Hezekile 20:1-49
20 Ke kaloku kwathi ngonyaka wesixhenxe, ngenyanga yesihlanu, ngoweshumi umhla enyangeni leyo, amadoda avela kwabakhulileyo bakwaSirayeli eza kubuzisa kuYehova,+ ahlala phantsi phambi kwam.+
2 Landula ke lafika ilizwi likaYehova kum, lisithi:
3 “Nyana womntu, thetha namadoda akhulileyo akwaSirayeli, uthi kuwo, ‘Itsho iNkosi enguMongami uYehova ukuthi: “Nizele ukuza kubuzisa kum na?+ ‘Ndiphila nje, andizi kubuzwa nini,’+ itsho iNkosi enguMongami uYehova.”’
4 “Uya kubagweba na? Uya kubagweba na, nyana womntu?+ Bazise izinto ezicekisekayo zookhokho babo.+
5 Yaye umele uthi kubo, ‘Itsho iNkosi enguMongami uYehova ukuthi: “Ngemini yokunyula kwam uSirayeli,+ ndaphakamisa isandla sam+ ndifungela imbewu yendlu kaYakobi+ ndaza ndazazisa kubo kwilizwe laseYiputa.+ Ewe, ndasiphakamisa isandla sam ndibafungela, ndisithi, ‘NdinguYehova uThixo wenu.’+
6 Ngaloo mini ndasiphakamisa isandla sam+ ndibafungela ukuze ndibakhuphe kwilizwe laseYiputa ndibase kwilizwe endandibahlolele lona, eliqukuqela ubisi nobusi.+ Lalingumhombiso emazweni onke.+
7 Ndaza ndahlabela mgama ndathi kubo, ‘Lahlani, ngamnye kuni, izinto ezilizothe zamehlo enu,+ ningazenzi inqambi ngezithixo ezinezothe zaseYiputa.+ NdinguYehova uThixo wenu.’+
8 “‘“Baqala ke bona ukundivukela,+ yaye abazange bavume ukundiphulaphula. Izinto ezilizothe zamehlo abo abazange bazilahle, nezithixo ezinezothe zaseYiputa abazange bazishiye,+ kangangokuba ndathembisa ukuphalazela kubo ubushushu bam, ukuze ndiwuphelelise kubo umsindo wam phakathi kwelizwe laseYiputa.+
9 Ndenjenjalo ngenxa yegama lam ukuze lingahlanjelwa phambi kwamehlo eentlanga ababephakathi kwazo,+ ngenxa yokuba ndandizazisile kubo phambi kwamehlo azo ngokubakhupha kwilizwe laseYiputa.+
10 Ngoko ndabakhupha kwilizwe laseYiputa ndaza ndabazisa entlango.+
11 “‘“Ndabanika imimiselo yam;+ ndabazisa nezigwebo zam,+ ukuze umntu ozenzayo abe nokuphila ngazo.+
12 Ndabanika neesabatha zam,+ ukuba zibe ngumqondiso phakathi kwam nabo,+ ukuze bazi ukuba ndinguYehova obangcwalisayo.
13 “‘“Kodwa bona, ndlu kaSirayeli, bandivukela entlango.+ Abazange bahambe ngemimiselo yam,+ nezigwebo zam bazigatya,+ ezo, ukuba umntu ebengazenza, ebeya kuqhubeka ephila ngazo.+ Neesabatha zam bazihlambela kakhulu,+ kangangokuba ndathembisa ukukuphalazela kubo entlango ukuvutha komsindo wam, ukuze ndibatshabalalise.+
14 Kodwa ndenza oko ngenxa yegama lam ukuze lingahlanjelwa phambi kwamehlo eentlanga, endandibakhuphe phambi kwamehlo azo.+
15 Ndaza ndaphakamisa isandla sam ndibafungela entlango,+ ukuba andiyi kubazisa kwilizwe endandibanikile, elo liqukuqela ubisi nobusi,+ (lingumhombiso emazweni onke.)+
16 ngenxa yokuba bazigatya izigwebo zam; ngokubhekisele kwimimiselo yam ke, abazange bahambe ngayo, neesabatha zam bazihlambela, ngenxa yokuba intliziyo yabo yayilandela izithixo zabo ezinezothe.+
17 “‘“Laza iliso lam laba nosizi kubo ukuba ndingabonakalisi,+ yaye andizange ndibatshabalalise entlango.
