‘Ĩ̱mama hã te dza uburé marĩ hã te te aima ꞌre anhomri ꞌwa, ĩ̱nhitsi na marĩ tiwi ꞌre ĩwaptẽrẽ dzaꞌra waꞌaba mono hã.’ — João 16:23.

Jesus te te ĩnharĩdzéb dzarina, Jeová te te tsima wẽ õ di wa te tiwi rowaptẽrẽ dzaꞌra da dahöiba ꞌmanharĩ hawi, dawatsuꞌuꞌwa norĩ hawi niwamhã wahiꞌrata norĩ hawi, tadzahã Jesus Cristo nhitsi na tsi. Ropotoꞌwai wi wa te rowaptẽrẽ dzaꞌra wamhã Jesus nhitsi na hã, wa tsadze dzaꞌra ni Ropotoꞌwa wanhimirowaptẽrẽ te te ĩwapari na hã Jesus te te wama ĩꞌmanharĩ dzaꞌra dzéb uꞌöbö. Jesus te tinha: ‘Niꞌwa hã ĩ̱ꞌãma ꞌre morĩ õ nherẽ, Ĩ̱mama u hã witsi waihuꞌu õ di dza.’ — João 14:6.

‘Wa dza oto wapẽꞌẽ na ꞌröwi ĩtẽme ꞌre watsihutu, wahöimanadzé tsena ré tsi, ꞌRe ĩhöimana uꞌötsi mono u hã.’ — Hebreus 10:22.

Jeová ma wa dza wamreme dzaꞌra ni daꞌra timama ma ĩmreme ne. Tô õhõ rowaptẽrẽ hã ãma tsahu tõ bötö tsidöpötsi duré rowaptẽrẽ ãma tsahu tõ ĩhöiwarobo hawimhã. Taha waꞌrãmimhã tãma watsuꞌu na uburé atsimirotsaꞌrada aima robdzei wamhã niwamhã marĩ na aima robdzeiꞌõ wamhã.

‘ꞌRe ĩhöimana uꞌötsi mono te te tsima ꞌre ĩwẽ mono dzéb dzarina, tsiwaꞌru marĩ hã wa te tiwi ꞌre waptẽrẽ dzaꞌra mono wamhã, te dza te te wama ãma ꞌre aꞌuwaimrami.’ — 1 João 5:14.

Jeová te wama nharĩ dzaꞌra timreme na dza te te wama ĩꞌmanharĩ dzaꞌra dzé hã duré wa norĩ hã wa te tãma ĩꞌmanharĩ dzaꞌra dzéb da hã. Ropotoꞌwa wanhimirowaptẽrẽ te te wẽtsãmri da, wa te tiwi ĩrowaptẽrẽ dzaꞌra da tsi ‘te te tsima ꞌre ĩwẽ mono dzéb dzarina.’ Taha da, Ropotoꞌwai mreme na wa te ĩromnhoré dzaꞌra da tsi Ropotoꞌwa wa te waihuꞌu petse dzaꞌra da. Ãne Ropotoꞌwa te dza wapa wanhimirowaptẽrẽ.

Rowaptẽrẽ tsô ꞌre ĩꞌatsimnhatsi mono ãma. Ropotoꞌwai wi wa dza rowaptẽrẽ dzaꞌra ni watsa dzô, waꞌudza dzô duré wanhorõwa dzô. Wa dza duré tiwi waptẽrẽ dzaꞌra ni rowaihu ĩwẽ wa te watsima rowairébé wẽ dzaꞌra da duré wanhiptede ropire wa te ꞌwapé dzaꞌra da. Wa dza duré tiwi waptẽrẽ dzaꞌra ni wanhimidzadze, wawatsédé te te waꞌãma ꞌmadöꞌö tõ da duré ĩtsimipawaptobdzé. — Lucas 11:3, 4, 13; Tiago 1:5, 17.

Daꞌãma rowaptẽrẽ. Damama duré dana norĩ ma robdze ti tiꞌra norĩ ꞌre tsitsawi petse dzaꞌra mono wamhã. Jeová te tsima wẽ duré tiꞌra norĩ Tiꞌai ãma hã ꞌre tsiꞌmadöꞌö wẽ dzaꞌra mono da. Wa dza rowaptẽrẽ dzaꞌra ni wate família ãma, wamro ãma, waꞌra norĩ ãma duré watsiwaihuꞌu norĩ ãma. Ropotoꞌwai mreme te tinha: ‘Te dza duré atsiꞌãma ꞌre ĩrowaptẽrẽ dzaꞌra waꞌaba mo.’ — Tiago 5:16.

Rowaptẽrẽ hepãrĩ da marĩ aima ĩhöimana na hã. Bíblia te tinha Ropotoꞌwai ãma: ‘ꞌRe ĩhöimana uꞌötsi mono hã ma tô ꞌre tsiwaihuꞌu uꞌötsi, marĩ ĩwẽ te te ꞌre ĩꞌabꞌmanharĩ mono dzém na hã. Õ hã tãi ma, te te ꞌre robꞌru höiwa hawimhã duré amnho hã ꞌre ĩꞌrãi ꞌré dzaꞌra mono da hã bödö ĩꞌuwaibaba na. Õ hã te datsa hã te te aima ꞌre tsõmri dzaꞌra waꞌwa. Te duré aipẽꞌẽ ꞌre, rowẽ ĩtsaꞌẽne hã te te aima ꞌre tsõmri dzaꞌra waꞌwa.’ (Atos 14:17) Wa te rotsaꞌrata dzaꞌra wamhã uburé Ropotoꞌwa te te wama ĩꞌmanharĩ dzaꞌra dzém na hã, wa dza ãma wawata dzaꞌra ni rowaptẽrẽ na. Duré tô tsena wa dza ãma wawata dzaꞌra ni Ropotoꞌwa wa te tsadawa dzamarĩ dzaꞌra wamhã. — Colossenses 3:15.

