DAꞌRA NORĨ MA
11: Danhimiꞌẽ na romhuri
E MARĨ TE WATSUꞌU.
Niꞌwa ĩtsimiꞌẽ hã ĩtsimiromhuri waꞌa õ di. Taha waꞌrãmimhã, te te romhuri dze ti tsiꞌupari da duré te te dapawaptob da — nimahã romhuri dama ꞌmadöꞌö tsuru na nherẽ.
E MARĨ WA WẼ DI.
Wama wẽꞌõ nherẽ, marĩ ahö di wahöimanadzéb ꞌremhã wa te ĩꞌmanharĩ dzaꞌra da hã. Daꞌahö uptabi ma danhimiꞌẽ na da te romhuri dzei õ di. Tadzahã, wanhimiꞌẽ na wa te romhuri dzaꞌra wamhã, wa dza ãma danhipa dzaꞌra ni. — Eclesiastes 3:13 TNM.
“Wa waihuꞌu te romhuri da ĩ̱nhiptete wamhã ĩ̱ma ĩrowẽ na hã duré ĩ̱ma ĩrobdze na hã te ĩꞌmanharĩdzém na. Tahã ma ĩ̱pawapto te romhuri dze da. Atsimiꞌẽ na romhuri wamhã te dza da te ꞌre aiwaihuꞌu dzaꞌra aihöimana wẽ na.” — Reyon.
ROPOTOꞌWAI MREME NHIMIROTI: ‘Niꞌwa hã tsimiꞌẽ na te te ꞌre romhuri petse mono wamhã, te dza tihöimanadzéb da hã te te tsima ꞌre adzani.’ — Provérbios 14:23.
E MARĨ TE DZA ĨꞌMANHA.
Rotsaꞌrata wẽ da romhuri ãma, tsadawa dzamarĩ ã norĩ hã piꞌrebamhã.
Atsiwatsutu marĩ ꞌmanharĩ wẽ da. Marĩ õ di romhuri wamhã ĩromhuridzéb ãma, atsõrõwa ãma niwamhã romnhorédzéb ãma, ꞌrãdzaꞌõtõ ĩꞌmanharĩdzém na. Marĩ ꞌmanharĩ wẽ waihuꞌu petse wamhã, atsiwatsutu danhipai u waptu na duré wẽ na ꞌmanharĩ da. Atsimiromhuri danhipai u wẽ na ꞌmanharĩ wamhã danhipai u te dza ãma atsima ĩrowẽ.
ROPOTOꞌWAI MREME NHIMIROTI: ‘E aima waihuꞌu petse di, niꞌwa tsipetse na te te ĩromhuri wẽ mono na hã. Tahã tô danhipai u tsimiromhuri wẽ uptabi di. Taha wa tô ĩböre te aré apito norĩ tsiré tsi ꞌre höimana.’ — Provérbios 22:29.
Daꞌãma rotsaꞌrata. Romhuri wẽ wamhã rowẽ te dza dama ĩꞌadzani. Atsõrõwa ãma romhuri wẽ wamhã, romhuri te dza ĩwapu atsõrõwa ꞌrem norĩ ma.
ROPOTOꞌWAI MREME NHIMIROTI: ‘Marĩ hã niꞌwai ma, da te tsõmri wamhã, ãma rowẽ uptabi di, niꞌwa marĩ te te dama ĩtsõmri, da te ĩꞌöri, rowẽ nhipai ãma hã.’ — Atos 20:35.
Da te aima ĩrobꞌru dzarina tsi romhuri tõ. ꞌManharĩ tõ da te aiwi ĩwaptẽrẽdzép tsi. ꞌManharĩ da te aiwi ĩwaptẽrẽdzém nhipai u. Ãne ꞌmanharĩ wamhã, a hã dza aihöimanadzép tedeꞌwa duré danhipai u te dza ĩꞌmanha a hã atsima wẽ wa, mare di niꞌwa te te aima ꞌrui wa. — Mateus 5:41.
ROPOTOꞌWAI MREME NHIMIROTI: ‘Te aiwi ĩwaptẽrẽdzé hã aiwati dzahi dzarina ꞌmanharĩ tõ. Tadzahã, atsima ĩwẽ dzéb dzarina.’ — Filêmon 14.
Ĩpibui petse dzarina aihöimana. Romhuriꞌwa ĩwẽ waꞌa õ di. Tane nherẽ, romhuri da tsi ꞌre höimana mono õ di. Ĩpibui petse dzarina te ꞌre höimana bödö te te tsima pitsutu tsina tsimiꞌẽ na te te romhuri da duré waꞌutu da.
ROPOTOꞌWAI MREME NHIMIROTI: ‘We ĩ̱tsiré aiꞌabaꞌréi waꞌaba aꞌubuni u, wawaꞌutu dzaꞌra da aꞌö.’ — Marcos 6:31.
