Isahluko 22

Ukuba Phakathi Kweemvelaphi Ezahlukahlukeneyo—Ndimele Ndithini?

Ngaba utata okanye umama wakho usuka kwelinye ilizwe?

□ Ewe □ Hayi

Ngaba ulwimi okanye indlela ezenziwa ngayo izinto esikolweni yahlukile kweyakowenu?

□ Ewe □ Hayi

 “Ekhaya singamaTaliyane yaye kuyinto eqhelekileyo ukubonisa indlela ovakalelwa ngayo. Kodwa ngoku sihlala eBritani. Abantu balapha bazibambile yaye kuyo yonk’ into bachul’ ukunyathela. Andilungi ncam kuzo zombini ezi ndlela zokuphila—ndiya ndiyilibala indlela aphila ngayo amaTaliyane ngoxa kunzima ukufunda eyamaNgesi.”—UGiosuè, eNgilani.

“Esikolweni utitshala uye wathi mandimjonge emehlweni xa ndithetha naye. Kodwa xa ndijonga uTata ngolo hlobo uthi ndikrwada. Ndizibona ngathi ndiphakathi kweendlela ezimbini ezingafaniyo.”—UPatrick, ozalelwe eFransi nonabazali abasuka eAlgeria.

XA ABAZALI bakho befudukele kwelinye ilizwe bajamelana neengxaki ezinzima. Bazibona sele bephakathi kwabantu abathetha olunye ulwimi, abaphila nabanxiba ngendlela engafaniyo neyabo. Ngoku bahluke ngokupheleleyo kubantu belo lizwe. Ngenxa yoku, basenokungahlonitshwa baze babe zizisulu zokugculelwa.

Ngaba yakha yenzeka into enjalo kuwe? Nazi ezinye izinto oluye lwajamelana nazo olunye ulutsha olukwimeko efana neyakho. Faka olu phawu ✔ kwinto ekunzima ukujamelana nayo.

□ Ukwenziwa intlekisa. Ngoxa uNoor wayeselula, intsapho yakowabo yafuduka eJordan isiya eMntla Merika. Uthi: “Sasinxiba ngendlela eyahlukileyo, ngenxa yoko sasisiba yintlekisa. Phofu, sasingaziqondi izinto ezihlekisa abantu baseMerika.”

□ Ukudideka. Intwazana egama linguNadia ithi: “Ndizalelwe eJamani. Kodwa ngenxa yokuba abazali bam bengamaTaliyane, ndithetha isiJamani ngendlela engaqhelekanga, yaye abanye abantwana esikolweni bathi ‘ndisisidenge.’ Xa ndiseItali, ndithetha isiTaliyane njengabantu baseJamani. Ndiziva ndididekile. Naphi na apho ndiya khona ndingumntu wasemzini.”

□ Ukuphila ngeendlela ezingafaniyo ekhaya. UAna wayeneminyaka esibhozo ubudala xa intsapho yakowabo  yafudukela eNgilani. Uthi: “Ukutshintshela kubomi baseLondon kwaba lula kakhulu kum nomntakwethu. Kodwa kwakunzima kakhulu kubazali bethu ababengabemi besiqithi esincinane samaPhuthukezi iMadeira.”

UVoeun wayeneminyaka emithathu ubudala xa abazali bakhe bafudukela eOstreliya besuka eKhambodiya. Uthi: “Kusenzima nangoku kubazali bam ukuqhela indlela ekuphilwa ngayo eOstreliya. Xa ndithetha inyani, utata usuka abe ligqabi ngumsindo xa ndingasiqondi isimo sakhe sengqondo okanye indlela acinga ngayo.”

□ Ukungafani kolwimi oluthethwa ekhaya. UIan, wayeneminyaka esibhozo ubudala xa intsapho yakowabo yafudukela eNew York isuka e-Ecuador. Emva kweminyaka emithandathu belapho uthi: “Ngoku ndithetha isiNgesi ngaphezu kweSpanish. Ootitshala bathetha isiNgesi esikolweni, nabantwana endifunda nabo bathetha isiNgesi, mna nomntakwethu sithetha isiNgesi. Ndiya ndisilibala iSpanish kuba entloko kugcwele isiNgesi.”

ULee, owazalelwa eOstreliya ngabazali abayinzalelwane yaseKhambodiya, uthi: “Xa ndithetha nabazali bam ndifuna ukubacacisela indlela endivakalelwa ngayo ngezinto, ndiye ndifumanise ukuba andikwazi kakuhle ukuthetha ulwimi lwabo.”

