Zikhwebule Kunqulo Lobuxoki!

“‘Phumani phakathi kwabo, nizahlule,’ utsho uYehova, ‘nento engahlambulukanga ningayichukumisi.’”—2 KORINTE 6:17.

1. Yiyiphi imeko yokomoya abantyumpantyumpeka kuyo abantu abaninzi abanyanisekileyo?

 ABANTU abaninzi abanyanisekileyo abayazi inyaniso ngoThixo nekamva loluntu. Ngenxa yokuba bengade bazifumane iimpendulo kwimibuzo abanayo ngoThixo nangekamva, babhidekile yaye abaqinisekanga ngeziqu zabo. Izigidi zikhotyokiswe ziinkolelo, izithethe kwanemibhiyozo emcaphukisayo uMdali wethu. Mhlawumbi abamelwane bakho kwanezalamane zikholelwa kwisihogo somlilo, kuThixo onguBathathu Emnye, kumphefumlo ongafiyo, nakwezinye iimfundiso zonqulo lobuxoki.

2. Yintoni eziyenzileyo iinkokeli zonqulo, yaye oko kuye kwaphumela entwenini?

² Yintoni ebangela obu bumnyama bokomoya bunwenwe okomlilo wedobo? Okuhlekisayo kukuba, lunqulo—ngokukodwa iintlangano kwaneenkokeli zonqulo eziye zafundisa iingcamango ezinxamnye noThixo. (Marko 7:7, 8) Ngenxa yoko, abantu abaninzi baye bakhohliselwa ekubeni bakholelwe ukuba banqula uThixo oyinyaniso, ngoxa bemenza buhlungu. Lunqulo lobuxoki olubekek’ ityala ngale meko ilusizi ngolu hlobo.

3. Ngubani oyena unkqenkqeza phambili ekukhuthazeni unqulo lobuxoki, yaye iBhayibhile imchaza njani?

³ Unqulo lobuxoki luxhaswa ngumntu ongabonakaliyo. Ethetha ngalo mntu umpostile uPawulos wathi: “Uthixo wale nkqubo yezinto uye wamfamekisa iingqondo zabangakholwayo, ukuze ukhanyiso lweendaba ezilungileyo ezingoKristu, ongumfanekiso kaThixo, lungakhanyi.” (2 Korinte 4:4) “Uthixo wale nkqubo yezinto” nguSathana uMtyholi. Unkqenkqeza phambili ekukhuthazeni unqulo lobuxoki. UPawulos wabhala wenjenje: “NoSathana ngokwakhe uzimilisa okwengelosi yokukhanya. Ngoko ke akunto inkulu ukuba nabalungiseleli bakhe bazimilise okwabalungiseleli bobulungisa.” (2 Korinte 11:14, 15) USathana wenza izinto ezimbi zibonakale ngathi zilungile aze akhohlisele abantu ekubeni bakholelwe kubuxoki.

4. Wawusithini uMthetho kaThixo kumaSirayeli amandulo ngabaprofeti bobuxoki?

⁴ Ngoko sicace okwekat’ emhloph’ ehlungwini isizathu sokuba iBhayibhile ilubek’ ityala ngolu hlobo unqulo lobuxoki! Ngokomzekelo, uMthetho kaMoses wabalumkisa ngokukhethekileyo abantu abanyulwe nguThixo ngokuphathelele abaprofeti bobuxoki. Nabani na owayefundisa iimfundiso zobuxoki nowayekhuthaza ukuba kunqulwe oothixo bobuxoki wayefanele ‘abulawe kuba ethethe ngemvukelo ngoYehova.’ AmaSirayeli ayeyalelwe ukuba ‘atshayele ububi bungabikho phakathi kwawo.’ (Duteronomi 13:1-5) Liyinyaniso elokuba unqulo lobuxoki luyinto ephosakeleyo emehlweni kaYehova.—Hezekile 13:3.

