INdumiso 102:1-28
Umthandazo woxhwalekileyo xa kunokwenzeka abe buthathaka aze aphalaze ukuxhalaba kwakhe phambi koYehova.+
102 Owu Yehova, wuve umthandazo wam;+Ngamana ukukhalela kwam uncedo kungafikelela kuwe.+
2 Musa ukubufihla ubuso bakho kum ngemini yokuba sezingxakini ezinkulu kwam.+Ndithobele indlebe yakho;+Ngemini yokubiza kwam, khawuleza, undiphendule.+
3 Kuba imihla yam iphelile kanye njengomsi,+Namathambo am avutha kanye njengeziko lomlilo.+
4 Intiliziyo yam ibethiwe kanye njengotyani yaye yomisiwe,+Kuba ndilibele ukutya ukutya kwam.+
5 Ngenxa yesandi sokuncwina kwam+Amathambo am anamathele enyameni yam.+
6 Ndifana nengcwangube yentlango.+Ndiye ndanjengesikhova esincinane seendawo eziphanzileyo.
7 Ndibhityile,Yaye ndinjengentaka eyodwa eluphahleni.+
8 Iintshaba zam zindingcikivile imini yonke.+Abo bandenza isidenge bafunga ngam.+
9 Kuba ndidle uthuthu kanye njengesonka;+Nezinto endiziselayo ndiziphithikeze nokulila,+
10 Ngenxa yesiqalekiso sakho nokucaphuka kwakho;+Kuba undiphakamisile, ukuze undilahle.+
11 Imihla yam injengokoluka kwamathunzi,+Yaye mna ndomile njengotyani.+
12 Wena ke, Yehova, uya kuhlala ukusa kwixesha elingenammiselo,+Nesikhumbuzo sakho siya kuba kwizizukulwana ngezizukulwana.+
13 Uya kusukuma, uya kuba nenceba kuyo iZiyon,+Kuba lixesha lokuba ube nobabalo kuyo,Kuba ixesha elimisiweyo lifikile.+
14 Kuba abakhonzi bakho bakholisiwe ngamatye ayo,+Kwaye babhekisa inkoliseko yabo eluthulini lwayo.+
15 Iintlanga ziya kuloyika igama likaYehova,+Nabo bonke ookumkani bomhlaba ubuqaqawuli bakho.+
16 Kuba ngokuqinisekileyo uYehova uya kuyakha iZiyon;+Umele abonakale esebuqaqawulini bakhe.+
17 Ngokuqinisekileyo uya kuphethukela emthandazweni wabo baphangwe yonk’ into,+Aze angawudeli umthandazo wabo.+
18 Oku kubhalelwe isizukulwana esizayo;+Nabantu abaza kudalwa baya kumdumisa uYa.+
19 Kuba ukhangele phantsi esendaweni yakhe ephakamileyo engcwele,+Esemazulwini kanye uYehova ukhangele emhlabeni,+
20 Ukuze akuve ukuncwina kwebanjwa,+Abakhulule abo bamiselwe ukuba bafe;+
21 Ukuze igama likaYehova livakaliswe eZiyon+Nendumiso yakhe eYerusalem,+
22 Xa izizwana ziqokelelwe zonke ndawonye,+Nezikumkani ukuba zikhonze uYehova.+
23 Endleleni wawaxhwalekisa amandla am,+Wayinqumla imihla yam.+
24 Ndathi ke: “Owu Thixo wam,Musa ukundisusa kwisiqingatha semihla yam;+Iminyaka yakho ikuzo zonke izizukulwana.+
25 Wazibeka kwakudala iziseko zomhlaba,+Namazulu angumsebenzi wezandla zakho.+
26 Ezo zinto ziya kutshabalala, kodwa wena uya kuqhubeka umile;+Zonke ziya kuguga kanye njengesambatho.+Uya kuzithabathel’ indawo kanye njengesinxibo, yaye ziya kuligqiba ithuba lazo.+
27 Kodwa wena ukwanguwe, neminyaka yakho ayiyi kuphela.+
28 Oonyana babakhonzi bakho baya kuqhubeka behlala;+Kwaye phambi kwakho inzala yabo iya kumiselwa ngokuqinileyo.”+
