Hezekile 32:1-32
32 Kwathi ke ngonyaka we-12, ngenyanga ye-12, ngomhla wokuqala kuloo nyanga, laphinda lafika ilizwi likaYehova kum, lisithi:
2 “Nyana womntu, cula ingoma yokuzila ngoFaro ukumkani waseYiputa, uthi kuye,‘Wawunjengengonyama enamandla* ezintlangeni,Kodwa uye wathuliswa.
Wawunjengesilwanyana saselwandle,+ udakasa emilanjeni yakho,Ugxobha amanzi ngeenyawo zakho, yaye ungcolisa imilambo.’*
3 Ithi iNkosi enguMongami uYehova:
‘Ndiza kwaneka umnatha wam phezu kwakho ngeentlanga ezininzi,Ibe ziza kukutsala ngomnatha wam orhuqwayo.
4 Ndiza kukulahlela emhlabeni;Ndiza kukuphosa esigangeni.
Ndiza kuzenza zihlale phezu kwakho zonke iintaka zezulu,Ibe ndiza kuwanelisa ngawe amarhamncwa omhlaba wonke.+
5 Ndiza kuyibeka phezu kweentaba inyama yakhoNdize eshiyekileyo ndigcwalise iintlambo ngayo.+
6 Ndiza kwenza ilizwe libe manzi tixi ligazi lakho elimpompoza liyokutsho ezintabeni,Ibe liza kugcwalisa imisinga.’*
7 ‘Emva kokuba ucinywe igama, ndiza kuwogquma amazulu, ndizenze mnyama iinkwenkwezi zawo.
Ilanga ndiza kulogquma ngamafu,Nenyanga ayizukukhanyisa.+
8 Zonke izikhanyiso ezimenyezelayo emazulwini ndiza kuzenza mnyama ngenxa yakho,Ndilenze mnyama ilizwe lakho,’ itsho iNkosi enguMongami uYehova.
9 ‘Ndiza kuzenza zikhathazeke entliziyweni izizwana ezininzi xa ndisisa abathinjwa bakho kwezinye iintlanga,Kumazwe obungawazi.+
10 Ndiza kuzenza zothuke izizwana ezininzi,Nookumkani bazo baza kutyhwatyhwa ngenxa yakho xa ndivonyavonya ikrele lam phambi kwabo.
Baza kuhlala bengcangcazela, ngamnye esoyikela ubomi bakhe,Ngemini yokuwa kwakho.’
11 Kuba ithi iNkosi enguMongami uYehova:
‘Ikrele lokumkani waseBhabhiloni liza kukufikela.+
12 Ndiza kusiwisa isihlwele sakho ngamakrele amakroti,Awona akhohlakeleyo ezintlangeni.+
Aza kuliphelisa ibhongo leYiputa, yaye sonke isihlwele sayo siza kubhujiswa.+
13 Ndiza kuyitshabalalisa yonke imfuyo yakhe engasemanzini amaninzi,+Ibe akukho nyawo lwamntu okanye luphuphu lwamfuyo luza kuphinda luwagxobhe.’+
14 ‘Ngelo xesha ndiza kuwenza acwenge amanzi ayo,Nemilambo yayo ndiza kuyenza iqukuqele njengeoli,’ itsho iNkosi enguMongami uYehova.
15 ‘Xa ndiyenza ibe yindawo engahoywanga nengahlali mntu iYiputa, ilizwe elihlutywe yonke into yalo,+Xa ndibaxabela bonke abemi balo,Baza kutsho bazi ukuba ndinguYehova.+
16 Yingoma yokuzila le, ibe abantu baza kuyicula.Iintombi zeentlanga ziza kuyicula.
Ziza kuyicula ngenxa yeYiputa nangenxa yabo bonke abantu bayo,’ itsho iNkosi enguMongami uYehova.”
17 Kwathi ngonyaka we-12, ngomhla we-15 enyangeni, kwafika ilizwi likaYehova kum, lisithi:
18 “Nyana womntu, benzele isijwili abantu baseYiputa uze ubehlisele kwilizwe langaphantsi, bona neentombi zeentlanga ezinamandla, kunye nabo behla baye emngxunyeni.*
19 “‘Ngubani omogqithayo ngobuhle? Yihla uyokulala nabangalukanga!’