5. Ziziphi izilumkiso esifanele sizithobele kule mihla?

⁵ UYesu Kristu nabapostile bakhe babonisa indlela angalufuni ngayo uYehova unqulo lobuxoki. UYesu walumkisa abafundi bakhe wenjenje: “Baphapheleni abaprofeti bobuxoki abeza kuni ngezambatho zeegusha, kodwa ngaphakathi beziingcuka eziqwengayo.” (Mateyu 7:15; Marko 13:22, 23) UPawulos yena wathi “ingqumbo kaThixo iyatyhilwa  ivela ezulwini nxamnye nako konke ukungabi nabuthixo nentswela-bulungisa yabantu abathintela inyaniso.” (Roma 1:18) Hayi indlela ekubaluleke ngayo ukuba amaKristu okwenyaniso athobele ezi zilumkiso aze azinxweme kuye nabani na othetha kakubi ngenyaniso yeLizwi likaThixo okanye osasaza iimfundiso zobuxoki!—1 Yohane 4:1.

Phumani ‘KwiBhabhiloni Enkulu’

6. IBhayibhile iyifanisa nantoni “iBhabhiloni Enkulu”?

⁶ Khawuqwalasele indlela oluchazwa ngayo unqulo lobuxoki kwincwadi yeSityhilelo. Lufaniswa nonongogo onxilileyo ophembelela ookumkani nabantu ababaphetheyo. Lo mfazi wokomfuziselo uhenyuza nookumkani abaninzi yaye unxile ligazi labanquli bokwenyaniso bakaThixo. (ISityhilelo 17:1, 2, 6, 18) Ebunzini lakhe kubhalwe igama eliyichaza ngokuthe ngqo ihambo yakhe eyonyanyekayo. Eli gama lithi, “iBhabhiloni Enkulu, unina wamahenyukazi nowezinto ezilizothe zomhlaba.”—ISityhilelo 17:5.

7, 8. Unqulo lobuxoki luye lwahenyuza ngayiphi indlela, yaye oko kuye kwaphumela entwenini?

⁷ Indlela iZibhalo eziyichaza ngayo iBhabhiloni Enkulu ivisisana ncam nequmrhu lonqulo lobuxoki elisehlabathini. Nangona unqulo oluninzi lungamanyananga ngokusemthethweni njengentlangano enye yehlabathi, kodwa ngeenjongo nangezenzo, yintlaka nexolo. Njengoko incwadi yeSityhilelo ithetha ngalo njengomfazi oziphethe kakubi, unqulo lobuxoki lunempembelelo enkulu koorhulumente. Njengomfazi onganyanisekanga kwizibhambathiso zomtshato, luye lwahenyuza ngokuzimanya namagunya amaninzi ezobupolitika. Umfundi uYakobi wabhala wenjenje: “Bakrexezikazindini, anazi na ukuba ubuhlobo kunye nehlabathi bubutshaba kunye noThixo? Nabani na, ke ngoko, ofuna ukuba ngumhlobo wehlabathi uzenza utshaba lukaThixo.”—Yakobi 4:4.

⁸ Oku kulala ngengubo enye konqulo lobuxoki noorhulumente kuye kwalubeka ebugxwayibeni uluntu. Omnye umhlalutyi wezobupolitika waseAfrika, uGqr. Xolela Mangcu wathi “imbali yehlabathi izaliswe kukubulawa kwenyambalala yabantu ngenxa yokuzixuba konqulo nezobupolitika.” Kutshanje elinye iphephandaba lithe: “Isizekabani seengxwabangxwaba eziphumela kuphalazo-gazi nezona ziyingozi namhlanje . . . lunqulo.” Unqulo luye lwafak’ isandla kungquzulwano olubangele ukufa kwezigidi zabantu. IBhabhiloni Enkulu ide yatshutshisa yaza yabulala nabakhonzi abanyanisekileyo bakaThixo, ngokungathi kunjalo, yanxila ligazi labo.—ISityhilelo 18:24.

