Hezekile 29:1-21
29 Ngonyaka weshumi, ngenyanga yeshumi, ngomhla we-12 kuloo nyanga, kwafika ilizwi likaYehova kum, lisithi:
2 “Nyana womntu, jongisa ubuso bakho kuFaro ukumkani waseYiputa, uprofete ngaye nangeYiputa yonke.+
3 Uze uthethe la mazwi: ‘Ithi iNkosi enguMongami uYehova:
“Ndilwa nawe Faro, kumkani waseYiputa,+Silwanyana esikhulu saselwandle esihleli phakathi kwemisinga yomNayile* waso,+Esithe, ‘UMlambo umNayile ngowam.
Ndizenzele wona.’+
4 Ndiza kufaka iihaki emihlathini yakho ndize ndizenze zithi nca emaxolweni akho iintlanzi zomNayile wakho.
Ndiza kukukhupha kumNayile wakho nazo zonke iintlanzi zomNayile ezithe nca emaxolweni akho.
5 Ndiza kukushiya entlango, wena nazo zonke iintlanzi zomNayile wakho.
Uza kuwela esigangeni, ibe awuzukuqokelelwa.+
Ndiza kukunikela ube kukutya kwamarhamncwa omhlaba nokweentaka zezulu.+
6 Bonke abemi baseYiputa baza kutsho bazi ukuba ndinguYehova,Kuba bebengeloncedo lwanto ekuxhaseni indlu kaSirayeli, befana nje nengcongolo.+
7 Xa bakubamba ngesandla, wasuka watyumka,Waza wakrazula igxalaba labo.
Bathi bezixhasa ngawe, wasuka waphuka,Wayenza yagexa imilenze yabo.”*+
8 “‘Ngoko ithi iNkosi enguMongami uYehova: “Ndikuzisela ikrele,+ yaye ndiza kunqumla umntu nesilwanyana kuwe.
9 Ilizwe laseYiputa liza kutshabalala lingahlali bantu,+ batsho bazi ukuba ndinguYehova, kuba wena* uthe, ‘UMlambo UmNayile ngowam; ndiwenze ngokwam.’+
10 Ngoko ndilutshaba lwakho, wena nomNayile wakho, yaye ndiza kulenza ilizwe laseYiputa litshabalale lize lome, lingahlali bantu,+ ukususela eMigdoli+ ukuyokutsho eSiyene+ nakumda waseTiyopiya.
11 Akukho mntu namfuyo iya kudlula kulo ngonyawo lwayo,+ ibe akuzukuhlala mntu kulo iminyaka eyi-40.
12 Ilizwe laseYiputa ndiza kulenza lingahlali bantu, lona nezixeko zalo, iminyaka eyi-40;+ yaye ndiza kuwathi saa amaYiputa phakathi kweentlanga, ndiwasasaze emazweni.”+
13 “‘Kuba ithi iNkosi enguMongami uYehova: “Emva kweminyaka eyi-40 ndiza kuwaqokelela amaYiputa ndiwathathe kwizizwana aza kube ethiwe saa kuzo;+
14 ndiza kubuyisela amaYiputa athinjiweyo kwilizwe lasePatrosi,+ kwilizwe azalelwe kulo, yaye aza kuba sisizwe esingento yanto.
15 IYiputa iza kuthotywa ibe ngaphantsi kwezinye izizwe ize ingaphinde izilawule ezinye iintlanga,+ ndiyenze ibe ncinci kangangokuba ingakwazi ukoyisa ezinye iintlanga.+
16 Soze iphinde ithembele ngayo indlu kaSirayeli,+ kodwa iza kusuke nje ikhumbule indlela eye yona ngayo ngokucela uncedo kumaYiputa. Baza kutsho bazi ukuba ndiyiNkosi enguMongami uYehova.”’”
17 Kwathi ngonyaka we-27, ngenyanga yokuqala, ngomhla wokuqala kuloo nyanga, kwafika ilizwi likaYehova kum, lisithi:
18 “Nyana womntu, uKumkani uNebhukadenetsare*+ waseBhabhiloni wathumela umkhosi omkhulu ukuba uyokuhlasela iTire.+ Zonke iintloko zachetywa iinkqayi, namagxalaba atyabuka. Kodwa yena nomkhosi wakhe abazange bafumane mvuzo ngento abayenza kwiTire.
19 “Ngoko ithi iNkosi enguMongami uYehova, ‘Ndilinikela kuKumkani uNebhukadenetsare* waseBhabhiloni ilizwe laseYiputa,+ ibe uza kumka nobutyebi balo aze athimbe izinto zalo ezininzi, zibe ngumvuzo womkhosi wakhe.’
20 “‘Ndiza kumnika ilizwe laseYiputa njengembuyekezo yento ayenze kuyo,* ngenxa yokuba bebesebenzela mna,’+ itsho iNkosi enguMongami uYehova.
21 “Ngaloo mini ndiza kuyihlumisela uphondo indlu kaSirayeli,*+ yaye wena ndiza kukunika ithuba lokuthetha phakathi kwabo, ibe baza kutsho bazi ukuba ndinguYehova.”
Umbhalo osemazantsi
^ Kule vesi nakwezilandelayo, “umNayile” ubhekisela kumlambo nakwimijelo yawo yokunkcenkceshela.
^ Ngokoqobo, “Wazenza zagexa izinqe zabo.”
^ Ngokoqobo, “yena.”
^ Ngokoqobo, “uNebhukaderetsare,” enye indlela yokubhala eli gama.
^ Ngokoqobo, “uNebhukaderetsare,” enye indlela yokubhala eli gama.
^ Oko kukuthi, kwiTire.
^ Okanye “ndiza kuyinika amandla indlu kaSirayeli.”
