Hezekile 47:1-23
47 Yandibuyisela emnyangweni weNdlu,+ yaye, khangela! kwakukho amanzi+ aphuma phantsi kombutho womnyango weNdlu ngasempuma,+ kuba umngaphambili weNdlu wawungasempuma. Amanzi ke ayesihla evela ngaphantsi, kwicala lasekunene leNdlu, kumzantsi wesibingelelo.
2 Yandizisa ngendlela yesango lasemntla+ yaza yandijikelezisa ngendlela engaphandle eya esangweni elingaphandle elijonge ngasempuma,+ yaye, khangela! kwakuqukuqela amanzi+ evela kwicala lasekunene.
3 Ekuyeni kwendoda ngasempuma inolutya lokulinganisa esandleni sayo,+ yalinganisa iikubhite eziliwaka yaza yandidlulisa emanzini, amanzi ebetha emaqatheni.
4 Kwaye yaqhubeka ilinganisa iwaka ize ke indidlulise emanzini, amanzi ebetha emadolweni.
Yaqhubeka ke ilinganisa iwaka yaye ngoku yandidlulisa—amanzi ebetha esinqeni.
5 Yaqhubeka ke ilinganisa iwaka. Yayingumsinga endandingakwazi ukudlula kuwo, kuba amanzi ayephakamile, amanzi avumela ukudada, umsinga ekungenakudlulwa kuwo.
6 Yathi ke yona kum: “Ukubonile na oku, nyana womntu?”
Yandula ke yandihambisa yaza yandibuyisela eludongeni lomsinga lowo.
7 Ekubuyeni kwam, kaloku, khangela! eludongeni lomsinga kwakukho imithi emininzi kakhulu, kweli cala nakweliya icala.+
8 Yaza yahlabela mgama yathi kum: “La manzi aphuma aye kummandla wasempuma yaye amele ehle aye eArabha.+ Kwaye amele afike elwandle. Akuziswa elwandle,+ namanzi alo+ okunene ayaphiliswa.
9 Kumele kuthi ke wonke umphefumlo ophilayo onyakazelayo,+ kuyo yonke indawo ofika kuyo umsinga omkhulu, ufumane ubomi. Kumele kubekho iintlanzi ezininzi kakhulu, ngenxa yokuba ngokuqinisekileyo aya kufika apha la manzi, yaye amanzi aselwandle aya kuphiliswa,+ kwaye yonk’ into iya kuphila apho ufika khona umsinga.
10 “Kumele kuthi ke okunene kume abalobi ecaleni kwawo ukususela e-Engedi+ ukusa e-En-eglayim. Kuya kubakho indawo yokumisa iminatha erhuqwayo. Ziya kuba ngokohlobo lwazo iintlanzi zabo, njengeentlanzi zoLwandle Olukhulu,+ zininzi kakhulu.
11 “Kukho imigxobhozo yalo, yaye ayiyi kuphiliswa.+ Ngokuqinisekileyo iya kuba mtyuba.+
12 “Nasecaleni komsinga kuya kuphuma, eludongeni lwawo kweli cala nakweliya icala, zonke iintlobo zemithi yokudliwa.+ Amagqabi awo akayi kubuna,+ nesiqhamo sawo asiyi kudliwa siphele.+ Iya kuthwala isiqhamo esitsha ngeenyanga zayo, ngenxa yokuba amanzi awo—aphuma engcweleni kanye.+ Isiqhamo sawo simele sibe sesokudliwa namagqabi awo abe ngawokuphilisa.”+
13 Itsho iNkosi enguMongami uYehova ukuthi: “Nguwo lo ummandla eniya kuzabela wona ube lilifa njengelizwe lezizwe ezilishumi elinesibini zakwaSirayeli, kunye neziqwenga ezibini zomhlaba wakwaYosefu.+
14 Kwaye nimele niwudle ilifa, ngamnye ngokufanayo nomntakwabo, lizwe elo ndaphakamisa isandla sam ndifunga+ ukulinika ookhokho benu;+ yaye eli lizwe limele liwele kuni ngeqashiso libe lilifa.+
15 “Nguwo lo ke umda welizwe kwicala lasemntla, ukususela kuLwandle Olukhulu ngendlela yaseHetelon,+ ukusa eTsedadi,+
16 eHamati,+ eBherota,+ eSibrayim, ephakathi komda waseDamasko+ nomda waseHamati; iHatsere-hatikon, engakumda waseHawuran.+
17 Umda ukusuka elwandle umele ube seHatsare-enon,+ umda waseDamasko—owasemntla ngasemntla, nomda waseHamati.+ Licala lasemntla ke elo.
18 “Necala lasempuma lisusela phakathi kweHawuran+ neDamasko+ naphakathi kweGiliyadi+ nelizwe lakwaSirayeli; iYordan,+ nifanele nilinganise ukususela emdeni ukuya kulwandle lwangasempuma. Licala lasempuma ke elo.
19 “Necala lasemzantsi lingasemzantsi, ukususela kwaTamare+ ukusa emanzini aseMeribhati-kadeshe,+ entlanjeni+ ukusa kuLwandle Olukhulu. Licala lasemzantsi ke elo, ukuya ngaseNegebhi.
20 “Necala lasentshona luLwandle Olukhulu, ukususela emdeni liye ngqo phambili ukuya kungena eHamati.+ Licala lasentshona ke elo.”
21 “Nimele nizahlulele eli lizwe, kwizizwe ezilishumi elinesibini zakwaSirayeli.
22 Nifanele nilabe njengelifa kuni+ nakubaphambukeli abaphambukele kuni,+ abaye bazala oonyana phakathi kwenu. Kuni bamele babe njengenzalelwane phakathi koonyana bakaSirayeli. Kunye nani baya kuwela elifeni ngeqashiso phakathi kwezizwe zakwaSirayeli.+
23 Kweso sizwe aphambukele kuso umphambukeli, nize nimnike ilifa lakhe kuso,” itsho iNkosi enguMongami uYehova.
