Ekuhambeni kwexesha xa amaSirayeli ayesentlango, uKora, uDatan, noAbhiram kunye nabanye abayi-250 bajikela uMoses. Bathi kuye: ‘Sidikiwe yile nto yenu! Kutheni le nto kufuneka sikhokelwe nguwe aze uAron abe ngumbingeleli omkhulu? UYehova akaxhasi wena noAron kuphela, kodwa unathi sonke.’ Zange ayithande loo nto uYehova kuba yayikukudelela!

UMoses wathi kuKora nababekunye naye: ‘Yizani ententeni engcwele ngomso niphethe izitya zomlilo ezinesiqhumiso. UYehova uza kusibonisa oyena amkhethileyo.’

Kusuku olulandelayo, uKora namadoda ayi-250 baya ententeni engcwele ukuze badibane noMoses. Batshisa isiqhumiso ngokungathi bangababingeleli. UYehova wathi kuMoses nakuAron: ‘Zahluleni kuKora nabantu bakhe.’

UKora waya kuMoses ententeni engcwele, kodwa yena uDatan, uAbhiram kunye neentsapho zabo abazange bavume ukuya. UYehova waxelela amaSirayeli ukuba aphume kwiintente zikaKora, uDatan noAbhiram. Aphuma  ngokukhawuleza amaSirayeli. UDatan, uAbhiram neentsapho zabo bema ngaphandle. Ngephanyazo umhlaba wavuleka waza wabaginya! Ententeni engcwele kwehla umlilo waza watshisa uKora namadoda akhe ayi-250.

UYehova wathi kuMoses: ‘Thatha intonga kwinkokeli yesizwe ngasinye uze uyibhale igama layo. Kodwa kwintonga yesizwe sakwaLevi, bhala igama lika-Aron. Zifake ententeni engcwele, ibe intonga yalowo ndimkhethileyo iza kukhula iintyatyambo.’

Ngosuku olulandelayo, uMoses wakhupha zonke iintonga waza wazibonisa iinkokeli. Eka-Aron yayikhula iintyatyambo, inazo neeamangile ezivuthiweyo. Ngale ndlela, uYehova wayebonisa ukuba ukhethe uAron abe ngumbingeleli omkhulu.