Eyesibini YooKumkani 13:1-25
13 Ngonyaka we-23 kaYehowashe+ unyana ka-Ahaziya+ ukumkani wakwaYuda, uYehowahazi unyana kaYehu+ waba ngukumkani wakwaSirayeli eSamariya, walawula iminyaka eyi-17.
2 Waqhubeka esenza izinto ezimbi emehlweni kaYehova, waqhubeka esenza isono sikaYerobhoham unyana kaNebhati,+ awamonisa ngaso uSirayeli. Akazange asiyeke.
3 Ngoko uSirayeli wamcaphukisa kakhulu uYehova,+ kangangokuba wamnikela kuKumkani uHazayeli+ waseSiriya nakuBhen-hadadi+ unyana kaHazayeli yonke imihla yakhe.
4 Ethubeni, uYehowahazi wamcenga uYehova,* waza uYehova wammamela, kuba wayeyibonile indlela ukumkani waseSiriya awayemcinezele ngayo uSirayeli.+
5 Ngoko uYehova wamnika umsindisi uSirayeli+ ukuze amkhulule esandleni seSiriya, amaSirayeli atsho akwazi ukuhlala emizini yawo njengakuqala.*
6 (Kodwa ke, awazange asishiye isono sendlu kaYerobhoham awamonisa ngaso uSirayeli.+ Aqhubeka esenza esi sono,* nepali engcwele*+ yahlala ikho eSamariya.)
7 UYehowahazi wasala nomkhosi wabakhweli-mahashe abayi-50, iinqwelo eziyi-10 namajoni ahamba ngeenyawo ayi-10 000, kuba ukumkani waseSiriya wayewatshabalalisile amanye,+ ewanyathela njengothuli lwaxa kubhulwa.+
8 Enye imbali kaYehowahazi, zonke izinto awazenzayo namandla akhe, azibhalwanga na encwadini yembali yamaxesha ookumkani bakwaSirayeli?
9 UYehowahazi walala kookhokho bakhe, baza bamngcwabela eSamariya;+ yaye uYehowashe unyana wakhe waba ngukumkani endaweni yakhe.
10 Ngonyaka we-37 kaKumkani uYehowashe wakwaYuda, uYehowashe+ unyana kaYehowahazi waba ngukumkani wakwaSirayeli eSamariya, walawula iminyaka eyi-16.
11 Waqhubeka esenza izinto ezimbi emehlweni kaYehova, akaziyeka izono zikaYerobhoham unyana kaNebhati, awamonisa ngazo uSirayeli.+ Waqhubeka ezenza* ezi zono.
12 Enye imbali kaYehowashe, zonke izinto awazenzayo, amandla akhe nendlela awalwa ngayo noKumkani uAmatsiya wakwaYuda,+ ayibhalwanga na encwadini yembali yamaxesha ookumkani bakwaSirayeli?
13 UYehowashe walala kookhokho bakhe, yaye uYerobhoham*+ wahlala etroneni yakhe. UYehowashe wangcwatyelwa eSamariya nookumkani bakwaSirayeli.+
14 Xa uElisha+ wayegula sisifo esambulalayo ekugqibeleni, uYehowashe ukumkani wakwaSirayeli wehla weza kuye waza wamlilela, esithi: “Tata, tata! Nqwelo kaSirayeli nabakhweli-mahashe bakhe!”+
15 UElisha wathi kuye: “Thatha isaphetha neentolo.” Ngoko wazithatha.
16 Emva koko wathi kukumkani wakwaSirayeli: “Beka isandla sakho kwisaphetha.” Wasibeka, waza uElisha wabeka izandla zakhe phezu kwezandla zikakumkani.
17 Wathi: “Vula ifestile engasempuma.” Ngoko wayivula. UElisha wathi: “Dubula!” Ngoko wadubula. Emva koko wathi: “Utolo lukaYehova loloyiso,* utolo lokoyisa iSiriya!* Uza kuyixabela* uyigqibe iSiriya eAfeki.”+
18 Emva koko wathi: “Thatha iintolo,” wazithatha. Emva koko wathi kukumkani wakwaSirayeli: “Betha phantsi.” Ngoko wabetha phantsi kathathu, wayeka.
19 Wacaphuka umntu kaThixo wokwenene, wathi: “Ubufanele ubethe phantsi kahlanu okanye kathandathu! Ukuba ubuwenze loo nto, ubuza kuyixabela de uyitshayele iSiriya, kodwa ngoku uza kuyixabela kathathu kuphela.”+
20 Emva koko uElisha wafa waza wangcwatywa. Kwakukho amajoni angabaphangi akwaMowabhi+ awayedla ngokuza kwelo lizwe ekuqaleni konyaka.*
21 Athi amanye amadoda esangcwaba ndoda ithile, abona la majoni angabaphangi, ngoko ayiphosa kwingcwaba likaElisha aza abaleka. Xa isidumbu saloo ndoda sachukumisa amathambo kaElisha, yavuka+ yema ngeenyawo.
22 UKumkani uHazayeli+ waseSiriya wamcinezela uSirayeli+ yonke imihla kaYehowahazi.
23 Noko ke, uYehova wamenzela inceba,+ wamvela ngenxa yesivumelwano sakhe noAbraham,+ uIsake+ noYakobi.+ Akazange afune ukumonakalisa, yaye akazange amsuse phambi kwakhe de kube namhlanje.
24 Emva kokufa kukaKumkani uHazayeli waseSiriya, unyana wakhe uBhen-hadadi waba ngukumkani endaweni yakhe.
25 UYehowashe unyana kaYehowahazi waphinda wazithatha kuBhen-hadadi unyana kaHazayeli izixeko awayezithathe kuYehowahazi utata wakhe emva kokulwa imfazwe naye. UYehowashe wamxabela,*+ waza wazibuyisa izixeko zakwaSirayeli.
Umbhalo osemazantsi
^ Okanye “wabenza bathamba ubuso bukaYehova.”
^ Oko kukuthi, ahlala ngoxolo ekhuselekile.
^ Funda Ingcaciso Yamagama.
^ Ngokoqobo, “Wahamba kuso.”
^ Ngokoqobo, “Wahamba kuzo.”
^ Oko kukuthi, uYerobhoham II.
^ Okanye “losindiso.”
^ Okanye “lokusindisa kwiSiriya.”
^ Okanye “kuyoyisa.”
^ Ngokoqobo, “ekuthwaseni konyaka,” mhlawumbi ngentwasahlobo.
^ Okanye “wamoyisa.”
