DAꞌRA NORĨ MA
9: Dawaihuꞌudzé
E MARĨ TE WATSUꞌU.
Aiwaihuꞌudzé mare di atsitsi na tsi niwamhã aihöiba na tsi. Ĩme hã duré ĩré hã aihöimana prédubdzé, atsimidzadze duré aihöimanadzé. Aiwaihuꞌudzé me hã ĩré hã uburé ꞌre aihöimana mono dzé aimana wawimhã duré ꞌre ĩhöiꞌré mono na hã.
E MARĨ WA WẼ DI.
ꞌRe aihöimana mono dzé waihuꞌu petse wamhã, rẽme õ di dza atsimidzadze duré tsaꞌréi õ di dza atsiré norĩ te te airétsi dzaꞌra da.
“Te ꞌre dahöimana dzaꞌra dahöiba ꞌmanharĩ ne daꞌudza uipradzéb ãma hã. Tiꞌudza hã tsiꞌuihö na te te tsima pitsutu dzaꞌra õ di. Ĩhöiba amo norĩ ĩꞌupa na te tãma pitsutu dzaꞌra.” — Adrian.
“Wa waihuꞌu ĩbö dzô te ꞌwapé da romhöimanadzé pire nherẽ. Ĩ̱ma waihuꞌu petse di e ꞌwam norĩ tô tsena ĩ̱tsiwaihuꞌu uptabi norĩ ĩhöimana prédub dzaꞌra dzéb dzarina duré ĩ̱höimana prédub dzarina ĩtsiré dzaꞌra ĩ̱höimana wamhã.” — Courtney.
ROPOTOꞌWAI MREME NHIMIROTI: ‘Tiꞌai ãma dahöimana watsété na ꞌre ĩdanomro mono norĩ ãma hã, ꞌre tsatsõmri dzaꞌra waꞌaba mono õ di dza . . . Atsimirotsaꞌrata wẽ na tsi, aipẽꞌẽ ꞌre . . . ꞌre aihöimana dzaꞌra waꞌaba mono dzép tém na tsi, oto ꞌre anomro aba mono da.’ — Romanos 12:2.
E MARĨ TE DZA ĨꞌMANHA.
Waihuꞌu wamhã e niha na hã atsiptete di, atsibꞌuwa di duré atsimidzadzedzé hã te dza aipawapto waihuꞌu da e ꞌwa hã a hã ꞌröwi aipẽꞌẽ na ãhãna duré e niha dza aptoꞌoré hã. Tsadaꞌöbö dadzadanharĩ norĩ piꞌrebamhã atsina waihuꞌu da.
Ĩ̱nhiptetedzé: E marĩ ĩwẽ te ꞌmanharĩ waihuꞌu petse di. E mahã ĩ̱nhimirowaihuꞌu wẽ ĩré hã marĩ te ꞌmanharĩ da. E ĩ̱tsitété waihuꞌu petse di. E ĩ̱nhimiꞌẽ na wa romhu. E ĩ̱nhoprub di. E bötö pitsutu na wa natsi wi.
AIPAWAPTOBDZÉB DA: E aima pire di waihuꞌu da aihöimanadzém na ĩtsiptede. Tawamhã, waptẽrẽ aimama duré ana wi, niwamhã atsiwaihuꞌu wi te te aipawaptob dzaꞌra da.
ROPOTOꞌWAI MREME NHIMIROTI: ‘Romhuri hã te wama ꞌre höimana dzaꞌra wahöiba mono bö, wa te watsina ꞌre ĩꞌmadöꞌö petse dzaꞌra mono da hã. Ãne wa, wa dza aihĩni ꞌröwi wa te watsima ꞌre rotsaꞌrata petse dzaꞌra, wa te watsina ꞌre ꞌmadöꞌö petse dzaꞌra mono da, wanhimiromhuri hã. Wa te watsina ꞌre ꞌmadöꞌö petse dzaꞌra mono wamhã, wa dza ꞌröwi wapẽꞌẽ ꞌre watsima ꞌre wato dzaꞌra. Danhimiromhuri hã wanhimiromhuri me aiwab õ na, wa te daꞌãma ꞌre rotsaꞌrata dzaꞌra mono õ di dza.’ — Gálatas 6:4, 5.
Ĩ̱nhibꞌuwadzé: E marĩ na duré ĩ̱tsihiri wẽ da tsi ĩ̱höimanadzém na. E mahã romhöimanadzé te ꞌwapé da hã pire di. E marĩ na danhipai u ĩ̱tsitété da tsi.
ROPOTOꞌWAI MREME NHIMIROTI: ‘Wawatsété ãna ꞌre ĩwahöimana dzaꞌra mono na dama ꞌre watsiwatsuꞌu dzaꞌra mono wamhã, ꞌröwi wa dza watsima ꞌre wadzadawa nhipetse dzaꞌra. Tawamhã dahöimanadzé tô tsena hã wama ꞌre höimana waihuꞌu dzaꞌra mono õ di dza, ãne wamhã.’ — 1 João 1:8.
Ĩ̱nhimidzadze: E mahã dahöimana prédubdzé wa ĩ̱tsima pitsutu. E marĩ wa. E Ropotoꞌwa na wa tsadze. E marĩ dzarina wa tsadze tô tsena ꞌre ĩhöimana mono na hã. E marĩ dadzô ĩwatobro hã, ĩ̱ma ĩböiꞌõ. E marĩ wa. Ĩ̱ma hã, e niha dza dahöimanadzé hã aptoꞌoré u hã.
ROPOTOꞌWAI MREME NHIMIROTI: ‘Atsimirowaihu ĩwẽ hã te dza aiꞌwawimhã ꞌre tsimapa.’ — Provérbios 2:11.
