Ileta Evela EMexico

“Ngaba UYehova Uyasithanda Nangona SingamaNdiya?

UMELESIO, othetha isiO’dam, wayedla ngokwehla ezintabeni aze kufuna umsebenzi. Wayesiya kwiintlanganiso zamaKristu aze athathe uncwadi lweBhayibhile awayeza kulufunda nabantu bakowabo. Wacela ukuba batyelelwe ukuze bafundiswe iBhayibhile.

AmaO’dam, sisizwe esisemagqagaleni, ahlala eSierras kumntla mbindi weMexico, omalunga neekhilomitha ezingama-240 ukusuka kwelona bandla likufutshane lamaNgqina kaYehova. Abanye bethu bagqiba ekubeni bawatyelele.

Safumana ilori, iintente neebhegi zokulala saza saphatha ukutya nepetroli enokwanela iintsuku ezintathu, sanduluka sisuka kwisixeko saseDurango. Saphuma ngentsimbi yesine ekuseni, sahamba iiyure ezisibhozo kwiindlela ezinothuli ezintabeni yada yaphela indlela. Le ndawo yasingenisa kummandla wamaO’dam. Ngaphambili kwakukho ingxondorha enzulu nentaba.

Ilori yethu sayishiya elalini saza sahamba iiyure ezintathu ngeenyawo siphethe izinto esasiza kuzisebenzisa sisiya emazantsi ale ngxondorha. Safika sagxumeka iintente, saza satheza iinkuni zokubasa umlilo ukuze sigxothe izilwanyana zasendle, sasibolekisana ngokulala ukuze ungacimi umlilo.

Ekuseni ngentsasa elandelayo, senyuka intaba. Kwakukho iindledlana ezininzi yaye salahleka kanobom. Omnye wethu wayenofifi lwesiO’dam, sahamba sishumayela ngeBhayibhile kwimizi esecaleni kwendlela. Asizange sikholelwe xa abantu besixelela ukuba, eLos Arenales, apho sasisiya khona, kwakukho abantu ababesithi bangamaNgqina kaYehova yaye babeqhuba iintlanganiso zeBhayibhile apho. Sothuka kodwa ke sakhuthazeka.

Ukufika kwethu eLos Arenales, iinyawo zethu zazidumbile. Abantu balapho babehlala ezindlwini ezenziwe ngezinti nodaka zaza zafulelwa ngekhadibhodi—kungekho zikolo, kungekho nambane. Lwalungekho unxibelelwano  phakathi kwabo nabantu bezinye iindawo, bezimpula zikaLujaca, bephila ngesonka sombona nezinye izinto. Sadibana noMelesio, ityendyana elingenamzimba, akazange akwazi ukuzibamba luvuyo esakusibona. Wasimemela ekhayeni lakhe eliphantsi waza wasixelela ukuba ebethandaza mihla le ecela ukuba uYehova athumele amaNgqina akhe afundise intsapho yakhe namanye amaO’dam iBhayibhile. Wayesithi akakwazi ukuyiphendula yonke imibuzo yabo.

Unqulo lwamaO’dam bubushaman. Asebenzisa amakhubalo enziwe ngeentsiba namathambo okhozi, anqula amandla endalo yaye ayazoyika iishaman, ezidla ngokuwaxhaphaza. UMelesio wasixelela ukuba xa wafunda kuhambo lwakhe ukuba uYehova nguThixo oyinyaniso, wazitshisa zonke izinto zakhe zonqulo. Abahlali babelindele ukuba oothixo babo bambulale ngenxa yaloo nto. Xa ingazange yenzeke loo nto, babona ukuba uYehova unamandla angakumbi kunoothixo babo. Ngenxa yoko, baqalisa ukuza xa uMelesio efundisa intsapho yakhe iBhayibhile esebenzisa uncwadi lwethu.

UMelesio uthi: “Ndabaxelela ukuba bafanele kuqala batshise onke amakhubalo abo nezithixo zabo.” Abaninzi baloyisa uloyiko lwabo yaye abo bezayo banda baba ngama-80. Zasimangalisa ezi ndaba, sagqiba ekubeni siqhube intlanganiso kwangaloo mva kwemini. Sathumela umyalezo ngabantu ababekhwele amahashe ababeqhele ukudibana kwaMelesio. Nangona kwakuphakathi evekini yaye benganikwanga xesha laneleyo, kweza abantu abangama-25, behamba ngeenyawo nangamahashe.

Sasiphendula imibuzo yeBhayibhile uMelesio eguqulela. Babebuza imibuzo enjengethi: “Ngaba uYehova uyasithanda nangona singamaNdiya?” “Ngaba uyayiphulaphula imithandazo yesiO’dam?” “Xa kufika iArmagedon, ngaba uYehova uza kucinga ngathi nangona sihlala kude nedolophu?” Kwakusivuyisa ukubaqinisekisa aba bantu bathobekileyo ngokusuka eBhayibhileni ukuba uYehova ubakhathelele abantu abalulamileyo, kungakhathaliseki ukuba bathetha luphi ulwimi okanye bahlala phi. Basicenga ukuba sithumele umntu aze kubafundisa.

Emva kwentlanganiso, sabelana ngokutya kwethu naba bahlobo bethu batsha. Kwakusele kusebusuku kubanda, ngoko sabulela bakusinika indawo yokulala kwigumbi elalingekagqitywa ukwakhiwa. Ngentsasa elandelayo basibonisa indlela emfutshane esisa kwilori yethu saza sabuyela eDurango, sidiniwe kodwa sanelisekile.

Yayililungelo lokwenene ukudibana naba bantu banyanisekileyo, abaninzi kubo abangakwaziyo ukulesa nokubhala iSpanish kodwa abakufunayo ukufunda ngoThixo oyinyaniso baze bamnqule! Emva kokuba sityelele apho, amaNgqina amathandathu aye atyelela le lali, ahlala iiveki ezintathu. Aye anceda abantu abamalunga nama-45 ababefuna ukukhonza uYehova. Bonke baya rhoqo ezintlanganisweni.

Nantsi into siyilibala. Ivenkile ekuphela kwayo eLos Arenales ayisawathengisi amacuba. Oku kubangelwa yinto yokuba abantu abaninzi bafunda iBhayibhile yaye bayekile ukutshaya. Kwakhona baye batshata ngokusemthethweni.

[Umfanekiso okwiphepha 24]

UMelesio nomfazi wakhe, iintombi zakhe ezine nomkhwekazi wakhe

[Imifanekiso ekwiphepha 25]

Isifundo seBhayibhile nentlanganiso yamaKristu eLos Arenales

[Inkcazelo Ngomfanekiso okwiphepha 25]

Servicio Postal Mexicano, Correos de Mexico