Isaya 58:1-14
58 “Vula umqala, ukhwaze kakhulu; ungayeki!
Khwaza kakhulu kube ngathi kuvakala ixilongo.
Chazela abantu bam indlela abangathobelanga ngayo,+Uchazele indlu kaYakobi izono zayo.
2 Mihla le bafuna ndibakhokele,Babonisa ukuba bayavuyiswa ziindlela zam,Ngokungathi bebeluhlanga olwenza ubulungisaObelungakushiyanga okusesikweni* kukaThixo.+
Lucela ndilugwebe ngobulungisa,Ngokungathi luyakuvuyela ukusondela kuThixo:+
3 ‘Kutheni ungaboni xa sizile ukutya?+
Kutheni ungaqapheli xa sityiwa zizono zethu?’+
Kuba ngemini enizila ngayo, nenza unothanda,Ibe niyabacinezela abasebenzi benu.+
4 Niphela senixabana, nisilwa koku kuzila kwenu,Niphosa inqindi ngenkohlakalo.
Aninakuzila ukutya ngale ndlela nenza ngayo namhlanje, nakugqiba nilindele ukuba ilizwi lenu liviwe ezulwini.
5 Ngaba le ndlela nizila ngayo yile ifunwa ndim,Imini umntu azibonakalisa ngayo esentlungwini,Athokombise intloko njengomzi,Azenzele umandlalo ngelaphu lokwenza ingxowa nothuthu?
Yile nto na le niyibiza ukuzila nomhla owamkelekileyo kuYehova?
6 Naku ukuzila endikufunayo mna:
Ukususa amatsheyini obubi,Ukukhulula izibopho zedyokhwe,+Ukukhulula umntu ocinezelekileyo,+Nokwaphula nayiphi na idyokhwe;
7 Ukuqhekezela umntu olambileyo kwisonka sakho,+Ukumemela emzini wakho umntu ongathathi ntweni nongenakhaya.Kukuthi xa ubona umntu ehamba ze umnike into yokunxiba,+Nokungamfulatheli umntu ozalana naye.
8 Ngoko ke, ukukhanya kwakho kuza kukhanya njengokuthi qheke kokusa,+Uza kukhawuleza uphile.
Imisebenzi yakho yobulungisa iza kukukhokela,Yaye uzuko lukaYehova luza kukukhusela ngasemva.+
9 Uza kubiza, uYehova aphendule;Uza kukhalela uncedo, uThixo athi, ‘Ndim lo!’
Ukuba uyahlukana nedyokhwe yengcinezelo,Uyeke ukukhomba ngeminwe nokuthetha amazwi ahlabayo,+
10 Ukuba umntu olambileyo umpha into nawe oyithandayo+Yaye wanelisa abantu abasentlungwini,Ngoko ke ukukhanya kwakho kuza kukhanya nasebumnyameni,Nesithokothoko sakho sobumnyama siza kuba njengasemini emaqanda.+
11 UYehova uza kuhlala ekukhokelaAze akwanelise nokuba ukwilizwe elomileyo;+UThixo uza kuwomeleza amathambo akho,Yaye uza kuba njengegadi enkcenkceshelwa ngokwaneleyo,+Njengomthombo wamanzi ongatshiyo.
12 Ngokwesicelo sakho, baza kuzakha iindawo ebezingahlali bantu ixesha elide;+Yaye uza kuphinda uzakhe iziseko zezizukulwana ezadlulayo.+
Uza kubizwa ngokuba ungumngcibi weendonga ezidilikileyo,*+Umlungisi weendlela ekuhlalwa ngakuzo.
13 Ukuba ngenxa yeSabatha, imini engcwele, uyayeka ukwenza* ukuthanda kwakho,*+Yaye iSabatha uyibiza usuku olumnandi gqitha, imini kaYehova engcwele, imini yokuzukiswa,+Ibe uyayizukisa endaweni yokuba uleqeke emva kwezakho izinto, yaye uyayeka ukuthetha amazwi angakhiyo,
14 Uza kutsho wonwatyiswe nguYehova,Ibe ndiza kukwenza ulawule neendawo eziphakamileyo zomhlaba.+
Yaye ndiza kukunika* ilifa likaYakobi ukhokho wakho,+Kuba loo nto ithethwe ngumlomo kaYehova.”
Umbhalo osemazantsi
^ Okanye “ubulungisa.”
^ Ngokoqobo, “weentanda.”
^ Ngokoqobo, “uyalubuyisa unyawo lwakho ekwenzeni.”
^ Okanye “izinto ezithandwa nguwe.”
^ Okanye “kukwenza ulonwabele.”
