Eksodus 6:1-30
6 Wathi uYehova kuMoses: “Uya kukubona ngoku oko ndiya kukwenza kuFaro,+ kuba ngesandla esomeleleyo ndiya kumenza abandulule ndize ngesandla esomeleleyo ndimenze abagxothe ezweni lakhe.”+
2 Waqhubeka uThixo ethetha kuMoses esithi kuye: “NdinguYehova.+
3 Ndandidla ngokubonakala kuAbraham,+ uIsake+ noYakobi+ njengoThixo uSomandla,+ kodwa andizazisanga kubo+ ngegama lam elinguYehova.+
4 Yaye ndawumisa nabo umnqophiso wam wokuba ndibanike ilizwe lakwaKanan, apho baphambukela khona baza bahlala kwelo lizwe njengabaphambukeli.+
5 Kananjalo, ndikuvile mna ukugcuma koonyana bakaSirayeli,+ abakhotyokiswayo ngamaYiputa, ndawukhumbula umnqophiso wam.+
6 “Ngoko ke yithi koonyana bakaSirayeli, ‘NdinguYehova, yaye ngokuqinisekileyo ndiya kunikhupha phantsi koxanduva lwamaYiputa ndize ndinihlangule ebukhobokeni bawo,+ yaye ndiya kunihlangula ngokwenene ngengalo eyoluliweyo nangezigwebo ezikhulu.+
7 Ngokuqinisekileyo ndonithabatha nibe sisizwana sam,+ ndize ngokwenene ndizingqine ndinguThixo wenu;+ yaye niya kwazi ngokuqinisekileyo ukuba ndinguYehova uThixo wenu onikhuphayo phantsi koxanduva lwamaYiputa.+
8 Yaye ndonisa ngokuqinisekileyo ezweni elo ndaphakamisa isandla sam ndafunga+ ngalo ukuba ndolinika uAbraham, uIsake noYakobi; ndoninika lona ngokuqinisekileyo njengelifa.+ NdinguYehova.’”+
9 Emva koko uMoses wakuthetha oku koonyana bakaSirayeli, kodwa abamphulaphulanga uMoses ngenxa yokudimazeka nangenxa yokukhotyokiswa nzima.+
10 Wathetha ke uYehova kuMoses, wathi:
11 “Ngena, uthethe kuFaro, ukumkani waseYiputa,+ ukuba abandulule oonyana bakaSirayeli baphume ezweni lakhe.”+
12 Noko ke, uMoses wathetha phambi koYehova, wathi: “Khangela! Oonyana bakaSirayeli abandiphulaphulanga;+ uya kundiphulaphula njani ke yena uFaro,+ ndingomilebe ingalukanga nje?”+
13 Kodwa uYehova waqhubeka ethetha kuMoses noAron yaye ekhupha umyalelo ngabo oya koonyana bakaSirayeli nakuFaro, ukumkani waseYiputa, wokuba abakhuphe oonyana bakaSirayeli ezweni laseYiputa.+
14 Zizo ezi iintloko zezindlu zooyise: Oonyana bakaRubhen, izibulo likaSirayeli,+ nguHanoki noPalu, uHetseron noKarmi.+ Zizo ezo iintsapho zikaRubhen.+
15 Oonyana bakaSimeyon nguYemuweli noYamin no-Ohadi noYakin noTsohare noShawule unyana womfazi womKanan.+ Zizo ezo iintsapho zikaSimeyon.+
16 Ngawo la amagama oonyana bakaLevi,+ ngokweminombo yeentsapho zabo:+ NguGershon noKohati noMerari.+ Yaye iminyaka yobomi bukaLevi yaba likhulu elinamashumi amathathu anesixhenxe eminyaka.
17 Oonyana bakaGershon nguLibhini noShimeyi,+ ngokweentsapho zabo.+
18 Oonyana bakaKohati nguAmram noItsare noHebron noUziyeli.+ Yaye iminyaka yobomi bukaKohati yaba likhulu elinamashumi amathathu anesithathu eminyaka.
19 Oonyana bakaMerari nguMahali noMushi.+
Zizo ezo iintsapho zakwaLevi, ngokweminombo yeentsapho zazo.+
20 UAmram wathabatha uYokebhede udade boyise waba ngumfazi.+ Kamva wamzalela uAron noMoses.+ Yaye iminyaka yobomi buka-Amram yaba likhulu elinamashumi amathathu anesixhenxe eminyaka.
21 Oonyana bakaItsare nguKora+ noNefege noZikri.
22 Oonyana bakaUziyeli nguMishayeli noElitsafan noSiteri.+
23 UAron wathabatha uElishebha, intombi ka-Aminadabhi, udade boNashon,+ waba ngumfazi wakhe. Kamva wamzalela uNadabhi noAbhihu, uEleyazare noItamare.+
24 Oonyana bakaKora nguAsire noElikana noAbhiyasafu.+ Zizo ezo iintsapho zamaKora.+
25 UEleyazare, unyana ka-Aron,+ wazithabathela enye yeentombi zikaPutiyeli yaba ngumfazi wakhe. Kamva yamzalela uFinehasi.+
Zizo ezo iintloko zooyise zabaLevi, ngokweentsapho zabo.+
26 Ngulo Aron noMoses awathi kubo uYehova:+ “Bakhupheni oonyana bakaSirayeli ezweni laseYiputa ngokwemikhosi yabo.”+
27 Ngabo abo bathethayo kuFaro, ukumkani waseYiputa, ukuba abakhuphe oonyana bakaSirayeli eYiputa.+ Ngulo Moses nalo Aron.
28 Kwathi mhla wathethayo uYehova kuMoses ezweni laseYiputa,+
29 wathetha uYehova kuMoses, wathi: “NdinguYehova.+ Thetha kuFaro ukumkani waseYiputa yonke into endiyithethayo kuwe.”
30 Waza wathi uMoses phambi koYehova: “Khangela! Ndingomilebe ingalukanga, ngoko angandiphulaphula njani na ke uFaro?”+