9. Indlela uYehova alucekisa ngayo unqulo lobuxoki ichazwa njani kwincwadi yeSityhilelo?

⁹ Ubungqina bokuba uYehova uyalucekisa unqulo lobuxoki bubonwa  ngokucacileyo koko kwenzeka kwiBhabhiloni Enkulu. KwiSityhilelo 17:16 kuthiwa: “Iimpondo ezilishumi ozibonileyo, nerhamncwa, ngabo baya kulithiya ihenyukazi, baliphanzise, balihlube libe ze, bazidle iinxalenye zenyama yalo baze balitshise ngokupheleleyo ngomlilo.” Okokuqala, irhamncwa elikhulu liyidlakaza liyibulale, yaye liqwenga iinxalenye zenyama yayo. Emva koko, iinxalenye zenyama eshiyekileyo zitshiswa ngokupheleleyo. Kungekudala, oorhulumente bomhlaba baya kwenza okufanayo kunqulo lobuxoki. NguThixo oya kubabangela ukuba benze oku. (ISityhilelo 17:17) IBhabhiloni Enkulu, ubukhosi behlabathi bonqulo lobuxoki, iza kutshatyalaliswa. ‘Ayiyi kuba safunyanwa kwakhona.’—ISityhilelo 18:21.

10. Sifanele silujonge njani unqulo lobuxoki?

¹⁰ Abanquli bokwenyaniso bafanele bayijonge njani iBhabhiloni Enkulu? IBhayibhile ayifuniseli ngokuphathelele oku, ithi: “Phumani kuyo, bantu bam, ukuze ningabelani nayo ngezono zayo, nokuze ningamkeliswa kwizibetho zayo.” (ISityhilelo 18:4) Abo bafuna ukusindiswa bamele balunikel’ umva unqulo lobuxoki ngaphambi kokuba bashiywe lixesha. Xa wayelapha emhlabeni, uYesu Kristu wathi ngemihla yokugqibela, baninzi abaya kuthi balandela emanyathelweni akhe. (Mateyu 24:3-5) Kwabanjalo uthi: “Andizange ndinazi! Mkani kum, nina benzi bokuchasene nomthetho.” (Mateyu 7:23) UKumkani obekwe etroneni, uYesu Kristu, akananto emdibanisa nonqulo lobuxoki.

Zikhwebule—Ngayiphi Indlela?

11. Yintoni esifanele siyenze ukuze sizikhwebule kunqulo lobuxoki?

¹¹ AmaKristu okwenyaniso ayazikhwebula kunqulo lobuxoki, ayazigatya iimfundiso zalo zobuxoki. Oku kuthetha ukuba asiziphulaphuli iinkqubo zonqulo ezisasazwa kunomathotholo nakumabonwakude yaye asizifundi iimpapasho zalo ezisasaza ubuxoki ngoThixo nangeLizwi lakhe. (INdumiso 119:37) Kwakhona sihambela kude kwiimbutho nokuzihlaziya okuxhaswa yiyo nayiphi na intlangano enxulumene nonqulo lobuxoki. Ukongezelela, asiluxhasi nangayiphi na indlela unqulo lobuxoki. (1 Korinte 10:21) Ukuba siyaziphepha ezi zinto asiyi kuthabatheka “ziintanda-bulumko nayinkohliso elambathayo esekelwe kwizithethe zabantu, nakwizinto eziziziqalelo zehlabathi, kungekhona kuKristu.”—Kolose 2:8.

12. Umntu unokuluqhawula njani unxibelelwano nonqulo lobuxoki?

¹² Kuthekani ukuba umntu ofuna ukuba liNgqina  likaYehova ulilungu elisemthethweni lonqulo lobuxoki? Ngokuqhelekileyo, ubhala ileta echaza ukuba ngoku uyarhoxa kolo nqulo. Okona kubaluleke ngokukhethekileyo kukuba ubani enze yonke into ebonisa ukuba uzinxwema ngokupheleleyo kwinto yonke ephathelele unqulo lobuxoki nemngcolisayo ngokomoya. Konke akwenzayo kufanele kubenze beyiseke abantu bolo nqulo kwanababukeli ukuba ulushiye ngokupheleleyo.

