Obhadiya 1:1-21
1 Umbono kaObhadiya:*
Ithi iNkosi enguMongami uYehova ngoEdom:+
“Sive ingxelo evela kuYehova,Kuthunyelwe umthunywa ezintlangeni ukuba athi:
‘Phakamani, masilungele ukulwa naye.’”+
2 “Jonga! Ndikwenze wamncinci phakathi kweentlanga.Udelekile kakhulu.+
3 Ukukhukhumala kwentliziyo yakho kukuqhathile,+Wena uhlala kwiindawo zokuzimela ezingamawa,Uhlala kwindawo ephakamileyo, usithi entliziyweni yakho,‘Ngubani oza kundihlisela emhlabeni?’
4 Nokuba indawo yakho yokuhlala ungayenza iphakame njengeyokhozi,*Okanye indlwane yakho ungayibeka phakathi kweenkwenkwezi,Ndingakwehlisa apho,” utsho uYehova.
5 “Ukuba bekufike amasela kuwe, ootsotsi befike ngobusuku,Ngaba bebengazukuthatha kuphela izinto abazifunayo?
Okanye ukuba bekufike abavuni beediliya kuwe,
Ngaba bebengazukushiya nto enokuchola-cholwa?+Kodwa wena uza kutshatyalaliswa ngokupheleleyo!*
6 Ugqogqwe ngeyona ndlela uEsawu!
Buye bafunwa ubutyebi bakhe obufihliweyo!
7 Bakutshovele emdeni.
Bonke abebengakuwe bakuqhathile.*
Amadoda aseluxolweni nawe akoyisile.
Abo batya isonka nawe baza kubeka umnatha ngaphantsi kwakho,Kodwa wena awuzukuyibona loo nto.
8 Ngaloo mini,” utsho uYehova,“Andizukuzitshabalalisa na izilumko kwaEdom+Nokuqonda kwiindawo ezisezintabeni zakwaEsawu?
9 Yaye amagorha akho aza koyika,+ Owu Teman,+Ngenxa yokuba ngamnye okummandla weentaba wakwaEsawu uza kutshatyalaliswa.+
10 Ngenxa yokuhlaselwa komntakwenu uYakobi,+Uza kuhlazeka gqitha,+Ibe uza kutshabalala ngonaphakade.+
11 Mhla wena wamela kude,Mhla abasemzini babethimba umkhosi wakhe,+Xa abasemzini bangena egeyithini yakhe baza benza amaqashiso+ ngeYerusalem,Nawe wenza njengabo.
12 Uhleka njani ngemini yokuba nelishwa komntakwenu?+Uvuya njani ngemini yokutshabalala kwabantu bakwaYuda?+Kwaye kutheni uthetha kakubi ngolu hlobo ngemini yokuba sentlungwini kwabo?
13 Ungena njani egeyithini yabantu bam ngemini yentlekele yabo?+Uyihleka njani intlungu yomntakwenu ngemini yentlekele yakhe?Yaye kutheni ubeka izandla zakho kubutyebi bakhe ngemini yentlekele yakhe?+
14 Kutheni usima apho iindlela zidibana khona ukuze uxabele ababalekileyo bakhe?+Yaye ubasa njani kwiintshaba zabo abasindileyo bakhe ngemini yentlungu?+
15 Kuba imini kaYehova yokulwa nazo zonke iintlanga ikufutshane.+
Ngendlela owenze ngayo, kuza kwenziwa ngayo nakuwe.+
Indlela oye wabaphatha ngayo abanye iza kubuyela phezu kwentloko yakho.
16 Kuba ngendlela nina enithe nasela ngayo entabeni yam engcwele,Ziza kuhlala zisela kwangayo zonke iintlanga.+
Ziza kuyisela ziyigongqoze indebe yomsindo kaThixo,Zibe ngathi zange zabakho.
17 Kodwa kwiNtaba YeZiyon kuza kubakho ababalekileyo,+Yaye iza kuba ngcwele;+Kwaye indlu kaYakobi iza kuzithathela kuyo izinto zayo.+
18 Indlu kaYakobi iza kuba ngumlilo,Indlu kaYosefu ibe lidangatye,Ize indlu kaEsawu ibe njengeendiza.Ziza kuyitshisa iphele,Akuzukubakho usindayo endlini kaEsawu,+Kuba uYehova uthethile.
19 Ziza kuyithathela kuzo iNegebhi nendawo esezintabeni yakwaEsawu,+IShefela nelizwe lamaFilisti.+
Ziza kuwuthathela kuzo umhlaba wakwaEfrayim nomhlaba waseSamariya,+Yaye uBhenjamin uza kuthathela kuye iGiliyadi.
20 Ilizwe lamaKanan ukuya kutsho eTsarefathi,+ liza kuba lelabathinjwa bale nqaba,+Abantu bakwaSirayeli.
Abantu baseYerusalem abaselubhacweni, ababeseSefaradi, baza kuzithatha izixeko zeNegebhi.+
21 Abahlanguli baza kunyuka kwiNtaba YeZiyonUkuze bagwebe ummandla weentaba wakwaEsawu,+Yaye ubukumkani buza kuba bobukaYehova.”+
Umbhalo osemazantsi
^ Othetha ukuthi “Umkhonzi KaYehova.”
^ Okanye kusenokwenzeka, “ungabhabhela phezulu njengokhozi.”
^ Okanye kusenokwenzeka, “Bebeza kutshabalalisa kangakanani?”
^ Okanye “Bonke abenze isivumelwano nawe bakuqhathile.”
