Zekariya 5:1-11
5 Ndaphinda ndajonga phezulu, ndabona umsongo obhabhayo.
2 Yathi kum: “Ubona ntoni?”
Ndathi: “Ndibona umsongo obhabhayo, oziikubhite* eziyi-20 ubude, neekubhite eziyi-10 ububanzi.”
3 Yathi kum: “Esi sisiqalekiso sawo wonke umhlaba, ngenxa yokuba bonke abantu abangamasela khange bohlwaywe,+ nangona babeqalekiswe kweli cala lawo; nabo bonke abantu abenza isifungo+ khange bohlwaywe, nangona babeqalekiswe kwelinye icala lawo.
4 ‘Ndim obaqalekisileyo,’ utsho uYehova wemikhosi, ‘yaye isiqalekiso siza kungena endlini yesela nasendlini yalowo wenza isifungo sobuxoki egameni lam; siza kuhlala kuloo ndlu size siyiqwenge namaplanga namatye ayo.’”
5 Ngoko ingelosi eyayithetha nam yasondela, yathi kum: “Ndicela ujonge phezulu, ubone ukuba yintoni le iphumayo.”
6 Ndathi: “Yintoni?”
Yathi: “Sisitya se-efa* esi siphumayo.” Yaphinda yathi: “Banje abantu emhlabeni wonke.”
7 Ndabona isiciko selothe esirawundi siphakanyiswa, ibe kwakukho umfazi ohleli phakathi kweso sitya.
8 Yathi: “NguBubi lo.” Yamphosa phakathi kwesitya se-efa, emva koko yagadlela isiciko selothe emlonyeni weso sitya.
9 Ndajonga phezulu, ndabona abafazi ababini besondela, bebhabha emoyeni. Babenamaphiko afana nawengwamza. Basiphakamisa eso sitya phakathi komhlaba namazulu.
10 Ndathi kwingelosi eyayithetha nam: “Basisa phi isitya se-efa?”
11 Yathi kum: “Basisa kwilizwe laseShinare*+ ukuze bamakhele indlu; ibe xa seyilungile, uza kubekwa apho endaweni yakhe.”
Umbhalo osemazantsi
^ Ikubhite ilingana ne-44,5 cm. Funda Isihlomelo B14.
^ Ngokoqobo, “Yiefa.” Apha ibhekisela kwibhaskithi eyayisetyenziswa ukuze kukalwe iefa. Iefa ilingana ne-22 L. Funda Isihlomelo B14.
^ Oko kukuthi, eBhabhiloni.