Eyokuqala YooKumkani 15:1-34
15 Ngonyaka we-18 kaKumkani uYerobhoham+ unyana kaNebhati, uAbhiyam waba ngukumkani wakwaYuda.+
2 Walawula iminyaka emithathu eYerusalem. Igama likamama wakhe yayinguMahaka+ umzukulwana ka-Abhishalom.
3 Waqhubeka esenza zonke izono ezazisenziwa ngutata wakhe ngaphambi kwakhe, ibe intliziyo yakhe yayingaphelelanga* kuYehova uThixo wakhe njengentliziyo kaDavide ukhokho wakhe.
4 Kodwa ngenxa kaDavide,+ uYehova uThixo wakhe wamnika isibane eYerusalem+ ngokuvelisa unyana wakhe emva kwakhe nokugcina iYerusalem ikho.
5 Kuba uDavide wenza izinto ezilungileyo emehlweni kaYehova, ibe akazange aphambuke kuyo nantoni na awayemyalele yona yonke imihla yobomi bakhe, ngaphandle kwento awayenza ku-Uriya umHiti.+
6 Kwakuhlala kukho imfazwe phakathi kukaRehobhoham noYerobhoham yonke imihla yobomi bakhe.+
7 Enye imbali ka-Abhiyam, zonke izinto awazenzayo, azibhalwanga na kwincwadi yembali yamaxesha ookumkani bakwaYuda?+ Kwakukho imfazwe naphakathi kuka-Abhiyam noYerobhoham.+
8 UAbhiyam walala kookhokho bakhe, wangcwatywa kwisiXeko SikaDavide; uAsa+ unyana wakhe waba ngukumkani endaweni yakhe.+
9 gonyaka we-20 kaKumkani uYerobhoham wakwaSirayeli, uAsa waqalisa ukulawula kwaYuda.
10 Walawula iminyaka eyi-41 eYerusalem. Igama likamakhulu wakhe yayinguMahaka+ umzukulwana ka-Abhishalom.
11 UAsa wenza izinto ezilungileyo emehlweni kaYehova,+ njengoDavide ukhokho wakhe.
12 Wawagxotha kwelo lizwe onke amadoda athengisa ngomzimba etempileni,+ wasusa zonke izithixo ezenyanyekayo* ezazenziwe ngookhokho bakhe.+
13 Wada wayekisa nomakhulu wakhe uMahaka+ ekubeni ngukumkanikazi,* kuba wenza isithixo esilisikizi ukuze kunqulwe ipali engcwele.* UAsa wasigawula eso sithixo,+ wasitshisa kwiNtlambo YeKidron.+
14 Kodwa azizange zichithwe iindawo eziphakamileyo.+ Noko ke, intliziyo ka-Asa yayiphelele* kuYehova ubomi bakhe bonke.
15 Wazizisa endlini kaYehova izinto ezazenziwe ngcwele nguye notata wakhe: isilivere, igolide nezinye izinto.+
16 Kwakuhlala kukho imfazwe phakathi kuka-Asa noBhahasha+ ukumkani wakwaSirayeli.
17 UKumkani uBhahasha wakwaSirayeli wenyuka eyokulwa noYuda waza wakha* iRama,+ ukuze kungabikho mntu uphumayo okanye ungenayo kummandla kaKumkani* uAsa wakwaYuda.+
18 UAsa wathatha yonke isilivere negolide eyayisele kubutyebi bendlu kaYehova nobutyebi bendlu kakumkani, wayinika abasebenzi bakhe. UKumkani uAsa wabathumela kuBhen-hadadi unyana kaTabhrimon unyana kaHeziyon, ukumkani waseSiriya,+ owayehlala eDamasko, esithi:
19 “Kukho isivumelwano phakathi kwam nawe, naphakathi kotata wam notata wakho. Ndikuthumelela isipho sesilivere negolide. Yiza, uzokwaphula isivumelwano sakho noKumkani uBhahasha wakwaSirayeli, ukuze emke kum.”
