DAMAMA DURÉ DANA MA
7: Dahöimana prédubdzé ĩwẽ
E MARĨ TE WATSUꞌU.
Damama na niwamhã dana na, ma ĩpitsu dahöimana prédubdzé ĩtsarina aihöimana da. Ãma ĩtsimiré, tô tsena te ꞌre atsiwatsutu tsena na ꞌre aihöimana mono da uburé na. Ãne na hã, te atsima ĩwẽ duré rowahutu da aiꞌra norĩ ma ãne ꞌre höimana dzaꞌra mono da.
Te atsima ĩwẽ duré tãma rowahutu dzaꞌra da ĩwẽ uptabi na, tsimiꞌẽ na duré ĩbö na ꞌre höimana dzaꞌra mono da, duré tsiꞌãma tsi te te rotsaꞌrata dzaꞌra tõ da. Danhipai u wapu di ãhã dahöimanadzém norĩ da te ĩwaihuꞌu da hã dzahadu dahöibatéb ré.
ROPOTOꞌWAI MREME NHIMIROTI: ‘Aiꞌuté höimana prédum na ꞌre ĩhöimana mono dzéb da hã, tãma ꞌre roti petse mono. Tawamhã tãma tsimirẽme ãna te dza ãma ꞌre mo, tihöimanadzéb ꞌrãtsutu u.’ — Provérbios 22:6.
E MARĨ WA WẼ DI.
à bötö na robꞌmanharĩ té ahö wa, dahöimana prédubdzé ĩwẽ ĩpire uptabi. Dana Karyn na ĩtsitsi te tinha: “Dahörödzém na tsiwaꞌru bötö na waꞌra norĩ te te tsõpẽtẽ waihuꞌu petse dzaꞌra di tiha ĩwatsédé. Ãté wadzati tsiꞌubumro tsina tiha ĩtsitsébꞌõ wa te tsaꞌretse ãna te ꞌmadöꞌö dzaꞌra.”
ROPOTOꞌWAI MREME NHIMIROTI: ‘Ĩprédum norĩ tsi . . . uburé marĩ hã niha ĩwẽ dzô, duré niha ĩwatsété dzô, te te ꞌre ĩpibu dzaꞌra mono dzéb dzarina tsi, te dza te te ꞌre waihuꞌu petse dzaꞌra, ta norĩ ma tsi waihuꞌu petse wa.’ — Hebreus 5:14.
Daꞌãma rotsaꞌrada ĩwẽ uptabi. Niꞌwa te te daꞌãma ĩrotsaꞌrada tsimiwadzé petse na te ꞌre höimana duré te natsi ãma tiwata marĩ da te tãma ꞌmanharĩ wamhã. Te duré höiꞌré daꞌãma ĩhötöꞌö na hã, ã bötö na hã dahörödzé danhipai u dama wẽ dzaꞌra nherẽ.
ROPOTOꞌWAI MREME NHIMIROTI: ‘Marĩ hã da te aima ꞌre ꞌmanharĩ wẽ dzaꞌra waꞌaba mono da, atsima ꞌre ĩwẽ dzaꞌra waꞌaba mono dzéb dzarina, te dza tô taha dzarina dama ꞌre ĩꞌmanharĩ wẽ dzaꞌra waꞌaba mo.’ — Lucas 6:31.
E MARĨ TE DZA ĨꞌMANHA.
Tsõꞌawi rowahutu dahöimana prédubdzé atsima ĩpitsudu. Ãma ĩtsimiré, romnhoré norĩ dzarina, damama norĩ tsõꞌawi daꞌra norĩ ma te te rowahutu dzaꞌra wamhã datsina dahöimana datsina damro wana ré ĩböiꞌõ na, danhipai u wapu di daꞌra norĩ te te tsadawa dzamarĩ dzaꞌra da.
AIPAWAPTOBDZÉB DA: Marĩ da te ꞌmahörö dzaꞌra wamhã, niwamhã marĩ watobro wamhã, robdzanhamri aiꞌra norĩ ma, dahöimana prédubdzé ĩwẽ ãma. Ĩropoto na roꞌmahörö ĩré wamhã niꞌwa marĩ ĩpipa te te ĩꞌmanharĩ na hã ĩtsimiwẽꞌõ dzarina, te dza ĩnha aiꞌra ma: “E niha ĩpipa uptabi. Aima hã, e marĩ wa, ãne te da te ꞌre ꞌmanharĩ dzaꞌra.”
“Ĩhöibaté ma waihuꞌu õ wamhã e marĩ ĩbö duré e marĩ ĩböiꞌõ, tãma pire uptabi di te te pitsutu da dza te te ꞌmanharĩ dzô ĩbö niwamhã ĩböiꞌõ.” — Brandon.
Rowahutu aiꞌra norĩ ma te te daꞌãma rotsaꞌrata dzaꞌra da. Tsada hã aiꞌra norĩ aiꞌuté nherẽ, tsimiwadzé petse na ꞌre höimana dzaꞌra mono da, daꞌãma wata dzaꞌra da marĩ da te tãma ꞌmanharĩ dzaꞌra wamhã duré daꞌãma hötöꞌö dzaꞌra da. Ĩhöiwarobo daꞌra prédubdzém na a, te tinha: “Wẽ di daꞌra norĩ te te tsadaihuꞌu dzaꞌra da dame ĩhöimana dzaꞌra da na hã família ꞌremhã, romnhorédzéb ꞌremhã duré ꞌri ꞌremhã. Tahã danhipai u te te tsadaihuꞌu dzaꞌra wamhã, danhipai u wapu di dza tsimidzawi na dama ꞌre höimana dzaꞌra mono da, aihĩni ma rowẽdzéb da hã, mare di tsima dzaꞌra tsi.”
AIPAWAPTOBDZÉB DA: Pitsutu nimahã romhuri atsõrõwa ꞌremhã aiꞌra te te ꞌmanharĩ da. Ãne te dza waihuꞌu ĩwẽ uptabi na hã marĩ dapibuma te te ꞌmanharĩ da.
“Waꞌra norĩ romhuri na danhorõwa ꞌremhã te te ãma romhõtsi dzaꞌra wamhã, tãma pire dzaꞌra õ di dza tsiwaprotsi ꞌre höimana dzaꞌra mono wamhã. Te dza oto ãma romhõtsi tsirõmo dzaꞌra romhuri na danhorõwa ãma.” — Tara.
a Ĩhöiwarobo nhitsi: Parenting Without Borders.
