XA UFUNDA iphephandaba, ubukele i-TV okanye umamele irediyo, uva izinto ezininzi ngolwaphulo-mthetho, iimfazwe nobugrogrisi. Mhlawumbi nawe unezakho iingxaki njengokugula okanye ukuswelekelwa ngumntu omthandayo.

Khawuzibuze:

• Ngaba nguThixo ofuna kwenzeke ezi zinto kum nakwintsapho yam?

• Yintoni enokundinceda ndimelane neengxaki zam?

• Luya kuze lube khona lona uxolo?

IBhayibhile iyayiphendula le mibuzo.

• Abantu abazukwaluphala, abazukuva zintlungu ibe abazukufa.​—ISityhilelo 21:4.

• “Umntu oqhwalelayo uza kutsiba.”​—Isaya 35:6.

• “Aza kuvulwa amehlo abantu abangaboniyo.”​—Isaya 35:5.

•  Abantu abaswelekileyo baza kuvuswa.​—Yohane 5:28, 29.

• Ukugula kuza kuphela.​—Isaya 33:24.

• Wonke umntu uza kuba nokutya.​—INdumiso 72:16.

Kusenokuba lula ukuthi izinto ekuthethwe ngazo ekuqaleni kule ncwadi asoze zenzeke. Kodwa uThixo uthembisa ukuba sele eza kuzenza ibe iBhayibhile iyasichazela ukuba uza kuzenza njani.

IBhayibhile ayisichazeli nje izinto eziza kwenzeka kwixesha elizayo. Isichazela nezinto ezisinceda sonwabe ngoku. Khawucinge ngezinto ezikwenza ungonwabi. Isenokuba ziingxaki zemali, ezentsapho, ukugula okanye ukuswelekelwa. IBhayibhile ingakunceda umelane nezi ngxaki ize ikuphendulele nale mibuzo:

• Kutheni kusenzeka izinto ezibuhlungu?

• Sinokumelana njani neengxaki zethu?

• Yintoni enokwenza intsapho yakho yonwabe?

• Xa umntu eswelekile kwenzeka ntoni kuye?

• Ngaba abantu abaswelekileyo bangaze baphinde baphile?

• Sinokuqiniseka njani ukuba uThixo uza kuzenza zonke izinto asithembise zona?

 Ukufunda kwakho le ncwadi kubonisa ukuba uyafuna ukuyazi into efundiswa yiBhayibhile, ibe iza kukunceda. Iziqendu zayo zinemibuzo eza kukunceda uyazi bhetele iBhayibhile. Abantu abaninzi bayakuthanda ukufunda iBhayibhile namaNgqina KaYehova, siyathemba nawe uza kukuthanda. Kwanga uThixo angakusikelela njengoko ufunda izinto ezifundiswa yiBhayibhile.