18 Ndaza ndathi koonyana babo entlango,+ ‘Musani ukuhamba ngemimiselo yookhokho benu,+ ningayigcini nemigwebo yabo,+ ningazenzi iinqambi ngezithixo zabo ezinezothe.+
19 NdinguYehova uThixo wenu.+ Hambani ngemimiselo yam,+ nigcine izigwebo zam,+ nizenze.+
20 Ngcwalisani iisabatha zam,+ zibe ngumqondiso phakathi kwam nani, ukuze nazi ukuba ndinguYehova uThixo wenu.’+
21 “‘“Basuka oonyana bandivukela.+ Abahamba ngemimiselo yam, abazigcina izigwebo zam ukuba bazenze, ezo, aya kuthi umntu ukuba uyazenza, aphile ngazo.+ Iisabatha zam bazihlambela.+ Ngoko ndathembisa ukuphalazela ubushushu bam kubo, ukuze ndiwuphelelisele kubo umsindo wam entlango.+
22 Ndasibuyisa ke isandla sam+ ndaza ndenza ngenxa yegama lam, ukuze lingahlanjelwa phambi kwamehlo eentlanga, endandibakhuphe phambi kwamehlo azo.+
23 Ndasiphakamisa isandla sam ndibafungela entlango,+ ukuze ndibachithachithe phakathi kweentlanga nokuze ndibasasaze phakathi emazweni,+
24 ngenxa yokuba bengazigcinanga izigwebo zam+ baza bayigatya imimiselo yam+ neesabatha zam bazihlambela,+ namehlo abo alandela izithixo ezinezothe zookhokho babo.+
25 Nam ndabamisela imimiselo engalunganga nezigwebo ababengenakuphila ngazo.+
26 Ndabayeka benziwa iinqambi ngezipho zabo ekudluliseni kwabo emlilweni wonke umntwana ovula isibeleko,+ ukuze ndibaphanzise, bazi ukuba ndinguYehova.”’+
27 “Ngoko ke thetha kwindlu kaSirayeli, nyana womntu, uthi kuyo,+ ‘Itsho iNkosi enguMongami uYehova ukuthi: “Kanti ke kule nkalo, ookhokho benu banditshabhisa, ngokwenza kwabo ngokungathembeki kum.+
28 Yaye ndabazisa kwilizwe+ endandiphakamise isandla sam ndibafungela ukubanika lona.+ Bathi bakubona zonke iinduli eziphakamileyo+ nayo yonke imithi eshinyeneyo ngamasebe, bandula ke babingelela apho imibingelelo yabo,+ banikela apho iminikelo yabo ecaphukisayo, bazisa apho amavumba abo athozamisayo,+ bethululela apho neminikelo yabo ethululwayo.+
29 Ngoko ndathi kubo, ‘Ithetha ntoni na kuni le ndawo iphakamileyo niza kuyo, ukuze nje igama layo kuthiwe yiNdawo Ephakamileyo kude kuse kule mini?’”’+
30 “Ngoko ke yithi kwindlu kaSirayeli, ‘Itsho iNkosi enguMongami uYehova ukuthi: “Ngaba nizenza iinqambi na ngendlela yookhokho benu,+ nilandela izinto zabo ezilizothe ngeentlobano zokuziphatha okubi?+
31 Yaye ngokuphakamisa izipho zenu ngokudlulisa oonyana benu emlilweni,+ ngaba nizenza iinqambi na ngenxa yezithixo zenu zonke ezinezothe ukuza kutsho namhlanje?+ Kwangaxeshanye ndiya kubuzwa nini na, ndlu kaSirayeli?”’+
“‘Ndiphila nje,’ itsho iNkosi enguMongami uYehova ukuthi, ‘andiyi kubuzwa nini.+
32 Yaye oko kuzayo emoyeni wenu+ ngokuqinisekileyo akuyi kwenzeka,+ ekubeni nisithi: “Masibe njengeentlanga ezi, njengeentsapho zamazwe la,+ silungiselele emthini naselityeni.”’”+
33 “‘Ndiphila nje,’ itsho iNkosi enguMongami uYehova ukuthi, ‘Ndiza kulawula njengokumkani phezu kwenu ngesandla esomeleleyo nangengalo eyoluliweyo+ nangobushushu obuthululwayo.+
34 Kwaye ndiza kunikhupha kwizizwana, ndiniqokelele ndawonye kumazwe enichithachithelwe kuwo ngesandla esomeleleyo nangengalo eyoluliweyo nangobushushu obuthululwayo.+
35 Yaye ndiza kunizisa kwintlango yezizwana+ ndize ndinigwebe apho ubuso ngobuso.+
36 “‘Kanye njengoko ndabagwebayo ookhokho benu entlango yelizwe laseYiputa,+ ngoko ndiya kunigweba nani,’ itsho iNkosi enguMongami uYehova.
