Hoseya 7:1-16
7 “Xa kanye ndimphilisa uSirayeli,Isono sikaEfrayim siyabhenceka,+Nezinto ezimbi zaseSamariya.+
Kuba bayaxoka;+Amasela ayaqhekeza nemigulukudu iyagqugqisa ngaphandle.+
2 Kodwa abatsho ezintliziyweni zabo ukuba ndiza kuzikhumbula zonke izinto ezimbi abazenzayo.+
Ngoku izenzo zabo zibangqongile;Ziphambi kobuso bam.
3 Bayamvuyisa ukumkani ngezinto ezimbi abazenzayo,Neenkokheli ngokuxoka kwabo.
4 Bonke bangabakrexezi,*Batshiseka okweziko elivuthayo libaswa ngumbhaki,Oyekayo ukukhwezela emva kokuxova intlama ide inyuke.
5 Ngemini kakumkani wethu, iinkosana ziye zagula,Zinomsindo ngenxa yewayini.+
Ukumkani uzimanyanise nabantu abasileyo.
6 Kuba beza beneentliziyo ezivutha okweziko.*
Umbhaki ulala ubusuku bonke;Kusasa iziko livutha njengomlilo odangazelayo.
7 Bonke batshisa okweziko,Yaye bayabaqwenga abalawuli* babo.
Ookumkani babo bonke bawile;+Akukho namnye kubo ondibizayo.+
8 UEfrayim uxubana neentlanga.+
UEfrayim unjengesonka esirawundi esingaphethulwanga.
9 Abasemzini bawadle bawagqiba amandla akhe,+ kodwa akayazi loo nto.
Neenwele zakhe zijike zamhlophe, kodwa yena akayiboni loo nto.
10 Ikratshi likaSirayeli limmangalele,+Kodwa akabuyelanga kuYehova uThixo wakhe,+Phezu kwayo yonke loo nto, akakhange amfune.
11 UEfrayim ufana nehobe elimathileyo, elingasebenzisi ngqondo.*+
Ucele uncedo eYiputa;+ uye eAsiriya.+
12 Nokuba uya phi uEfrayim, ndiza kuwuphosa phezu kwakhe umnatha wam.
Ndiza kumhlisa okweentaka zezulu.
Ndiza kumqeqesha ngokwesilumkiso asinikiweyo.+
13 Uza kuthi shu kuba undibalekile!
Uza kutshatyalaliswa kuba undonile!
Bendikulungele ukumkhulula, kodwa uxoke ngam.+
14 Khange acele uncedo kum ngentliziyo yakhe yonke,+Nangona ebeqhubeka ekhala kabuhlungu kwiibhedi zakhe.
Ebezisika ukuze afumane iinkozo newayini entsha;Undijikele.
15 Nangona bendimqeqesha, ndisomeleza neengalo zakhe,Akandifuni, undicebela izinto ezimbi.
16 Utshintshile, kodwa akayanga kwinto engcono;*Ebengathembekanga oku kwesaphetha esityeketyeke.+
Iinkosana zakhe ziza kuwa ngekrele ngenxa yolwimi lwazo oludelelayo.
Ngenxa yoku uEfrayim uza kuba yinto yokugezelwa kwilizwe laseYiputa.”+
Umbhalo osemazantsi
^ Oko kukuthi, umntu otshatileyo olala nomntu angatshatanga naye.
^ Okanye kusenokwenzeka, “Kuba iintliziyo zabo zinjengeziko, njengoko besiza ngamaqhinga abo.”
^ Ngokoqobo, “abagwebi.”
^ Ngokoqobo, “elingenantliziyo.”
^ Oko kukuthi, akayanga kwinkonzo engcono.