Ãté nimahã na hã aima robdzeiꞌõ di Ropotoꞌwa atsimirowaptẽrẽ te te tsadaꞌöbö tsuꞌu õ wa. E tahã te höiꞌré Ropotoꞌwai ma ĩꞌatsawi õ na hã. Mare uptabi di! ꞌMadöꞌö niꞌwam norĩ te te ĩnharĩ dzaꞌra dzé rowaptẽrẽ ãma. Te dza ĩwaihu wa te natsi ĩrowaptẽrẽ uꞌötsi dzaꞌra da na hã.

Aibö Steve na ĩtsitsi te tsina tinha: “Rowaptẽrẽ na tsi wa tô ĩ̱tsima robdze apö.” E marĩ wa Steve ma ãma tsaprĩ tinhimirotsaꞌrata na rowaptẽrẽ ãma. Steve ma tô ãma tsãnaꞌrata Bíblia na te te romnhoré da duré ma tô waihuꞌu e marĩ wa Ropotoꞌwai wi wa te natsi ĩrowaptẽrẽ dzaꞌra da tsi. Steve te tinha: “Ĩ̱tsiwaihuꞌu norĩ ma tô ĩ̱pawapto petse dzaꞌra ropire wamhã. Wa natsi hepãrĩ Ropotoꞌwai ma taha na. Ãhãna hã ĩ̱ma robdzei uptabi di.”

Piꞌõ Jenny na ĩtsitsi ĩwatsété na tsiꞌmadöꞌö wa, te rotsaꞌrata ĩtsadai õ na hã Ropotoꞌwa ĩtsimirowaptẽrẽ te te wapari da. “Nimahã na ĩ̱hötöꞌö uptabi wamhã, Ropotoꞌwai wi wa rowaptẽ te te ĩ̱ma waihuꞌu da e tihai wa, wa ĩ̱tsiꞌmadö tiha dai õ na hã. Te rowaptẽrẽ parimhã, wa ĩ̱tsiꞌmadö Ropotoꞌwa nhimiroꞌmadöꞌö dzarina. Ĩ̱pẽꞌẽ na wa aré ĩ̱tsiꞌãma rowairébé ĩ̱watsété na, tadzahã, wa tô waihuꞌu Ropotoꞌwa ãne te te ĩ̱ꞌãma ĩrowairébé õ na hã. Rowaptẽrẽ uꞌöbö wa duré waihuꞌu te tsadzöri tõ da. Rowaptẽrẽ uꞌöbö wa ꞌmadö Jeová Ĩ̱mama na duré Ropotoꞌwa ĩtsimidzawi petse na, ĩ̱tsiwaihu ĩꞌuptabi te te ĩ̱ꞌãma ĩrotsaꞌrata na. Ĩ̱tsiwatsutu wamhã te tãma rowẽ da, te dza te te ꞌre ĩ̱ꞌupari uꞌötsi duré te dza te te ꞌre ĩ̱pawaptob uꞌötsi.”

ꞌMadöꞌö duré Isabel watsuꞌu. Watsã wamhã, dawedeꞌwa norĩ ma tãma watsuꞌu dzaꞌra ĩꞌra dza ĩpoto na hã ĩpoto prã na ĩtsépu ĩpire uptabi ré. Ma tô tiwi tirobdzeiꞌõ petse. Niꞌwam norĩ ma tãma watsuꞌu dzaꞌra tiwatsã te te wĩrĩ da. Isabel te tinha: “Ĩ̱ma hã, wa aré dörö robdzeiꞌõ uptabi na. Wa natsi rowaptẽrẽ uꞌötsi Ropotoꞌwa nhimipawaptobdzéb dzô.” Nimahã bötö pari, ĩꞌra ma tãma podo duré ma tô tsitsi Gerard na. Ĩꞌra höiba prã na tãma poto nherẽ, te te ꞌmadöꞌö waihuꞌu petse di Ropotoꞌwa ĩtsimirowaptẽrẽ te te ĩtsadaꞌöbö na hã. E niha bété. Te tsiwatsuꞌu: “Ãhãna hã, ĩ̱ꞌra Gerard ãma 14 ĩwaihu. Duré tãma robdzei uptabi di höiba prã nherẽ. Jeová ma tô ĩ̱ma tinhopru ĩ̱ꞌra te te ĩ̱ma ĩtsõmri na hã. Ĩ̱nhimirowaptẽrẽ ma tô wapa, taha wa, wa ãma ĩ̱wata.”

Ta norĩ mreme hã te wapoꞌre puꞌu dzaꞌra romnhihötö na hã: ‘Uburé Danhibꞌapito, a hã te dza [ĩtsahiꞌõ norĩ] mreme hã ꞌre ĩꞌawapari mo. Te dza duré ĩpẽꞌẽ nhiptetedzé hã tãma ꞌre ĩꞌanhomri mo.’ (Salmo 10:17) Umnhatsi waihuꞌu petse di Ropotoꞌwa atsimirowaptẽrẽ dza te te ĩwapari na hã.

Bíblia ꞌremhã wa duré tsõpẽtẽ dzaꞌra ni ĩhöiba amo nhimirowaptẽrẽ ahö na. Tahã Jesus. Daꞌahö na dama waihuꞌu petse di rowaptẽrẽ titsiré ꞌre ĩnomro mono norĩ ma te te ĩrowahudu hã. E marĩ wa waihuꞌu dzaꞌra ni ãhã rowaptẽrẽ na. Wa te ꞌmadöꞌö dzaꞌra na.