Eyesibini YooKumkani 1:1-18
-
UEliya uprofeta ngokufa kuka-Ahaziya (1-18)
1 Emva kokufa kuka-Ahabhi, amaMowabhi+ awajikela amaSirayeli.
2 Ngelo xesha uAhaziya wawa kuthango lwegumbi lakhe eliseluphahleni eSamariya wenzakala. Ngoko wathumela abathunywa, wathi kubo: “Hambani niyokubuza kuBhahali-zebhubhi uthixo wase-Ekron+ ukuba ndiza kuphila na.”+
3 Kodwa ingelosi kaYehova yathi kuEliya*+ umTishbhi: “Hamba uyokudibana nabathunywa bakakumkani waseSamariya, uthi kubo, ‘Akukho Thixo na kwaSirayeli le nto nisiya kubuza kuBhahali-zebhubhi uthixo wase-Ekron?+
4 Uthi uYehova: “Awuzukuyishiya le bhedi ulele kuyo, kuba uza kufa ngokuqinisekileyo.”’” Emva koko uEliya wemka.
5 Xa abathunywa babuyela kuye, ngoko nangoko wathi kubo: “Nibuyele ntoni?”
6 Bathi kuye: “Kukho indoda eye yasihlangabeza, yathi kuthi, ‘Buyelani kukumkani onithumileyo, nize nithi kuye: “Uthi uYehova, ‘Akukho Thixo na kwaSirayeli le nto uthumela ukuba kuye kubuzwa kuBhahali-zebhubhi uthixo wase-Ekron? Ngoko ke, awuzukuyishiya le bhedi ulele kuyo, kuba uza kufa ngokuqinisekileyo.’”’”+
7 Yena wathi kubo: “Ibinjani le ndoda inihlangabezileyo yaza yathetha le nto kuni?”
8 Bathi: “Yindoda enesambatho soboya,+ ebhinqe ibhanti lesikhumba esinqeni sayo.”+ Ngoko nangoko wathi: “IbinguEliya umTishbhi.”
9 Ukumkani wathumela kuye umphathi wamadoda ayi-50 kunye namadoda akhe. Wafika ehleli phezulu entabeni. Wathi kuye: “Mntu kaThixo wokwenene,+ ukumkani uthi, ‘Yihla.’”
10 Kodwa uEliya wathi: “Ukuba ndingumntu kaThixo, makuhle umlilo emazulwini+ ukudle ukugqibe wena namadoda akho ayi-50.” Kwehla umlilo emazulwini wamdla wamgqiba namadoda akhe ayi-50.
11 Ukumkani wathumela omnye umphathi wamadoda ayi-50 namadoda akhe. Waya kuye wathi: “Mntu kaThixo wokwenene, ukumkani uthi, ‘Yihla ngokukhawuleza.’”
12 Kodwa uEliya wathi: “Ukuba ndingumntu kaThixo wokwenene, makuhle umlilo emazulwini ukudle ukugqibe wena namadoda akho ayi-50.” Kwehla umlilo kaThixo emazulwini wamdla wamgqiba yena namadoda akhe ayi-50.
13 Waphinda ukumkani wathumela umphathi wesithathu wamadoda ayi-50 namadoda akhe. Kodwa lo mphathi wafika waguqa phambi kukaEliya, wacela inceba kuye esithi: “Mntu kaThixo wokwenene, ndiyakucela, ubomi bam nobomi bezi zicaka zakho ziyi-50 mabuxabiseke emehlweni akho.
14 Sele kuhle umlilo emazulwini, wabadla abaphathi ababini bamadoda ayi-50 kunye namadoda abo, kodwa ngoku ndicela obam ubomi buxabiseke emehlweni akho.”
15 Ingelosi kaYehova yathi kuEliya: “Hamba naye. Ungamoyiki.” Ngoko waphakama waza wehla naye baya kukumkani.
16 UEliya wathi kukumkani: “Uthi uYehova, ‘Wena uthumele abathunywa ukuba baye kubuza kuBhahali-zebhubhi uthixo wase-Ekron.+ Akukho Thixo na kwaSirayeli?+ Kutheni ungabuzanga kuye? Ngoko awuzukuyishiya le bhedi ulele kuyo, kuba uza kufa ngokuqinisekileyo.’”
17 Ngoko wafa, njengokuba uYehova wayetshilo esebenzisa uEliya. Ekubeni wayengenanyana, uYehoram*+ waba ngukumkani endaweni yakhe, kunyaka wesibini kaYehoram+ unyana kaYehoshafati ukumkani wakwaYuda.
18 Enye imbali yezinto awazenzayo uAhaziya,+ ayibhalwanga na encwadini yembali yamaxesha ookumkani bakwaSirayeli?
