Numeri 2:1-34
2 Wathetha ke uYehova kuMoses nakuAron, esithi:
2 “Oonyana bakaSirayeli bafanele bazimise iinkampu zabo, ngamnye ngakwisahlulo sezizwe ezithathu zakowabo,+ ngakwimiqondiso yezindlu zooyise. Bafanele bazimise iinkampu zabo zijikeleze ngaphambi kwentente yokuhlangana.
3 “Kwicala elingasempumalanga kuya kuma inkampu yesahlulo sezizwe ezithathu zakwaYuda ngokwemikhosi yazo, yaye isikhulu soonyana bakaYuda nguNashon+ unyana ka-Aminadabhi.
4 Umkhosi wakhe nabo babhaliswayo kuwo waba ngamashumi asixhenxe anesine amawaka anamakhulu mathandathu.+
5 Ecaleni kwakhe kuya kuma inkampu yesizwe sakwaIsakare,+ yaye isikhulu soonyana bakaIsakare nguNetaneli+ unyana kaTsuware.
6 Umkhosi wakhe nabo bakhe babhaliswayo waba ngamashumi amahlanu anesine amawaka anamakhulu mane.+
7 Kuze kulandele isizwe sakwaZebhulon; yaye isikhulu soonyana bakaZebhulon nguEliyabhi+ unyana kaHelon.
8 Umkhosi wakhe nabo bakhe babhaliswayo waba ngamashumi amahlanu anesixhenxe amawaka anamakhulu mane.+
9 “Bonke ke ababhaliswayo enkampini yakwaYuda balikhulu elinamashumi asibhozo anesithandathu amawaka anamakhulu mane ngokwemikhosi yabo. Bafanele banduluke kuqala bona.+
10 “Isahlulo sezizwe ezithathu senkampu yakwaRubhen+ soba ngasezantsi ngokwemikhosi yabo, yaye isikhulu soonyana bakaRubhen nguElitsure+ unyana kaShedeyure.
11 Umkhosi wakhe nabo bakhe babhaliswayo waba ngamashumi amane anesithandathu amawaka anamakhulu mahlanu.+
12 Ecaleni kwakhe kuya kuma inkampu yesizwe sakwaSimeyon, yaye isikhulu soonyana bakaSimeyon nguShelumiyeli+ unyana kaTsurishadayi.
13 Umkhosi wakhe nabo babhaliswayo kuwo waba ngamashumi amahlanu anesithoba amawaka anamakhulu mathathu.+
14 Nesizwe sakwaGadi; yaye isikhulu soonyana bakaGadi nguEliyasafu+ unyana kaRehuweli.
15 Umkhosi wakhe nabo babhaliswayo kuwo waba ngamashumi amane anesihlanu amawaka anamakhulu mathandathu anamashumi mahlanu.+
16 “Bonke ke ababhaliswayo enkampini yakwaRubhen balikhulu elinamashumi amahlanu ananye amawaka anamakhulu mane anamashumi mahlanu ngokwemikhosi yabo, yaye bona baya kuba ngabesibini ukunduluka.+
17 “Ekundulukeni kwentente yokuhlangana,+ iqela labaLevi+ loba phakathi kwamanye amaqela.
“Aya kunduluka+ ngokwendlela ezimi ngayo iinkampu zawo, ilelo endaweni yalo, ngokwezahlulo zezizwe ezithathu zakwamawabo.
18 “Isahlulo sezizwe ezithathu senkampu yakwaEfrayim+ soba ngasentshona ngokwemikhosi yabo, yaye isikhulu soonyana bakaEfrayim nguElishama+ unyana ka-Amihudi.
19 Umkhosi wakhe nabo babhaliswayo kuwo waba ngamashumi amane amawaka anamakhulu mahlanu.+
20 Ecaleni kwakhe yoba sisizwe sakwaManase,+ yaye isikhulu soonyana bakaManase nguGamaliyeli+ unyana kaPedatsure.
21 Umkhosi wakhe nabo babhaliswayo kuwo waba ngamashumi amathathu anesibini amawaka anamakhulu mabini.+
22 Nesizwe sakwaBhenjamin;+ yaye isikhulu soonyana bakaBhenjamin nguAbhidan+ unyana kaGidiyoni.
23 Umkhosi wakhe nabo babhaliswayo kuwo waba ngamashumi amathathu anesihlanu amawaka anamakhulu mane.+
24 “Bonke ke ababhaliswayo enkampini yakwaEfrayim balikhulu elinesibhozo lamawaka nekhulu ngokwemikhosi yabo, yaye bona baya kuba ngabesithathu ukunduluka.+
25 “Isahlulo sezizwe ezithathu senkampu yakwaDan soba ngasentla ngokwemikhosi yabo, yaye isikhulu soonyana bakaDan nguAhiyezere+ unyana ka-Amishadayi.
26 Umkhosi wakhe nabo babhaliswayo kuwo waba ngamashumi amathandathu anesibini amawaka anamakhulu asixhenxe.+
27 Ecaleni kwakhe kuya kuma inkampu yesizwe sakwa-Ashere, yaye isikhulu soonyana baka-Ashere nguPagiyeli+ unyana kaOkeran.
28 Umkhosi wakhe nabo babhaliswayo kuwo waba ngamashumi amane ananye amawaka anamakhulu mahlanu.+
29 Kuze kulandele isizwe sakwaNafetali;+ yaye isikhulu soonyana bakaNafetali nguAhira+ unyana kaEnan.
30 Umkhosi wakhe nabo babhaliswayo kubo waba ngamashumi amahlanu anesithathu amawaka anamakhulu mane.+
31 “Bonke ke ababhaliswayo enkampini yakwaDan balikhulu elinamashumi amahlanu anesixhenxe amawaka anamakhulu mathandathu. Baya kuba ngabokugqibela ukunduluka+—ngokwezahlulo zezizwe ezithathu zakwamawabo.”
32 Ngabo ke abo ababhaliswayo koonyana bakaSirayeli ngokwezindlu zooyise; bonke ababhaliswayo enkampini ngokwemikhosi yabo baba ngamakhulu amathandathu anesithathu amawaka anamakhulu mahlanu anamashumi mahlanu.+
33 Kodwa bona abaLevi ababhaliswanga+ phakathi koonyana bakaSirayeli, kanye njengoko uYehova wamyalelayo uMoses.
34 Benza ke oonyana bakaSirayeli ngako konke uYehova awamyalela kona uMoses.+ Benjenjalo ukumisa iinkampu ngokwezahlulo zezizwe ezithathu zakwamawabo,+ benjenjalo nokunduluka kwabo,+ elowo ngokwentsapho yakhe ngokwezindlu zooyise.
