ISikhumbuzo sisihlandlo sokucinga ngeentsikelelo zekamva ezikho ngenxa yentlawulelo, njengovuko. Ayizange ibe yinjongo kaYehova ukuba abantu bafe. Yiloo nto enye yezona mvakalelo zibuhlungu kuthi iyintlungu yokufelwa ngumntu omthandayo. (1Ko 15:26) UYesu wayebuhlungu kukubona abafundi bakhe besentlungwini yokulahlekelwa nguLazaro. (Yoh 11:33-35) Ekubeni uYesu engumfanekiso ogqibeleleyo kaYise, sinokuqiniseka ukuba uYehova naye uba buhlungu xa esibona sisentlungwini yokulahlekelwa ngabantu esibathandayo. (Yoh 14:7) UYehova ulilindele ngolangazelelo ixesha laxa eya kuvusa abakhonzi bakhe, ibe nathi sifanele sibe njalo.—Yob 14:14, 15.

Ekubeni uYehova enguThixo wocwangco, kufanelekile ukucinga ukuba uvuko luya kwenziwa ngocwangco. (1Ko 14:33, 40) Endaweni yokuba kubekho imingcwabo, kusenokwamkelwa abantu abavusiweyo. Ngaba ukhe ucinge nzulu ngovuko, ngokukodwa xa usentlungwini? (2Ko 4:17, 18) Ngaba uyambulela uYehova ngokulungiselela intlawulelo nangokuchaza eZibhalweni ukuba abantu abafileyo baza kuphila kwakhona?—Kol 3:15.

• Nguwuphi oyena mhlobo nesalamane sakho okhangele phambili ekusiboneni kwakhona?

• Ngabaphi abona bantu ekuthethwa ngabo eBhayibhileni ongathanda ukubabona uze uthethe nabo?