UNoor, ocatshulwe ngaphambilana uthi: “Utata wayenyanzelisa ukuba sithethe ulwimi lwakhe ekhaya, kodwa sasingafuni ukuthetha isiArabhu. Sasicinga ukuba kunzima ukusifunda. Abahlobo bethu babethetha isiNgesi. Iinkqubo esasizibukela kumabonwakude zazisisiNgesi. Ngoku sasiza kusifundela ntoni isiArabhu?”

Yintoni Onokuyenza?

Njengokuba amagqabaza angasentla ebonisa, asinguwe wedwa ojamelene nezi ngxaki zinzima. Usenokuziphepha ngokukhetha  ukulibala ngemvelaphi yakho uze uzame ukuphila ngendlela ekuphilwa ngayo kwilizwe okulo. Kodwa oko kunokubacaphukisa abazali bakho kuze kukwenze ungonwabi. Kunoko, kutheni ungazami ukuhlangabezana nezo ngxaki uze uzame ukonwaba kuloo ndawo ukuyo? Khawuhlolisise la macebiso:

Indlela omele ukujonge ngayo ukugculelwa. Enoba ungenza ntoni na, akusoze uthandwe ngabo bonke abantu. Abantu abakuthandayo ukugculela abanye baya kusoloko besenjenjalo. (IMizekeliso 18:24) Ngoko mus’ ukuchitha ixesha uzama ukubalungisa. UKumkani uSolomon osisilumko wathi: “Abo bagculela abanye abathandi ukulungiswa.” (IMizekeliso 15:12, ngokweContemporary English Version) Amazwi abonisa umkhethe abhenca ukungabi nalwazi kwalowo uwathethayo kungekhona izinto ekuthiwa ziintsilelo zalowo ugculelwayo.

Indlela yokuhlangabezana nokudideka. Yinto eqhelekileyo ukufuna ukuphila neqela elithile, njengentsapho. Kodwa yimpazamo ukucinga ukuba ukubaluleka kwakho kuxhomekeke kwindlela ophila ngayo okanye kwimvelaphi yentsapho yakowenu. Ezo zinto zinokukwenza ubaluleke ebantwini, kungekhona kuThixo. Umpostile uPetros wathi: “UThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” (IZenzo 10:34, 35) Ukuba wenza konke okusemandleni ukukholisa uYehova uThixo, uya kuba yinxalenye yentsapho yakhe. (Isaya 43:10; Marko 10:29, 30) Ngoko eyona nto ibalulekileyo kukuba yinxalenye yentsapho kaThixo kunendlela ophila ngayo okanye imvelaphi yakowenu.

 Indlela yokuvala umsantsa ekhaya. Phantse kuzo zonke iintsapho, abazali nabantwana baneembono ezingafaniyo. Kweyakho imeko loo mahluko usenokuba mkhulu—abazali bakho bafuna ubambelele kwindlela ekuphilwa ngayo kwilizwe enisuka kulo ngoxa wena ufuna ukuphila ngendlela yasekuhlaleni. Sekunjalo, ukuba ufuna izinto zikuhambele kakuhle ebomini, umele ‘ubeke uyihlo nonyoko.’—Efese 6:2, 3.

Kunokuba ungafuni ukuphila ngendlela yabazali bakho kuba ungayithandi, zama ukuqonda isizathu sokuba bona bayithande. (IMizekeliso 2:10, 11) Zibuze le mibuzo: ‘Ngaba le ndlela bafuna ndiphile ngayo iyangqubana nemigaqo yeBhayibhile? Ukuba ayingqubani, yintoni ngokwenene endingayithandiyo ngayo? Ndingabachazela njani ngentlonelo abazali bam ngendlela endivakalelwa ngayo?’ (IZenzo 5:29) Kakade ke, uya kubabeka ngokulula abazali bakho—ukwazi indlela abacinga ngayo nokuchaza indlela ovakalelwa ngayo—ukuba ulazi kakuhle ulwimi lwabo.

Indlela onokuwoyisa ngayo umqobo wolwimi ekhaya. Ezinye iintsapho ziye zafumanisa ukuba xa zinyanzelisa ukuba kuthethwe ulwimi lomthonyama kuphela ekhaya, abantwana baya kuzazi kakuhle zombini iilwimi. Kutheni ungakhe ukuzame kowenu oko? Usenokude ucele nabazali bakho bakufundise indlela yokulubhala olo lwimi. UStelios, okhulele eJamani kodwa ulwimi lwakowabo olusisiGrike, uthi: “Abazali bam babedla ngokuxubusha itekisi yokusuku kunye nam. Babedla ngokufunda ngokuvakalayo ndize ke mna ndibhale phantsi. Ngoku ndiyakwazi ukufunda nokubhala isiGrike nesiJamani.”

