VEKI nganye, inkoliso yamabandla amaNgqina kaYehova ilungiselela ukuba kubekho intetho yesidlangalala esekelwe kumbandela weZibhalo. Ukuba ungumdala okanye usisicaka solungiselelo, ngaba bukho ubungqina bokuba usisithethi esiphumelelayo sasesidlangalaleni, ungumfundisi? Ukuba kunjalo, usenokwabelwa ukuba unikele intetho yesidlangalala. ISikolo Sobulungiseleli Sobuthixo siye sanceda amawaka abazalwana ukuba alifanelekele eli lungelo lenkonzo. Ufanele uqale phi ke xa wabelwe ukuba unikele intetho yesidlangalala?

Ngaphambi kokuba wenze naluphi na uphando, funda ulwandlalo uze ucamngce ngalo de uyifumane eyona ngcamango luyidluliselayo. Wubethelele engqondweni umxholo waloo ntetho. Yintoni kanye kanye le umele uyifundise abaphulaphuli bakho? Luyintoni usukelo lwakho?

Qhelana nemixholwana eyintloko. Zihlahlele ezi ngongoma ziziintloko. Zidibana njani nomxholo? Phantsi kwengongoma eyintloko nganye, kukho iingongoma ezingaphantsi ezidwelisiweyo. Inkcaza exhasa ezi ngongoma zingaphantsi idweliswe ngaphantsi kwazo. Qwalasela indlela icandelo ngalinye lentetho elinxibelelana ngayo nelingaphambi kwalo, likhokelele kwelilandelayo, lize lincede ekuphumezeni injongo yaloo ntetho. Wakuba uwuqondile umxholo, injongo yaloo ntetho nendlela iingongoma eziziintloko eziyiphumeza ngayo loo njongo, hay’ ke ukulungele ukuqalisa ukuphuhlisa loo mbandela.

Ekuqaleni usenokufumanisa kuluncedo ukugqala intetho yakho njengeentetho ezine okanye ezintlanu ezimfutshane, nganye inengongoma eyintloko. Lungiselela ibe nye ngexesha.

Ulwandlalo olunikiweyo lusisixhobo sokulungiselela. Alungomanqaku okuba unikele intetho ngawo. Lufana namathambo. Ngokungathi kunjalo, kufuneka wena ulufakele inyama, ulwenze lube nentliziyo, kwaye luphile.

UYesu Kristu nabafundi basekela imfundiso yabo kwiZibhalo. (Luka 4:16-21; 24:27; IZe. 17:2, 3) Nawe unokwenza okufanayo. IZibhalo zifanele zibe sisiseko sentetho yakho. Kunokuba ucacise yaye uchaze indlela asebenza ngayo amazwi akulwandlalo olunikiweyo, qonda indlela loo mazwi axhaswa ngayo ziZibhalo, uze ufundise ngokusuka kwiZibhalo.

 Njengoko ulungiselela intetho, hlola indinyana nganye eboniswe kulwandlalo. Phawula umongo. Ezinye izicatshulwa zinokukunika ingcombolo eluncedo. Akuyomfuneko ukuba uzifunde okanye ugqabaze ngazo zonke xa unikela intetho. Khetha ezo zifanela abaphulaphuli bakho. Ukuba unikela ingqalelo kwizibhalo ezicatshulwe kulwandlalo olushicilelweyo, mhlawumbi akuyi kuba yimfuneko ukuba usebenzise iZibhalo ezongezelelekileyo.

Ukuphumelela kwentetho yakho akuxhomekekanga kwinani lezibhalo ozisebenzisayo, kodwa kuxhomekeke kubuchule bokufundisa. Xa utshayelela izibhalo, bonisa isizathu sokuba uzisebenzise. Ziphe ithuba lokuchaza indlela ezisebenza ngayo. Emva kokuba ufunde isibhalo, yigcine uyivulile iBhayibhile njengoko uxubusha loo ndinyana. Nabaphulaphuli bakho baya kwenjenjalo. Unokuwuvuselela njani umdla wabaphulaphuli bakho uze ubancede bangenelwe ngokuzele ngakumbi kwiLizwi likaThixo? (Neh. 8:8, 12) Unokukwenza oko ngokucacisa, ngomzekeliso nangokubonisa indlela osebenza ngayo loo mbandela.

Ukucacisa. Xa ulungiselela ukucacisa isicatshulwa esithile esiyintloko, zibuze: ‘Sithetha ukuthini? Kutheni ndisisebenzisa entethweni yam? Yintoni abasenokuzibuza yona abaphulaphuli ngale ndinyana?’ Kusenokufuneka uphicothe umongo, ingcombolo, imeko, amandla aloo mazwi, nenjongo yombhali ophefumlelweyo. Oku kufuna ukuba ubani enze uphando. Uya kufumana intabalala yenkcazelo ebalulekileyo kwiimpapasho ezilungiselelwe “likhoboka elithembekileyo neliyingqondi.” (Mat. 24:45-47) Musa ukuzama ukucacisa yonke into ephathelele loo ndinyana, kodwa cacisa isizathu sokuba ucele abafundi ukuba bayifunde esinxibelelene nombandela oxutyushwayo.