37 ‘Yaye ndiza kunidlulisa phantsi kwentonga+ ndize ndinizise kumxokelelwane womnqophiso.+
38 Kwaye ndiza kubacoca kuni abo bavukelayo nabanxaxhayo+ nxamnye nam, kuba ndiya kubakhupha kwilizwe abaphambukele kulo, kodwa abayi kuza kumhlaba wakwaSirayeli;+ nazi ukuba ndinguYehova.’+
39 “Yaye nina, ndlu kaSirayeli, itsho iNkosi enguMongami uYehova ukuthi, ‘Hambani niye kukhonza ngamnye kuni izithixo zakhe ezinezothe.+ Kwaye emva koko ukuba anindiphulaphuli, ngoko igama lam elingcwele aniyi kuphinda nilihlambele ngezipho zenu nangezithixo zenu ezinezothe.’+
40 “‘Kuba entabeni yam engcwele, entabeni ephakamileyo yakwaSirayeli,’+ itsho iNkosi enguMongami uYehova, ‘kulapho bona, iyonke indlu kaSirayeli ngokupheleleyo, baya kundikhonza, elizweni.+ Apho ndiya kukholiswa ngabo, yaye apho ndiya kuyifuna iminikelo yenu nentlahlela yeminikelo yenu kwizinto zenu zonke ezingcwele.+
41 Ngenxa yevumba elithozamisayo ndiya kukholiswa nini,+ xa ndinikhupha kwizizwana ndize okunene ndiniqokelele ndawonye nivela kumazwe enanichithachithwe kuwo,+ ndingcwaliswe kuni phambi kwamehlo eentlanga.’+
42 “‘Niya kwazi ukuba ndinguYehova,+ ekuniziseni kwam kumhlaba wakwaSirayeli,+ kwilizwe endaphakamisa isandla sam ndifungela ukulinika ookhokho benu.
43 Yaye ngokuqinisekileyo niya kuzikhumbula apho iindlela zenu+ nazo zonke izenzo zenu enazenza iinqambi ngazo,+ nize okunene nizive nizothekile bubuso benu ngenxa yazo zonke izinto zenu ezimbi enizenzileyo.+
44 Niya kwazi ukuba ndinguYehova+ xa ndithabatha inyathelo ngani ngenxa yegama lam,+ kungekhona ngokweendlela zenu ezimbi okanye ngokwezenzo zenu ezonakeleyo,+ ndlu kaSirayeli,’ itsho iNkosi enguMongami uYehova.”
45 Laza ilizwi likaYehova laqhubeka lifika kum, lisithi:
46 “Nyana womntu, bhekisa ubuso bakho+ kwicala lasemzantsi uze ukhuphe+ amazwi akho aye ngasemzantsi, uprofete kwihlathi lomhlaba wasemzantsi.
47 Uze uthi kwihlathi lasemzantsi, ‘Live ilizwi likaYehova. Itsho iNkosi enguMongami uYehova ukuthi: “Yabona, ndikutshisa ngomlilo,+ kwaye umele uqwenge kuwe wonke umthi osafumileyo nawo wonke umthi owomileyo.+ Idangatye elivuthayo aliyi kucinywa,+ yaye bonke ubuso bumele butshiswe nguwo ukususela emzantsi ukusa emntla.+
48 Nabo bonke abo benyama bamele babone ukuba mna, Yehova, ndiwubasile, kangangokuba awuyi kucinywa.”’”+
49 Ndaza ndathi ke: “Owu Nkosi enguMongami Yehova! Bathi ngam, ‘Ngaba akaqambi iintetho eziyimizekeliso na kodwa?’”+