Kambe ke, yiyiphi enye into onokuyizuza ngokwenza oku? UGiosuè okhankanywe ngaphambilana uthi: “Ndiye ndafunda  ulwimi lwabazali bam kuba ndifuna sazane kakuhle size sikwazi ukuncokola ngezinto zokomoya. Ukufunda ulwimi lwabo kuye kwandinceda ndayiqonda indlela abavakalelwa ngayo ngezinto, baza nabo bandiqonda.”

Ukumanyana, Kungekhona Umsantsa

Ngaba imvelaphi yakowenu uyijonga njengomsantsa okwahlula kwabanye okanye njengento enimanyanisayo? AmaKristu amaninzi aselula anesinye isizathu sokuvala umsantsa ophakathi kweendlela zokuphila. Afuna ukuxelela abanye abantu basemzini ngeendaba ezilungileyo zoBukumkani bukaThixo. (Mateyu 24:14; 28:19, 20) USalomão owafudukela eLondon xa wayeneminyaka emihlanu ubudala uthi: “Ukucacisa iZibhalo ngeelwimi ezimbini, kuyinto engenakuchazwa  ngamazwi! Ndiphantse ndalibala ulwimi lwasekhaya, kodwa ngoku ndikwibandla lesiPhuthukezi kwaye ndithetha isiPhuthukezi nesiNgesi ngokutyibilikayo.”

UNoor okhankanywe ngaphambili wabona ukuba kufuneka abantu abaza kushumayela kwintsimi yesiArabhu. Le ntwazana ithi: “Ngoku ndifunda olu lwimi yaye ndiqale apho bendiyeke khona. Isimo sengqondo sam sitshintshile. Ngoku ndifuna ukulungiswa xa ndenze impazamo kolu lwimi. Ndifuna ukulufunda.”

Ngokuqinisekileyo, ukuba uthetha iilwimi ezimbini okanye ngaphezulu kwaye uqhelene nezo lwimi, unokuzuza lukhulu. Ukwazi iindlela ezimbini zokuphila kunokukhulisa amandla akho okuqonda indlela abantu abavakalelwa ngayo uze ukwazi ukuphendula imibuzo ngoThixo. (IMizekeliso 15:23) UPreeti, owazalelwa eNgilani ngabazali baseIndiya, uthi: “Ngenxa yokuba ndisazi iindlela ezimbini zokuphila, kulula ukushumayela entsimini. Ndibazi kakuhle abantu—izinto abazikholelwayo nesimo sabo sengqondo.”

Ngaba nawe iimeko zakho uzijonga njengento eluncedo kungekhona umqobo? Khumbula ukuba uYehova uyakuthanda ingakhathaliseki indawo ovela kuyo. Njengolutsha olukhankanywe apha, ngaba nawe unokusebenzisa ulwazi namava onawo ukuze uncede abantu abanemvelaphi efana neyakho bafunde ngoYehova, uThixo ongenakhethe nonothando? Ukwenza oku kuya kukubangela wonwabe kakhulu!—IZenzo 20:35.

IZIBHALO EZIBALASELISA

“UThixo akakhethi buso.”—IZenzo 10:34.

ICEBISO

Ukuba oontanga bakho bahlekisa ngemvelaphi yakho, musa ukukhathazeka kodwa hleka nabo. Xa usenjenjalo, baya kuphelelwa ngamandla okuhlekisa ngawe.

NGABA UBUSAZI . . . ?

Ukwazi iilwimi ezimbini, kunokukuvulela amathuba amaninzi okufumana umsebenzi.

OKO NDICEBA UKUKWENZA!

Ukuze ndilwazi kakuhle ulwimi lwabazali bam, ndiza ․․․․․

Oku ndifuna ukukubuza abazali bam ngalo mba ․․․․․

UCINGA NTONI?

● Ukwazi ngemvelaphi yabazali bakho kunokukunceda njani ukuze ubazi ngakumbi ubuntu bakho?

● Ziziphi iingenelo onazo xa uzithelekisa nabanye abantwana abangakhulelanga phakathi kweemvelaphi ezahlukahlukeneyo?

[Amagama acatshulweyo akwiphepha 160]

“Kuyandivuyisa ukunceda abanye. Ndiyakwazi ukucacisa iBhayibhile kubantu abathetha isiRashiya, isiFrentshi nolwimi lwaseMoldova.”—UOleg

[Umfanekiso okwiphepha 161]

Usenokukhetha ukujonga imvelaphi yakho njengento ekumanyanisa nabanye abantu