Umzekeliso. Injongo yomzekeliso kukwenza abaphulaphuli bakho baqonde nangakumbi okanye kukubanceda bakhumbule ingongoma okanye umgaqo oye wawuxubusha. Imizekeliso iyabanceda abantu bakuqonde oko ubaxelele kona kwaye ibenza bakunxibelelanise noko sele bekwazi. Yiloo nto kanye eyenziwa nguYesu xa wayesenza iNtshumayelo yakhe yaseNtabeni ethandwayo. “Iintaka zezulu,” “iinyibiba zasendle,” ‘isango elimxinwa,’ ‘indlela emxinwa,’ ‘indlu eyakhiwe phezu kolwalwa,’ namanye amabinzana afana nalawo enza imfundiso yakhe yabetheleleka, yacaca yaza ayalibaleka.—Mat., isahlu. 5–7.

Indlela Umbandela Onokusetyenziswa Ngayo. Ukuchaza nokucacisa isibhalo kuya kudlulisela ulwazi, kodwa ukulusebenzisa olo lwazi kuko okubangela iziphumo. Yinyaniso kona ukuba, kuyimbopheleleko yabaphulaphuli bakho ukukwenza oko kuqulethwe sisigidimi seBhayibhile, kodwa ke unako ukubanceda baqonde oko bafanele bakwenze. Wakuba  uqinisekile ukuba abaphulaphuli bakho bayayiqonda indinyana exutyushwayo kwaye bayayibona indlela engena ngayo kwingongoma ekuthethwa ngayo, ziphe ixesha lokubabonisa impembelelo enayo kwinkolelo nakwihambo. Balaselisa iingenelo zokulahla iingcamango eziphosakeleyo okanye ihambo engahambisaniyo nenyaniso exutyushwayo.

Njengoko ucinga ngendlela yokusebenzisa izibhalo, khumbula ukuba abaphulaphuli bakho baneemvelaphi ezahlukeneyo kwaye bajamelana neemeko ezingafaniyo. Kusenokuba kukho abantu abanomdla, ulutsha, abakhulileyo, nabo bathwaxwa ziingxaki zobuqu ezahlukeneyo. Yenze isebenziseke yaye ibe yeyokwenene intetho yakho. Kuphephe ukunikela isiluleko esivakala ngathi ucinga ngabantu abathile.

Ezinye izigqibo eziphathelele intetho yakho sele uzenzelwe. Iingongoma eziziintloko zibekwe zacaca, kwaye nexesha omele ulichithe kumxholwana ngamnye oyintloko liboniswe kakuhle. Ezinye izigqibo umele uzenzele ngokwakho. Usenokukhetha ukuchitha ixesha elingakumbi kwiingongoma ezingaphantsi uze uchithe elincinane kwezinye. Ungacingi ukuba uza kuzigubungela zonke iingongoma ezingaphantsi ngendlela efanayo. Loo nto isenokukubangela ukuba uwuleqe umbandela wakho baze abaphulaphuli bakho basale ngasemva. Unokuyazi njani ingongoma omele uyixubushe ngokuzeleyo nengongoma onokuyikhankanya nje okanye uyithethe udlula? Zibuze: ‘Ziziphi iingongoma eziya kundinceda ndidlulisele eyona ngcamango iyintloko yale ntetho? Ziziphi ezona zinokuba yingenelo kubaphulaphuli bam? Ngaba ukungasikhankanyi isibhalo esithile esibonisiweyo kunye nengongoma enxibelelene naso kuya kubenza buthathaka ubungqina endibunikelayo?’

Kuphephe ngalo lonke ixesha ukuthetha into ongaqinisekanga ngayo okanye ukuveza ingcamango yakho. KwanoNyana kaThixo, uYesu Kristu, wakuphepha ukuthetha ‘ngokuphuma kuye.’ (Yoh. 14:10) Yiqonde into yokuba isizathu sokuba abantu beze kwiintlanganiso zamaNgqina kaYehova kukuva iingxubusho zeBhayibhile. Ukuba abantu bakugqala njengeciko lokuthetha, kusenokwenzeka ukuba kungenxa yokuba ukwenza umkhwa wakho ukungatsaleli ingqalelo kwisiqu sakho, kodwa ukuyitsalela kwiLizwi likaThixo. Ngenxa yaloo nto, iintetho zakho ziyaxatyiswa.—Fil. 1:10, 11.

Wakuba ujike ulwandlalo nje oluqhelekileyo lwaba neengcaciso ezongezelelekileyo zeZibhalo, ngoku kufuneka ulungiselele indlela yokunikela intetho yakho. Kuyingenelo ukukwenza oku ngelizwi elivakalayo. Into ebalulekileyo kukuba uqiniseke ukuba zonke iingongoma zakho zibethelelekile  engqondweni. Umele ukwazi ukuthetha ngengqiniseko, uwenze uphile umbandela wakho, yaye uyidlulisele ngehlombe inyaniso. Ngaphambi kokuba uyinikele intetho yakho, zibuze: ‘Yintoni endinethemba lokuyiphumeza? Ngaba iingongoma eziziintloko ziyavakala? Ngaba ngokwenene ndiye ndenza iZibhalo zaba sisiseko sentetho yam? Ngaba ingongoma nganye ikhokelela kwelandelayo? Ngaba le ntetho yakha uxabiso ngoYehova nangamalungiselelo akhe? Ngaba umqukumbelo unxibelelana ngokungqalileyo nomxholo, ubonisa abaphulaphuli oko bamele bakwenze, kwaye ubashukumisela ukuba bakwenze?’ Ukuba unokuphendula ngokuthi ewe kule mibuzo, ukwimeko ‘yokulusebenzisa kakuhle ulwazi,’ ukuze kungenelwe ibandla yaye kudunyiswe uYehova!—IMize. 15:2.