UThixo ufuna ukuba ube ngumhlobo wakhe. Ngaba wakha wayicinga into yokuba unako ukuba ngumhlobo woyena Mntu mkhulu kwindalo iphela? UAbraham owayephila kudala, wayebizwa ngokuba ngumhlobo kaThixo. (Yakobi 2:23) Nabanye ekuthethwa ngabo eBhayibhileni banandipha ubuhlobo noThixo yaye basikelelwa ngeyona ndlela. Namhlanje, abantu abaphuma kuzo zonk’ iinxalenye zomhlaba baye baba ngabahlobo bakaThixo. Nawe unako ukuba ngumhlobo kaThixo.

Ukuba ngumhlobo kaThixo kulunge ngaphezu kokuba ngumhlobo wakhe nawuphi na umntu. UThixo akaze abadanise abahlobo bakhe abanyanisekileyo. (INdumiso 18:25) Ukuba ngumhlobo kaThixo kulunge ngaphezu kokuba nobutyebi. Xa umntu osisityebi esifa, imali yakhe iya kwabanye. Noko ke, abo banandipha ubuhlobo noThixo banobutyebi ekungekho bani unokubohlutha.​—Mateyu 6:19.

Abanye abantu basenokuzama ukukuyekisa ukufunda ngoThixo. Kwanabanye kubahlobo nakwintsapho yakho banokwenjenjalo. (Mateyu 10:36, 37) Ukuba abanye bahlekisa ngawe okanye bakutyityimbisela umnwe, zibuze, ‘Ngubani endifuna ukumkholisa—ngabantu okanye nguThixo?’ Cinga ngoku: Ukuba ubani ebesithi yeka ukutya, ngaba ubuya kumthobela? Kakade ubungayi kukwenza oko! Kufuneka utye ukuze uphile. Kodwa uThixo unokukwenza uphile ngonaphakade! Ngoko ke ungaze uvumele nabani na ukuba akuyekise ukufunda ngendlela onokuba ngumhlobo kaThixo ngayo.​—Yohane 17:3.