13. IBhayibhile inikela siphi isiluleko ngokuphathelele ukulushiya ngokupheleleyo unqulo lobuxoki?

¹³ Umpostile uPawulos wabhala: “Musani ukubotshwa edyokhweni kunye nabangakholwayo. Kuba bunabudlelane buni na ubulungisa nokuchas’ umthetho? Okanye kunakwabelana kuni na ukukhanya nobumnyama? Ngokubhekele phaya, unakuvumelana kuni na uKristu noBheliyali? Okanye unakwahlulelana kuni na umntu okholwayo nongakholwayo? Yaye inakuvisisana kuni itempile kaThixo nezithixo? . . . ’Ngoko ke phumani phakathi kwabo, nizahlule,’ utsho uYehova, ‘nento engahlambulukanga ningayichukumisi.’” (2 Korinte 6:14-17) La mazwi siwathobela ngokuba silushiye ngokupheleleyo unqulo lobuxoki. Ngaba icebiso likaPawulos lithetha ukuba sicezela kude nabantu abakunqulo lobuxoki?

“Qhubekani Nihamba Ngobulumko”

14. Ngaba sifanele sizinxweme ngokupheleleyo kwabo bakunqulo lobuxoki? Cacisa.

¹⁴ Ngaba abanquli bokwenyaniso bafanele bacezele kude nabantu abakunqulo lobuxoki? Ngaba sifanele sizinxweme ngokupheleleyo kubantu esingakholwa kunye nabo? Akuthethwa loo nto. Umyalelo wokugqibela kwimiyalelo emibini emikhulu uthi: “Uze umthande ummelwane wakho njengawe siqu.” (Mateyu 22:39) Indlela esibonisa ngayo ukuba siyabathanda abamelwane bethu kukubaxelela ngeendaba ezilungileyo zoBukumkani. Enye indlela kukubaqhubela isifundo seBhayibhile size sibenze basiqonde isizathu sokuba kufuneka bazikhwebule kunqulo lobuxoki.

15. Kuthetha ukuthini ‘ukungabi yonxalenye yehlabathi’?

¹⁵ Nangona sishumayela iindaba ezilungileyo kubamelwane bethu, njengabalandeli bakaYesu ‘asiyonxalenye yehlabathi.’ (Yohane 15:19) Apha ibinzana elithi ‘ihlabathi’ libhekisela kwibutho labantu elizahlukanisileyo noThixo. (Efese 4:17-19; 1 Yohane 5:19) Sahlukile ehlabathini kuba siyasiphepha isimo sengqondo, intetho, kwanehambo emenza buhlungu uYehova. (1 Yohane 2:5-17) Ngaphezu koko, ngokuvisisana nomgaqo othi “unxulumano olubi lonakalisa imikhwa elungileyo,” siyakuphepha ukuba nolwalamano olusenyongweni nabantu abangaphili ngemilinganiselo yobuKristu. (1 Korinte 15:33) Ukungabi yinxalenye yehlabathi kuthetha “ukuzigcina ungenabala kulo ihlabathi.” (Yakobi 1:27) Ngoko, ukungabi yonxalenye yehlabathi akuthethi kuthi singoonkom’ idla yodwa.—Yohane 17:15, 16; 1 Korinte 5:9, 10.

16, 17. AmaKristu afanele abaphathe njani abantu abangayaziyo inyaniso yeBhayibhile?

¹⁶ Ngoko ke, simele sibaphathe njani abo bangayaziyo inyaniso yeBhayibhile? UPawulos wabhalela ibandla laseKolose la mazwi: “Qhubekani nihamba ngobulumko ngokwabo bangaphandle, nizongela ixesha. Amazwi enu makasoloko ekholekile, enongwe ngetyuwa, ukuze nikwazi ukuphendula bonke ngabanye.” (Kolose 4:5, 6) Umpostile uPetros wabhala: “Ngcwalisani uKristu njengeNkosi ezintliziyweni zenu, nisoloko nikulungele ukuzithethelela phambi kwakhe wonk’ ubani ofuna  kuni isizathu sethemba elikuni, kodwa nisenjenjalo ngomoya wobulali nentlonelo enzulu.” (1 Petros 3:15) UPawulos wayalela amaKristu ukuba ‘angathethi kakubi nangabani na, angabi ngathanda ukulwa, abe nengqiqo, ebonisa ubulali kubantu bonke.’—Tito 3:2.

¹⁷ NjengamaNgqina kaYehova, siyakuphepha ukuthetha rhabaxa okanye ukuzikhukhumalisa kwabanye. Siyaqiniseka ukuba asisebenzisi amagama anyembayo xa sithetha ngabantu bolunye unqulo. Kunoko, sithetha ngobuchule kwanaxa umninimzi okanye ummelwane, nditsho nomntu esisebenza naye engenabubele kuthi okanye esithuka.—Kolose 4:6; 2 Timoti 2:24.