20 UBhen-hadadi wammamela uKumkani uAsa waza wathumela iintloko zomkhosi wakhe ukuba ziye kuhlasela izixeko zakwaSirayeli, ibe zaxabela i-Iyon,+ iDan,+ iAbheli-bhete-mahaka, yonke iKinereti nalo lonke ilizwe lakwaNafetali.
21 Wathi nje akuyiva loo nto uBhahasha, wayeka ngoko nangoko ukwakha* iRama waza waqhubeka ehlala eTirtsa.+
22 UKumkani uAsa wabiza wonke uYuda, akukho mntu ungazange abizwe, bonke bathwala amatye namaplanga aseRama awayesakha ngawo uBhahasha, waza uKumkani uAsa wakha* ngawo iGebha+ yakwaBhenjamin neMizpa.+
23 Yonke enye imbali ka-Asa, bonke ubukhulu bakhe, zonke izinto awazenzayo nezixeko awazakhayo,* azibhalwanga na encwadini yembali yamaxesha ookumkani bakwaYuda? Wathi akuba mdala waba nesifo ezinyaweni.+
24 Emva koko uAsa walala kookhokho bakhe waza wangcwatywa nookhokho bakhe kwisiXeko SikaDavide ukhokho wakhe; uYehoshafati unyana wakhe+ waba ngukumkani endaweni yakhe.
25 UNadabhi+ unyana kaYerobhoham waba ngukumkani kwaSirayeli ngonyaka wesibini kaKumkani uAsa wakwaYuda, yaye walawula kwaSirayeli iminyaka emibini.
26 Waqhubeka esenza okubi emehlweni kaYehova, ehamba endleleni katata wakhe+ nasesonweni sakhe awamonisa ngaso uSirayeli.+
27 UBhahasha unyana ka-Ahiya wendlu kaIsakare wamenzela iyelenqe, waza uBhahasha wamxabela eGibheton yamaFilisti, ngoxa uNadabhi nawo onke amaSirayeli baberhangqe iGibheton.+
28 Ngoko uBhahasha wambulala ngonyaka wesithathu kaKumkani uAsa wakwaYuda, waza walawula endaweni yakhe.
29 Wathi nje esakuba ngukumkani, wayixabela yonke indlu kaYerobhoham. Akazange ashiye nabani na ephefumla kwaYerobhoham; wabatshabalalisa ngokwelizwi awalithethayo uYehova ngomkhonzi wakhe uAhiya umShilo.+
30 Oku kwakungenxa yezono ezenziwa nguYerobhoham nawabangela ukuba zenziwe nguSirayeli, nangenxa yokuba wamcaphukisa kakhulu uYehova uThixo kaSirayeli.
31 Enye imbali kaNadabhi, zonke izinto awazenzayo, azibhalwanga na encwadini yembali yamaxesha ookumkani bakwaSirayeli?
32 Kwakuhlala kukho imfazwe phakathi kuka-Asa noKumkani uBhahasha wakwaSirayeli.+
33 Ngonyaka wesithathu kaKumkani uAsa wakwaYuda, uBhahasha unyana ka-Ahiya waba ngukumkani kaSirayeli wonke eTirtsa, waza walawula iminyaka eyi-24.+
34 Kodwa waqhubeka esenza izinto ezimbi emehlweni kaYehova,+ waqhubeka ehamba endleleni nasesonweni sikaYerobhoham awabangela ukuba senziwe nguSirayeli.+
Umbhalo osemazantsi
^ Okanye “wayengayinikelanga ngokupheleleyo.”
^ Kusenokwenzeka ukuba igama lesiHebhere liyelelene nelo lithetha “ubulongwe,” yaye lisetyenziswa xa kuthethwa ngento eyenyanyekayo.
^ Okanye “linenekazi.”
^ Funda Ingcaciso Yamagama.
^ Okanye “yayinikelwe ngokupheleleyo.”
^ Okanye “wayenza yakhuseleka; wayakha kwakhona.”
^ Okanye “aphume okanye angene kuKumkani.”
^ Okanye “ukuyenza ikhuseleke; ukuyakha kwakhona.”
^ Okanye “wayenza yakhuseleka; wayakha kwakhona.”
^ Okanye “awazenza zakhuseleka; awazakhayo kwakhona.”
