Kubalisa UMateyu 17:1-27
17 Emva kweentsuku ezintandathu, uYesu wenyuka intaba ephakamileyo noPetros noYakobi nomntakwabo uYohane.+
2 Bambona etshintsha. Ubuso bakhe babengezela njengelanga, nezambatho zakhe zangaphezulu zaqaqamba* njengokukhanya.+
3 Kwathi kusenjalo, babona uMoses noEliya bencokola naye.
4 UPetros wathi kuYesu: “Nkosi, kuyasivuyisa ukuba lapha. Ukuba uyafuna, ndingamisa apha iintente zibe ntathu, eyakho, ekaMoses nekaEliya.”
5 Uthe esathetha, kwavela ilifu eliqaqambileyo phezu kwabo, kwaza kwavakala ilizwi kwelo lifu, lisithi: “Lo nguNyana wam endimthandayo, nondivuyisayo.+ Mmameleni.”+
6 Bakuyiva le nto, abafundi baqubuda, boyika kakhulu.
7 UYesu wasondela kubo, wababamba wathi: “Phakamani. Sanukoyika.”
8 Bathe bakuphakamisa amehlo, ababona mntu ngaphandle koYesu.
9 Bathi ke xa besihla entabeni, uYesu wabayalela, esithi: “Ze ningaxeleli mntu ngalo mbono de uNyana womntu avuswe ekufeni.”+
10 Kodwa abafundi bambuza lo mbuzo: “Kutheni ke ababhali besithi kumele kuqale kufike uEliya?”+
11 Wabaphendula wathi: “Uyeza nyhani uEliya, ibe uza kulungisa yonke into.+
12 Kodwa ndithi kuni, uEliya sele ezile, yaye zange babone ukuba nguye, suke benza unothanda kuye.+ Baza kwenza loo nto ke nakuNyana womntu, ibe baza kumbulala.”+
13 Baqonda ke abafundi ukuba wayethetha ngoYohane umBhaptizi.
14 Bathi xa bebuyela ebantwini,+ kwasondela enye indoda kuYesu, yaguqa phantsi, yathi:
15 “Nkosi, yenzela unyana wam inceba, kuba unesifo sokuxhuzula. Uhlala esiwa emlilweni nasemanzini.+
16 Bendimzise kubafundi bakho, kodwa abakwazi ukumphilisa.”
17 UYesu wathi: “Owu sizukulwanandini singenalukholo nesijijekileyo,+ kufuneka ndihlale nani de kube nini? Koda kube nini ndininyamezele? Mziseni apha.”
18 Ngoko ke uYesu wayingxolisa idemon, yaphuma kuye, yaza yaphila ngoko nangoko loo nkwenkwe.+
19 Emva koko, abafundi bathetha noYesu ecaleni bambuza bathi: “Kutheni singakwazanga nje thina ukuyikhupha?”
20 Wathi kubo: “Kungenxa yokuba ukholo lwenu luncinci. Kuba ndiyaniqinisekisa ukuba, ukuba nje ninokholo olulingana nokhozo lwemostade, ninokuthi kule ntaba, ‘Suka apha uye phaya,’ ize isuke, ibe ayikho into eningenakukwazi ukuyenza.”+
21 *——
22 Babekunye eGalili xa uYesu wathi kubo: “UNyana womntu uza kujikelwa aze anikelwe ebantwini.+
23 Baza kumbulala, aze avuswe ngosuku lwesithathu.”+ Bakhathazeka kakhulu bakuva loo nto.
24 Emva kokuba befike eKapernahum, kweza kuPetros abantu abaqokelela irhafu yasetempileni,* bathi: “Akayikhuphi na irhafu yasetempileni umfundisi wenu?”+
25 Wathi: “Ewe, uyayikhupha.” Kodwa xa wayengena endlini, uYesu waqala wathetha naye, wathi: “Khawutsho Simon! Ookumkani behlabathi bayinikwa ngubani imali yerhafu? Ngoonyana babo okanye ngabanye abantu?”
26 Uthe uPetros akuthi: “Ngabanye abantu,” uYesu wathi: “Uyabona ke! Oonyana abayikhuphi irhafu, andithi?
27 Kodwa ukuze singabakhubekisi,+ yiya elwandle, ufike ulobe intlanzi, ephume kuqala, yivule umlomo, uza kufumana kuyo imali yesilivere.* Yithathe uyokubhatalela thina sobabini.”
Umbhalo osemazantsi
^ Okanye “zaba mhlophe.”
^ Funda Isihlomelo A3.
^ Ngokoqobo, “iidrarhma ezimbini.” Funda Isihlomelo B14.
^ Ngokoqobo, “ingqekembe yestateri,” ekwakusithiwa yitetradrarhma. Funda Isihlomelo B14.
