waihuꞌu pese di. E ꞌwa hã a hã. E a hã sada aihâimana bâ, dawasédé hã daꞌãma ꞌre iꞌazaꞌra mono da hã.
ꞌRe ihâimana uꞌâsi mono ma si, uburé marĩ romnhowamhã tãma waihuꞌu pese uptabi di
13 Maꞌãpé ãhã na hã ĩwapari zaꞌra waꞌaba, ãne ꞌre inharĩ zaꞌra waꞌaba mono norĩ: “Ã bâtâ na hã niwamhã awẽmhã wa za aiꞌabaꞌré ni, nimomo ꞌri nhoꞌõmo u. Tawamhã tamemhã misi wahum na wa za aiꞌubumro ni, marĩ zarina, robꞌuiprazé hã wa te ãma saꞌẽtẽ zaꞌra da.”
14 Tazahã, aima waihuꞌu zaꞌra waꞌaba õ di, niha awẽm na hã za aima iromhâimana zaꞌra waꞌaba na hã. A norĩ waꞌwa hã aiwa hâiwa nhirõtõ ne, za te te iꞌubumro ne, taha pari ãma ronomro prãi wi, za isiꞌutõrĩ mono ne.
15 Ãne hã ꞌre nharĩ zaꞌra waꞌaba mono da nherẽ, ãne si ꞌre nharĩ zaꞌra waꞌaba mono: “ꞌRe ihâimana uꞌâsi mono te te sima wẽ wamhã, wa za ꞌre wahâimana hâ zaꞌra. Duré wa za wa te ꞌre ꞌmanharĩ zaꞌra, ã hã niwamhã õ hã.”
16 Tane nherẽ, a norĩ waꞌwa hã te ꞌre asiꞌmadâꞌâ ze zaꞌra waꞌaba mo. Te duré asina ꞌre aiwata zaꞌra waꞌaba mo, asihawi asima ꞌre irowaꞌõtõ zaꞌra waꞌaba mono zém na. Uburé ãne hã marĩ na ꞌre idasiꞌmadâꞌâ ze zaꞌra mono zé hã, wasété di.
17 Tahawa, maꞌãpé ãhã na, ãma ꞌre aipoꞌre puꞌu zaꞌra waꞌaba mono: Niꞌwa hã iwẽ te te iꞌmanharĩ da hã tãma waihuꞌu pese nherẽ, te te ꞌmanharĩ õ wamhã, ta hã te za tiwasédé hã ꞌmanha.
