ÃHÃ ĨTSÕRÉDZÉB dzarina, robꞌru ti watobro wamhã ropire uptabi di dza. Ãté te ĩrotsaꞌra niꞌwa te te aipawaptob dzaꞌra õ di dza. Tane nherẽ, Höimanaꞌuꞌö waihuꞌu petse di atsimirobdzépada. Tãma atsawi petse di.

Salmo 4 ĩtsihötöꞌwa ma tô umnhatsi Höimanaꞌuꞌö ãma. Te tinha: ‘ꞌRe ĩhöimana uꞌötsi mono, ĩ̱ꞌwawi ꞌre ĩꞌaimapa mono, maꞌãpé te ãma ĩꞌaiꞌmahörödzém na hã we ĩ̱dzadaꞌöbö! Ropire na ĩ̱höimanadzém na, we ĩ̱pawapto na. Duré ĩ̱ꞌãma aiwamri wamhã, maꞌãpé ãma aima ĩ̱mremedzé hã wapari!’ (Salmo 4:1) Tadzahã, ãté te ĩrotsaꞌra: “E niha Höimanaꞌuꞌö te dza ĩ̱dzadaꞌö ĩ̱höimanadzé ropire wamhã.”

Ãté awaꞌawi hã Höimanaꞌuꞌö ropire hã tsiꞌutõrĩ õ di dza. Tadzahã, Bíblia te ãma rowatsuꞌu te dza aipawapto atãma ꞌre ꞌwapéi mono da. ‘Marĩ na ꞌre aihötöꞌö dzaꞌra waꞌaba mono ãna, te dza oto ꞌre aihöimana dzaꞌra waꞌaba mo. ꞌRe ĩhöimana uꞌötsi mono ma, ꞌre aimreme dzutsi aba mono dzép tsidöpötsi, te dza duré tiwi ꞌre ĩrowaptẽrẽ dzaꞌra waꞌaba mo . . . Rowẽ hã ꞌRe ĩhöimana uꞌötsi mono te te wama ꞌre ĩꞌapitsutu mono hã, ĩwẽ uptabi hã te wama ꞌre höimana dzaꞌra, da te ꞌre ĩwaihuꞌu dzaꞌra mono õ hã. Taha tsi te dza te te ꞌre aipẽꞌẽ nomri wẽ dzaꞌra waꞌwa, marĩ na ꞌre aihötöꞌö dzaꞌra waꞌaba mono ãna ꞌre aihöimana dzaꞌra waꞌaba mono da.’ (Filipenses 4:6, 7) Höimanaꞌuꞌö te waꞌmadöꞌö dzaꞌra. ꞌMadöꞌö Bíblia ꞌremhã.

‘Tsire ꞌwaꞌöhã waꞌöbö tsyryre nherẽ, ãma poꞌre tsiꞌöri waihuꞌu õ di, ꞌRe ĩhöimana uꞌötsi mono hã. Tane duré . . . tsire dzawi nhipai u, tãma atsawi uptabi dzaꞌra waꞌaba di, ꞌRe ĩhöimana uꞌötsi mono ma hã. Tahawa, te dza atsina aihötöꞌö ãna ꞌre anomro aba mo.’ — Lucas 12:6, 7.

ÃMA ROTSAꞌRATA: Tsire norĩ hã, tsyryre nherẽ, Höimanaꞌuꞌö tãma waihuꞌu petse di, duré tãma tsawi petse di. Tawamhã, Höimanaꞌuꞌö aꞌuwẽ norĩ hã tãma tsawi petse nhipai u hã. Ropoto mono bö tiꞌai ãma hã aꞌuwẽ norĩ hã danhipai u ĩpire. Höimanaꞌuꞌö ĩtsine wa tô poto dzaꞌra. E niha. Wa natsi tsawi dzaꞌra ni, wa natsi robdze dzaꞌra di, duré marĩ ahö na wa ꞌmanharĩ dzaꞌra ni Höimanaꞌuꞌö ĩtsine. — Gênesis 1:26, 27.

‘Danhimirotsaꞌrada hã, Uburé Danhibꞌapito ma, waihuꞌu petse di. Duré tarére na da te ꞌre ĩrotsaꞌrata dzaꞌra mono dzé, tãma hã waihuꞌu petse di.’ — Salmo 94:11.

ÃMA ROTSAꞌRATA: Atsimirotsaꞌrada hã duré marĩ na te aihötöꞌö di Höimanaꞌuꞌö tãma waihuꞌu petse di. Aipẽꞌẽ ꞌre da te waihuꞌu dzaꞌra õ nherẽ, Höimanaꞌuꞌö tãma waihuꞌu petse di, duré te dza aipawapto. Ãne waihuꞌu wamhã, wapu di dza ꞌre aihöimana dze apö.

‘Uburé Danhibꞌapito, maꞌãpé ãma aima ĩ̱mremedzé hã wapari. Duré ĩ̱dzadari tsina ĩ̱pawaptobdzé te aiwi ĩwaptẽrẽdzé hã, maꞌãpé atsitẽme öri wẽ na! Duré maꞌãpé ĩ̱wi aiꞌrã tsipiꞌra tõ, te robdzépata ré, ĩ̱ꞌmadöꞌö tõ da hã . . . Duré... tinhibꞌaꞌuwẽ . . . ĩtsimirowaptẽrẽ dzaꞌra dzé, te te tiwi ꞌre ĩꞌawẽꞌõ mono da hã mare di dza.’ — Salmo 102:1, 2, 17.

ÃMA ROTSAꞌRATA: Uburé danhimirobdzépada hã Jeová tãma waihuꞌu petse di, duré atsimirobdzépada Jeová tãma waihuꞌu petse di. (Salmo 56:8) E marĩ wa. Tãma atsawi petse di.

‘Tahawa, watsina ꞌre wahötöꞌö dzaꞌra mono ãna, wa dza tô ꞌröwi wapẽꞌẽ ꞌre, ꞌRe ĩhöimana uꞌötsi mono u ꞌre watsihutu, daꞌãma ꞌre tsiwãrĩ mono da, te te ꞌre ĩdaꞌabꞌmadöꞌö uꞌötsi mono u hã.’ — Hebreus 4:16.

ÃMA ROTSAꞌRATA: Höimanaꞌuꞌö te te ꞌre ĩꞌabꞌmadöꞌö uꞌötsi. Tawamhã, ropire watobro wamhã te dza aipawapto.

“Höimanaꞌuꞌö, ma te daꞌadzawi dzaꞌẽtẽ poré, ma te Tiꞌra potoꞌrada dama titsõ, marĩ ãna, tahã aihini te ĩtsadze dzaꞌra mono hã, tsiꞌutõrĩ mono tõ da, tadza hã ĩhöimana tsiꞌutõrĩꞌõ tãma höimana dzaꞌra mono da.” — João 3:16, Rowatsuꞌu tém nhihödö.

ÃMA ROTSAꞌRATA: Höimanaꞌuꞌö tãma atsawi petse di. Tahawa, õ hã ma tô titsõ tiꞌra atsada döꞌö da, tahawa romhutuꞌõmhã te dza ꞌre aihöimana uꞌötsi mo. *