ISityhilelo Esiya KuYohane 17:1-18
-
Kugwetywa “iBhabhiloni Enkulu” (1-18)
17 Enye yeengelosi ezisixhenxe ezaziphethe izitya ezisixhenxe+ yeza kum, yathi: “Yiza ndikubonise isigwebo sikanongogo* omkhulu ohlala phezu kwamanzi amaninzi,+
2 abaye baziphatha kakubi ngesondo*+ naye ookumkani bomhlaba, baza abemi bomhlaba banxiliswa yiwayini yokuziphatha kakubi kwakhe ngesondo.”*+
3 Yandifunqula ngamandla omoya yandisa entlango. Ndabona umfazi ehleli phezu kwerhamncwa elibomvu krwe, ligcwele amagama anyelisayo. Lalineentloko ezisixhenxe neempondo ezilishumi.
4 Lo mfazi wayenxibe iimpahla ezimsobo*+ nezibomvu krwe. Wayehombe ngegolide, ngamatye axabisekileyo nangeeperile,+ yaye wayephethe indebe egcwele izinto ezenyanyekayo nezimdaka zokuziphatha kakubi kwakhe ngesondo.*
5 Ebunzini lakhe kwakubhalwe igama elingaziwayo elithi: “IBhabhiloni Enkulu, umama wabafazi abathengisa ngomzimba+ nowezinto ezenyanyekayo zomhlaba.”+
6 Ndambona lo mfazi ukuba unxilile ligazi labangcwele naligazi lamangqina kaYesu.+
Ndathi ndakumbona ndamangaliswa kakhulu.
7 Ngoko ingelosi yathi kum: “Kutheni umangalisiwe nje? Ndiza kukuxelela le nto ingaziwayo ngalo mfazi+ nangerhamncwa alikhweleyo, elineentloko ezisixhenxe neempondo ezilishumi:+
8 Irhamncwa owalibonayo lalikho, laza laphinda alabikho, kodwa sele liza kunyuka liphume emngxunyeni ongenasiphelo.*+ Liza kutshatyalaliswa. Abemi bomhlaba abanamagama angabhalwanga kumsongo wobomi+ ukususela ekusekweni kwehlabathi, baza kumangaliswa xa bebona irhamncwa elalikho laza alabikho, kodwa eliseza kubakho.
9 “Le nto ifuna ingqondo yesilumko: Iintloko ezisixhenxe+ zimela iintaba ezisixhenxe ahleli phezu kwazo umfazi.
10 Kukho ookumkani abasixhenxe: abahlanu bawile, omnye ukho, omnye akakafiki, kodwa xa efika umele ahlale ixesha elifutshane.
11 Irhamncwa elalikho laza alabikho,+ likwangukumkani wesibhozo, kodwa liphuma kwaba basixhenxe, ibe liza kutshatyalaliswa.
12 “Iimpondo ezilishumi ozibonileyo zimela ookumkani abalishumi abangekafumani bukumkani, kodwa bayalifumana igunya lokuba ngookumkani okwexeshana* kunye nerhamncwa.
13 Aba kumkani bacinga into enye, ngoko banika irhamncwa amandla negunya labo.
14 Baza kulwa neMvana,*+ kodwa kuba iyiNkosi yeenkosi noKumkani wookumkani,+ iMvana iza* kuboyisa.+ Nabo babiziweyo nabakhethiweyo, nabathembekileyo abakunye nayo baza kuboyisa.”+
15 Le ngelosi yathi kum: “Amanzi owabonileyo, ahleli kuwo umfazi othengisa ngomzimba,* amela izizwana, izihlwele, iintlanga neelwimi.+
16 Iimpondo ezilishumi+ ozibonileyo, nerhamncwa,+ baza kumcaphukela lo mfazi uthengisa ngomzimba,*+ yaye baza kumxuthela zonke izinto zakhe, bamshiye eze. Baza kuyitya inyama yakhe baze bamtshise aphele ngomlilo.+
17 Kuba uThixo wenze iintliziyo zabo ukuba zenze izinto ezicingwa nguye,+ benze le nto inye bayicingayo, le yokunika irhamncwa ubukumkani babo,+ ide yenzeke into eyathethwa nguThixo.
18 Umfazi+ ombonileyo yena umela isixeko esikhulu esinobukumkani obulawula ookumkani bomhlaba.”
Umbhalo osemazantsi
^ Okanye “somfazi othengisa ngomzimba.”
^ Okanye “bahenyuza.” Funda Ingcaciso Yamagama.
^ Okanye “yokuhenyuza kwakhe.” NgesiGrike, por·neiʹa. Funda Ingcaciso Yamagama.
^ Okanye “ezipepuli.”
^ Okanye “zokuhenyuza kwakhe.” NgesiGrike, por·neiʹa. Funda Ingcaciso Yamagama.
^ Funda Ingcaciso Yamagama.
^ Ngokoqobo, “iyure enye.”
^ Okanye “iTakane Legusha liza.”
^ Okanye “neTakane Legusha.”
^ Okanye “ihenyukazi.”
^ Okanye “eli henyukazi.”
