Titu 3:1-15
3 Titu, maꞌãpé isazeiꞌwa norĩ, ꞌre apoꞌre puꞌu mono, rotiꞌwa norĩ hã te te ꞌre wazé pese zaꞌra mono da, duré dama ipire norĩ hã te te ꞌre wapari pese zaꞌra mono da, duré ꞌre sisaꞌra wẽ uꞌâsi zaꞌra mono da, uburé marĩ iwẽ hã te te ꞌre ꞌmanharĩ zaꞌra mono da.
2 Duré tãma ꞌre roti zaꞌra mono, timreme iwasété na te te daꞌãma ꞌre wasété zaꞌra mono tõ da, waimri na si ꞌre hâimana zaꞌra mono da. Duré simizawi pese na ꞌre hâimana zaꞌra mono. Duré uburé dama ꞌre hâimana zaꞌra mono, dawazép sina.
3 Duréihã wa norĩ zama, waꞌrã nhimizaꞌrese ãna wa aré ꞌre wahâimana zaꞌra. Wanhimiwapari ãna wa aré ꞌre wahâimana zaꞌra duré wawasété na. Uburé marĩ sipuꞌu pese na wa te wasima ꞌre iwẽ zaꞌra mono zô si, wa aré ꞌre wahâimana zaꞌra, tiwi ꞌre wawairébé waihuꞌu mono ãna. Wahâimanazé iwasété na si, wa aré ꞌre wahâimana zaꞌra duré marĩ na danhoꞌru na si. Te aré da te ꞌre waꞌruiwapari zaꞌra. Duré wa norĩ zama wa aré daꞌru na si ꞌre wahâimana zaꞌra.
4 Tane nherẽ, ꞌRe ihâimana uꞌâsi mono Waꞌanhoꞌreptuiꞌwa hã tinhoprubzé duré tinhimizawi pese zé hã te te uburé dama hâiꞌré wamhã,
5 ma tô wanhoꞌreptu zaꞌra, waꞌãma siwamri zaꞌra wa. Marĩ iwẽ hã wa te ꞌmanharĩ zaꞌra wab õ di. Tipẽꞌẽzani na ma tô wanhoꞌreptu zaꞌra. Ta hã ma waꞌupsõ zaꞌra. Ma tô duré ꞌmanha, apâ wapoto téb zaꞌra da. Taha na ma tô wahâimanazé ité hã wama sõmri zaꞌra.
6 ꞌRe ihâimana uꞌâsi mono hã sõpru wa, ma tô Tipẽꞌẽzani na waꞌahâiba ubu, Zezu Cristu hã wazada idâꞌâ zaꞌra uꞌâbâ, Wanhoꞌreptuiꞌwa zaꞌra hã.
7 Ãne hã ma tô ꞌmanha, tinhimipawaptobzé iwaꞌâbâ õ na, iꞌra na ꞌre wanomro mono da, duré dahâimanazé isiꞌutõrĩꞌõ te te wama ꞌre anhomri mono da, sô ꞌre iwanhimipari zaꞌra mono hã.
8 Ã hã te aima irowahutuzé hã tô sena.
Titu, wa ĩsima wẽ, ã hã te aima irowasuꞌuzém na, Re ihâimana uꞌâsi mono zazeiꞌwa norĩ hã ꞌre anhiptete uꞌâsi mono da, ta norĩ hã te te sima ꞌre wẽ uꞌâsi zaꞌra mono da, marĩ iwẽ si te te ꞌre ꞌmanharĩ wẽ uꞌâsi zaꞌra mono da. Taha si iwẽ hã duré marĩ, da te ꞌre iꞌmanharĩ wẽ zaꞌra mono da.
9 Siwaꞌru marĩ na ꞌre idasiwasu zaꞌra mono wi ꞌre asiꞌmadâꞌâ pese mono, duré dahiꞌrata zaꞌrada hã, ahâ na ꞌre ihâimana zaꞌra mono wi duré dasiꞌahâri wi duré Zudeu norĩ ma roti zahi na dasiwasui wi hã. Ã norĩ hã marĩ dai õ di. Duré waꞌâbâ õ di.
10 Niꞌwam norĩ hã isazeiꞌwa norĩ ꞌremhã daꞌãma ꞌre sipoꞌo zaꞌra mono wamhã, maꞌãpé aimreme hã tãma ꞌre abꞌmõrõpãrĩ mono, imorĩꞌrata na duré maparane ãma. Taha parimhã, asiwi wẽꞌõ na, tiwi ꞌre asiꞌmadâꞌâ pese mono da.
11 Niꞌwa ãne hã hâimana wamhã, te za iwaihu, iꞌuwaibaba õ na ꞌre ihâimana mono na duré tiwasété si te te ꞌre iꞌmanharĩ mono na. Ta hã te za ꞌrâwi siꞌãwisi, rowasété u.
Paulu hã, Tituhu ma te te iroti ꞌrãsutu zé
12 Nimahã na, Atemasi niwamhã Tiquicu hã te ãma atẽme satõrĩ wamhã, maꞌãpé we aiꞌwapé na, Nicopoli u we ĩtẽme aimorĩ da, ĩnhopẽtẽ da, pire nherẽ, tame rowaꞌuꞌu wahâ ꞌrowi ĩnhamra da, te ĩsima rowairébé wa.
13 Ãma aime na, daꞌwawi isimapaꞌwa Zenasihi ãma hã duré Apoluhu ãma zama, uburé marĩ na aima iwapu zarina, nimomo neb zahuré wa, tiwi sô rowaptâꞌâ zahuré tõ da, sô isimnhasi zahuré zéb zô.
14 Wasiré isazeiꞌwa norĩ, marĩ iwẽ si te te ꞌre iꞌmanharĩ zaꞌra mono da si iwẽ hã, siꞌãma ꞌre sina mono da, marĩ zô tiwi ꞌre rowaptâꞌâ zaꞌra mono wamhã, ãne zarina wasiré isazeiꞌwa norĩ hã hâimana wẽ na ꞌre hâimana zaꞌra mono da.
15 Uburé ãme ĩsiré isiꞌubumro norĩ hã ma ãma siwi asawi. Maꞌãpé wama sawi zaꞌra na, wazawiꞌwa norĩ, wasiré isazeiꞌwa norĩ hã.
ꞌRe ihâimana uꞌâsi mono nhimizawizé iwaꞌâbâ õ, asiré ꞌre ihâimana uꞌâsi zaꞌra waꞌaba mono da si, iwẽ hã.
