E marĩ wa Ropotoꞌwa te te tsadaꞌöbö õ di uburé rowaptẽrẽ norĩ.
Wamama höiwa ãma, Ropotoꞌwa Jeová, te tsima wẽ petse te te wapari da ꞌröwi wapẽꞌẽ na wa te tiwi rowaptẽrẽ dzaꞌra wamhã. Tane nherẽ, te te tsadaꞌöbö õ di uburé rowaptẽrẽ mono hã. E niha bö. Duré, e marĩ na wa dza wapoꞌre puꞌu dzaꞌra ni wa te tiwi rowaptẽrẽ dzaꞌra wamhã. Wa te ꞌmadöꞌö dzaꞌra na Ropotoꞌwai mreme te te ãma ĩnharĩdzé hã.
‘ꞌRe rowaptẽrẽ dzaꞌra waꞌaba mono wamhã, aimreme na ãma ꞌre tsahu dzaꞌra waꞌaba mono tõ.’ — Mateus 6:7.
E niha te aré aihöiba atsiwaihu timreme na te te ãma ꞌre tsahu uꞌötsi mono ꞌwaꞌöhã te te aima ꞌre robdzanhamri mono wamhã. Tô tsena aima wẽ õ di aré. Jeová duré te te tsima wẽ õ di rowaptẽrẽ ĩtsihödö ĩhöiwarobo na taré wa te ãma tsahu dzaꞌra da niwamhã waꞌrãi hawi taré wa te ãma tsahu dzaꞌra da. Datsiwaihu ĩwẽ norĩ te natsi tsima tsiwatsuꞌu dzaꞌra ꞌröwi tipẽꞌẽ na. Jeová duré te tsima wẽ wa te ꞌmadöꞌö dzaꞌra da watsiwaihuꞌu na duré tãma ꞌre watsiwatsuꞌu dzaꞌra mono da ꞌröwi wapẽꞌẽ na.
‘ꞌRe ĩhöimana uꞌötsi mono wi ꞌre rowaptẽrẽ dzaꞌra waꞌaba mono wamhã, ꞌre waibui waꞌaba mono õ di. E marĩ wa. Atsima ĩwẽdzé hã watsété nherẽ, ꞌre waptẽrẽ dzaꞌra waꞌaba mono wa.’ — Tiago 4:3.
Wanhimipari dzaꞌra õ di dza Ropotoꞌwa wanhimirowaptẽrẽ te te tsadaꞌöbö da, wa te tiwi waptẽrẽ dzaꞌra wamhã marĩ tãma ĩwẽꞌõ. Bíblia te watsuꞌu tsõꞌawi Ropotoꞌwai ma ĩwẽꞌõ na hã danhibroꞌahö dzô robꞌruiwapari duré te roti wa te tsadze dzaꞌra tõ da rotsaꞌrada ĩböiꞌõ. Ãma ĩtsimiré, niꞌwam norĩ te tsadze dzaꞌra, to dzaꞌra da wamhã robꞌuipradzéb dzô Ropotoꞌwa dza te te ĩpawaptob dzaꞌra na hã te te aiꞌuté da, te te tiwi rowaptẽrẽ dzaꞌra wamhã. E Ropotoꞌwa tô tsena te dza tsadaꞌö rowaptẽrẽ ãne na hã. (Isaías 65:11 TNM; Lucas 12:15) Mare uptabi di. Ropotoꞌwa wanhimirowaptẽrẽ te te wapari da, wa te tiwi ĩwaptẽrẽ dzaꞌra dzé hã ĩhöimana da tsi Ropotoꞌwai mreme te te ĩnharĩdzéb dzarina.
‘ꞌRe ĩhöimana uꞌötsi mono, ĩtsimiroti te te ꞌre ĩwapari dzaꞌra mono õ norĩ nhimirowaptẽrẽdzé hã te tô te te ꞌre awẽꞌõ.’ — Provérbios 28:9.
Duréihã Bíblia dzarina, Ropotoꞌwa te te tsadaꞌöbö õ di ĩtsimiroti wẽ te te ꞌre ĩwapari dzaꞌra mono õ norĩ nhimirowaptẽrẽdzé hã. (Isaías 1:15, 16 TNM) Ropotoꞌwa tihöimanadzém na te te tsaprĩ õ di. (Tiago 1:17) Ropotoꞌwa wanhimirowaptẽrẽ te te tsadaꞌöbö da, ĩtsimiroti wẽ wa te ꞌre ĩtsadawa dzamarĩ dzaꞌra mono da tsi. Duréihã marĩ watsédé wa te ꞌmanharĩ dzaꞌra wamhã bété. E tsadai õ di oto Ropotoꞌwa wanhimirowaptẽrẽ te te wapari da. Tsada hã. Wawatsédé wa te rẽme dzaꞌra wamhã duré ĩwẽ hã wa te ꞌmanharĩ dzaꞌra wamhã, Ropotoꞌwa wawatsédé te te waꞌãma ꞌmadöꞌö õ di dza. — Atos 3:19.
