Kubalisa uLuka 14:1-35
14 Ngenye imini uYesu wayokutya emzini wenye inkokheli yabaFarisi ngeSabatha, ibe abantu ababelapho babemgadile.
2 Apho kwakukho umntu owayenesifo esasimenza adumbe.*
3 Ngoko uYesu wabuza abo bawaziyo uMthetho nabaFarisi, esithi: “Kusemthethweni na ukuphilisa ngeSabatha okanye akunjalo?”+
4 Kodwa bathi cwaka. Ngoko wambamba lo mntu, wamphilisa, wathi makagoduke.
5 Emva koko wathi kubo: “Ngubani kuni onokungamkhuphi ngoko nangoko unyana wakhe okanye inkunzi yakhe yenkomo ukuba inokutshona equleni+ ngomhla weSabatha?”+
6 Abazange bakwazi ukuphendula.
7 Ngoko ke wabenzela umzekelo abantu ababemenyiwe, xa waphawula ukuba babezikhethela ukuhlala kwiindawo zabona bantu babalulekileyo.+ Wathi kubo:
8 “Xa umenywe kwitheko lomtshato, sukuhlala kwindawo yabona bantu babalulekileyo.+ Kusenokwenzeka ukuba kukho umntu omenyiweyo obaluleke ngaphezu kwakho.
9 Aze lowo ukumemileyo eze kuwe athi, ‘Suka kuhlale lo mntu.’ Uza kusuka apho uyokuhlala kweyona ndawo isemva.
10 Kodwa xa umenyiwe, hlala kweyona ndawo isemva, ukuze lo mntu ukumemileyo athi kuwe, ‘Mhlobo, yiya ngaphambili.’ Uza kutsho uhlonitshwe ngabo bonke abantu abalapho.+
11 Kuba wonke umntu oziphakamisayo uza kuthotywa, nalowo uzithobayo uza kuphakanyiswa.”+
12 Emva koko uYesu wathi kulo mntu wayemmemile: “Xa umema abantu kwisidlo sasemini okanye kwesangokuhlwa, sukubiza abahlobo bakho okanye abantakwenu okanye izalamane zakho okanye abamelwane bakho abazizityebi. Kuba kusenokwenzeka nabo bakumeme.
13 Kodwa xa unesidlo, mema amahlwempu, abantu abakhubazekileyo, abaqhwalelayo, nabangaboniyo;+
14 uza kutsho wonwabe kuba bona abanakukwazi ukukwenzela nto. Wena uza kuvuzwa xa kuvuswa+ amalungisa.”
15 Wathi akuva ezi zinto, omnye weendwendwe wathi kuYesu: “Wonwabile umntu oza kutya* eBukumkanini bukaThixo.”
16 UYesu wathi kuye: “Kwakukho indoda eyayiza kuba nesidlo sangokuhlwa esikhulu,+ imeme abantu abaninzi.
17 Yathumela ikhoboka layo ngexesha lesidlo ukuba liyokuthi kwabo bamenyiweyo, ‘Yizani kuba ukutya sekulungile.’
18 Bonke bathi abazukukwazi ukuza.+ Owokuqala wathi, ‘Ndithenge amasimi ibe ndiyokuwabona; ndixolele, andizukukwazi ukuza.’
19 Omnye wathi, ‘Ndithenge iinkomo ezilishumi* ibe ndisaya kuzihlola; ndixolele, andizukukwazi ukuza.’+
20 Waza omnye wathi, ‘Ndisandul’ ukutshata, ngoko andizukwazi ukuza.’
21 Labuya ke ikhoboka laxelela inkosi yalo ukuba bathini aba bantu. Yacaphuka yathi kwikhoboka layo, ‘Khawuleza uye kwizitrato ezikhulu nakwiindlela ezisesixekweni, ubize amahlwempu, abakhubazekileyo, abangaboniyo nabaqhwalelayo.’
22 Ekuhambeni kwexesha ikhoboka lathi, ‘Nkosi, ndiyenzile le nto ubundithume yona, kodwa kusekho indawo.’
23 Ngoko inkosi yathi kwelo khoboka, ‘Hamba uye ezindleleni, uze nabantu, ukuze indlu yam igcwale.+
24 Kuba ndithi kuni, akukho nomnye kwaba bantu bendibamemile oza kutya ukutya kwam.’”+
25 Kwakukho abantu abaninzi ababehamba noYesu, ngoko wajika wathi kubo:
26 “Nabani na oza kum, abe engamcaphukeli* utata wakhe, umama wakhe, umfazi wakhe, abantwana bakhe, umntakwabo, nodadewabo, kwanobomi bakhe,+ akanakuba ngumfundi wam.+
27 Nabani na ongasithwaliyo isibonda sakhe sokungcungcutheka* aze andilandele, akanakuba ngumfundi wam.+
28 Ngokomzekelo, ngubani kuni othi xa efuna ukwakha inqaba angaqali ahlale phantsi abale iindleko, ukuze abone ukuba unazo na izinto zokuyigqiba?
29 Ukuba akayenzi loo nto, usenokusibeka sona isiseko kodwa angakwazi ukuyigqiba, baze bonke abantu ababukeleyo bahlekise ngaye,
30 besithi: ‘Lo mntu waqalisa ukwakha kodwa akakwazi ukugqiba.’
31 Okanye nguwuphi ukumkani onamajoni ayi-10 000 ofuna ukuya kulwa nokumkani onamajoni ayi-20 000, ongaqali ahlale phantsi acele amacebiso, ukuze abone ukuba angoyisa na?
32 Ukuba kuyacaca ukuba akazukukwazi ukoyisa, uye athumele abantu kuloo kumkani esekude, acele kubekho uxolo.
33 Nani ke, qinisekani ukuba, akukho namnye kuni ongazishiyiyo zonke izinto zakhe onokuba ngumfundi wam.+
34 “Ityiwa ilungile, kodwa ukuba iphelelwa yincasa, iza kubuyiselwa ngantoni incasa yayo?+
35 Ayikulungelanga ukugalelwa emhlabeni, ingakulungelanga nokugalelwa emgqubeni. Ngoko ke iyalahlwa. Lowo uneendlebe zokumamela, makamamele.”+
Umbhalo osemazantsi
^ Okanye “owayenesifo somlambo.”
^ Ngokoqobo, “oza kutya isonka.”
^ Ngokoqobo, “izipani ezihlanu zeenkomo.”
^ Okanye “abe emthanda ngaphezu kwam.”
^ Okanye “isibonda sakhe sentuthumbo.” Funda Ingcaciso Yamagama.
