KwabaseGalati 5:1-26
5 UKristu wasikhulula ukuze sibe naloo nkululeko. Ngoko ke yimani ningagungqi,+ ningazivumeli ukuba niphinde ningene phantsi kwedyokhwe yobukhoboka.+
2 Mna Pawulos ndithi kuni, ukuba niyoluka, uza kube akanincedanga nganto uKristu.+
3 Kwakhona ndikhumbuza wonke umntu owolukayo ukuba, kuza kufuneka awuthobele wonke uMthetho.+
4 Nina nizama ukuba ngamalungisa ngokuthobela umthetho,+ nimshiyile uKristu, nabushiya nobubele bakhe.
5 Ngenxa yomoya oyingcwele nangenxa yokholo lwethu, silindele ukuba ngamalungisa.
6 Xa simanyene noKristu, ukoluka nokungoluki akubalulekanga,+ kodwa into ebalulekileyo kukuba nokholo, uqhutywa luthando.
7 Benibaleka kakuhle.+ Ngubani ke ngoku onenze nayeka ukuthobela inyaniso?
8 Olo hlobo lwemfundiso alusuki kulowo unibizayo.
9 Igwele elincinci liyibilisa yonke intlama.+
10 Ndiqinisekile ukuba nina nimanyene neNkosi,+ anizukucinga ngenye indlela, kodwa nabani na onisokolisayo+ uza kufumana isohlwayo esimfaneleyo.
11 Bazalwana, ukuba ndisashumayela ukuba abantu boluke, kutheni ke ndisatshutshiswa? Ukuba bekunjalo, isibonda sokungcungcutheka*+ besiza kuyeka ukuba sisikhubekiso.
12 Akwaba la madoda azama ukunisokolisa, ebenokuzithena.*
13 Bazalwana nabizelwa kwinkululeko, kodwa sanukuyithatha njengethuba lokwenza izinto ezifunwa yimizimba yenu enesono,+ kodwa omnye makabe likhoboka lomnye kuba nithandana.+
14 Kuba uMthetho xa uwonke uzalisekiswa* ngomyalelo omnye othi: “Umele umthande ummelwane wakho ngendlela ozithanda ngayo nawe.”+
15 Kodwa ukuba niyagrenyana, niqwengane,+ lumkani ningenzakalisani.+
16 Ndithi kuni, Qhubekani nikhokelwa ngumoya kaThixo,+ ibe anizukuzenza izinto ezifunwa yimizimba yenu enesono.+
17 Kuba izinto ezifunwa ngumzimba onesono zilwisana nomoya kaThixo, yaye umoya kaThixo ulwisana nomzimba onesono; kuba ezi zinto azidibani, ukuze ningazenzi izinto enifuna ukuzenza.+
18 Ngaphezu koko, ukuba nikhokelwa ngumoya kaThixo, anikho phantsi komthetho.
19 Izinto ezenziwa ngumzimba onesono zibonakala kakuhle. Kukuziphatha kakubi ngesondo,*+ ukungcola, ukuziphatha ngokungenazintloni,*+
20 ukukhonza izithixo, ukusebenzelana nemimoya,+ ubutshaba, iingxabano, ikhwele, ukugqajukelwa ngumsindo, ukungavani, ukwahlukanisa abantu, ukulandela abantu,
21 umona, ukunxila,+ iipati ezingalawulekiyo nezinto ezinjengezi.+ Ndiyanilumkisa ngezi zinto, njengokuba ndandinilumkisile ukuba abantu abazenzayo, abazukubufumana uBukumkani BukaThixo.+
22 Kwelinye icala isiqhamo somoya luthando, uvuyo, uxolo, umonde, ububele, ukulunga,+ ukholo,
23 ukululama* nokukwazi ukuzibamba.*+ Akukho mthetho othi mazingenziwa ezi zinto.
24 Abo ke bangabakaKristu Yesu bazibulele* iinkanuko neminqweno yemizimba yabo enesono.+
25 Ukuba sikhokelwa ngumoya kaThixo, masiqhubeke sikufuna ukukhokelwa nguwo.+
26 Masingaziphakamisi,+ singakhuphisani nabanye abantu,+ singamonelani.
Umbhalo osemazantsi
^ Okanye “isibonda sentuthumbo.” Funda Ingcaciso Yamagama.
^ Okanye “ebenokuba ngamathenwa,” atsho angakufanelekeli nokuzenza izinto zaloo mthetho awukhuthazayo.
^ Okanye kusenokwenzeka, “ushwankathelwa.”
^ Okanye “Kukuhenyuza.” NgesiGrike, por·neiʹa. Funda Ingcaciso Yamagama.
^ Okanye “ukuqaqadeka.” NgesiGrike, a·selʹgei·a. Funda Ingcaciso Yamagama.
^ Okanye “ubulali.”
^ Okanye “nokuzeyisa.”
^ Ngokoqobo, “bazibethelele esibondeni.”
