Marko 1:1-45
1 Ukuqala kweendaba ezilungileyo ezingoYesu Kristu:
2 Kanye njengoko kubhaliwe kuIsaya umprofeti kwathiwa: “(Khangela! Ndithumela umthunywa wam phambi kobuso bakho, oya kulungisa indlela yakho;)+
3 phulaphula! uthile udanduluka entlango esithi, ‘Lungisani indlela kaYehova, yenzani iindlela zakhe zithi tye,’”+
4 uYohane umbhaptizi wavela entlango, eshumayela ubhaptizo olufuzisela inguquko ukuze kuxolelwe izono.+
5 Ngenxa yoko wonke ummandla welakwaYuda nabo bonke abemi baseYerusalem baphuma besiya kuye, yaye wababhaptiza kuMlambo iYordan, bezivuma ekuhleni izono zabo.+
6 UYohane wayambethe uboya benkamela kwaye enombhinqo wethwathwa esinqeni sakhe,+ yaye wayesidla iinkumbi+ nobusi basendle.+
7 Wayedla ngokushumayela, esithi: “Emva kwam kuza uthile owomelele ngakumbi kunam; andikufanelekelanga ukugoba ndize ndikhulule imitya yeembadada zakhe.+
8 Mna ndanibhaptiza ngamanzi, kodwa yena uya kunibhaptiza ngomoya oyingcwele.”+
9 Ebudeni baloo mihla uYesu weza evela eNazarete yaseGalili waza wabhaptizwa eYordan nguYohane.+
10 Yaye ngoko nangoko akunyuka ephuma emanzini wabona amazulu esahlukaniswa, nomoya usihla phezu kwakhe njengehobe;+
11 kwaza kwaphuma ilizwi emazulwini lisithi: “UnguNyana wam, oyintanda; ndikholisiwe nguwe.”+
12 Yaye ngoko nangoko umoya wamqhubela ukuba ahambe aye entlango.+
13 Waqhubeka esentlango iintsuku ezingamashumi amane,+ ehendwa nguSathana,+ yaye wayekunye namarhamncwa, kodwa iingelosi zazimlungiselela.+
14 Emva kokuba uYohane ebanjiwe uYesu waya eGalili,+ eshumayela iindaba ezilungileyo zikaThixo+
15 esithi: “Lizalisekile ixesha elimisiweyo,+ yaye ubukumkani bukaThixo busondele. Guqukani,+ nikholwe kwiindaba ezilungileyo.”
16 Ngoxa wayehamba ecaleni kolwandle lwaseGalili wabona uSimon+ noAndreya umntakwabo Simon bephosa iminatha yabo elwandle, kuba babengabalobi.+
17 Ngoko uYesu wathi kubo: “Ndilandeleni, yaye ndiya kunenza nibe ngabalobi babantu.”+
18 Kwaoko bayishiya iminatha yabo baza bamlandela.+
19 Yaye akuba ehambe umganyana wabona uYakobi unyana kaZebhedi noYohane umntakwabo, besesikhepheni sabo belungisa iminatha yabo;+
20 waza ngaphandle kokulibazisa wababiza. Bona ke bamshiya uyise uZebhedi esikhepheni nabaqeshwa baza bamlandela.
21 Kwaye bahamba baya eKapernahum.+
Kamsinya nje kwakuba yisabatha wangena kwindlu yesikhungu waza waqalisa ukufundisa.
22 Yaye bathi khamnqa yindlela yakhe yokufundisa,+ kuba apho wayebafundisa njengonegunya, kungekhona njengababhali.+
23 Kwangalo kanye elo xesha kwindlu yabo yesikhungu kwakukho umntu owayenomoya ongahlambulukanga, yaye wakhwaza,+
24 esithi: “Sinantoni na yakwenza nawe, Yesu wena mNazarete?+ Uze kusitshabalalisa na? Ndikwazi+ kakuhle ukuba ungubani na, unguLowo Ungcwele+ kaThixo.”+
25 Kodwa uYesu wawukhalimela, esithi: “Yithi cwaka, uze uphume kuye!”+
26 Yaye umoya ongahlambulukanga, emva kokumxhuzulisa yaye udanduluka ngelizwi eliphezulu, waphuma kuye.+
27 Ngoko, abantu bonke bakhwankqiswa kangangokuba baxubusha, besithi: “Yintoni na le? Yimfundiso entsha! Uyalela ngegunya kwanoomoya abangahlambulukanga, yaye bayamthobela.”+
28 Ngoko ingxelo engaye yasasazeka ngoko nangoko kulo lonke ilizwe elijikeleze iGalili.+
29 Yaye ngoko nangoko baphuma kwindlu yesikhungu baza baya ekhayeni likaSimon+ noAndreya bekunye noYakobi noYohane.
30 Ke kaloku umkhwekazi+ kaSimon wayelele phantsi egula ngumkhuhlane,+ baza kwaoko bamxelela ngaye.
31 Waya kuye wambamba ngesandla, wamphakamisa; waphela umkhuhlane,+ waza wabalungiselela.+
32 Kwathi ke ngokuhlwa, selitshonile ilanga, abantu bamzisela bonke abo babegula+ nabo babeneedemon;+
33 saza isixeko siphela sahlanganisana kanye emnyango.
34 Ngoko waphilisa abaninzi ababegula zizifo ezahlukahlukeneyo,+ waza wakhupha iidemon ezininzi, kodwa wayengazivumeli iidemon zithethe, ngenxa yokuba zazimazi ukuba unguKristu.+
35 Kwathi ngonyezi, ngoxa kwakusemnyama, wavuka waphuma phandle waza wemka waya kwindawo engasese,+ wathandaza khona apho.+
36 Noko ke, uSimon nabo babekunye naye bamzingela
37 baza bamfumana, yaye bathi kuye: “Bonke bayakufuna.”
38 Kodwa wathi kubo: “Masiye kwenye indawo, kwiidolophu ezikufuphi, ukuze ndishumayele+ kwanalapho, kuba ndiphumele oko.”+
39 Yaye wahamba, eshumayela kwizindlu zabo zesikhungu kulo lonke elaseGalili, ekhupha iidemon.+
40 Kweza oneqhenqa kuye, embongoza ede waguqa ngedolo, esithi kuye: “Ukuba nje uyathanda, unako ukundenza ndihlambuluke.”+
41 Ngako oko waba nosizi,+ waza wasolula isandla sakhe wamchukumisa, wathi kuye: “Ndiyathanda. Hlambuluka.”+
42 Lathi shwaka ngoko nangoko iqhenqa kuye, wahlambuluka.+
43 Ngapha koko, wamnika imiyalelo engqongqo waza kwaoko wamndulula,
44 wathi kuye: “Uze uqiniseke ukuba akuxeli nto nakubani na, kodwa hamba uye kuzibonakalisa kumbingeleli+ uze unikele ngenxa yokuhlanjululwa kwakho izinto uMoses awazalathisayo,+ ukuze kube bubungqina kubo.”+
45 Kodwa emva kokuba emkile lo mntu waqala ukubhengeza kakhulu nokusasaza ingxelo ngokubanzi, kangangokuba uYesu wayengasakwazi ukungena ekuhleni esixekweni, kodwa waqhubeka ngaphandle kwiindawo ezingasese. Kanti baqhubeka besiza kuye bevela macala onke.+