20 “‘Baza kuwa phakathi kwabo babulewe ngekrele.+ Inikelwe ekreleni; yirhuqeni imke nabo bonke abantu bayo.
21 “‘Awona makroti anamandla aza kuthetha naye nabancedi bakhe esezinzulwini zengcwaba.* Ngokuqinisekileyo baza kuhla, balale njengabangalukanga, bebulewe ngekrele.
22 IAsiriya ilapho kunye nabo bonke abantu bayo. Amangcwaba abo amjikelezile, bonke bawe ngekrele.+
23 Amangcwaba ayo asezinzulwini zomngxuma,* nabantu bayo bajikeleze ingcwaba layo, bonke baxatyelwe ngekrele, kuba babangela uloyiko kwilizwe labaphilayo.
24 “‘Ulapho uElam,+ nabantu bakhe bajikeleze ingcwaba lakhe, bonke bewe ngekrele. Behlile baya kwilizwe langaphantsi bengalukanga, abo babangele uloyiko kwilizwe labaphilayo. Ngoku baza kuthwala ihlazo labo kunye nabo behla baye emngxunyeni.*
25 Bambekele ibhedi phakathi kwababuleweyo, kunye nabo bonke abantu bakhe abajikeleze amangcwaba akhe. Bonke abalukanga yaye babulewe ngekrele, kuba babenze boyika abakwilizwe labaphilayo; baza kuthwala ihlazo labo kunye nabo behla baye emngxunyeni.* Ubekwe phakathi kwababuleweyo.
26 “‘Ulapho uMesheki noTubhali+ nabo bonke abantu babo.* Ujikelezwe ngamangcwaba akhe. Bonke abalukanga yaye bahlatywe ngekrele, kuba babenze boyika abakwilizwe labaphilayo.
27 Ngaba abazukulala namakroti angalukanga aye awa, aza ehla aya engcwabeni* nezixhobo zawo zemfazwe? Aza kubeka amakrele awo phantsi kweentloko* zawo nezono zawo emathanjeni awo, kuba la makroti aye oyikisa ilizwe labaphilayo.
28 Kodwa wena, uza kutyunyuzwa phakathi kwabo bangalukanga, yaye uza kulala nabo babulewe ngekrele.
29 “‘Ulapho uEdom,+ ookumkani bakhe neenkosi zakhe, ezathi nangona zazinamandla, zabekwa kunye nabo babulewe ngekrele; nazo ziza kulala nabo bangalukanga+ kunye nabo behla baye emngxunyeni.*
30 “‘Zilapho iinkosana* zasemntla nawo onke amaSidon+ aye ehla, aya kuhlazeka nababuleweyo, nangona amandla awo ebebangela uloyiko. Aza kulala engalukanga kunye nabo babulewe ngekrele, ibe aza kuthwala ihlazo lawo kunye nabo behla baye emngxunyeni.*
31 “‘UFaro uza kuzibona ezi zinto, yaye uza kuthuthuzeleka kuyo yonke into eyenzeke kubantu bakhe;+ uFaro nawo wonke umkhosi wakhe baza kubulawa ngekrele,’ itsho iNkosi enguMongami uYehova.
32 “‘Ekubeni ebenze boyika abakwilizwe labaphilayo, uFaro nabo bonke abantu bakhe baza kulaliswa nabo bangalukanga, kunye nabo babulewe ngekrele,’ itsho iNkosi enguMongami uYehova.”
Umbhalo osemazantsi
^ Ngokoqobo, “imilambo yabo.”
^ Okanye “entsha enesingci.”
^ Ngokoqobo, “Ibe imisinga iza kugcwaliswa nguwe (ngawe).”
^ Okanye “engcwabeni.”
^ Funda Ingcaciso Yamagama.
^ Okanye “zengcwaba.”
^ Okanye “engcwabeni.”
^ Okanye “engcwabeni.”
^ Ngokoqobo, “bakhe.”
^ Funda Ingcaciso Yamagama.
^ Mhlawumbi apha kubhekiselwa kumakroti angcwatywe namakrele awo, nezidanga zomkhosi.
^ Okanye “engcwabeni.”
^ Okanye “iinkokheli.”
^ Okanye “engcwabeni.”