“Bambelela Emazwini Aphilileyo”

18. Yiyiphi imeko elusizi yokomoya ababa kuyo abo babuyela kunqulo lobuxoki?

¹⁸ Hayi indlela ekuba lusizi ngayo xa umntu ofunde inyaniso yeBhayibhile ebuyela kunqulo lobuxoki! Xa ithetha ngemiphumo emibi yelo khondo, iBhayibhile ithi: “Ngokuqinisekileyo ukuba, emva kokuphepha izidyobho zehlabathi ngolwazi oluchanileyo lweNkosi noMsindisi uYesu Kristu, babandakanyeka kwakwezi zinto kwakhona baze boyiswe, iimeko zokugqibela ziba mbi ngakumbi kubo kunezokuqala. . . . Abhekisa kubo amazwi omzekeliso oyinyaniso, athi: ‘Inja ibuyele emhlanzweni wayo, nehagukazi ehlanjwe umzimba ibuye yaqika-qikeka eludakeni.’”—2 Petros 2:20-22.

19. Kutheni kubalulekile nje ukuba sihlale siyiphaphele nantoni na enokusenzakalisa ngokomoya?

¹⁹ Simele sihlale siyiphaphele nantoni enokusenzakalisa ngokomoya. Zisoloko zikho iingozi! Umpostile uPawulos wathi: “Ilizwi eliphefumlelweyo lithi ngokuqinisekileyo kuya kubakho ixesha laxa abathile beya kuphambuka elukholweni, benikela ingqalelo kumazwi aphefumlelweyo alahlekisayo nakwiimfundiso zeedemon.” (1 Timoti 4:1) Siphila kwelo ‘xesha.’ Abo bangazikhwebuliyo kunqulo lobuxoki ‘banokukhukuliswa ngamaza baze baphetshethwe yiyo yonke imimoya yeemfundiso zabakhohlisi abalahlekisa abantu ngobuqhokolo.’—Efese 4:13, 14.

20. Sinokuzikhusela njani kwimpembelelo eyonakalisayo yonqulo lobuxoki?

²⁰ Sinokuzikhusela njani kwimpembelelo eyonakalisayo yonqulo lobuxoki? Ngokuhlolisisa onke amalungiselelo uYehova asenzele wona. SineLizwi likaThixo, iBhayibhile. (2 Timoti 3:16, 17) Kwakhona uYehova usilungiselele intabalala yokutya kokomoya esebenzisa ‘ikhoboka elithembekileyo neliyingqondi.’ (Mateyu 24:45) Njengoko sisenza inkqubela enyanisweni, ngaba asifanele sisoloko sikulangazelela ‘ukutya okuqinileyo kwabantu abaqolileyo’ nokuya ezintlanganisweni apho sifundiswa inyaniso ngezinto zokomoya? (Hebhere 5:13, 14; INdumiso 26:8) Masizimisele ukuwasebenzisa ngokupheleleyo amalungiselelo uYehova asenzele wona ukuze siqhubeke ‘sibambelele emazwini aphilileyo’ esiwavileyo. (2 Timoti 1:13) Ukuba senjenjalo, siya kukwazi ukuzikhwebula kunqulo lobuxoki.

Ufunde Ntoni?

• Yintoni “iBhabhiloni Enkulu”?

• Yintoni esimele siyenze ukuze sizikhwebule kunqulo lobuxoki?

• Ziziphi izinto esifanele siziphephe ezinokusonakalisa ngokomoya?

[Imibuzo YeSifundo]

[Umfanekiso okwiphepha 28]

Uyasazi na isizathu sokuba “iBhabhiloni Enkulu” ifaniswe nomfazi oziphethe kakubi?

[Umfanekiso okwiphepha 29]

“IBhabhiloni Enkulu” iza kutshatyalaliswa

[Umfanekiso okwiphepha 31]

‘Sinomoya wobulali nentlonelo enzulu’ ngabo singakholwa kunye nabo